Izaias

39 Tea disamnim, Baladanacho put Merodak-baladan, Babilonacho raza aslo. Tannem Hezekiak chitteo ani dennim dhaddlim. Karonn Hezekia duent aslo ani atam boro zalʼlo mhunn taka khobor mellʼlloli. 2 Hezekian tea sondexkarank khuxalkaien ieukar dilo ani aple sogle theve tankam dakhoile. Tannem tankam chandi, bhangar, balsamachem* tel, dusre torechim moladik telam, soglim hotʼtearam ani aplea bhanddarant asloleo sogleo vostu dakhoileo. Tachea ghorant* ani akʼkhea rajeant osli ekui vost nasli, ji Hezekian tankam dakhounk na.

3 Uprant provadi Izaias, Raza Hezekia lagim ailo ani tannem taka vicharlem: “He munis khoim thaun aileat ani tannim tuka kitem mhunnttlem?” Hezekian mhunnttlem: “Te ek poisulʼlo des, Babilona thaun aileat.” 4 Uprant Izaiasan taka vicharlem: “Tannim tujea ghorant* kitem-kitem polloilem?” Hezekian mhunnttlem: “Tannim mhojea ghorantleo* sogleo vostu polloileo. Mhojea bhanddarant oxem kainch na jem hanvem tankam dakhounk na.”

5 Tednam Izaiasan Hezekiak mhunnttlem: “Atam tum fouzancho Dev Jehovacho sondex aik. 6 Jehova mhunntta, ‘Polloi! Osle dis ieunche asat jednam tujea ghorantlo* soglo thevo Babilonant gheun voitole. Tujea purvozamnim aiz meren jitli girestkai ektthaim kelʼli ti sogli luttun vhortole, kainch urchena. 7 Tuka je put zolmotole tanchea modlea thoddeank Babilonant vhortole ani tankam thoinchea rajmahalant odhikari mhunn nemtole.’”

8 Tednam Hezekian Izaiasak mhunnttlem: “Tunvem zo Jehovacho sondex mhaka sangla, to boro asa.” Uprant tannem mhunnttlem: “Karonn hanv jivo asa tea meren,* mhojea rajeant xanti ani surokxa astoli.”*