Izaias
56 Jehova oxem mhunntta:
“Neai-an vag ani nitivontponnan chol,
Karonn beginuch hanv tumkam taronn ditolom,
Ani mhojem nitivontponn ugddapem kortolom.
2 To munis khuxal, zo hem korta
Ani hea vostunk chittkon ravta,
Zo Sabath palltta ani to boxttaina,
Ani zo soglea torechea vaitt kamam thaun pois ravta.
3 Jehovachi bhokti kortolea pordexi munxan oxem mhunnchem nhoi,
‘Jehova mhaka aplea lokam koddlean kuxin kaddttolo.’
Ani hizddean* oxem mhunnchem nhoi, ‘Polloi! Hanv tor ek suklolem zhadd.’”
4 Karonn Jehova oxem mhunntta: “Je hizdde mhoje sabath pallttat, mhaka avoddtta tench kortat ani mhozo korar samballttat,
5 Tankam hanv mhojea ghorant ani tachea durgam bhitor ek zago* ani nanv ditolom,
Jem, put ani dhuvo aslolea poros odik borem astolem.
Hanv tankam sodankal urta toslem ek nanv ditolom,
Ek oslem nanv, jem kednanch piddʼddear zaunchem na.
6 Je pordexi lok Jehovachi seva korunk,
Jehovachea nanvacho mog korunk,
Ani tache sevok zaunk fuddem sortat,
Je Sabath samballttat ani to boxttainant,
Ani je mhojea korarak chittkon ravtat,
7 Tankam pasun hanv mhojea povitr dongrar haddttolom,
Ani mhojea magnneachea ghorant hanv tankam khuxalbhorit kortolom.
Tannim mhojea vedicher jeo hulpailoleo bhetto ani bolidanam bhettoilim tim hanv manun ghetolom.
Karonn mhojea ghorak, soglea desantlea lokam pasot magnneachem ghor oxem mhunnttole.”
8 Izraelachea hanga-thoim ximpoddlolea lokank ektthaim korta, to Akʼkhea Vixvacho Dhoni Jehova mhunntta:
“Jea lokank ektthaim keleat, tanchea sangata hanv anikui lokank ektthaim kortolom.”
9 Ranvotti zonvaramno, ieiat,
Ranantlea soglea zonvaramno, khaunk ieiat.
10 Tache rakhonndar kuddʼdde, tanchea modlo konnuch dhean dina.
Te sogle mone sunne, je bhonkunk xokonant.
Te fokot add poddttat ani khorxetat, tankam nhidonk avoddtta.
11 Te osle bhukelʼle sunne,
Zanchem pott kednanch bhorona.
Te osle gonvlli, zankam somjikai na.
Te sogle apleak zai tench kortat.
Dor eklo aplea faideak lagon fottingponnam korta ani mhunntta:
12 “Ieiat, hanv drakxancho soro gheun ietam,
Ami pieun ttaitt zaum-ia.
Faleancho dis aicheach bhaxen astolo, to aichea poros odik boro astolo!”