Ami Visvaxi Devdutanchi Dekh Koxi Gheunk Zata?

1-2. (a) Amchea ani devdutam modem koslo ontor asa? (b) Amchea ani devdutam modem kitem ek-sarkem asa?

AMI Jehovachim sevokam zalim tednam thaun, tacho mog kortolea eka vhoddlea familichim ami bhag zalim. Hea familint prithumer aslolim amchim lakʼkhamnim bhav-bhoinnam, toxench sorgar aslole koroddamnim devdut mellon asat. (Dan. 7:9, 10) Ami devdutam vixim chintʼtat tednam sogleam-von poilim, tanchea ani amchea modem kitem ontor asa tem amchea monant ieta. Zoxem, Jehovan munxank rochʼchea zaitea vorsam poilim devdutank rochlole. (Job 38:4, 7) Toxench, te amchea poros khub bollixtt asat. Tea bhair, ami opurnn asat dekhun ami tanchea itlim povitr ani nitivont nant.—Luk. 9:26.

² Punn ho ontor aslear pasun, ami zaitea vattamnim ek-sarkim asat. Zoxem devdutam bhaxen, ami Jehovachea sobit gunnanchi dekh gheunk zata. Toxench tanchea bhaxen, amkam-i borem ani vaitt vinchun kaddchi svotontrtai Jehovan dilea. Tea bhair, tankam dor ekleak veg-vegllem nanv, sobhav ani zobabdareo asat toxeo amkam-i asat. Titlench nhoi, amkam pasun tanchea sarki amchea Rochnnarachi bhokti korchi bhuk asa.—1 Ped. 1:12.

3. Visvaxi devdutam koddlean ami kitem xikonk zata?

³ Amchea ani devdutam modem zaitem ek-sarkem asa dekhun, tanchea udharonnantlean amkam urba mellonk xokta ani tanchea thaun ami zaitim mhotvachim lisanvam xikonk xoktat. Tor hea lekhant, khoinchea char vattamnim ami devdutanchi dekh gheunk zata tem ami polloitolim. Tem mhunnttlear te khalti asat, te lokancho khub mog kortat, sosnikai dakhoitat ani sobha nitoll dovrunk khub vavr kortat.

DEVDUT KHALTI ASAT

4. (a) Devdut khalti asat mhunn koxem kolltta? (b) Te khalti kiteak asat? (Stotr 89:7)

⁴ Devdutank khub onnbhov asa. Te khub bollixtt asat ani tankam zannvai asa. Torui, te khaltikaien Jehovachi dor ek adnea pallttat. (St. 103:20) Jehova tankam kitem-i korunk sangta tednam tea vixim te kednanch boddai marinant vo tankam asloli xokti uzar korun dusreanchem dhean apnnacher voddun haddinant. Toxench, lokank tanchem nanv khobor na zalear pasun te khuxalkaien Jehovachi khuxi korit ravtat.a (Ut. 32:24, 29; 2 Raz. 19:35) Tea bhair, Jehovak favo ti mhoima apleak mellchi mhunn te kednanch axenant. Tor devdut itle khalti kiteak asat? Karonn te Jehovacho mog kortat ani taka khub resped ditat.—Stotr 89:7 vachat.

5. Juanvak solʼlo ditana eka devdutan khaltikai koxi dakhoili? (Chitr pasun polloiat.)

⁵ Atam ami Bible-antle eke ghoddnnecher dhean dium-ia, jea vorvim devdut khorench khalti asat mhunn kolltta. Sumar 96 K.X.-ant, eka devdutan, zachem amkam nanv khobor na, tannem apostl Juanvak ek dorxon dakhoilem. (Prok. 1:1) Tem polloun Juanvan kitem kelem? Tea devdutachi bhokti korunk to tachea paim-a poddlo. Punn tea devdutan taka rokddoch addaun oxem mhunnttlem: “Na, na, oxem korinaka! Hanv tujea sarkoch ani . . . tujea bhavam sarkoch ek sevok zaun asa. Devachi bhokti kor!” (Prok. 19:10) Khorench, ho devdut khub khalti aslo dekhun apleak mhoima melloun gheunk tannem proitn korunk na. Tannem rokddench Juanvachem dhean Jehovacher haddlem. Toxench, apunn Juanva poros vorto oxem-i tannem chintunk na. Tannem zaitea vorsam thaun Jehovachi seva kelʼli ani to Juanva poros bollixtt aslo. Torui, tannem khaltikaien apunn pasun tacheach sarko Devacho sevok mhunn sanglem. Toxench Juanvak solʼlo ditana, tannem taka tapounk na vo tachea sangata krur toren vagonk na, punn doiall ritin uloilo. Juanv heo sogleo vostu polloun thottaklo zait ani dekhun to hea toren vaglo mhunn tea devdutan somzon ghetlem astolem.

6. Devdutam bhaxen ami khaltikai koxi dakhounk zata?

⁶ Devdutam bhaxen ami khaltikai koxi dakhounk zata? Devdutam bhaxen amkam pasun Jehovache sevent khub vavr korunk zai. Punn tea vixim amkam boddai marunk naka vo amkam khas kola asa mhunn ami dusreank dakhounk sodhinant. (1 Kor. 4:7) Tea bhair, ami dusream poros chodd vorsam Jehovachi seva kelea vo amkam khas zobabdareo mellʼlleat dekhun, ami dusream poros vortim asat oxem ami kednanch dakhounk sodhinant. Khorem mhunnttlear, amkam jitleo chodd zobabdareo asat, titlim ami anikui khaltim asonk zai. (Luk. 9:48) Tor devdutam bhaxen ami dusreanchi seva korunk sodhtat, ani dusream poros mhotvachim asat oxem ami kednanch dakhounk sodhinant.

7. Dusreank solʼlo ditana ami khaltim asat mhunn koxem dakhounk zata?

⁷ Bhav-bhoinnank vo amchea bhurgeank solʼlo diunk poddtta tednam pasun, ami khaltim asat mhunn dakhounk zata. Solʼlo ditana ami to spoxtt toren diunk zai. Punn oxem kortana, Juanvak solʼlo dilo tea devduta bhaxen, ami tankam dukhoinastana doiall toren solʼlo diunk zai. Ami amkam dusream poros vortim mhunn somzonant tednam, ami tankam respedan ani mogan Bible-antlean solʼlo diunk pavtolim.—Kol. 4:6.

DEVDUT LOKANCHO MOG KORTAT

8. (a) Devdut lokancho mog kortat mhunn Lukas 15:10-ntlean koxem kolltta? (b) Porgottnnechea kamant devdut amkam koxe modot kortat? (Chitr pasun polloiat.)

⁸ Devdutank munxanchi khub kallji asa. Karonn tankam munxancho mog asa. Gombhir patok kelʼlo ek munis poschatap korun porot Jehovachi seva korunk lagta tednam, vo konnui Jehova vixim xikon aplea jivitant bodlav korun tachi bhokti korunk suru korta tednam, devdut khub khuxal zatat. (Lukas 15:10 vachat.) Toxench te porgottnnechea kamak tenko ditat. (Prok. 14:6) Te svota zaun porgottnni korinant tem khorem, punn khaltea kallzache lok mellonk te amkam modot korunk xoktat. Punn eka umkeach munxak mellonk, devdutamninch amkam modot keli mhunn ami khatren sangonk xokonant. Karonn aplea lokank adar ani margdorxon diunk Jehova herui vatto, zoxi apli povitr xokti uzar korunk xokta. (D.I. 16:6, 7) Torui, porgottnnechea kamant devdutancho vhoddlo bhag asa. Tor te amkam tenko ditole mhunn ami khatri dovrunk zata.—“Tanchea Magnneancho Tankam Zobab Mellʼllo” hem boks polloiat.b

9. Devdutam bhaxen ami lokank mog koso dakhounk zata?

⁹ Devdutam bhaxen ami lokank mog koso dakhounk zata? Konnui porot Jehovacho Sakxi zala mhunn kollounni aikonk melltta tednam, devdutam bhaxen ami khuxal zaunk zata. Ami tacho khub mog kortat mhunn taka khatri diunk zata ani tachea pasot ami khuxal asat mhunn sangonk zata. (Luk. 15:4-7; 2 Kor. 2:6-8) Tea bhair, devdutam bhaxen ami pasun porgottnni korunk amchean zata tem soglem korunk zata. (Up. 11:6) Ani te amkam porgottnnent tenko ditat toxe, ami pasun bhav-bhoinnam sangata porgottunk veg-veglleo vatto sodhunk zatat. Zoxem, eka novea porgottnnara sangata porgottnni korunk ami manddavoll korunk zata kai? Porgottnni korunk, oskot vo zannttea bhav-bhoinnank ami modot korunk zata kai?

10. Bhoinn Sara-chea onnbhovantlean ami kitem xiktat?

¹⁰ Punn amche poristhitik lagon ami porgottnnechea kamant amkam zai titlem korunk xokonant zalear kitem? Oslea vellar, devdutam sangata porgottnnechea kamant bhag gheunk ami noveo vatto sodhunk zatat. Hea vixim Bharotant ravpi bhoinn Sara-choc onnbhov polloum-ia. Sumar 20 vorsam pioneer seva kelea uprant, ti khub duent zali ani hantrunnar poddli. Tor ti ekdom niraxi zali. Punn sobhentlea bhav-bhoinnamnim tika modot keli. Toxench ti sodanch Bible vachtali dekhun, ti apli khuxalkai porot melloun gheunk pavli. Punn tichi poristhiti bodolʼlolean, tika porgottnni korunk noveo vatto sodhunk poddleo. Chitti borounk ti bosonk pasun xokonasli dekhun, ti fokot fona udexim porgottnni korunk xoktali. Tor tika jeo porot bhetto asleo tankam tinnem fon kelo, ani tannim tika Bible xikonk umed aslolea anikui munxanche number dile. Hacho porinnam kitem zalo? Thoddeach mhoineam bhitor tika 70 Bible obheas mellʼlle. Punn he sogle ti ekttich gheunk xokonasli dekhun, tantuntle thodde tinnem sobhentlea bhav-bhoinnank gheunk sangle. Tantuntlim zaitim zannam mittingek ieunk laglim. Tor bhoinn Sara bhaxen porgottnnechea kamant apleachean zata tem soglem kortat tankam tenko diunk devdut kitle khuxal zatat nhoi!

DEVDUT SOSNIKAI DAKHOITAT

11. Sosnikai dakhounchea vixim visvaxi devdutamnim ekdom borem udharonn koxem dovorlam?

¹¹ Sosnikai dakhounchea vixim visvaxi devdutamnim amkam ekdom borem udharonn dovorlam. Hozaramnim vorsam thaun, onʼneai ani noxtteponn vaddot asa tem tannim polloilam. Toxench Soitan ani zaite devdut, je eka vellar tanchea sangata seva kortale, te Jehovachea add gele tem tannim polloilam. (Ut. 3:1; 6:1, 2; Jud. 6) Tea bhair eka visvaxi devdutak, eka noxttea duta thaun zaite dis poriant virodh soscho poddlo mhunn Bible-ant sanglam. (Dan. 10:13) Toxench munxakullachea survatek thaun, fokot thoddech lok khori bhokti kortat mhunn tannim polloilam. Punn hem soglem polloun pasun, he visvaxi devdut khuxalkaien ani urben Jehovachi seva korit asat. Karonn Jehova sarkea vellar neai kortolo mhunn te zannant.

12. Sosnikai dakhounk amkam koxi modot zaunk xokta?

¹² Devdutam bhaxen ami koxi sosnikai dakhounk zata? Devdutam bhaxen ami onʼneai polloila ani amkam virodhacho fuddo korunk poddla zait. Punn Dev sarkea vellar hem soglem vaittponn kaddttolo mhunn amkam-i khatri asa. Tor tanchi dekh gheun ami “borem kam korunk soddun diunchem nhoi.” (Gal. 6:9) Toxench, sosnikai dakhounk Jehova amkam modot kortolo mhunn tannem bhas dilea. (1 Kor. 10:13) Tor povitr xokti mellonk ami magnnem korunk zata, jea vorvim amkam bore gunn, zoxem pasiens ani khuxalkai vaddounk modot zatoli. (Gal. 5:22; Kol. 1:11) Punn tumkam virodh sosunk poddlo zalear kitem? Jehovacher purnn toren patieun ravat ani bhienakat. To sodanch tumkam modot kortolo ani ghottai ditolo.—Heb. 13:6.

DEVDUT KRISTI SOBHA NITOLL DOVRUNK MODOT KORTAT

13. Hea nimannea disamnim Jehovan devdutank kosli khas zobabdari dilea? (Matev 13:47-49)

¹³ Hea nimannea disamnim, Jehovan devdutank ek khas zobabdari dilea. (Matev 13:47-49 vachat.) Kosli? Aiz sonvsarbhor lakʼkhamnim lok bori khobor aikonk sodhtat. Hantuntlim thoddim zannam, Jehovachea dorjeam pormonnem aplea jivitant bodol kortat ani taka manvota tea toren tachi seva kortat. Punn dusrim oxem korinant. Tor ‘noxttea lokank nitivont lokam thaun kuxin kaddop’ devdutanchi zobabdari asa. Hacho orth, Kristi sobha nitoll dovorchi zobabdari Jehovan tankam dilea. Punn hacho orth oso nhoi ki Jehovak soddun geleant tim soglim kednanch porot ieunchim nant vo Kristi sobhent kednanch oddchonneo ieuncheo nant. Tori astana, Kristi sobha xudʼdh dovrunk devdut khub vavr kortat mhunn ami khatri dovrunk zata.

14-15. Devdutam bhaxen ami pasun sobha nitoll dovrunk sodhtat mhunn koxem dakhounk zata? (Chitram pasun polloiat.)

¹⁴ Devdutam bhaxen ami pasun sobha nitoll dovrunk sodhtat mhunn koxem dakhounk zata? Poilem mhunnttlear, ami Jehova sangata amchi ixttagot ghott korunk zai. Oxem korunk ami oslim ixttam vinchun kaddunk zai jim Jehovacho mog kortat. Ani ami oxem kainch korunk zaina zaka lagon tachea sangata amchi ixttagot piddʼddear zaunk xokta. (St. 101:3) Dusrem mhunnttlear, Jehovak visvaxi ravonk ami amchea bhav-bhoinnank modot korunk zai. Koxi? Chintat, eka bhavan vo bhoinnin ek gombhir patok kelam mhunn amkam kolltta. Oslea vellar tannim tem vhoddilank kollounchem mhunn ami tankam sangtat. Karonn amkam tancho mog asa. Punn tim toxem korinant zalear ami vochon vhoddilank tea vixim kolloitolim. Karonn zata titlea begin tea bhavachi vo bhoinnichi ixttagot Jehova sangata porot ghott zalʼli amkam zai!—Jak. 5:14, 15.

¹⁵ Punn dukhachem mhunnttlear, gombhir patok kortolea thoddeank sobhentlean bhair kaddunk poddttat. Oxem zata tednam, tancho ‘sangat dovrop ami bond kortat.’d (1 Kor. 5:9-13) Oxem kelʼlean sobha nitoll urta. Tea bhair, ami Jehovachi adnea pallun oslea munxam sangata vell sarop bond kortat tednam ami khorem mhunnttlear tankam doia dakhoitat. Karonn ami oxem kortat tednam, tannim porot Jehova lagim ieunk zai mhunn tankam kollon ieunk xokta. Ani tim porot Jehova lagim ietat zalear, Jehova ani devdutam borabor ami pasun khub khuxal zatat.—Luk. 15:7.

16. Tumi devdutanchea khoinchea gunnanchi dekh gheunk sodhtat?

¹⁶ Devdutam vixim xikonk ani tanchea sangata kam korunk Jehovan amkam ek vhoddlo sueog dila. Tor ami tanchea borea gunnanchi dekh gheum-ia. Tem mhunnttlear tanchi khaltikai, lokam pasot aslolo tancho mog, tanchi sosnikai ani sobha nitoll dovrunk te kortat to vavr. Ami tanchi dekh ghetli zalear, ami pasun sasnachea sasnak Jehovachea familicho bhag zaun uronk pavtolim.