Eka-mekak Lagim Sorop Amkam Borem!

1-2. Jehovak kitem chodd mhotvachem asa, ani ami kitem kelʼlem taka zai?

AMI dusream sangata koxim vagtat tem Jehovak khub mhotvachem zaun asa. Ami amcho mog kortat toso amchea xezareancho mog korunk zai mhunn Jezun amkam xikoilem. (Mt. 22:37-39) Tor jim konn Jehovachi seva korinant tankam pasun ami doia dakhounk zai. Ami oxem kortat tednam ami Jehovachi dekh ghetat, zo “borea toxench vaitt munxancher aplo suria ude-so korta. Toxench nitivont ani onitivont munxancher paus dhaddtta.”—Mt. 5:45.

² Jehova soglea munxancho mog korta, punn jim tachi adnea pallttat tancho to chodd mog korta. (Ju. 14:21) Ami tachi dekh ghetloli taka zai dekhun ami amchea bhav-bhoinnancho “kallzant thaun mog” kelʼlo ani tankam “aplemponn” dakhoilʼlem Jehovak zai. (1 Ped. 4:8; Rom. 12:10) Ani ho mog ami amchea familik vo ek lagxilʼlea ixttak dakhoitat toslo mog zaun asa.

3. Ami moga vixim kitem ugddas dovrunk zai?

³ Mog amchea garden-ant aslolea eka lhan zhadda sarko asa zo vaddounk amkam khub vavr korunk poddtta. Hea vixim apostl Paulun Kristanvank sanglem: “Bhavam bhaxen eka-mekacho mog korit ravat.” (Heb. 13:1) Tor ami eka-mekacho mog korit ravlolim Jehovak zai. Ami eka-mekak kiteak anik lagim soronk zai ani ami koxem tem korit ravonk zata tem ami hea lekhant polloitolim.

AMI EKA-MEKAK KITEAK ANIK LAGIM SORONK ZAI?

4. Stotr 133:1-a pormonnem, bhav-bhoinnam valorachim asat mhunn sodanch ugddas dovrunk ami kitem korunk zata? (Chitram pasun polloiat.)

⁴ Stotr 133:1 vachat. Jehovacho mog kortat tanchim ixttam asop khub “borem” ani “sobit!” Stotrkarachim him utram khorim asat mhunn ami pasun mantat. Punn zoso ek munis tachea sodanchea vatter aslolea eka vhoddlea zhaddachi sobitkai pollounk chukonk xokta tea bhaxen, ami pasun bhav-bhoinnam sangata aslolo amcho ekvott kitlo sobit tem pollounk chukonk xoktat. Karonn ami tankam sumanak ghoddie zaite pavtti mellttat. Tor tim valorachim asat mhunn sodanch ugddas dovrunk ami kitem korunk zata? Dor ek bhav ani bhoinn sobhe pasot ani amchea pasot kitlim moladik asat tem chintunk ami vell kaddunk zai. Oxem kelear tanchea pasot amcho mog vaddttolo.

5. Amchea modem aslolo mog polloun dusreancher koslo probhav poddonk xokta?

⁵ Amchea modem aslolo mog polloun, poilech pavtti mittingek hajir zatat tancher khub boro probhav poddtta. Karonn ho mog pollounuch tankam sot mellʼllem mhunn khatri zaunk xokta. Jezun mhunnttlolem: “Tumkam eka-mekacho mog asa zalear hea vorvim tumi mhoje xis mhunn sogleank kollon ietolem.” (Ju. 13:35) Ani osloch mog Chaithra-n onnbhovlo. Tem university-nt xiktalem ani Jehovachea Sakxeam sangata tannem Bible obheas suru kelo. Taka pradexik odhivexonachem amontronn mellʼllem ani poilea disak hajir zalea uprant tannem aplea Bible xikoupeak oxem sanglem: “Mhaka mhojea avoi-bapain kednanch veng marunk na, punn tumchea odhivexonant ekach disak mhaka 52 zannamnim veng marli. Tanchea vorvim Jehovan mhaka mog dakhoilo oxem mhaka bhoglem. Ani mhaka pasun hea familicho bhag zaunk zai.” Chaithra sotant vaddavoll korit ravlem ani 2024-ant tannem bautizm ghetlo. Khorench, amchim borim kamam ani amchea modem aslolo mog polloun poilech pavtti mittingek hajir zatat tankam pasun Jehovachim sevokam zaunk urba melltta.—Mt. 5:16.

6. Bhav-bhoinnank anik lagim sorlolean amchi rakhonn koxi zaunk xokta?

⁶ Eka-mekak anik lagim sorlolean amchi rakhonn pasun zaunk xokta. Apostl Paulun bhav-bhoinnank oxem sanglolem: “Eka-mekak urba di-it ravat. Tumchea modlim konnuch, patkachea fosoupachea xoktek lagon nibor kallzachim zaina zaunk oxem korat.” (Heb. 3:13) Thodde pavtti niraxiponnak lagon Jehovak manvota tem korit ravonk amkam kotthin zait. Ani hem polloun ek bhav vo bhoinn amkam modot korunk xokta. Hea toren amkam modot korunk Jehova bhav-bhoinnank uzar korta tednam amkanch boreak poddtta.—St. 73:2, 17, 23.

7. Mog ani ekvott koso zuddlolo asa? (Koloskarank 3:13, 14)

⁷ Ami eka-mekak mog dakhounk khub vavr kortat. Hea pasot amkam zaitim besanvam mellttat. (1 Ju. 4:11) Udharonnak, mogak lagon ‘ami eka-mekak soxit ravtat,’ jea vorvim amchea modem ekvott samballunk amkam modot zata. (Koloskarank 3:13, 14 vachat; Ef. 4:2-6) Tea pasot ami mittingek mellon ietat tednam amchea modem khub mog ani khori khuxalkai asta, ji amkam anik khoinch pollounk mellona.

EKA-MEKAK MAN DIAT

8. Bhav-bhoinnam sangata ekvott samballunk Jehova amkam koso modot korta?

⁸ Ami opurnn asonui sonvsarbhor amchea bhav-bhoinnam modem ekvott asa, hem ek vizmit zaun asa. Karonn Jehovak lagonuch hem soglem zaunk pavta. (1 Kor. 12:25) Bible sangta ki ‘Devanuch amkam eka-mekacho mog korunk xikoileant.’ (1 Tes. 4:9) Hacho orth, ami eka-mekak anik lagim soronk kitem korunk zai tem Jehova aplea Utra vorvim amkam spoxttponnim sangta. Ani ami tachi xikounn dhean diun apnnaitat tednam ami ‘Jehova koddlean xiktat.’ (Heb. 4:12; Jak. 1:25) Ani oxem korunk Jehovachim Sakxi khub vavr kortat.

9. Dusreank man diunchea vixim Romkarank 12:9-13-ntlean ami kitem xiktat?

⁹ Eka-mekak anik lagim soronk amkam Devachem Utor koxem modot korta? Hea vixim Romkarank 12:9-13-nt apostl Paulun kitem mhunnttlem tacher ami dhean diunk zata. (Vachat.) Hanga tannem “tumi poilim fuddem soron dusreank man diat” mhunn sanglem. Hacho orth, ami dusreank bhogsun, tancho poramos korun ani udar kallzachim zaun tankam “aplemponn” dakhounk fuddem soronk zai. (Ef. 4:32) Dusrim amchea lagim ietolim mhunn ravchea bodlek ami “poilim fuddem soron” tankam man diunk zai. Ani heach pasot Jezun oxem mhunnttlem: “Gheunchea poros diunk chodd khuxalkai melltta.”—D.I. 20:35.

10. ‘Dusreank man diunk’ ami koso vavr korunk zata? (Chitr pasun polloiat.)

¹⁰ Ami poilim fuddem soron eka-mekak man diunk zai oxem sanglea uprant Paulun rokddench oxem mhunnttlem: “Vavr korat, allxi zainakat.” Vavr korpi munis taka koslem-i kam melltta tednam tem rokddench korta. Ani Mhonnʼnneo 3:27, 28-ant pasun amkam oxich urba dilea. Thoim sanglam: “Tuje lagim ghoddta zalear, upkar korunk zai taka to korinastana ravum naka.” Tor konnakui modotichi goroz asa mhunn ami polloitat tednam taka modot korunk ami fattim-fuddem zaunchimnant vo uprant pollounchem oxem ami chintchimnant vo anik konnankui taka modot korum di mhunn ami ravchimnant. Punn ami rokddinch fuddem soron taka modot kortolim.—1 Ju. 3:17, 18.

11. Dusreank man diunk anik ek vatt khoinchi?

¹¹ Dusreank man diunk anik ek vatt mhunnttlear, tim amkam dukhoitat tednam ami tankam rokddinch bhogsunk zai. Efezkarank 4:26 sangta: “Suria buddo poriant tumi rag dhorun ravchem nhoi.” Kiteak? Vers 27 sangta ki rag dhorun ravlear ami ‘Soitanak sondhi ditolim.’ Jehova aplea Utra vorvim amkam porot-porot eka-mekak bhogsunk sangta. Ani Koloskarank 3:13-nt ‘eka-mekak kallzant thaun bhogxit ravonk’ to amkam urba dita. Tor dusreank ami kallzant thaun bhogxitat tednam, ami tankam anikui lagim sortat. Ani oxem korun ami ‘povitr xokte udexim ekvottan bandun dovorta ti xanti samballun dovrunk’ pavtat. (Ef. 4:3) Tor ami eka-meka bhogxitat tednam amchea modem aslolo ekvott ani xanti ami samballunk pavtat mhunn spoxttponnim kollon ieta.

12. Dusreank bhogsunk Jehova amkam koso modot korta?

¹² Punn amkam dukhoileant tankam bhogsunk amkam ek-ek pavtt kotthin zait. Torui Jehovachea povitr xoktechea adaran ami eka-mekak bhogsunk pavtolim. “Eka-mekak . . . aplemponn dakhoiat” ani “vavr korat” hem sanglea uprant, Bible amkam “povitr xoktechea urben bhorat” mhunn sangta. ‘Povitr xoktechea urben bhorlolo’ ek munis sarkem tem korunk fuddem sorta. (Rom. 12:11) Tor hi xokti amkam dusreank aplemponn dakhounk ani kallzantlean bhogsunk modot korta. Tea pasot ami Jehova lagim amkam modot kor mhunn magot ravonk zai.—Luk. 11:13.

“TUMCHEA MODEM FUTT ASCHI NHOI”

13. Amchea modem futt kiteak poddonk xokta?

¹³ Sobhent “sogle toreche,” mhunnche veg-vegllea sonskrutaientle lok asat. (1 Tim. 2:3, 4) Hea pasot nhespa-dispa vixim, bholaike vixim vo monoronjona vixim zonn eklo apleak bore distat tosle nirnnoi gheit. Ami chotrai dovornant zalear, hea karonnank lagon amchea modem futt poddonk xokta. (Rom. 14:4; 1 Kor. 1:10) Punn ‘Devan amkam eka-mekacho mog korunk xikoileant’ dekhun, amkam borem dista tench dusreamnim korunk zai mhunn ami tancher dobhav ghalcho nhoi.—Filp. 2:3.

14. Futt poddona zaunk ami anik kitem korunk zai, ani kiteak?

¹⁴ Toxench, amchea modem futt poddona zaunk ami soglea vellar dusreank urba ani ghottai di-it ravonk zai. (1 Tes. 5:11) Halinchea kallar, seva bond kelolim porgottnnaram vo sobhentlean bhair kaddlolim zaitim zannam porot aileant. Ani ami tankam khuxalkaien ieukar ditat! (2 Kor. 2:8) Dha vorsam porian seva bond kelʼle eke bhoinnin porot Raj-ghorant ailea uprant oxem mhunnttlem: “Mhaka sogleamnim smile diun hat dilo.” (D.I. 3:19) Tea doiall korneam vorvim bhoinnicher kitem probhav poddlo? Ti sangta, “Jehovan mhaka porot khuxal zaunk modot keli oxem mhaka dislem. Tor ami sogleank urba ditat tednam, ‘koxtt kortoleank ani ojeachea bhara khala aslolea lokank’ ghottai diunk Jezu Krist amkam uzar korunk xokta.—Mt. 11:28, 29.

15. Amchea modem aslolo ekvott samballunk anik ek vatt khoinchi? (Chitr pasun polloiat.)

¹⁵ Amcho ekvott samballunk anik ek vatt mhunnttlear, ami kitem uloitat tacher dhean diunk zai. Job 12:11 sangta: “Je bhaxen tuje jibek suvadik jevnnachi ruch kolltta, tech bhaxen tujea kanak borim utram aikonk khoxi bhogta.” Zoso ek boro randpi dusreank jevonn vaddchea poilim, tem ruchik asa kai mhunn chakun polloita, tech bhaxen ulounchea poilim ami kitem uloitolim tea vixim ami bariksannen chintunk zai. (St. 141:3) Tor amchim utram sodanch dusreank ghottai ditat, urba haddttat ani “aiknnareak faido zatolo” toslim asat kai mhunn ami khatri korunk zai.—Ef. 4:29.

16. Konnanchim utram khas korun urba ditat toslim asonk zai?

¹⁶ Khas korun, ghovanchim ani avoi-bapainchim utram urba ditat toslim asat mhunn tannim khatri korun gheunk zai. (Kol. 3:19, 21; Tit. 2:4) Vhoddil Jehovachea menddranche gonvlli zalʼlean tannim pasun bhav-bhoinnank ghottai ani urba diunk zai. (Iz. 32:1, 2; Gal. 6:1) Bible-antli ek mhunnʼnni amkam oxem ugddasak haddtta: “Favo ti zap asop kitlem dhadosponnachem!”—Mho. 15:23.

“KAMAMNIM ANI KALLZANTLEAN” EKA-MEKACHO MOG KORAT

17. Ami khorea kallzan bhav-bhoinnancho mog kortat mhunn koxem dakhounk zata?

¹⁷ Apostl Juanvan amkam “utramnim ani tonddan nhoi, punn amchea kamamnim ani kallzantlean mog” korunk urba dili. (1 Ju. 3:18) Tor ami khorea kallzan amchea bhav-bhoinnank mog dakhounk sodhtat. Hem ami koxem korunk zata? Ami eka-meka sangata jitlo chodd vell sartolim, titlinch ami eka-mekak lagim soronk pavtolim ani amchea modem aslolo mog anikui vaddttolo. Tor bhav-bhoinnam sangata vell sarunk ami sondhi sodhum-ia, zoxem mittingek ani porgottnnek. Toxench, tankam bhett korunk ami vell kaddum-ia. Oxem kelear, ami ‘Deva koddlean eka-mekacho mog korunk xiktat’ mhunn dakhoitolim. (1 Tes. 4:9) Ani “bhavbhoinn koxim zor ekcharan jietat sogllim, kitlem borem, kitlem sobit!” him utram khorim asat mhunn ami onnbhovunk pavtolim.—St. 133:1.