Izaias
34 Raxttramno, lagim ieun aikat!
Veg-vegllea desantlea lokamno, dhean diat!
Prithum ani tantunt jem kitem asa,
Zomin ani tantunt jem kitem upzota, tea sogleamnim aikonchem!
2 Karonn Jehovacho rag soglea raxttrancher pettla,
Tanchea soglea fouzancher to khub ragar asa.
To tancho purnn toren nas kortolo,
To tankam jivexim martolo.
3 Tanchea meloleank purchenant,
Ani tanchea moddeanchi ghann voir voitoli,
Tanchea rogtan dongor pigollttole.*
4 Mollbachi sogli fouz kuson voitoli,
Ani mollbak kovllea bhaxen guttlaun dovortole.
Zoxi drakxanchea valichim panam sukon sokol poddttat,
Ani anjirachim follam bavon sokol poddttat,
Toxich mollbachi fouz bavon sokol poddttoli.
5 “Karonn mollbar mhoji tolvar rogtan bhiztoli.
Hi tolvar Edomak khast lavunk sokol ietoli,
Tea lokancher ietoli, zancho hanvem nas korunk tharailam.
6 Jehova koddem ji tolvar asa, ti rogtan bhortoli.
Ti chorben bhortoli,
Menddranchea ani bokddeanchea rogtan,
Menddranchea kiddnechea chorben ti bhortoli,
Karonn Jehova Bozra xarant bolidan bhettouncho asa,
Ani to Edomant zaitea zannank jivexim marcho asa.
7 Ranvotti boil pasun tanchea sangata nas zaunk voitole,
Tornatte boil, vaddlolea ghott-mutt boilam sangata voitole.
Tancho des rogtan bhiztolo,
Ani tanchi mati chorben fugtoli.”
8 Karonn Jehovan dusmanancho bodlo gheunk dis tharaila,
Sionak neai mellcho mhunn bodlo gheunk tannem ek voros tharailam.
9 Tacheo* nhoim-eo damor zatoleo,
Ani tachi mati gondhok zatoli,
Ani tachi akʼkhi zomin zolltta toslo damor zatoli.
10 Tem dis ani rat zollot ravtolem,
Tantuntlean sodankal dhunvor ieit ravtolo.
Pillgean-pillgi poriant tem padd zaun urtolem,
Porot kednanch tantuntlean konn pasar zaunchona.
Mezpachi dori ani ollombo* gheun Dev tem xar meztolo,
Karonn tannem tacho nas korunk ani tem osadd korun soddunk tharailam.
12 Tachea khoincheach odhikareak raza korchenant,
Ani tache sogle kunvor nanch zatole.
13 Tachea vhoddlea gopurancher kantteanchim zhaddam vaddttolim,
Tachea kilʼleancher ranvotti jhilkuttam* ani kantteanchim jhilkuttam zatolim.
14 Oronnʼnneantlim ranvotti zonvaram kuleo ghaltolea zonvaram sangata ravtolim,
Ani ranvotti bokddo aplea sangateak apoitolo.
Ratchea vellachem suknnem* thoim ravtolem ani suseg gheunk taka thoim zago mellttolo.
15 Uddtta toslo sorop thoim aplem bill* kortolo ani tantiam ghaltolo,
To tankam ub ditolo ani aplea pilank aple savllent ektthaim kortolo.
Thoim xikar korpi suknneancheo* zoddio ektthaim zatoleo.
16 Jehovachea pustokant sodhat ani tem vhoddlean vachat:
Tanchea modem eklo-i unno aschona,
Tim soglim zoddien astolim, eklo-i sangati nastana aschona.
Karonn ho hukum Jehovachea tonddantlean asa,
Ani tache povitr xokten tankam ektthaim keleant.
17 Tannench tanchea pasot sort ghatlea,
Ani tannench aplea hatamnim tankam zago mezun dila.*
Te sodankal tacher kobzo kortole,
Ani pillgechea-pillge poriant tim thoim ravtolim.