Izaias
36 Hezekia Razachea razvottkechea 14-vea vorsa, Asiriecho raza Senakeriban Judachea soglea kilʼleanchea xarancher akromonn kelem ani tim aplea tabeant ghetlim. 2 Tednam Asiriechea razan Lakisha thaun Rabshakek* eke vhoddle fouje sangata, Hezekia Raza koddem Jeruzalemant dhaddlo. Te thoim gele ani voilea tolleachea kanala lagim vochon ube ravle, zo dhobichea moidana vatten voita tea mha-marga lagim asa. 3 Uprant, Hilkiacho put Eliakim, zaka razachea ghoracher* dekhrekh korunk nemlolo, xastri Shebna ani Asafacho put Joah, zo itihaskar aslo, he tigui taka mellonk bhair gele.
4 Rabshaken tankam mhunnttlem: “Vochon Hezekiak sangat, ‘Vorto raza, Asiriecho raza oxem mhunntta: “Kiteacher mhunn tuka itlo visvas asa? 5 Tum mhunntta, ‘Mhoje lagim zhuz korpachi ievzonn ani foujechem boll pasun asa.’ Punn him soglim polkim utram! Tunvem konnancher visvas dovrun mhojea add vochpachi kapostad keli?* 6 Tea Ejipttacher? To tor maddoilʼlea tonnachea boddie sarko asa! Konnem-i tacho adar gheunk tacher hat dovorlo zalear to tachea hatik toptolo. Ejipttacho raza Faraoh-cher jitle lok visvas dovortat, tanchea pasot to maddoilʼlea tonnachea boddie sarkoch asa. 7 Atam oxem mhunnonakat, ‘Amkam amcho Dev Jehovacher visvas asa,’ Hezekian tor tache unch-unch zage ani tacheo vedi moddun uddoileo ani to Juda ani Jeruzalemachea lokank mhunntta, ‘Tumi fokot heach vedi mukhar man bagoiat.’”’ 8 Tor atam, tujea modem ani mhozo dhoni, Asiriechea raza modem konn jikhta tem polloum-ia: Hanv tuka 2,000 ghodde haddun ditam ani tum tancher bosonk 2,000 ghoddesvar haddun dakhoi. 9 Tum hem korunk xokona zalear, amchea foujecho fuddo koso kortolo? Tunvem Ejipttantle sogle roth ani ghoddesvar haddlear pasun, mhojea dhoniachea razpalak, tachea eka lhan sevokak pasun tum harounk xokchona. 10 Tuka kitem dista? Hanv Jehovachi porvangi nastana hea desacho nas korunk ailam kitem? Jehovan svota mhaka sanglem, ‘Voch, tea desacher akromonn kor ani tachem nisontton kor.’”
11 Tednam Eliakim, Shebna ani Joah-an, Rabshakek mhunnttlem: “Upkar korun tujea sevokam lagim Aramaik* bhaxent uloi, karonn amkam ti bhas somzota. Tum amchea lagim Judevanchea bhaxent uloinaka, karonn xarachea vontticher ube asat te lok aikotat.” 12 Punn Rabshaken mhunnttlem: “Mhojea dhonian mhaka fokot tumkam ani tumchea dhoniak ho sondex sangonk dhaddunk na. Ho sondex xarachea vontticher ube aslolea munxank pasun asa. Karonn tanchi ani tumchi oxi poristhiti zatoli ki tumi tumchich hollxig khatole ani tumchench mut pietole.”
13 Uprant Rabshake thoinch ubo ravon Judevanchea bhaxent vhoddlean oxem mhunnonk laglo: “Vortea razacho, Asiriechea razacho sondex aikat. 14 Raza oxem mhunntta: ‘Tumi Hezekiak tumkam fosounk dium nakat, karonn to tumkam vanchounk xokona. 15 Tachea utrancher patieum nakat zo tumkam Jehovacher visvas dovrunk oxem sangta, “Jehova amkam vanchoitoloch, ani hem xar Asiriechea razachea hatant poddchem na.” 16 Tumi Hezekiachem matui aikonakat. Asiriechea razan mhunnttlam: “Tumi mhoje lagim xanti korat ani mhoje adhin zaiat. Tednam tumchea modlo dor eklo ap-aplea drakxanchea vali thaun ani anjirachea zhadda thaun khaunk pavtolo ani ap-aplea baim-chem* udok pietolo. 17 Uprant, hanv ieun tumkam eka oslea desant vhortolo, zo tumchea desa sarkoch astolo. Thoim zaito dano, novo drakxancho soro, unddo ani voita thoim drakxanche molle astole. 18 Hezekiak oxem mhunnon tumkam fosounk dium nakat, ‘Jehova amkam vanchoitolo.’ Aiz poriant, khoinchea-i raxttracho dev aplea lokank Asiriechea razachea chopkeantlo vanchounk xokla kai? 19 Hamath ani Arpadache dev khoim gele? Khoim gele Sefarvaimache dev? Te Samariek mhojea chopkeantlean vanchounk xokle kai? 20 Tanchea modem ek tori dev oso asa kai zo aplea desak mhojea hantantlo vanchounk xokla? Toxem zalear, Jehova Jeruzalemak mhojea chopkeantlo koso mhunn vanchoitolo?”’”
21 Punn te vogich ravle, tannim kainch mhunnonk na, karonn razan oso hukum dilʼlo: “Tumi taka kainch zobab dium nakat.” 22 Hilkiacho put Eliakim, zaka razachea ghoracher* dekhrekh korunk nemlolo, xastri Shebna ani Asafacho put Joah, zo itihaskar aslo, tannim tigaimnim aple kopdde pinzle ani Hezekia lagim ieun Rabshaken mhunnttlolem tem soglem taka sanglem.