Izaias
47 Babilonache ankvar dhuve,
Sokol denv ani dhulʼlint bos.
Kaldeikaranche dhuve,
Zomnir bos, tujea pasot xinvason na,
Karonn tum nazuk asa ani tuje ladd keleat, oxem lok porot kednanch mhunnchenant.
2 Dantem ghe ani dano doll.
Tuji veil* kadd.
Tuzo ghagro voir kaddun bhenddak kas mar, tuje paim dakhoi.
Ani nhoim-eo par kor.
3 Tujem vingllemponn distolem.
Tuka sogleam hujir loz bhogchi poddttoli.
Hanv tuje koddlean sudd ghetolom, ani konnuch mhaka addaunk xokchona.*
4 “Izraelacho Povitr Dev
Amcho Soddoupi zaun asa.
Tachem nanv fouzancho Dev Jehova.”
5 Kaldeikaranche dhuve,
Kallkhant voch ani thoim vogi bos.
Karonn atam lok tuka Rajeanchi Ranni mhunnchenant.
6 Mhaka mhojea lokancho rag ailo.
Hanvem mhojem daiz boxttailem,
Ani hanvem tankam tujea hatan dile.
Punn tunvem tankam doia dakhounk na.
Tunvem zanntteancher pasun ek zodd zum ghatlem.
7 Tunvem mhunnttlem: “Hanv sodankal Ranni zaun urtoli.”
Tunvem hea vostuncher dhean diunk na,
Ani tujea kamancho kitem porinnam zatolo tea vixim tunvem chintunk na.
8 Moujecho mog korpi baile, atam aik!
Tum ji bhirant nastana boslea, ani aplea kallzant mhunntta:
“Hanvuch sogleam-von vorti, mhojea sarki anik konnuch na.
Hanv kednanch vidva zaunchina.
Mhojim bhurgim kednanch morchimnant.”
9 Punn ekach disa bhitor don vostu okosmat tujea thaim ghoddttoleo:
Tujim bhurgim moron voitolim ani tum vidva zatoli.
Tunvem kelʼlea tujea zaitea jadu-ttonak lagon ani bollixtt montram-tontrank lagon,
Heo vostu tujea thaim purnn toren ghoddttoleo.
10 Tuka tujea noxttea kamancher khub visvas aslo.
Tunvem mhunnttlem: “Mhaka konn polloina.”
Tujea zannvaien ani gineanan tuka bhottkoilea,
Ani tum tujea kallzantuch mhunntta: “Hanvuch sogleam-von vorti, mhojea sarki anik konnuch na.”
11 Punn tujer odruxtt ietolem,
Ani tujim khoinchinch montram-tontram tem addaunk xokchimnant.*
Tujer tras ietole, ani tujean te addaunk zaunchenant.
Tunvem chintunk pasun na tea toren, tuzo okosmat nas zatolo.
12 Tum tornattponnar thaun montram-tontram
Ani zaite jadu-ttona kortali toxi, korit rav.
Ghoddie tea udexim tuka faido zait,
Ani tum ghoddie lokancher bhirant ghalit.
13 Tujea hispa-bhair solʼle diupeank lagon tum khub thoklea.
Tannim fuddem ieun tuka vanchounchem mhunn tankam sang.
Je mollbachi bhokti kortat,* je noketrank dhean diun polloitat,
Je novo chondrim polloun fuddar sangtat,
Tannim ieun tujea sovem kitem ghoddchem asa tem sangchem.
14 Polloi! Te suklolea tonna sarke asat.
Uzo tankam lasoun uddoitolo.
Te apleakuch ujeachea agttea thaun salvar korunk xokchenant.
Ub gheunk he inglle nhoi,
Ani mukhar boson xekonk melltta toslo ho uzo nhoi.
15 Tum tornattponnar thaun jea jadu-ttona korpeam sangata vavr korit ailea,
Tanchi poristhiti pasun oxich zatoli.
Te bhottoktole ani hanga-thoim ximpoddttole.*
Tuka vanchounk konnuch aschona.