Bhavarth Dovortat Tankam Besanvam Mellʼlleant Tem Hanvem Polloilam

Hem aikon mhaka hansonk ailem. Karonn mhozo ixtt ek dhormik munis mhunn hanvem kednanch chintunk na. Hanvem vicharlem: “Tuka Bible-a vixim kitem khobor tori asa?” Hacho tannem mhaka rokddoch zobab diunk na. Punn uprant tachi avoi ek Jehovachi Sakxi, ani tiche koddlean to Bible-a vixim thoddeo vostu xiklolo mhunn tannem mhaka sanglem. Tednam hanvem taka mhaka hea vixim anikui sang mhunn sanglem.

Ami sumar ti akʼkhi rat tea vixim uloile. Tea vellar, Soitan hea sonvsaracho odhikari mhunn Bible-ant sanglam oxem mhojea ixttan mhaka sanglem. (Ju. 14:30) Tumkam ghoddie hem bhurgeponnar thaun khobor asa zait. Punn hanvem tor hem poilech pavtti aikolʼlem. Ani hanv ojap zalom. Karonn ek doiall ani niticho Dev sonvsar choloita mhunn hanvem aikolʼlem. Punn hea sonvsarant jem kitem ghoddtta tem polloun hem khorem mhunn disonaslem. Tea vellar, hanv fokot 26 vorsancho aslom tem khorem. Tori astana, mhaka niraxi kortat tosleo zaiteo vostu hanvem mhojea jivitant polloilʼleo.

Hanv lhan aslo tednam, mhozo bapui United States Air Force-ant pilot aslo. Tor lhanponnim thaun, military kednam-i bomb uddoun zhuz korunk xokta mhunn hanv zannam aslom. Uprant hanv California-nt, college-int xiktalom tednam Vietnam-ant zhuz zalem. Hanv vidʼdheartheam sangata morchant bhag ghetalo. Pulis dandde gheun amchea fattik lagtale dekhun ami dhanvon voitale, ani te amcher tear gas soddttale dekhun amkam pollounk ani svas gheunk kotthin zatalem. Sogleak goddbodd aslo ani lok sorkaracho virodh kortale. Rajki fuddareank jivexim martale, lok morcha kaddttale ani maramari kortale. Dor ekleache vichar veg-veglle asle ani sogleak guspagondoll zalʼlo.

1970-ant, hanv Alaska-chea utʼtorechea doria deger kam korunk laglom. Ani hanvem zaite poixe zoddle. Uprant hanv London gelom, ani thoim hanvem ek motorcycle vikti ghetli. Hanv khoim voitolom tem hanvem chintunk naslem, punn hanv dokxinne vatten bike choloit ravlom. Zaitea mhoineam uprant, hanv Afrika pavlom. Vatter mhaka oslo zaito lok mellʼllo, zankam khub tras asle ani mhojea bhaxen tankam pasun tanchea trasantlean suttka zai asli.

Hanvem jem kitem polloilʼlem ani aikolʼlem tea vorvim, ek noxtto hea sonvsaracher tabo choloita mhunn Bible-ant sanglolem tem sarkem oxem mhaka disonk laglem. Punn noxtto tabo choloita zalear, Dev kitem korta tem hanv zannam zaunk sodhtalom.

Thoddea mhoineamnim mhaka mhojea prosnacho zobab mellʼllo. Vell soron gelo toso hanv oslea zaitea lokank vollkhonk pavlom, jim soglea torechea poristhitimnim ekleach khorea Devak visvaxi aslim. Ani hanv tanchea sangata ek ghott ixttagot korunk pavlom.

UTʼTOR IRELAND—“BOMB ANI PISTOLACHEA GULLEANCHO DES”

Hanv porot London-ak ailom tednam, hanv mhojea ixttache mummy-k mellonk gelom. Ani tinnem mhaka ek Bible dilo. Uprant hanv Netherlands-ant, Amsterdam xarant gelom, ani thoim light-ichea khambea sokol ravon Bible vachtalom tednam eka Sakxean mhaka polloilo. Ani Bible-a vixim anik mahiti mellonk tannem mhaka modot keli. Magir hanv Ireland-ant, Dublin xarant gelom. Thoim hanvem Jehovachea Sakxeanchem xakha ofis polloilem. Ani hanvem vochon darar marlem. Thoim mhaka bhav Arthur Matthews mellʼllo. Taka khub zannvai ani onubhov aslo. Hanv Bible xikonk sodhta mhunn hanvem taka sanglem tednam, mhaka Bible xikounk to toiar zalo.

Hanv khub umedin Bible xikonk laglom. Ani Sakxeamnim chhaplolim pustokam ani masikam vachunk mhaka khub khuxalkai bhogtali. Toxench, hanvem Bible pasun vachlo. Oxem korun hanv khub khuxal zalom. Uprant, hanv sobhent gelom tednam, khub xiklole munis xemboramnim vorsam thaun sodhtale tea prosnanche zobab, lhan bhurgim pasun zannam aslim mhunn hanvem polloilem. Zoxem, ‘Vaitt kiteak ghoddtta? Dev konn? Munis mortoch tachem kitem zata?’ Hanv tea desant anik konnakuch vollkhonaslom. Mhojim soglim ixttam Jehovachim Sakxinch aslim ani tannim mhaka Jehovacho mog korunk ani tachi khuxi korunk modot keli.

1972-ant hanvem bautizm ghetlo. Eka vorsa uprant, hanvem pioneer seva suru keli, ani hanv Utʼtor Ireland-ant, Newry xarant aslole eke lhan sobhent vochonk laglom. Thoim dongrar aslolea eka ghorant hanv bhaddeak ravonk laglom. Thoim lagim ghoram naslim. Punn laginch eka xetant zaitim gorvam aslim, ani tanchea mukhar hanv mhojim bhaxonnam practice korunk laglom. Tim tonn khatalim toxim, mhojem dhean diun aikotalim oxem mhaka distalem. Hanvem khoim sudharnni korunk zai tem tim mhaka sangonk xokonaslim. Punn oxem kelolean, bhaxonn ditana lokank polloun ulounk mhaka modot zali. 1974-ant mhaka khas pioneer mhunn nemlo, ani bhav Nigel Pitt mhojea sangata seva korunk laglo. Ami dogui ekdom ghott ixtt zale.

Tea vellar Utʼtor Ireland-ant khub hinvsa zatali. Tea pasot, thodde lok hea desak “bomb ani pistolachea gulleancho des” mhunnttale. Lok rostear zhogoddtta tem pollovop, lokank faran martat tem pollovop ani gaddiemnim bomb ghalop, hem sodanchench zalʼlem. Hem soglem rajki ani dhormik karonnank lagon zatalem. Punn Jehovachim Sakxi rajkaronnant bhag ghenant, mhunn Protestant ani Catholic dhormachea lokank khobor asli. Tea pasot, amkam ukteponnim ani surokxit toren porgottnni korunk mellttali. Toxench, aiknnareank khoim ani kednam zhogddim zatolim tem khobor astali dekhun, amcho jiv dhokeant poddona zaunk tim amkam poilinch xittkaitalim.

Punn thodde pavtti, amkam bhirankull poristhitincho fuddo korcho poddlo. Zoxem ek dis, Denis Carrigan nanvacho ek pioneer bhav ani hanv, oslea eka vattarant porgottnni korunk gelʼle, zoim hache poilim ekuch pavtti ami porgottnni kelʼli, ani hanga ekui Sakxi naslo. Thoim eke bailen ami British soinik mhunn amcher arop ghatlo. Ami tea zagea voile lok uloitale tea toren uloinasle dekhun tika ghoddie oxem dislem astolem. Tea vellar, ami ekdom bhiele. Karonn eka soinika lagim bexttem uloilearuch, lok tuka jivexim marunk xoktale vo tuje dimer far marunk xoktale. Ami thoim bhair ekttech thonddaient bus-ik ravtale tednam te bailen amcher arop ghatlolo tea lhanxea hotel-a mukhar, ek gaddi ieun thambli ti ami polloili. Ti bail bhair aili ani amkam bottam dakhoun, gaddient aslolea dogam munxam sangata ulounk lagli. Uprant te munis gaddi gheun amche sorxim aile ani amkam bus-i vixim prosn vicharunk lagle. Bus ailea uprant, te driver-a lagim ulounk lagle. Te kitem uloitale tem ami noko asle. Tea vellar bus-int konnuch naslo. Tor, xara bhair vhoron amkam jivexim marunk te ievzonn kaddttat mhunn ami chintlem. Punn toxem kainch zaunk na. Bus-intlean denvtana hanvem driver-ak vicharlem: “Te munis tuka amche vixim vichartale?” Tannem mhunnttlem: “Tumi konn tem hanv zannam, ani hanvem tankam sanglem. Tor tumi bhienakat, tumi surokxit asat.”

1976-ant, Dublin-ant aslole eke district zomatint, hanv Pauline Lomax-ak mellʼllom.a Tem England-a thaun hea zomatik ailʼlem, ani tem ek khas pioneer aslem. Tem visvaxi, khalti ani mogall aslem. Tem ani tacho bhav, Ray Lomax, bhurgeponnar thaun sot zannam aslim. Tea zomatichea eka vorsa uprant, hanv ani Pauline kazar zalim, ani Utʼtor Ireland-achea Ballymena xarant, ami khas pioneer mhunn seva korit ravlim.

Thoddo temp porian, ami sorkittachem kam kelem. Ami Belfast, Londonderry, ani her bhirankull zageamnim seva keli. Ami oslea bhav-bhoinnank mellʼllim jim aplo dhorm soddun diunk toiar naslim, dusreancho bhed-bhav kortalim ani dves kortalim. Punn Jehovachi seva korunk lagon tannim heo sogleo vostu soddun dileo. Ani Jehovan tankam zaitim besanvam dilim ani tanchi rakhonn keli. Tancho bhavarth polloun amkam khub urba mellʼlli.

Hanv dha vorsam porian Ireland-ant ravlom. Uprant 1981-ant, 72-vea Gilead Korsak amkam apounnem mellʼllem. Tea korsa uprant, amkam Poschim Afrikechea, Sierra Leone desant seva korunk dhaddlim.

SIERRA LEONE—GORIB ASLEAR PASUN GHOTT BHAVARTH

Ami mixinori seva korpi 11 bhav-bhoinnam sangata eka ghorant ravtalim. Tim khub mogall aslim. Tea ghorant ek kujin, don bathroom, tin toilet, ek kopdde dhuvpachem ani ek kopdde sukhoupachem mexin, tosoch ek fon aslo. Thoim khoinchea-i vellar light voitali, ani oxem zaite pavtti zatalem. Tea ghorachea pakear khub undir asle, toxench basement-ant nag bhonvtale.

Hea ghorant ravop sompem naslem. Punn porgottnni kelolean amkam khub khuxalkai mellttali. Lok Bible-ak resped ditalo, ani amchem kan diun aikotalo. Zaitim zannam Bible xikonk laglim ani Sakxi zalim. Thoim ravpi lok mhaka “Mister Robert,” ani Pauline-ak “Missus Robert” mhunnttalim. Punn thoddea vella uprant, xakha ofisantlean mhaka ietalem tem kam vaddlem dekhun, hanv porgottnnent chodd vochonk pavonaslom. Hea pasot lok Pauline-ak “Missus Pauline,” ani mhaka “Mister Pauline” mhunnonk laglim. Pauline-ak hem khub avoddttalem!

Hanga ravpi zaitim bhav-bhoinnam gorib aslim. Punn Jehovan sodanch tanchea gorzanchi kallji ghetli. Ani thodde pavtti, tannem ojapache ritin oxem kelem. (Mt. 6:33) Ek bhoinnik ek pavtt oxench ghoddlem mhunn mhaka ugddas ieta. Tea bhoinni lagim, tika ani tichea bhurgeam pasot tea disak jevonn gheunk zai titlech poixe asle. Punn tinnem te poixe eka duent bhavak dile. Karonn tea bhavak malaria-chem vokhod gheunk poixe zai asle. Uprant tea disa, okosmat ek bail bhoinni lagim apli hairstyle korunk aili. Ani tea pasot tinnem bhoinnik poixe pasun dile. Tea bhoinni bhaxen, anikui zaitea bhav-bhoinnamnim, Jehovan ojapache ritin tanchi koxi kallji ghetli tem polloilem.

NIGERIA—EK NOVI SONSKRUTI

Ami nnov vorsam Sierra Leone-ant seva keli. Uprant, amkam Nigeria-ntlea Bethel-ant dhaddlim. Hem xakha ofis khub vhoddlem aslem. Hanv adim Sierra Leone-ant kortalom tench kam hanga korunk laglom. Punn Pauline-ak hem soglem novem aslem. Karonn adim, tem dor mhoineak porgottnnent 130 voram sartalem, ani vaddavoll kortat tosle Bible obheas ghetalem. Punn atam tem xinvpachem kam kortalem, ani dis-bhor pinzlole kopdde xinvtalem. Ho bodlav korunk taka sompem naslem. Punn bhav-bhoinnam tachea vavra pasot upkari asat mhunn taka kollon ailem. Ani Bethel-antlea her bhav-bhoinnank urba diunk tem apleachean zata tem soglem korunk laglem.

Nigeria-nt ravpi lokanchi sonskruti, amkam khub veglli ani novi asli. Ani tea vixim ami zaitem xikonk zai aslem. Ek pavtti, eke bhoinnik novich Bethel-ant ghetloli. Ani tichi vollokh korun gheunk, ek bhav tika mhojea ofisant gheun ailo. Hanv tika hat diunk gelom tednam, ti somtich mhojea paim-a poddli. Hanv samkoch thottaklom! Tea vellar mhojea monant rokddinch Itihas 10:25, 26 ani Prokasovnni 19:10, him versam ailim. Hanvem chintlem, ‘Toxem korinaka mhunn hanvem tika sangchem kai?’ Punn tika Bethel-ant ghetloli, ani Bible kitem xikoita tem ti zannam mhunn teach vellar mhaka ugddas ailo.

Uprant, tea bhoinni lagim hanv uloilo to sogloch vell mhaka kitem-xem dislem. Punn magir hanvem sodh kelo. Tednam, te bhoinnin jem kelʼlem toxem korop, tea desant azunui thoddea zageam voili ek rit asli mhunn mhaka kollʼllem. Dadle pasun dusreank paim-a poddttale. Tim hem dusreank bhokti diunk nhoi, punn resped diunk kortalim. Ani Bible-ant pasun oslim udharonnam asat. (1 Sam. 24:9) Tor hanvem mhojea nennarponnant, tea bhoinnik loz zata toxem kainch mhunnonk na mhunn mhaka borem dislem.

Ami Nigeria-ntlea zaitea bhav-bhoinnank mellʼllim, jim khub vorsam thaun visvaxiponnan Jehovachi seva kortalim. Ek udharonn mhunnttlear, bhav Isaiah Adagbona-chem.b To tornnatto aslo tednam sot xiklo. Punn uprant taka kodd zale. Tor koddkarank dovortat tea zagear taka dhaddlo. Thoim to ekloch Sakxi aslo. Dhumallo aslear pasun, tannem 30-am poros chodd koddkarank sot apnnaunk modot keli ani thoim ek sobha sthapon keli.

KENYA—BHAV-BHOINNAM MHOJEA SANGATA PASIENSAN VAGLIM

1996-ant, mhaka Kenya xakhent dhaddlo. Hanvem survatek sanglolea ghoddnne uprant, hanv hea desant poilech pavtti ailʼlom. Ami Bethel-ant ravtalim, ani hea zagear makodd ietale. Te choddxe pavtti bhoinnam lagim aslolim follam chorun vhortale. Ek dis, ek bhoinn aplea room-achem zonel bond korunk visorli. Ti porot aili tednam, makddanchi ek famil bore moujen tichea room-ant aslolem jevonn khatat tem tinnem polloilem. Tinnem bhieun bob marli ani ti room-antlean bhair dhanvon geli. Tichi bob aikon makddamnim pasun killonch marli ani zonelantlean bhair uddki marli.

Pauline ani hanv Swahili bhas uloupi sobhek vochonk laglim. Thoddea vella uprant, mhaka Sobhechi Book Study gheunk nemlo (atam taka Sobhecho Bible Obheas mhunnttat). Punn mhaka hi bhas bore bhaxen ulounk ienasli. Tea pasot, hanv adim fuddench toiari kortalo. Oxem kelolean, hanv prosn tori vachunk xoktalo. Punn bhav-bhoinnanche zobab, pustokar asa tache poros matxe pasun veglle asle zalear, mhaka kainch somzonaslem. Mhaka mhojich loz bhogtali. Ani mhaka bhav-bhoinnanche churchure distale. Punn tannim khaltikaien hi manddavoll manun ghetli ani pasiensan mhaka tenko dilo, tem mhojea kallzak laglem.

UNITED STATES—GIRESTKAIECHER NHOI PUNN JEHOVACHER GHOTT BHAVARTH

Ami Kenya-nt thoddech mhoine ravlim. 1997-ant, amkam New York-achea Brooklyn Bethel-ant apoilim. Lok khub girest asle, oslea eka desant ami ravtalim. Ani girestkaiek lagon pasun oddchonneo ieunk xoktat. (Mho. 30:8, 9) Punn hea desantlea bhav-bhoinnancho bhavarth khub ghott aslo. Tim tancho vell ani tanche lagim asloleo vostu, anik girest zaunk lagon nhoi, punn Jehovache sevent uzar kortalim.

Itlim-i vorsam porian, bhav-bhoinnamnim veg-veglle poristhitint Jehovacher aplo bhavarth koso ghott dovorlo tem hanvem polloilem. Zoxem Ireland-ant, bhav-bhoinnank hinvsa ani zhogddim-zhuzancho fuddo korcho poddlo. Afrikent, bhav-bhoinnam gorib aslim, ani thodde pavtti konnuch Sakxi nant toslea vattaramnim ravtalim. United States-ant, bhav-bhoinnam khub girest aslim. Punn hea soglea poristhitimnim, tannim Jehovacher bhavarth dovrop kednanch bond korunk na. Tor soglea poristhitimnim visvaxiponnan apli seva kortat ani aplo mog kortat, toslea lokank Jehova voir thaun polloita tednam, to kitlo khuxal zata astolo nhoi!

Vorsam kitlea begin soron gelim. “Vinnpiache suta-gaddie poros mhoje dis vegim dhanvle.” (Job 7:6) Atam ami New York-achea Warwick-ant aslolea mukhel ofisant seva kortat. Aiz pasun eka-mekacho mog kortat toslea lokam sangata seva korunk ami khub khuxal zatat. Apleak visvaxi ravtolea sogleank beginuch besanvam diuncho asa tea amchea Raza Jezu Kristak tenko diunk, amchean zata tem soglem korunk amkam khub khuxalkai ani dhadosponn bhogta.—Mt. 25:34.