Izaias
7 Tea disamnim Jothamacho put, Ahaz Judacho raza aslo. To Uziacho natu aslo. Tea vellar, Siriecho raza Rezin ani Izraelacho raza Peka, zo Remaliacho put aslo, Jeruzalemacher zhuz korunk aile. Punn to* tem aplea tabeant gheunk xoklona. 2 Tednam Davidachea ghoranneak oxi khobor dili: “Siria Efraima* sangata mellʼllam.”
Hem aikotanch, ranantlim zhaddam zoxim varean hevtten-tevtten haltat, toxim Ahaz ani tachea lokanchim kallzam bhirantin koddkoddonk laglim.
3 Tednam Jehovan Izaiasak mhunnttlem: “Upkar korun, tuzo put Shear-jashubak* gheun Ahazak mellonk voch. To tuka voilea tolleachea kanalachea* pontar mellttolo, zo dhobichea moidana vatten voita tea mha-marga lagim asa. 4 Taka sang, ʻXant rav ani chotraien vag. Rezin ani Siria ani Remaliachea putacho zolltto krodh polloun bhienaka ani dhir soddun dinaka. Karonn te dogui zollttea lakddam sarke asat jim palonk pavleant. 5 Sirien Efraima sangata ani Remaliachea puta sangata mellon tujea add manddnni kaddlea. Te oxem mhunnttat: 6 “Chol, ami Juda add vochom-ia ani tache kuddkean-kuddke korum-ia.* Ani tem amchea tabeant gheun, ami Tabelachea putak thoincho raza nem-ia.”
7 “‘Akʼkhea Vixvacho Dhoni Jehova oxem mhunntta:
“Oxem kednanch zaunchem na,
Tankam ies mellchem na.
8 Karonn Siriechi rajdhani Damask,
Ani Damaskacho raza Rezin.
65 vorsam bhitor
Efraimache kuddkean-kuddke zatole ani tem ek raxttr mhunn anik urchem na.
9 Efraimachi rajdhani Samaria,
Ani Samariecho raza Remaliacho put.
Tumkam ghott bhavarth na tea meren,
Tumi surokxit urchenant.”’”*
10 Jehovan Ahazak fuddem mhunnttlem: 11 “Jehova tujea Deva koddlean ek khunna* mag, ti Fondda* itli khol asom vo mollba itli unch asom.” 12 Punn Ahazan mhunnttlem: “Na, hanv khunna magchom na. Hanv Jehovachi porikxa gheunchom na.”
13 Tednam Izaiasan mhunnttlem: “Davidachea ghorannea, upkar korun aik. Munxanchem pasiens piddʼddear korun tuka puro zaunk na, zo tum atam Devachem pasiens piddʼddear korunk sodhta? 14 Tor atam Jehova tuka ek khunna ditolo: Polloi! Ek ankvar cheddum gorbest zatolem ani eka putak zolm ditolem ani tem taka Imanuel* mhunn nanv dovortolem. 15 To bhurgo vaitt nakarunk ani borem vinchun kaddunk somzota tea meren taka bottor* ani mhonv soddun anik kainch khaunk mellchem na. 16 Karonn to bhurgo vaitt nakarunk ani borem vinchun kaddunk somzonk lagchea poilinch, tum khub bhieta tea donui razanche des purnn toren padd zaun voitole. 17 Juda koddlean Efraim kuxin zalʼlo tednam thaun atam meren ieunk nant tosle dis Jehova tujer, tujea lokancher ani tujea bapaichea ghoranneacher haddttolo. To tujea add Asiriechea razak dhaddttolo.
18 “Tea disa Jehova fivnneo* ghalun Ejipttachea Nil nhoim-chea poisulʼlea pontam thaun musank, ani Asirientlean ganjil musank apoun haddttolo. 19 Ani te sogle ieun khol falkeant,* tollpachea khanchimnim, soglea kantteanchea jhilkuttamnim ani udok aslolea soglea zageancher posortole.
20 “Tea disa Nhoim-chea* vattarantlea bhaddeacho vakhor* uzar korun mhunnche Asiriechea razak uzar korun, Jehova tumchea tokleche ani paim-anche kens tastolo, toxench to tumchem khadd kaddun uddoitolo.
21 “Tea disa ek munis aplea hinddantli ek gai ani don menddram vanchoun dovortolo. 22 Tachea lagim fokot bhorpur dudh astolem, taka lagon to fokot bottor khatolo ani desantlea urlolea lokam koddem bottor ani mhonv soddun kainch aschem na.
23 “Tea disa, jea zagear 1,000 drakxancheo vali zataleo, zanchem mol chandiche 1,000 kuddke asle, thoim fokot kantteanchim jhilkuttam ani ranvotti tonn astolem. 24 Akʼkho vattar kantteanchea jhilkuttamnim ani ranvotti tonnan bhortolo. Thoim vochonk lokank dhonu ani bann gheun voichem poddttolem. 25 Ani jea dongrar eka vellar kudoll gheun nitoll kortale, thoim atam kantteanchim jhilkuttam ani ranvotti tonnachea bhirantin tum voichona. To boilancho ani menddrancho chorvak vochpacho zago zatolo.”