OBHEASACHO LEKH 26
GIT 123 Devachea Manddavollik Khaltim Ravom-ia
Thoddeo Vostu Amkam Khobor Nant Mhunn Ami Khaltikaien Manun Gheunk Zai
“Devachea girestkaiechea, zannvaiechea ani gineanachea kholaiecho thav lavunk zaina! Tache nirnnoi amchean chintunk zainant toxe asat ani tacheo vatto amchean somzonk zainant toxeo asat!”—ROM. 11:33.
MUKHEL MUD’DO
Fuddarak kitem zatolem tem soglem amkam khobor na zalear pasun, ami kitem zannant tem chintlear ani Jehovacher visvas dovorlear, ami oddchonneancho bore toren fuddo korunk pavtolim.
1. Jehovan amkam koxe toren rochleant, ani kiteak?
JEHOVAN amkam ojapache ritin rochleant. Ami chintunk xoktat, noveo vostu xikonk xoktat, ani ami kitem zannant tem amchea jivitant koxem apnnaunchem tem ami somzonk xoktat. Tor Jehovan amkam hea toren kiteak rochleant? Karonn amkam ‘Devachi zannvai mellʼlloli’ ani ami somzochi tank uzar korun tachi seva kelʼli taka zai.—Mho. 2:1-5; Rom. 12:1.
2. (a) Ami amche vixim kitem ugddas dovrunk zai? (Romkarank 11:33, 34) (Chitr pasun polloiat.) (b) Amkam soglem khobor na mhunn ami manun ghetat tednam amkam koso faido zata?
2 Jehovan amkam xikonk tank dilea. Punn oxeo zaiteo vostu asat jeo amkam khobor nant. (Romkarank 11:33, 34 vachat.) Ami Joba vixim chintunk zata. Jehovan taka zaite prosn vicharle tednam, apleak zaitem kitem khobor na mhunn Jobak kollon ailem. Tor apnnem khalti zaunk zai ani aplem chintop bodlunk zai mhunn tannem vollkhon ghetlem. (Job 42:3-6) Heach bhaxen ami pasun amkam soglem khobor na mhunn manun ghetat tednam amkam faido zata. Tem mhunnttlear ami khaltim ravonk xiktat. Toxench, sarke nirnnoi gheunk ami khoreaninch jem zannam zaunchi goroz asa tem Jehova amkam kolloitolo mhunn ami tacher visvas dovrunk xiktat.—Mho. 2:6.
Joba bhaxen amkam jem khobor na tem ami manun ghetat tednam amkanch faido zata (Peregraf 2 polloiat)
3. Hea lekhant ami kitem xiktolim?
3 Tor hea lekhant thoddeo vostu jeo amkam khobor nant tea vixim ami xiktolim. Ani tea vixim amkam khobor na dekhun amkam kitem korunk kotthin zaunk xokta tem ami polloitolim. Toxench, tea vixim khobor naslolean amkam kiteak borem zaun asa tem-ui ami zannam zatolim. Oxem kelʼlean Jehovacher, zaka ‘sogleachi sopurnn zannvai asa’ tacher amcho visvas anikui vaddttolo. Toxench, amkam zannam zaunk kitem goroz asa tem to amkam kolloitolo mhunn tacher amchi khatri anikui vaddttoli.—Job 37:16.
XEVOTT KEDNAM IETOLO TEM AMKAM KHOBOR NA
4. Matev 24:36-a pormonnem, amkam kitem khobor na?
4 Matev 24:36 vachat. Hea sonvsaracho xevott kednam ietolo tem amkam khobor na. Jezu prithumer aslo tednam, “tea disa vixim ani tea vella vixim” taka pasun khobor nasli.a Uprant tannem aplea apostlank sanglem ki ‘to vell tharauncho odhikar Bapan aplea lagim dovorla’ mhunn. (D.I. 1:6, 7) Tor xevott kednam ietolo tem Jehovan tharailam. Punn amkam to vell khobor na.
5. Xevott kednam ietolo tem amkam khobor na dekhun kitem zaunk xokta?
5 Xevott ieunk kitlo vell ravonk poddttolem tem amkam khobor na. Haka lagon ami niraxi zait vo amkam pasiens dakhounk kotthin zait. Khas korun ami zaitea vorsam thaun Jehovachea disachi vatt polloitat zalear. Toxench, amchea familintlim vo her lok to dis azun ieunk na mhunn amchim fokannam kortat tednam, amkam tem sosunk kotthin zaunk xokta. (2 Ped. 3:3, 4) Oslea vellar, to dis kednam ietolo tem amkam khobor asli zalear pasiens dakhounk ani dusrim amchim fokannam kortat tednam tem sosunk amkam sompem zatolem aslem oxem ami chintit.
6. Xevott kednam ietolo tem amkam khobor na dekhun kiteak borem zaun asa?
6 Punn xevott kednam ietolo tem Jehovan amkam sangonk na dekhun amkam ek sondhi asa. Kosli? Ami tacho mog kortat ani amkam tacher visvas asa dekhun ami tachi seva kortat mhunn dakhounk. Ami sodankal Jehovachi seva korunk sodhtat; fokot xevott ieum poriant nhoi. Tor ‘Jehovacho dis’ kednam ietolo tacher chodduch dhean diunchea bodlek, to dis ailea uprant kitem borem zatolem tacher ami dhean diunk zai. Oxem kelʼlean, ami Jehovak anikui lagim sortolim, tacher amcho visvas anikui vaddttolo, ani taka manvota tem korunk amchean zata tem soglem ami kortolim.—2 Ped. 3:11, 12.
7. Amkam kitem khobor asa?
7 Ami kitem zannant tacher ami dhean dium-ia. Udharonnak, nimanne dis 1914-nt suru zale mhunn amkam khobor asa. Bible-achea bhasaunneam udexim Jehovan fokot tem voros khoinchem itlench nhoi punn tea uprant sonvsarachi poristhiti koxi astoli tem pasun amkam bariksannen dakhoun dilam. Tor hem zannam zalʼlean, “Jehovacho vhoddlo dis lagim asa” mhunn amkam khatri melltta. (Zef. 1:14) Toxench, Jehovan “Rajeachi bori khobor” zata titlea lokank porgott korchem amkam kam dilam mhunn ami zannant. (Mt. 24:14) Ho sondex aiz sumar 240 raxttramnim ani 1,000-am poros chodd bhasamnim porgott zata. Tor bori khobor urben porgott korunk ‘to dis ani to vell’ kednam ietolo tem ami zannam zaunchi goroz na.
JEHOVA AMKAM KOXE TOREN MODOT KORIT TEM AMKAM KHOBOR NA
8. “Devacho vaur” mhunnttlear kitem? (Upodexok 11:5)
8 “Rochnnar Devacho vaur” amkam purnn toren somzona. (Upodexok 11:5 vachat.) “Devacho vaur” mhunnttlear, apli khuxi purnn korunk to jem kitem korta vo jem kitem zaunk dita tem zaun asa. Tor Jehova umkench kitem kiteak zaunk dita vo amkam modot korunk to kitem kortolo tem ami purnn toren nokllo. (St. 37:5) Zoxem vidneanikank pasun avoichea kusveant bhurgem koxem vaddtta tem azun poriant purnn toren somzona toxem, Jehova koso panvl ghetolo tem amkam pasun purnn toren somzona.
9. Jehova amkam koso modot kortolo tem amkam khobor asona tednam kitem zaunk xokta?
9 Jehova amkam umkech toren koso modot kortolo tem amkam khobor asona tednam, thodde nirnnoi gheunk ami fattim-fuddem zait. Udharonnak, porgottnnechea kama pasot teag korunk ami fattim sorot. Zoxem amchem jivit sadem dovrunk vo porgottnnaranchi chodd goroz asa thoim vochon seva korunk. Tea bhair, amkam oxem-i disonk xokta ki Jehovachea sevent ami jem kitem kortat tem polloun to khuxal zaina. Udharonnak, Jehovachea sevent ami dovorlolo umkoch dhei ami melloun gheunk pavonant. Vo porgottnnechea kamant ami zaito vavr korun pasun amkam ekui Bible obheas mellona zait. Vo songottnnechea eka khas project-acher ami khub vavr kortat punn amkam zaitea oddchonneancho fuddo korcho poddtta zait. Tor hea soglea karonnank lagon Jehova amkam modot korina oxem amkam disot.
10. Jehova koso modot kortolo tem khobor naslolean amkam kosle faide asat?
10 Jehova koso modot kortolo tem khobor naslolean amkam bore gunn vaddounk modot zata, zoxem khaltikai. Ani tea pasot Jehovacheo vatto ani chintnam amchea poros vortim asat mhunn amkam kolltta. (Iz. 55:8, 9) Toxench ami Jehovacher purnn toren visvas dovrunk xiktat. Amkam porgottnnechea kamant vo Jehovachea sevent bore porinnam mellttat tednam ami sogli vakhannʼnni Jehovak ditat. (St. 127:1; 1 Kor. 3:7) Ani amkam bore porinnam mellonant zalear pasun, Jehovak soglem khobor asa ani to soglem sarkem kortolo mhunn ami tacher purnn visvas dovortat. (Iz. 26:12) Tor ami amchem kam kortat ani Jehova aplem kam kortolo mhunn ami tacher visvas dovortat. Ani thodde pavtti vizmitam korun tannem aplea lokank margdorxon dilam toxem atam to dina zalear pasun, amkam goroz tem margdorxon Jehova ditoloch mhunn amkam tacher purnn khatri asa.—D.I. 16:6-10.
11. Amkam Jehova vixim kitem khobor asa?
11 Amkam Jehova vixim kitem khobor asa? To mogall, nitivont, ani zannvaien bhorlolo mhunn ami zannant. Toxench, tachea pasot ani bhav-bhoinnam pasot ami jem kitem kortat tacho to valor korta mhunn amkam khobor asa. Ani taka visvaxi ravtat tankam to inam ditach hem pasun ami zannant.—Heb. 11:6.
FALEAM KITEM ZATOLEM TEM AMKAM KHOBOR NA
12. Jakob 4:13, 14 pormonnem amkam kitem khobor na?
12 Jakob 4:13, 14 vachat. Amchem jivit faleam koxem astolem tem amkam khobor na. Hea sonvsarant, ‘vell ani sondhi sogleank asa vo chintunk nant tosleo ghoddnneo konnakui ghoddonk xoktat.’ (Up. 9:11) Tea pasot, ami korunk sodhtat tem zatolench mhunn ami khatren sangonk zaina vo tem purnn zalem zalear tem pollounk ami jivont astolim vo na tem-ui amchean sangonk zaina.
13. Fuddarak kitem zatolem tea vixim amkam khobor naslolean kitem zaunk xokta?
13 Fuddarak kitem zatolem tea vixim amkam khobor naslolean sosnikai dakhounk amkam kotthin zaunk xokta. Ami itlim uskean buddonk xoktat ki ami amchi khuxalkai hogddaunk xoktat. Toxench, okosmat ami chintunk nasloleo ghoddnneo ghoddttat tednam, ami khub dukhi vo bejar zaunk xoktat. Ani ami chintlolem tem zaina tednam ami niraxi zaunk xoktat.—Mho. 13:12, NW.
14. Amchi khuxalkai kiteacher tharloli asa? (Chitram pasun polloiat.)
14 Kotthin poristhitimnim pasun ami Jehovachi seva kortat tednam ami tachea mogak lagon toxem kortat mhunn dakhoitat. Amcher ietat teo sogleo oddchonneo Jehova kaddttoloch mhunn ami opekxa korunk zaina. Ani amchea jivitant kitem ghoddttolem tem Jehovan poilinch tharaunk na mhunn Bible-antlean kollon ieta. Tor amchi khuxalkai, fuddarak kitem zatolem tem khobor asop hacher nhoi, punn Jehovachem margdorxon ghevop ani tacheo adnea pallop hacher tharlolem asa mhunn Jehova zannam. (Jer. 10:23) Tor ami Jehovachea margdorxona pormonnem nirnnoi ghetat tednam, ami eka orthan oxem mhunnttat: “Jehovachi khuxi asa zalear, ami faleancho dis polloitolim ani hem kam kortolim vo tem kam kortolim.”—Jak. 4:15.
Jehovachem margdorxon ghetlear ani tacheo adnea pallʼllear amchi rakhonn zata (Peregraf 14-15 polloiat)b
15. Fuddara vixim amkam kitem khobor asa?
15 Dor disa kitem zatolem tea vixim amkam khobor na tem khorem. Punn Jehovan kitem bhasailam tem amkam khobor asa. Tem mhunnttlear, to amkam sasnachem jivit ditolo; zaum tem sorgar vo hea prithumer. Toxench, Jehova kednanch fott ulounk xokona ani tannem jem bhasailam tem purnn korunk taka konnuch addaunk xokona mhunn pasun ami zannant. (Tit. 1:2) Fokot Jehova ‘fuddarak kitem ghoddttolem ani jem azun ghoddonk na tem sangonk xokta.’ Bible kallar tannem jeo bhasaunneo kelʼleo teo sogleo purnn zaleo. Ani fuddarak tannem jem bhasailam tem pasun purnn zatolem. (Iz. 46:10) Itlench nhoi, amcho mog korunk Jehovak kitench addaunk xokona mhunn amkam khatri asa. (Rom. 8:35-39) Amkam koslea-i oddchonneancho fuddo korunk poddom, Jehova amkam goroz ti zannvai, bhuzvonn, ani xokti ditolo, toxench to amkam modot kortolo ani besanv ditolo mhunn amkam khatri asa.—Jer. 17:7, 8.
JEHOVA AMKAM KITLE BORE TOREN ZANNAM TEM AMI PURNN TOREN SOMZONK XOKONANT
16. Jehova amchea vixim kitem zannam, ani hem zannam zalʼlean tumkam koxem bhogta? (Stotr 139:1-6)
16 Stotr 139:1-6 vachat. Amcho Rochnnar amchea vixim soglem zannam. Ami umkech toren kiteak chintʼtat ani amkam umkeach bhaxen kiteak bhogta tem Jehovak khobor asa. Ami kitem uloitat ani amchea kallzant kitem asa tem-ui to zannam. Toxench, ami kitem kortat ani kiteak kortat tem pasun taka khobor asa. Raza Davidan sanglem ki, Jehova amkam modot korunk xokta ani oxem korunk to sodanch toiar asa. Tor Sorvxoktivont Jehova zo sogleam-von vorto asa ani zannem sogleo vostu rochleat, to tuji itli kallji gheta hem zannam zalʼlean tuka koxem bhogta? Hea vixim Davidan mhunnttlem: “Osle zannvaiek mhojem ginean pavona; ti itli unch, mhojean ti attapunk zaina!”—St. 139:6.
17. Jehova amkam ekdom bore toren vollkhota mhunn manun gheunk amkam kiteak kotthin zait?
17 Punn ghoddie amkam jea toren vaddoileant, amchi sonskruti, vo sotant ieunchea poilim amchea patiennek lagon, Jehova amchi porva korta toslo ek mogall Bap mhunn manunk amkam kotthin zait. Vo ami poilim kelʼlea vaitt kamank lagon Jehova amchea thaun khub pois asa ani to kednanch amchea lagim ieunk sodhcho na oxem amkam disot. Davidak thodde pavtti oxench dislem. (St. 38:18, 21) Vo ami amchem jivit bodlun Jehovak manvota tea toren jieunk khub vavr kortat astolim. Tor ami oxem chintit: ‘Jehova mhaka itle bore toren somzota zalear, mhaka jem soddunk itlem kotthin zata tem hanvem kiteak soddun dilolem taka zai?’
18. Amchea poros Jehova amkam bore bhaxen vollkhota hem manun ghevop kiteak borem? (Chitram pasun polloiat.)
18 Amchea poros Jehova amkam bore bhaxen vollkhota, ani ami amche vixim jem borem pollounk xokonant tem pasun to pollounk xokta hem ami manun gheunk zai. Toxench amkam koslim unnemponnam asat ani tim kiteak asat tem pasun to zannam. (Rom. 7:15) Taka hem-ui khobor asa ki ami bodlonk xoktat ani toxem korunk to amkam mogan modot korta. Fuddarak ami koslim munxam zaunk xoktat tacher Jehova dhean dita hem zannam zalʼlean visvaxiponnan ani khuxalkaien tachi seva korunk amkam ghottai melltta.
Fuddarak amkam borem jivit ditolo mhunn Jehovan ji bhas dilea tacher amcho bhavarth ghott korunk to amkam modot korta. Hea vorvim aiz amcher okosmat oddchonneo ietat tednam tancho fuddo korunk amkam modot zata (Peregraf 18-19 polloiat)c
19. Jehova vixim amkam kitem khobor asa?
19 Jehova mog zaun asa mhunn amkam kosloch dubhav na. (1 Ju. 4:8) Tachea noitik dorjeam vorvim tacho mog dison ieta ani amchem sodanch borem zalʼlem taka zai mhunn amkam khobor asa. Toxench ami sasnak jielʼlim taka zai mhunn ami zannant. Hea pasot tannem soddvonnechi manddavoll keli. Ami patki asonui Jehovachi khuxi korunk xoktat mhunn soddvonne udexim amkam khatri melltta. (Rom. 7:24, 25) Tea bhair, “Dev amchea kallzam poros vhodd ani soglem zannam” hem-ui amkam khobor asa. (1 Ju. 3:19, 20) Tor Jehova amkam bore toren vollkhota ani ami tachi khuxi korunk pavtolim mhunn taka khatri asa.
20. Kitem ugddas dovorlolean amkam jem khobor na tea vixim ami chodduch usko korchimnant?
20 Ami khoreaninch jem zannam zaunchi goroz asa tem Jehova amchea thaun lipoun dovorna. Hem ami ugddas dovortat tednam, amkam jem khobor na tea vixim ami chodduch usko korinant, ani jem mhotvachem asa tacher dhean dovortat. Oxem kelʼlean, ami khaltim asat ani Jehova zo ‘zannvik vo zannvaien bhorlolo asa’ tacher amkam purnn visvas asa mhunn ami dakhoun ditat. (Job 36:4) Hem khorem ki atam amkam thoddeo vostu somzonant. Punn ami axeun tea vellachi vatt polloitat jednam ami amchea vortea Deva vixim ani tachea koddlean sasnak noveo vostu xikot ravtolim.—Up. 3:11.
GIT 104 Povitr Xokti—Devachem Ek Dennem
a Jezu Soitanachea noxttea sonvsaracho nas korunk fuddakar ghetolo mhunnttoch, Armageddonachem zhuz kednam zatolem ani to kednam ‘zoit melloun ghetolo’ tem taka atam khobor asa oxem ami mhunnonk zata.—Prok. 6:2, 19:11-16.
b CHITRACHI MAHITI: Akantachea vella pasot toiar asonk ek bapui ani put sangata mellon go-bag-ant gorjecheo vostu ghaltat.
c CHITRACHI MAHITI: Ek bhav zachea jivitant oddchonneo asat, to apunn novea sonvsarant kitlo khuxal astolo tea vixim chintʼta.