Jehovachim Sevokam Zaunk Ami Bible Vidʼdheartheank Koxi Modot Korunk Zata?

1-2. (a) Thoddim Bible vidʼdhearthi Jehovachi seva korcho nirnnoi gheunk kiteak fattim-fuddem zatat? (b) Hea lekhant ami kitem polloitolim?

TUMI sot xiktalim tednam Jehovachi seva korcho nirnnoi gheunk fattim-fuddem zalʼlim kai? Tumi Jehovachim Sakxi zalʼlim zalear, tumchea sangata kam kortat tim, tumchim ixttam vo ghorchim tumcher ragar zatolim mhunn tumi bhietalim zait. Vo tumi kednanch Jehovache dorje pallunk xokchimnant oxem tumkam distalem zait. Toxem zalear, aiz thoddea Bible vidʼdheartheank koxem bhogta ani Jehovachi seva korcho nirnnoi gheunk tankam kiteak kotthin zata tem tumi somzonk xoktat.

² Osle bhirantik lagon, ek munis Jehovachi seva korunk fattim soronk xokta mhunn Jezun pasun vollkhon ghetlem. (Mt. 13:20-22) Punn aplo pattlav korunk fattim-fuddem zatalim tankam tannem soddun diunk nant. Tannem tankam char vattamnim modot keli. Tem mhunnttlear, (1) tim kiteak lagon Jehovachi seva korunk fattim sortat, (2) tannim Jehova pasot aplo mog koso ghott korunk zata, (3) Jehovachi seva poilea zagear dovrunk tannim kitem korunk zai, ani (4) tannim virodhacho fuddo korunk koxi toiari korunk zata, tem tannem tankam xikoilem. Tor ami Sasnak Khuxalkaien Jieiat! pustok uzar korun, eka Bible vidʼdheartheak Jehovachi seva korcho nirnnoi gheunk modot kortat tednam, ami Jezuchi dekh koxi gheunk zata?

TIM KITEAK FATTIM SORTAT TEM ZANNAM ZAUNK MODOT KORUN

3. Nikodemus Jezucho xis zaunk kiteak fattim-fuddem zatalo zait?

³ Nikodemus Judevancho ek mukhel odhikari aslo. Jezun porgottnni suru korun sumar sov mhoineam bhitoruch, Jezuch Mesias mhunn taka kollon ailem. (Ju. 3:1, 2) Punn “Judevanchea bhiranten” to Jezucho xis zaunk fattim-fuddem zatalo. (Ju. 7:13; 12:42) Jezucho xis zalear apunn apli podvi ani girestkai hogddaitolo mhunn taka bhirant asli zait. Tea pasot to Jezuk ratchea vellar mellttalo.a

4. Jezun Nikodemusak koxi modot keli?

⁴ Nikodemusak, Moizesa udexim dilʼlea Kaidea vixim khobor asli. Punn Jehovak apnnem kitem kelʼlem zai tem taka khobor naslem. Tor hem zannam zaunk Jezun taka modot keli. Koxi? Jezu taka ratchea vellar pasun mellonk toiar aslo. Toxench, aplo xis zaunk tannem kitem korunk zai tem Jezun taka spoxttponnim sanglem. Tem mhunnttlear, tannem tachea patkancho poschatap korunk zai, udkant bautizm gheunk zai ani apleacher bhavarth dovrunk zai.—Ju. 3:5, 14-21.

5. Bible vidʼdhearthi vaddavoll korunk fatti sorta zalear, ami taka koxi modot korunk zata?

⁵ Eka Bible vidʼdheartheak Devachea Utrachi bori vollokh asa zait. Punn thoddea karonnank lagon Jehovacho Sakxi zaunk to fatti sorot. Kiteak? Ghoddie tachea kamak lagon taka vell mellona astolo vo tachea famili thaun taka virodh sosunk poddtta zait. Tor ami taka koxi modot korunk zata? Jezu bhaxen ami tachea sangata vell sarunk zai. Zoxem, taka ami amchea ghora apounk zata vo taka chaiek vhoronk zata. Oslea vellar taka kosleo oddchonneo asat tem ghoddie to bore bhaxen sangonk xoktolo ani ami taka modot korunk pavtolim. Punn tannem amkam nhoi, punn Jehovak khuxal korunk vaddavoll korchi mhunn ami tachea ugddasak haddunk zai.

6. Bible vidʼdhearthi xikta tem apnnaunk ami taka koxi modot korunk zata? (1 Korintkarank 16:13)

⁶ Jehovachea dorjeam pormonnem jieunk to taka modot kortolo mhunn ami Bible vidʼdheartheak khatri ditat tednam to xikta tem apnnaunk pavtolo. (1 Korintkarank 16:13 vachat.) Hem ami koxem korunk zata? Hem somzonk eka iskolachea tticheri vixim chintat. Ti fokot bhurgeamnim kitem korunk zai tench tankam sangona, punn tanchea lagim tem korunk zatolem mhunn tankam khatri dita. Toxench, ami Bible vidʼdheartheak, tannem kitem korunk zai tench sangonant, punn tem korunk Jehova taka modot kortolo mhunn taka khatri ditat. Tor tumi hem koxem korunk chintlam?

JEHOVA PASOT MOG VADDOUNK MODOT KORUN

7. Jezun lokank Jehova pasot mog vaddounk koxi modot keli?

⁷ Jehova pasot aplea xisancho mog vaddlear, tim jem xiktat tem apnnaitolim mhunn Jezuk khobor asli. Tea pasot aplea xisank xikoitana tannem choddxe pavtti oslim udharonnam uzar kelim, jea vorvim Jehova pasot tancho mog vaddounk tankam modot zali. Zoxem, tannem Jehovak eka oslea munxa sangata sor kelo zo aplea bhurgeank boreo vostu dita. (Mt. 7:9-11) Tachea aiknnaream modlea thoddeank tanchea bapai thaun kednanch mog mellonk na astolo. Tor Jezun tankam sanddlolea putachi vopar sangli tednam tankam koxem bhoglem astolem tea vixim chintat. Tea putan khub vaitt kamam kelʼlim, tori astana tachea bapain taka doia-maia dakhoili ani porot ieukar dilo. Hantuntlean, Jehova tancho pasun khub mog korta ani modot korunk sodhta mhunn tankam kollon ailem.—Luk. 15:20-24.

8. Jehova pasot mog vaddounk ami Bible vidʼdheartheak koxi modot korunk zata?

⁸ Jehova pasot Bible vidʼdheartheacho mog vaddounk, taka xikoitana ami porot-porot Jehovachea gunnam vixim ulounk zata. Dor ek pavtt obheas kortana, to jem xikta tantuntlean Jehova tacho mog korta mhunn koxem kolltta tem somzonk ami taka modot korunk zata. Khas korun soddvonne vixim xikoitana, Jehovan to soglea munxancho mog korta dekhunuch nhoi, punn to tacho pasun mog korta dekhun aplea Putak bolidan mhunn dilo hem somzonk ami taka modot korunk zata. (Rom. 5:8; 1 Ju. 4:10) Karonn Jehova tacho kitlo mog korta tem taka kollttolem tednam, Jehova pasot tacho mog vaddttolo.—Gal. 2:20.

9. Aplem jivit bodlun bautizm gheunk Michael-ak koxi modot zali?

⁹ Hea vixim Indonesia-nt ravpi Michael-achem udharonn polloum-ia. To lhan aslo tednam thaun taka sota vixim khobor asli. Punn tannem bautizm gheunk naslo. To 18 vorsancho zalo tednam, truck driver mhunn kam korunk dusrea desant gelo. Uprant to porot ailo ani kazar zalo. Punn magir to porot dusrea desant kam korunk gelo. Tea vellar, tachi bail ani tachi dhuv jim Indonesia-nt aslim tim Bible xikonk laglim ani sotant vaddavoll korunk laglim. Uprant Michael-achi avoi bhair poddli tednam, aplea bapaichi kallji gheunk to porot Indonesia-nt ailo ani tednam to Bible xikonk laglo. Sasnak Khuxalkaien Jieiat! pustokachea odheai 27-antlo, “Kholaien Xikat” ho bhag tachea kallzak laglo. Aplo Put tras sosta tem Jehovan polloilem tednam, Jehovak koxem bhoglem astolem tea vixim niall korun tachea dolleant dukham ailim. Soddvonne pasot tachem upkariponn itlem vaddlem ki tannem aplem jivit bodolʼlem ani bautizm ghetlo.

JEHOVACHI SEVA POILEA ZAGEAR DOVRUNK MODOT KORUN

10. Jehovachi seva poilea zagear dovrunk, Jezun aplea xisank koxi modot keli? (Lukas 5:5-11) (Chitr pasun polloiat.)

¹⁰ Jezun porgott kelʼlea xisam modem thoddea zannank Jezuch bhasailʼlo Mesias mhunn rokddench kollon ailem. Punn porgottnnechem kam khub mhotvachem mhunn somzonk tankam modot zai asli. Pedru ani Andre Jezuche xis zalea uprant pasun nusteacho dhondo kortale. (Mt. 4:18, 19) Ghoddie te hem kam Jakob ani Juanva sangata kortale ani tancho dhondo khub boro choltalo. (Mk. 1:16-20) Punn Jezun tankam aplo pattlav korunk apoile tednam te “aplem zall soddun” tacho pattlav korunk lagle. Ani hea vellar chodd korun tannim aplea familicheo gorzo purnn korunk bondobost kelo astolo. Tor itle teag korun te Jezucho pattlav kiteak korunk lagle? Lukas pustokantlean amkam kollon ieta ki Jezun ek vizmit kelem jea vorvim tachea xisancho bhavarth ghott zalo. Tor Jehovachi seva poilea zagear dovorlear, Jehova tancheo gorzo purnn kortolo mhunn tanchi khatri vaddli.—Lukas 5:5-11 vachat.

11. Bible vidʼdheartheacho bhavarth ghott korunk ami taka kitem sangonk zata?

¹¹ Jezu bhaxen ami vizmitam korunk xokonant. Punn Jehovachi seva poilea zagear dovortat tankam to koso modot korta tea vixim amkam aslole onnbhov ami Bible vidʼdheartheak sangonk zata. Udharonnak, tumi survatek mittingek hajir zaunk laglim tednam, Jehovan tumkam koxi modot keli tem tumkam ugddas asa? Mittingek vochonk zai dekhun tumi overtime korunk xokchimnant mhunn tumi ghoddie tumchea patranvak sanglem astolem. Tor Jehovachi seva poilea zagear dovorlolean, tannem tumkam koxi modot keli ani hea vorvim tacher tumcho bhavarth koso ghott zalo tem tumi Bible vidʼdheartheak sangonk zata.

12. (a) Ami veg-vegllea bhav-bhoinnank amchea Bible obheasak kiteak apounk zai? (b) Ami Bible vidʼdheartheak xikoitana, video bore toren koxe uzar korunk zatat? Ek udharonn diat.

¹² Toxench, Jehovachi seva poilea zagear dovrunk dusreamnim kitem kelem tem zannam zalear amchea Bible vidʼdheartheak modot zatoli. Tor veg-vegllea bhav-bhoinnank tumchea Bible obheasak apoiat. Tim sotant koxim ailim ani Jehovak aplea jivitant poilea zagear dovrunk tannim kitem kelem tem tankam vidʼdheartheak sangonk laiat. Toxench, Sasnak Khuxalkaien Jieiat! pustokacho obheas kortana, “Kholaien Xikat,” ani “Anik Sodhat,” hea bhagant aslole video sangata polloiat. Udharonnak, odheai 37 xiktana, Jehova Amcheo Gorzo Purnn Kortolo, ho video polloiat ani ami Jehovak poilea zagear dovorlear to amkam koso modot kortolo tem zannam zaunk taka modot korat.

VIRODHACHO KOSO FUDDO KORCHO TEM XIKOUN

13. Virodhacho fuddo korunk Jezun aplea xisank koxim toiar kelim?

¹³ Jezuchea xisank heram koddlean ani tanchea ghorcheam koddlean pasun virodh sosunk poddttolo mhunn Jezun tankam porot-porot sanglem. (Mt. 5:11; 10:22, 36) Tim Jehovachi bhokti kortat dekhun tankam jivexim pasun marunk xoktat mhunn morchea adim Jezun tankam xittkailem. (Mt. 24:9; Ju. 15:20; 16:2) Tea bhair, porgottnni kortana tankam xittuk ravonk sanglem. Ani konnui tancho virodh korta zalear, tanchea lagim vad-vivad korcho nhoi, punn uloitana ani tanchea sangtana vagtana chotrai dhorunk sanglem. Oxem kelear tankam porgottnni korit ravonk mellttoli asli.

14. Virodhacho fuddo korunk ami eka vidʼdheartheak koxi modot korunk zata? (2 Timotak 3:12)

¹⁴ Ami Jezuchi dekh koxi gheunk zata? Bible vidʼdheartheak tachea sangata kam kortat tanchea koddlean, tachea ixttam koddlean vo tachea ghorcheam koddlean koslea virodhacho fuddo korunk poddot tem ami taka sangonk zata. (2 Timotak 3:12 vachat.) Zoxem, to Bible-achea dorjeam pormonnem jieta dekhun tachea sangata kam korpi thoddim tachim fokannam korit. Vo to Bible-antlean jem xikta tem sarkem nhoi mhunn tachim ghorchim vo dusrim taka sangot. Tor hea vixim ami taka jitle begin sangtolim, titloch tacho fuddo korunk taka modot zatoli.

15. Ghorcheam koddlean virodh sosunk ami Bible vidʼdheartheak koxi modot korunk zata?

¹⁵ Bible vidʼdheartheak tachea ghorcheam koddlean virodh asa zalear, to kiteak asa tem somzonk taka modot korat. Tachea ghorcheank ghoddie Jehovachim Sakxi fotti xikoitat vo te bore lok nhoi oxem dista zait. Jezuchea ghorcheank pasun to toklen suttla oxem dislolem. (Mk. 3:21; Ju. 7:5) Tor ghorcheam ani heram lagim uloitana pasiensan ani doiallaien ulounk tumchea Bible vidʼdheartheak xikoiat.

16. Bible vidʼdhearthean aplea ghorcheank Bible-a vixim sangtana kitem ugddas dovrunk zai?

¹⁶ Bible vidʼdheartheachim ghorchim Bible-a vixim zannam zaunk sodhtat zalear tannem tankam soglem ekuch pavtti somzaunchem nhoi. Na zalear, tim fuddle pavtti aikonk fattim sorot. Tor tannem tankam ilʼlem-ilʼlem korun somzaunk zata. (Kol. 4:6) Oxem kelʼlean, tim ghoddie fuddle pavtti anikui zannam zaunk sodhtolim. Tannem tankam jw.org website-i vixim sangonk zata. Hea vorvim tankam Jehovachea Sakxeam vixim kednam ani kitlem zannam zaunk zai tem vinchun kaddunk mellttolem.

17. Jehovachea Sakxeam vixim vichartat tea prosnanche zobab diunk ami Bible vidʼdheartheak koxi modot korunk zata? (Chitr pasun polloiat.)

¹⁷ Toxench ami Bible vidʼdheartheak, jw.org-acher, “Zaite Pautt Vincharlole Prosn” hantunt aslole lekh dakhounk zata. Oxem kelʼlean, ghorchim vo tachea sangata kam korpi Sakxeam vixim prosn vichartat tednam, sompea utramnim koso zobab diuncho tem zannam zaunk taka modot zatoli. (2 Tim. 2:24, 25) Tea bhair, Sasnak Khuxalkaien Jieiat! pustokachea dor eka odheai-achea xevottak, “Thoddo Lok Mhunntta” hantunt aslolea prosna vixim uloun, tachea utramnim zobab diunk ami taka urba diunk zata. Toxench goroz poddlear tannem anik bore toren koso zobab diunk zata tem zannam zaunk ami taka modot korunk zata. Oxe toren practice kelear to dhiran aplea patienni vixim dusreank sangonk pavtolo.

18. Porgottnnar zaunk tumi Bible vidʼdheartheak koxi urba diunk zata? (Matev 10:27)

¹⁸ Jezun aplea xisank bori khobor porgottunk adnea dilea. (Matev 10:27 vachat.) Ek Bible vidʼdhearthi jitlea begin porgottnni kortolo, titlea begin to Jehovacher patieun ravonk xiktolo. Hem korunk tumi tumchea Bible vidʼdheartheak koxi modot korunk zata? Khas porgottnni asa mhunn sobhent kollounni kortat tednam porgottnnar zaunk taka urba diat. Tea vellar porgottnni korunk chodd korun sompem zata mhunn taka somzaiat. Toxench porgottnnar zaunk taka sumanache modlea mittinge thaun proxikxonn mellonk xokta. Tea mittingek to vidʼdheartheache bhag korta tednam, aplea patienni vixim dusreank sangonk taka anik sompem zatolem.

TANCHER BHORVONSO ASA MHUNN DAKHOUN

19. Jezuk tachea xisancher bhorvonso aslo mhunn tannem koxem dakhoilem, ani ami tachi dekh koxi gheunk zata?

¹⁹ Jezu sorgar voichea poilim tannem aplea xisank sanglem ki te porot aplea sangata astole mhunn. (Ju. 14:1-5, 8) Tea vellar Jezu tankam aslolea sorginchea bhorvonxea vixim uloitalo mhunn te somzonk nant. Tori astana, te kitle visvaxi asle tacher Jezun dhean dilem. Tankam thoddeo vostu, zoxem sorgar jieunchea bhorvonxea vixim somzonk vell lagtolo mhunn Jezu zannam aslo. (Ju. 16:12) Tor ami pasun Jezuchi dekh gheunk zata. Amcho vidʼdhearthi Jehovachi khuxi korunk sodhta mhunn amkam tacher bhorvonso asa mhunn dakhounk zata.

20. Malawi-ntlea eke bhoinnin tichea Bible vidʼdheartheacher bhorvonso koso dovorlo?

²⁰ Amcho Bible vidʼdhearthi sarkem tem korunk sodhta mhunn amkam bhorvonso asa mhunn ami koxem dakhounk zata? Hea vixim Malawi-ntli bhoinn, Chifundo-cho onnbhov polloum-ia. Ti Sasnak Khuxalkaien Jieiat! pustok uzar korun Alinafe nanvachea eka Catholic cheddva sangata Bible obheas kortali. Odheai 14 sompot ailo toso, bhoktent murteo uzar korchea vixim tuka koxem dista mhunn tinnem Alinafe-k vicharlem. Tednam tannem bejar zaun oxem mhunnttlem, “Hanvem kitem korunk zai tem hanv polloitolem!” Tednam bhoinnik dislem ki hachea uprant tem Bible obheas bond kortolem. Punn tinnem pasiens dakhoilem ani obheas chaluch dovorlo ani bhoktent murteo uzar korop chukichem mhunn taka ek dis kollon ietolem mhunn bhorvonso dovorlo. Thoddea mhoinea uprant, bhoinnin taka odheai 34-ant aslolo ho prosn vicharlo: “Bible xikon ani Jehovachi adnea pallun tumkam koso faido zalo?” Tednam Alinafe-n kitem zobab dilo tea vixim bhoinn Chifundo oxem sangta: “Zobab ditana tannem zaite bore mudʼde sangle. Tantuntlo ek mhunnttlear, jeo vostu korop chukichem mhunn Bible-ant sanglam, teo vostu Jehovachim Sakxi korinant.” Tea uprant rokddench Alinafe-n murteo uzar korop bond kelem ani bautizm ghetlo.

21. Jehovachi seva korcho nirnnoi gheunk ami Bible vidʼdheartheak koxi modot korunk zata?

²¹ Lokanchea kallzant sotachem bim ‘Dev vaddoita’ tem khorem, punn vaddavoll korunk ami vidʼdheartheak modot korunk zata. (1 Kor. 3:7) Koxi? Tannem kitem kelʼlem Jehovak zai, itlench ami taka xikoinant. Punn tachea kallzant Jehovacho mog vaddounk ami modot kortat. Toxench, tachea jivitant Jehovak poilea zagear dovrun to mog aplea kamamnim dakhounk ami taka urba ditat. Tea bhair oddchonnechea vellar Jehovacher patieun ravonk ami taka xikoitat. Toxench, to Jehovak manvota tem korunk sodhta mhunn amkam tacher bhorvonso asa mhunn ami dakhoitat. Oxem kelear to Jehovachea dorjeam pormonnem jieunk xokta mhunn tachi khatri vaddttoli ani to Jehovachi seva korcho nirnnoi gheunk pavtolo.