Izaias
27 Tea disa, Jehova apli bhirankull, vhoddli ani ghott tolvar gheun var kortolo,
To Leviathanacher,* tea sullsullit voitolea sorpacher var kortolo,
Guttlon boslolea sorpacher, Leviathanacher var kortolo,
Ani doriant ravpi tea vhoddlea pranneak to marun uddoitolo.
2 Tea disa, hea baile* pasot tumi hem git gaiat.
“Drakxanchea molleant drakxancho soro toiar zata.*
3 Jehova mhunntta: ‘Hanv molleachi rakhonn kortam.
Dor eka vallar taka udok ghaltam,
Konnench taka piddʼddear korina zaunk,
Rat ani dis hanv tachi rakhonn kortam.
4 Mhojea monant kosloch rag uronk na.
Konnem-i mhojea molleant kantteanchim jhilkuttam ani ranvotti tonn roilem zalear,
Hanv tachea lagim zhogoddttolom ani teach vellar tankam mostitolom, ani tancho bhosm korun uddoitolom.
5 Punn oxem zalʼlem taka naka zalear, tannem mhojea kilʼleant ieunchem,
Ani mhoje koddem xanti korchi,
Hoi, tannem ieun mhoje koddem xanti korchi.’”
6 Ieta tea disamnim Jakobachi pallam vaddttolim,
Izraelak kombri futtʼttoli ani fulam ietolim,
Tachea piken des bhortolo.
7 Taka zoso marlo toso taka marunk zai aslo kai?
Taka zoxem moronn mellʼllem, toxem moronn taka mellonk zai aslem kai?
8 Tum ticho fuddo kortolo, ani bob marun tika pois dhaddun ditolo,
Tum udentechea vareachea disa, tujea krodhachea sfottan tika dhanvddaun ghaltolo.
9 Hea toren Jakobachea guneanvanchem farikponn zatolem,
Tache guneanv pois zatole tednam taka hem foll mellttolem:
To* vedichea soglea fatrancho, chuneachea fatram sarko churo korun uddoitolo.
Ekui murti-pujecho khambo* vo dhumpachem sttendd urchem na.
10 Tea kilʼleanchea xarak soddun ditole,
Tache chorvache zage soddun dilʼlea ranvott vattara sarke zatole.
Thoim paddkulo chortolo ani add poddttolo,
To tache sogle khande khaun uddoitolo.
11 Tea xarache khande suktole tednam,
Bailo ieun te khande moddttoleo,
Ani zollounk uzar kortoleo.
Tea lokank somjikai na.
Taka lagon, tancho Rochpi* tankam doia dakhounchona,
Tankam Ghoddoupi tanchi kakut korchona.
12 Izraelachea lokamno, zoso konnui zhaddachem ek-ek foll kaddun tim ektthaim korta, toso Jehova pasun Nhoim-e* thaun tem Ejipttachea Vhalla meren aslolea vattarantlean tumkam ektthaim kortolo. 13 Tea disa, vhoddlem xing* vazoitole ani je Asirient kabar zaunche asle ani je Ejipttant hanga-thoim ximpoddlole, te Jeruzalemachea povitr dongrar ietole ani Jehova mukhar apli man bagoitole.