Izaias
3 Polloi! khoro Dhoni, fouzancho Dev Jehova,
Jeruzalem ani Juda koddlean tancho sogle torecho adar kaddun ghetolo,
Ani tankam ieta to unddo ani udokui bond kortolo.
2 Tanchea xoktivont munxak ani zhuzareak,
Neai korpeak ani provadeak, fuddar parkhupeak ani vhoddilak,
3 50 munxachea mukheleak, unch odhikareak ani solʼlo diupeak,
Onnbhov aslolea jadugarak ani sorop dhorpeak to kaddun uddoitolo.
4 Hanv cheddeank tanche kunvor kortolom,
Ani mon bodlit ravtat te* tancher odhikar choloitole.
5 Lok eka-mekacher zulum kortole,
Dor eklo aplea sangateacher zulum kortolo.
Bhurgo zanntteachea angar voitolo,
Ani kainch valor naslolo munis man aslolea munxacho opman kortolo.
6 Dor eklo aplea bapaichea ghorant aplea bhavak dhorun mhunnttolo:
“Tuje koddem lamb kopddo asa, tor tum amcho odhikari zav.
Padd zaun gelʼlea hea zageak tabeant ghe.”
7 Punn tea disa to virodh kortolo ani mhunnttolo:
“Hanv tuzo ghavo bandpi* zaunchom na,
Mhojeach ghorant mhaka jevonn na vo kopdde nant.
Mhaka lokancher odhikari korinaka.”
8 Jeruzalem addkhollʼllam,
Ani Juda poddlam,
Karonn tanchem ulovop ani tanchi vagnnuk Jehova add asa,
Mhoimevont Devachea dolleam mukhar tannim tachi adnea moddlea.
9 Tanchea tondda voile hav-bhav tanchea add govai ditat,
Ani te Sodomachea lokam bhaxen aplea patkam vixim vorʼran* sangtat.
Tim lipouncho te proitn korinant.
Tancher hai, karonn te apleacheruch nisontton haddttat.
10 Nitivontank sangat ki tanchem borem zatolem,
Tankam tanchea kamachem borem foll mellttolem.
11 Noxtteancher hai!
Tancher odruxtt ietolem,
Karonn tannim dusreank kelam toxench tanchea-i sangata ghoddttolem.
12 Mhojea lokam vixim sangchem mhunnttlear, tanche koddlean kam korun gheupi tancher zulum kortat.
Ani bailo tancher odhikar choloitat.
Mhojea lokamno, tumche fuddari tumkam bexttech hanga-thoim bhonvddaitat.
Te tumkam ghuspaitat ani nitt vatt sodhunk kotthin kortat.
13 Jehova lokank guneanvkari tharaunk toiar zata,
Ani aplo nirnnoi sangonk ubo ravta.
14 Jehova aplea lokanchea vhoddilanchi ani kunvranchi zhoddtti kortolo,
To tankam mhunnttolo, “Tumi drakxanche molle zolloun kabar kele,
Ani goribam koddlean luttlolea vostumnim aplim ghoram bhorlim.
15 Mhojea lokank chiddʼddunk
Ani goribanchem tondd matient zhorounk tumi kapostad koxi keli?”* oxem Akʼkhea Vixvacho Dhoni, fouzancho Dev Jehova mhunntta.
16 Jehova mhunntta: “Sionacheo dhuvo gorvixtt asat.
Tim apleo tokleo voir kaddun choltat,
Dolle martat, bhendd haloit choltat,
Ani aplea painzonnancho avaz korit bhonvtat.
17 Taka lagon, Jehova Sionachea dhuvanchea tokler khoroz* zai-xi kortolo,
Ani Jehova tanchea tokler ekui kens urona toso kortolo.
18 Tea disa, tankam sobitkai haddtta teo vostu Jehova kaddun ghetolo, tanchim kanknnam,
Toklek ghalpacheo vostu ani chondrachea akarache nettouncheo vostu,
19 Kanantlim, breslett* ani veil,*
20 Oddnni,* painzonnam, hoddʼddeache pottʼtte,*
Cheracheo battleo, taviz,*
21 Mudio, nakachim notim,
22 Moladik kopdde, lamb kott, shol ani porsi,*
23 Hatint dhorpache harxe, bhitorle vistid,*
Munddaxe* ani veil.
24 Balsamachea* telachea bodlek tanchea angak kuslolo vas ietolo,
Pottʼtteachea bodlek tanchea bhenddak dori bandloli astoli,
Sobit kensanchea bodlek tim khoddʼddim zalʼlim astolim,
Mharog kopddeachea bodlek tim sak ghalun astolim,
Ani sobitkaiechea bodlek tanchea angacher dag* astolo.
25 Tuje munis tolvarin mortole,
Ani tuje xoktivont zhuzari zhuzant mortole.
26 Sionachim daram roddttolim ani dukh kortolim,
Ani tem padd zaun zomnir bostolem.”