Sonchalon Monddollache Don Nove Vangddi

2024-ACHEA Otumbr 5 tarker, vorsavolliche mittingek ek khas kollounni keli. Ti mhunnttlear, bhav Jody Jedele ani bhav Jacob Rumph-ak Jehovachea Sakxeanchea Sonchalon Monddollache vangddi mhunn nemle. He donui bhav zaitea vorsam thaun visvaxiponnan Jehovachi seva kortat.

Bhav Jedele Missouri, U.S.A.-nt zolmolʼlo ani taka sotant vaddoilʼlo. Tim oslea eka vattarant ravtalim zoim thoddinch Sakxi aslim, ani dusrea vattarantlim bhav-bhoinnam thoim porgottnni korunk ietalim. Tankam mellon ani tancho mog ani ekvott polloun tacher khub boro probhav poddlo. Otumbr 15, 1983-nt tannem bautizm ghetlo. Taka porgottnni korunk khub avoddttali ani iskolachem xikop zalea uprant Setembr 1989-ant tannem niemit pioneer seva suru keli.

Bhav Jedele tornatto aslo tednam, tachim mummy-daddy taka ani tachea dhakttea bhoinnik Bethel-ant vhortalim. Hea vorvim Bethel-ant seva korunk tanchi itsa vaddli ani uprant tim dogaim Bethel-ant seva korunk laglim. Bhav Jedele Setembr 1990-ant Wallkill Bethel-ant ailo. Tannem survatek Nitoll Korchea Khateant ani Bholaiki Khateant seva keli.

Tea vellar tachea vattarant Spanish sobhamnim vaddavoll zatali ani bhav-bhoinnanchi goroz asli. Tor bhav Jedele Spanish sobhent gelo ani Spanish bhas xikonk laglo. Thoddea vella uprant taka Damaris mellʼllem jem tachea sorkittant pioneer seva kortalem. Uprant tim kazar zalim ani Damaris tachea sangata Bethel seva korunk laglem.

Aplea avoi-bapaichi kallji gheunk 2005-ant tankam Bethel seva soddunk poddli. Punn tea vellar tannim niemit pioneer seva keli. Ani bhavan Pioneer Sevechea Korsak xikoilem, toxench Hospital Liaison Somiti ani Regional Building Committee-k pasun modot keli.

2013-nt, bhav ani bhoinn Jedele-k porot Bethel-ant apoilim. Tednam Warwick Bethel-achem bandkam chalu aslem. Tea uprant thaun, tannim Patterson-ant ani Wallkill-ant pasun seva keli. Bhav Jedele-n Ievzonn ani Bandkam Khatem, toxench Hospital Mahiti Khateant seva keli. Mars 2023-ant, taka Seva Somitik modot korpi mhunn nemlo. Apleak mellʼllolea zobabdaream vixim ugddas kortana to oxem sangta: “Noveo zobabdareo mellttat tednam thodde pavtti amcher bhirant ieunk xokta. Punn tea vellar ami Jehovacher patieunk ugddas dovrunk zai. Karonn to ghoddoun ieum-xem korta.”

Bhav Rumph, U.S.A.-chea California xarant zolmolʼlo. To lhan aslo tednam tachi avoi seva bond keloli porgottnnar asli, punn taka Bible-a vixim xikounk ti vavr kortali. Toxench vorsak ek pavtti, to aplea xemaik mellonk voitalo ji visvaxiponnan Jehovachi seva kortali. Bible-a vixim anik xikonk tinnem taka modot keli. 13 vorsancho astana tannem Bible obheas suru kelo. Setembr 27, 1992-ant, tornattea piraier tannem bautizm ghetlo. Khoxechi khobor mhunnttlear, tachi avoi porot porgottnnar zali ani tachea daddy-n ani bhav-bhoinnamnim sotant vaddavoll korun bautizm ghetlo.

Tachea tornatte piraier, pioneer seva korpi bhav-bhoinnam khub khuxal astat tem tannem polloilʼlem. Tor iskolachem xikop zalea uprant, Setembr 1995-ant tannem pioneer seva suru keli. Ani 2000 hea vorsak, to Ecuador-ak gelo, zoim porgottnnaranchi chodd goroz asli. Thoim taka Inga mellʼllem. Tem Canada thaun aslem ani pioneer seva kortalem. Tim kazar zalim ani Ecuador-antlea eka xarant thoddinch porgottnnaram aslolea eka grupant seva korunk laglim. Atam thoim ek vhodd sobha asa.

Uprant, bhav ani bhoinn Rumph-ak khas pioneer mhunn nemlim ani magir tankam sorkittachem kam korunk pasun dhaddlim. 2011-nt tim Gilead-achea 132-avea Korsak hajir zalim. Graduation zalea uprant, tankam veg-vegllea desamnim veg-vegllea torechi seva korunk mellʼlli, zoxem Bethel seva, mixinori seva ani sorkittachem kam. Bhav Rumph-ak Raj Porgottnnarank Korsak xikounk pasun sueog mellʼllo.

COVID-19 piddek lagon bhav ani bhoinn Rumph porot United States-ant gelim. Tankam Wallkill Bethel-ant apoilim ani bhav Rumph-ak Seva Khateant kam korunk proxikxonn mellʼllem. Uprant, tankam porot Ecuador xakhent dhaddlim. Thoim bhav Rumph-an Xakha Somitint seva keli. 2023-ant tankam Warwick dhaddlim. Ani Janer 2024-ant, bhav Rumph-ak Seva Somitik modot korpi mhunn nemlo. Apnnem khoim-khoim seva kelea tea vixim bhav oxem sangta, “Eka umkeach zageak lagon nhoi, punn jea lokam sangata tum kam korta tea pasot tuji seva valorachi zata.”

He bhav kortat tea koxtti vavracho ami khub valor kortat “ani oslea bhavank moladik mhunn lekhtat.”—Filp. 2:29.