Vilap
א [Alef]*
1 Jem xar eka vellar lokamnim bhorlolem aslem, tem atam koxem mhunn eksurem boson asa!
Eka vellar dusrea raxttram poros chodd bhorlolem aslem, tem xar atam koxem mhunn eke vidve sarkem zalam!
Zaitea vattaranche* kunvri sarkem aslem, tem atam koxem mhunn ek chakorn zalam!
ב [Beth]
2 Tem rat-bhor thambonastana roddtta, ani tachea poleancher dukam vhanvtat.
Tachea soglea mog korpeam modlo taka bhuzvonn dita toslo eklo-i na.
Tachea soglea sangateamnim tacho visvasghat kela, te sogle tache dusman zaleat.
ג [Gimel]
3 Juda koident gelam, taka koxtt-dukh ani koddok gulamponn sosunk poddtta.
Taka dusrea raxttramnim ravchem poddtta, taka visov gheunk zago mellona.
Sonkoxttachea vellar, tachea zulum kortoleamnim tachea fattik lagon taka dhorlem.
ד [Daleth]
4 Siona vatten vochpi roste dukh kortat, karonn porob monounk konnuch iena.
Tache sogle darvontte padd zaun geleat, tache iadnik haskar-suskar soddttat.
Tacheo ankvareo* dukh kortat ani tem dukhan tollmolltta.
ה [He]
5 Tache dusman tache dhoni zaleat, tea dusmanank kainch poddon vochonk na.
Tachea zaitea opradank lagon Jehovan* tacher dukh haddlam.
Dusman tachea bhurgeank koident gheun gela.
ו [Waw]
6 Sionachea dhuvechi sogli mhoima nanch zalea.
Tache kunvor tea horonnam* bhaxen asat zankam chorov mellona,
Ani dusman tanchea fattik lagla, punn te samke thokon choltat.
ז [Zayin]
7 Koxtt-dukhachea ani ghor-dar naslolea hea disamnim,
Jeruzalemak adim tachea lagim aslolea soglea moladik vostuncho ugddas ieta.
Jednam tache lok dusmanachea hatant poddle ani taka modot korunk konnuch naslo,
Tednam tachea dusmanamnim hem polloilem, ani tem poddlam mhunn te hansonk lagle.
ח [Heth]
8 Jeruzaleman vhoddlem patok kelam.
Taka lagon tem ek vitt haddtta tosli vost zalam.
Taka khub man ditale te sogle atam taka kainch valor na koxem lekhtat, karonn tannim tachem vingllemponn polloilam.
Tem apunnuch pirgota ani lojen aplem tondd dusrea vatten korta.
ט [Teth]
9 Tachem mhellemponn tachea ghagreancher asa.
Tannem fuddara vixim kainch chintunk na.
Tem oxe toren poddlem ki taka polloun soglim ojap zalim, taka bhuzvonn diunk konnuch na.
Jehova Deva, mhojem dukh polloi, karonn dusman boddai marta.
י [Yod]
10 Dusmanan tache sogle theve luttleat.
Tujea sobhent ieunchem nhoi mhunn tunvem zankam adnea diloli,
Tim soglim raxttram tachea povitr zagear bhitor sortat tem tannem polloilem.
כ [Kaph]
11 Tache sogle lok roddttat, te jevonn sodhtat.
Jive uronk kitem tori mellchem mhunn tannim apleo sogleo moladik vostu dileo.
Jehova Deva, polloi, hanv ek valor naslolea baile* bhaxen zalam.
ל [Lamed]
12 Rostea voilean pasar zatoleamno, mhojea dukha vixim tumkam sogleank kainch poddon vochonk na kai?
Mhaka polloiat ani mhojer dhean diat!
Jehovan aplea zollttea ragachea disa mhaka jem dukh sosunk lailem,
Tachea sarkem anik dukh asa kai?
מ [Mem]
13 Tannem voir thaun mhojea haddamnim uzo dhaddla, ani to mhojem dor ek hadd lasoun uddoita.
Tannem mhojea paim-a pasot ek zall posrailam, to fattim vollonk mhojer dobhav ghatla.
Tannem mhaka ekttich poddlole baile bhaxen kelea.
Akʼkho dis hanv duent astam.
נ [Nun]
14 Tannem aplea hatamnim mhoje guneanv mhojea maner zum-a bhaxen bandleat.
Tannem te mhojea maner dovorleat, ani mhojea bhitor anik boll uronk na.
Jehovan mhaka oslea lokanchea hatant dilam zancho hanv fuddo korunk xokona.
ס [Samekh]
15 Mhojea soglea xoktivont munxank Jehovan mhojea thaun pois xevttun uddoileat.
Mhojea tornatteank mostunk tannem mhojea add lokancho ek zomo apoila.
Jehovan Judachea ankvar dhuvek drakxam maddoupachea zagear maddoun uddoilea.
ע [Ayin]
16 Taka lagon hanv roddttam, mhojea dolleantlean dukam vhanvtat.
Karonn zo mhaka bhuzvonn diunk xokta, vo mhaka ghottai diunk xokta to mhojea thaun khub pois asa.
Mhojea putam pasot kainch bhorvonso na, karonn dusmanak zoit mellʼllam.
פ [Pe]
17 Sion aple hat posraun asa, taka bhuzvonn diunk konn na.
Jehovan, Jakoba bhonvtonnim aslolea tachea soglea dusmanank tacher akromonn kor mhunn hukum dila.
Jeruzalem tanchea pasot ek vitt haddtta tosli vost zalam.
צ [Tsade]
18 Jehova nitivont asa. Tachi adnea moddun hanv tachea add gelam.
Soglea lokamno aikat ani mhojem dukh polloiat.
Mhojeo ankvareo* ani mhoje tornatte chedde koident geleat.
ק [Qoph]
19 Hanvem mhojea mog korpeank apoile, punn tannim mhozo visvasghat kela.
Jive uronk jevonn sodhta astana,
Mhojea iadnikancho ani vhoddilancho xarant nas zaun gela.
ר [Resh]
20 Jehova Deva, hanv kitlea vhoddlea sonkoxttant asam tem polloi.
Hanv bhitorlean* dukhin tollmollttam.
Mhojem kalliz bhitorlea-bhitor foddfoddtta, karonn hanv samkench tujea add gelam.
Bhair tolvarin mhojea bhurgeancho jiv kaddla, ghora bhitor pasun moronn asa.
ש [Shin]
21 Lokamnim mhojem roddop aikolam, mhaka bhuzvonn diunk konnuch na.
Mhojea soglea dusmanamnim mhojer ailolea odruxtta vixim aikolam.
Te khub khuxal asat, karonn hem odruxtt tunvem haddlam.
Punn tum to dis pasun haddttolo, zachea vixim tunvem kolloilam, jednam tanchi-i poristhiti mhojea sarkich zatoli.
ת [Taw]
22 Tanchea soglea vaittponnacher tum dhean di,
Ani mhojea soglea opradank lagon tum mhojea sangata koddok ritin vaglo tosoch tanchea-i sangata koddok ritin vag.
Karonn hanv khub dukhi asam ani mhojem kalliz duent asa.