Zhuzank Lagon Tras Zalʼlea Nagrikanchem Kitem?—Hea Vixim Bible Kitem Sangta?

United Nations-acho ripott:

• Otumbr 7 tem Otumbr 23, 2023-a modem zalʼlea Gaza-Israel zhuzak lagon 6,400-von chodd lok mele ani 15,200 lok zokhmi zale, zantuntle choddxe soinik nhoi punn nagrik asle. Tea bhair, hozaramnim lokank aplem ghor-dar soddun voichem poddlem.

• Setembr 24, 2023-a meren, Russia ani Ukraine-a modem choltolea zhuzak lagon, Ukraine-ant 9,701 nagrik meleat ani 17,748 zokhmi zaleat.

Zhuzak lagon dukh-tras sostat tankam Bible koslo bhorvonso dita?

Amkam koslo bhorvonso asa?

Dev ‘zhuzam sompoitolo’ mhunn Bible sangta. (Stotr 46:9) To aplo sorgincho sorkar vo rajea udexim beginuch soglea munxachea sorkarancho nas kortolo. (Daniel 2:44) Ani tem Raj razvottki choloun munxakullak xanti haddttolem.

Devachea Rajeacho Raza Jezu Krist kitem kortolo tacher dhean diat:

• “Ulo martolea goribank, adar-naxilʼlea dublleank to pavtolo. Dolldireanchi ani durbollanchi to doia kortolo, goribancho jiv to samballtolo. Zulum ani zobordosti sonstoleank to soddoitolo.”—Stotr 72:12-14.

Dev aplea Rajea udexim, zhuzak ani hinvxek lagon zalʼlem dukh-tras purnn toren kaddun uddoitolo.

• “Tanchea dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant. Adlem sogott soron gelem.”—Prokasovnni 21:4.

Beginuch Devachem Raj vo sorgincho sorkar, hea prithumecher vhodd bodlav haddttolo. “Zhuzancho avaz ani zhuzancheo khobro” ami aikotolim ani polloitolim mhunn Bible-ant sanglolem. (Matev 24:6) Osleo ani her ghoddnneo ami munxanchea razvottkechea “nimannea disamnim” jietat mhunn dakhoun ditat.—2 Timotak 3:1.