1925​—Xembor Vorsam Poilim

DEVACHEA LOKAMNIM ANIK RAVCHI GOROZ ASLI

1925-ant hi prithum ek sobit bag zatoli, oxem zaiteank distalem. Kiteak? Tea vixim bhav Albert Schroeder, zo uprant Sonchalon Monddollacho vangddi aslo, tannem oxem sanglem: “Jezuche urlole makhlole bhav sorgar vochon raz choloitole, ani Jehovache adle visvaxi sevok zoxem Abraham, David ani dusre, jivont zaun sobit bag zalʼle hea prithumer fuddakar ghetole oxem ami chintʼtalim.” Punn tem voros gelem toxem, tannim chintlolem toxem zaunk na dekhun zaitim bhav-bhoinnam niraxi zalim.—Mho. 13:12, NW.

Torui, Bible Vidʼdhearthi porgottit aslim. Karonn Jehova vixim dusreank porgottop chodd mhotvachem mhunn tankam kollʼllem. Tor tannim radio uzar korun zaitea lokank koxi porgottnni keli tem polloum-ia.

BIBLE VIDʼDHEARTHEAMNIM ANIK RADIO STATION-AM BANDLIM

1924-ant zaito lok WBBR radio broadcasting aikotalo dekhun, 1925-ant Illinois-achea Chicago xara lagim anik ek radio station bandlem. Hea radio station-ak UTOR mhunn nanv dilem. Hea vixim bhav Ralph Leffler, zannem station bandunk modot kelʼli, to sangta: “UTOR hem pois-pois aslolea lokank aikonk ietalem.” Udharonnak, ek famil Alaska-chea Pilot Station xarant ravtali jem 5,000 kilometram poros pois aslem. Tannim aikolʼlem hem poilench broadcast aslem. Broadcast aikolea uprant tea urbebhorit kariavolli pasot bhavanche upkar attounk tannim chitt boroili.

Hea radio station-a vorvim pois-pois aslolea lokank koxem aikonk mellttalem tea vixim Dezembr 1, 1925-achea Pahrogopur-ant oxem sanglolem: “UTOR hem radio station 5,000 watts-ancher cholta ani United States-antlea borea radio station-am modlem ek zaun asa. Hea radio station-a vorvim United States-achea Udent ani Ostomt, toxench Cuba-nt ani Alaska-chea ekdom utʼtore vatten aslolea lokank pasun aikonk melltta. Jea lokank poilim kednanch sot mellonk na tim hea radio station-ak lagon sot zannam zaunk sodhtat.”

Teach vellar Canada-nt pasun radio udexim porgottnni korunk Bible Vidʼdhearthi khub vavr kortalim. 1924-ant tannim Saskatchewan-achea Saskatoon xarant CHUC hem radio station bandlem. Hem Canada-chea radio station-am modlem poilem radio station aslem zoim dhormik kariavolli broadcast zataleo. Punn 1925-ant amkam vhoddlea zageachi goroz asli dekhun, songottnnen Saskatoon xarant Regent Bildding nanvacho ek porno theater vikto ghetlo, ani broadcasting-a pasot to renovate kelo.

Hea radio station-ak lagon Saskatchewan-ant aslolea lhan-lhan ganvamnim ani poisulʼlea vattaramnim lokank poile pavtti bori khobor aikonk mellʼlli. Udharonnak, eka poisulʼlea ganvant Graham nanvache eke bailen broadcast aikolem, ani prokaxonam magonk bhavank chitt boroili. Tea vixim bhav George Naish sangta: “Tika prokaxonanchi itli goroz asa mhunn tichea chittintlean dison ietalem ki ami tika Studies in the Scriptures nanvachim soglim pustokam dhaddun dilim.” Ani tinnem rokddench anikui pois vattaramnim bori khobor porgottunk suru kelem.

SOMZONNENT BODOL ZALO

1925-ant Mars 1 tarkechea Pahrogopur-ant, “Birth of the Nation” nanvacho ek lekh ailo. Ho lekh ekdom mhotvacho kiteak aslo? Soitanachem ek songotton asa, ani tantunt sorgar aslole noxtte dut, toxench hea prithumer aslole khotte dhorm, sorkar ani veapar-dhondo mellon asat mhunn Bible Vidʼdheartheank khobor asli. Punn hea lekha udexim Jehovachem pasun ek songotton asa mhunn ‘visvaxi ani xannea chakran’ bhav-bhoinnank kolloilem. (Mt. 24:45) Tea songottnnent, sorgar ani prithumer aslole Jehovache sevok mellon asat, ani te sangata mellon Jehovak tenko ditat. Toxench te Soitanachea songottnne thaun ekdom veglle asat, ani te Soitanacho toxench tacho pattlav kortat tancho virodh kortat mhunn tannim somzailem. Itlench nhoi, 1914-nt Devachem Raj suru zalem ani ‘sorgar zalʼlea zhuzant,’ Soitan ani tachea noxttea dutank sorgar thaun xevttile ani te atam prithumer asat mhunn tannim somzailem.—Prok. 12:7-9.

Punn thoddeank hi novi somzonni manun gheunk kotthin zalem. Tea pasot tea lekhant oxem sanglolem: “Hea Pahrogopur-ant jem sanglam tem manun gheunk konnakui kotthin zata zalear, tannim Jehovacher patieun ravchem ani visvaxiponnan tachi seva korit ravchi.”

Tea lekha vixim choddxea Bible Vidʼdheartheank koxem dislem, tea vixim Britain-antlea Tom Eyre nanvachea eka colporteur-an (atam taka pioneer mhunnttat) tannem oxem sanglem: “Prokasovnni 12-chi hi somzonni aikon bhav-bhoinnam khub khuxal zalim. Devachem Raj sorgar stapon zalam mhunn amkam kollʼllem tednam, dusreank tea vixim sangonk ami umedin bhorlim. Tor anikui nettan porgottnni korunk amchi urba vaddli ani Jehova fuddarak boreo vostu kortolo mhunn amkam kollʼllem.”

JEHOVACHEA NANVACHI SAKX DIUNK ZAI MHUNN KOLLON AILEM

Aiz Jehovachea Sakxeank Izaias 43:10-ant sanglolim utram bore bhaxen khobor asat. Thoim sanglam: “Mhojim sakxidaram tuminch ani Hanvem venchum kaddlolo sevok – uloita to Sorvespor!” Punn 1925-achea poilim hem vers amchea prokaxonamnim titlem uzar korunk naslem. Punn 1925-ant hem bodolʼlem. Tea vorsak Izaias 43:10 ani 12 him versam 11 Pahrogopur-amnim uzar kelim!

Agost 1925-achea xevottak, Bible Vidʼdhearthi Indiana-chea Indianapolis xarant odhivexonak hajir zalim. Odhivexonachea kariavollicher bhav Joseph F. Rutherford-an ek sondex chhaplolo. Tantunt oxem sanglolem: “Jehova koddlean . . . ghottai mellonk ani anikui urben tachea vixim sakx diunk ami hea odhivexonak hajir zaleant.” Tea atth disanchea odhivexonak hajir zalʼlea sogleank, dor ek sondhi uzar korun Jehova vixim sakx diunk urba dilʼli.

Sonvar, Agostachea 29 tarker, bhav Rutherford-an ek bhaxonn dilem. Tacho vixoi aslo, “A Call to Action.” Tannem aplea bhaxonnant sogleank Jehova vixim sakx diunk urba dili. Tannem mhunnttlem: “Jehova aplea lokank sangta . . . ‘Tuminch Mhojim sakxidaram . . . Hanv Dev.’” Uprant tannem tankam oxi adnea dili: ‘Porzank kollounk bavtto ubarat!’ Jehova vixim dusreank sakx diunk tachea lokam xivai hea prithumer anik konnuch na, karonn Jehovachi povitr xokti tachea lokancher asa.”—Iz. 43:12; 62:10.

Hea bhaxonna uprant bhav Rutherford-an “Message of Hope” nanvacho ek dokument vachlo. Tantunt, fokot Devachem Raj “khori xanti, surokxa, bori bholaiki, sasnachem jivit, suttka ani sasnak khuxalkai” haddttolem mhunn sanglolem. Ho sondex sogleamnim manun ghetlo. Uprant ho dokument zaitea bhasamnim bhaxantor kelo, ani bhav-bhoinnam to sevent ttrektt mhunn uzar korunk laglim. Tacheo sumar 4 korodd kopi vanttleo.

Bible Vidʼdheartheamnim zaitim vorsam poriant Jehovachim Sakxi hem nanv apnnaunk na. Torui, Jehova vixim sakx divop kitlem mhotvachem tem tim somzonk laglolim.

TIM POROT BHETTO KORUNK LAGLIM

Sonvsarbhor Bible Vidʼdheartheanchi vaddavoll zaunk lagli toxi, songottnnen tankam fokot prokaxonam diunkuch nhoi, punn bori khobor aikonk umed dakhoilʼli tankam porot bhett korunk pasun sanglem. Message of Hope hea ttrekttachi khas porgottnni zalea uprant, Bulletin-anta oxem sanglem: “Tumi jea lokank Message of Hope ttrektt dilʼlem, tankam sogleank porot bhett korat.”

Janer 1925-achea Bulletin-ant, Texas-achea Plano xarantlea eka Bible Vidʼdhearthean oxem mhunnttlem: “Novea vattaram poros, ami poilim zaite pavtti porgottnni kelʼli tea vattaramnim amkam boro ies mellʼllo tem polloun ami ojap zalim. Fattlea dha vorsamnim amchea vattarantlea eka lhan ganvant panch pavtti porgottnni zalʼli. Punn halinch, bhoinn Hendrix ani mhoje avoin thoim porot porgottnni keli ani khub pustokam dilim. Itlim pustokam poilim thoim kednanch diunk naslim.”

Panama desantlea eka colporteur-an oxem boroilem: “Hanvem poilea pavtti porgottnni kelʼli tednam, zaitea lokamnim mhaka dhanvddailʼlo. Punn hanv dusre vo tisre pavtti tanchea ghora gelo tednam tancho sobhav bodolʼlo. Tor hea vorsak, hanv adim mellʼllolo teach lokank hanvem porot porgottnni keli. Ani mhaka zaite bore onnbhov mellʼlleat.”

FUDDARACHER DHEAN DITANA

1925-achea xevottak bhav Rutherford-an soglea pioneer bhav-bhoinnank chitt boroili, ani tea vorsa porgottnnechea kamant kitlo vavr zalʼlo tem tankam sanglem. Toxench fuddlea vorsa tannim kitem korchem tem-ui sanglem. Tannem oxem boroilem: “Hea vorsa dukhi aslolea zaitea zannank bhuzvonn diunk tumkam sondhi mellʼlli. Toxench porgottnnechem kam korun tumkam khuxalkai pasun mellʼlli . . . Fuddlea vorsa Jehova ani tachea Rajea vixim sakx diunk tumkam anikui zaiteo sondheo mellttoleo . . . Tor ami soglim sangata mellon amchea Devachi ani Razachi vakhannʼnni korit ravom-ia.”

1925-achea xevottak, bhavamnim Brooklyn Bethel vaddounk ievzonn keli. Tor 1926-ant amchea songottnnent poilim kednanch zaunk na, titlem vhodd bandkamachem kam zaunchem aslem.