Izaias
28 Efraimachea bebdeancher, tanchea gorvixtt mukuttacher* hai!
Bavon voita tea tachea sobit fulanchea mukuttacher hai!
Zo pik dita tea falkeachea mathear asa, zoim lok drakxancho soro pieun ttaitt zaleat.
2 Polloi! Jehova bollixtt ani xoktivont aslolea konn ekleak dhaddttolo.
To goddgodd marun poddtta toslea korveanchea pausa sarko ani nas korun uddoitolea vadolla sarko ietolo,
Vadollachea varea sarko ani khub paus poddon ieta tea buddtte sarko ietolo,
Ani tea mukuttak nettan prithumer xevttitolo.
3 Efraimachea bebdeank jea mukuttacher gorv asa,
Taka paim-am ponda maddoitole.
4 Pik dita tea falkeachea mathear aslolea
Bavon voita tea sobit fulachi tich poristhiti zatoli,
Ji gima poilim anjirachea poilea pikachi zata.
Konnui taka polloita to, taka toddun rokddoch khaun uddoita.
5 Tea disa, fouzancho Dev Jehova aplea urlolea lokam pasot ek mhoimebhorit mukutt ani fulancho sobit har zatolo. 6 Je nit korunk bostat, tankam to nit korunk somjikai* ditolo. Ani je darvontteacher akromonn kortoleancho fuddo kortat, tankam zhuzonk xokti ditolo.
7 Iadnik ani provadi pasun drakxancho soro pieun bhottoktat.
Te soro pieun loktat,
Hoi, te soro pieun chukichea vatten pavtat.
Drakxancho soro pieun te ghuspotat,
Soreak lagon te loktat.
Tanchim dorxonam tankam vankdde vatten vhortat,
Te sarke toren nit korunk xokonant.
8 Karonn tanchim mezam vonkarin bhoron burxim zaleant,
Ekui zago nitoll na.
9 Te mhunnttat, “To konnank xikounk voita?
Konnank aplo sondex somzaunk sodhta?
Atanch dudh soddlolea bhurgeank?
Zankam tanchea avoichea horddeam* thaun atanch kuxin kaddleant?
10 Dor ek pavtt to oxem mhunntta: ‘Adneacher-adnea, adneacher-adnea!
Kaideacher-kaido, kaideacher-kaido!*
Hangachem thoddem, thoinchem thoddem.’”
11 Taka lagon, zanchi jib addkholltta ani je porki bhas uloita tanchea udexim Dev hea lokam lagim uloitolo. 12 Tannem tankam ek pavtti sanglolem: “Ho visov gheuncho zago. Thokloleank novean ghottai mellchi mhunn tannim hanga visov gheuncho.” Punn tannim aikon gheunk na. 13 Tednam Jehova tankam porot mhunnttolo:
“Adneacher-adnea, adneacher-adnea!
Kaideacher-kaido, kaideacher-kaido!*
Hangachem thoddem, thoinchem thoddem.”
Punn te tachem aikochenant,
Taka lagon, te addkhollon fattlea vatten poddttole,
Tankam mar lagtolo, te fasak sampoddttole ani tankam dhortole.
14 Tor boddai martoleamno, Jeruzalemachea lokanchea odhikareamno,
Jehovachem utor aikat.
15 Karonn tumi mhunnttat:
“Ami Mornna sangata korar kela,
Ani Fondda* sangata koblat kelea.
Taka lagon, okosmat buddttechea udkacho lott ietolo tednam,
To amchea meren pavchona.
Karonn ami fottik amcho asro kela,
Ani fottingponnam fattlean lipon bosleat.”
16 Taka lagon, Akʼkhea Vixvacho Dhoni Jehova mhunntta:
“Hanv Sionant topasun kaddlolea fatrachi buniad ghaltam,
Tea moladik konnxeachea fatrachi hanv buniad ghaltam.
Zo tacher bhavarth dovorta to kednanch bhieunchona.
17 Hanv neai-ak mezpachi dori
Ani nitivontponnak ollombo* kortolom.
Korveancho paus fottincho asro koslloun uddoitolo,
Ani buddtti tanchea lipʼpachea zageak lottun vhortoli.
18 Mornna sangata tumcho korar moddttolo,
Ani Fondda* sangata tumchi koblat urchina.
Okosmat udkacho lott ietolo tednam,
Tumcho nas zatolo.
19 Jitle pavtti to ietolo,
Title-i pavtti to tumkam vhanvoun vhortolo.
To dor sokallim ietolo,
To disacho ani ratcho vhanvtolo.
Ho sondex kitem to, te bhielearuch somzotole.”*
20 Karonn paim posraunk khatt lhan poddtta,
Ani pangrunk chador oxir poddtta.
21 Aplem kortutv, aplem vichitr kortutv purnn korchem mhunn,
Aplem kam, aplem ojapachem kam purnn korchem mhunn,
Jehova Perazim Dongrar utthlolo toso, to uttʼttholo.
Gibeonachea falkea* lagim tannem panvl ghetlolem toxem, to panvl ghetolo.
22 Fokannam korinakat,
Na zalear tumcheo sanklleo anikui ghott korun uddoitole,
Karonn hanvem, Akʼkhea Vixvacho Dhoni, fouzancho Dev Jehova koddlean aikolam ki,
Tannem akʼkhea desacho* nas korunk tharaila.
23 Kan diat ani hanv sangta tem aikat,
Hanv kitem sangta tem dhean diun aikat.
24 Xetant zot ghalta to munis, bim vompchea poilim dis-bhor zot ghalit ravta kai?
To soglo vell matieche gulle* foddun zomin fusfuxit korit ravta kai? Na!
25 Zomin ek-sarki kelea uprant,
To jirem ani kallem jirem ximpddaina kai?
Toxench gonv, zovar ani zov* ap-aplea zagear vompun,
Ani xetachea ximer holke toreche gonv* vompna kai?
26 Dev taka sarki vatt xikoita,*
Tacho Dev taka suchounneo dita.
27 Kallem jirem, mollnnek uzar kortat tea lakddachea follean* maddoinant,
Ani jireacher kednanch mollnnechim rodam* choloinant.
Tache bodlek kallem jirem danddean boddoitat,
Ani jirem boddien boddoitat.
28 Ek munis daneachem pitt zai meren mollnni korit ravta kai?
Na, to daneacho churo zai meren mollnni korit ravona.
Ani to ghoddeank uzar korun mollnnechim rodam tache voilean choloita tednam,
To daneacho churo zai meren tachea voilean tim choloina.