Vilap
א [Aleph]
2 Jehovan, Sionache dhuvek aplea ragachea kupan koxi dhamplea tem polloi!
Tannem Izraelachi sobitkai mollba voilean zomnir xevttilea.
Aplea ragachea disa tannem aplea paim-anchea monnoiecho* ugddas dovrunk na.
ב [Beth]
2 Jehovan doia-maia dakhoinastana, Jakobache sogle ravpache zage gillun uddoile.
Krodhan bhoron tannem Judachea dhuveche kilʼle moddun uddoile.
Tannem tachem raj ani tachea kunvrank zomnir xevttun tancho opman kelo.
ג [Gimel]
3 Ragachea bharan tannem Izraelachem dor ek xing katrun uddoilem.*
Dusmanan akromonn kelem tednam tannem aplo uzvo hat fatti vhelo,
Ani Jakobacher tacho rag ujea bhaxen pettot ravlo, jea udexim bhonvttonchi dor ek vost lason kabar zali.
ד [Daleth]
4 Tannem dusmana bhaxen aplo dhonu toiar kelʼlo asa,* tannem dusmana bhaxen akromonn korunk aplo uzvo hat ubarla.
Amchea nodren moladik asle tankam sogleank to jivexim marit ravlo.
Tannem Sionachea dhuvechea tombunt aplo krodhacho uzo votoilo.
ה [He]
5 Jehova eka dusmana sarko zala.
Tannem Izraelak gillun uddoila.
Tannem tache sogle gopur gillun uddoileat,
Tannem ghott durgam aslole tache sogle zage nas keleat.
Ani tannem Judachea dhuvecheo dukhi-khonti ani tichem roddnnem vaddoilam.
ו [Waw]
6 Bagent aslolea khompi bhaxen, to aplo tombu sarko kabar korun uddoita.
Tannem aplea porbecho xevott* kela.
Jehovan Sionant porob ani sabathacho ugddas pasun uronk diunk na,
Ani aplea bhirankull ragan bhoron tannem razak ani iadnikak nakarla.
ז [Zayin]
7 Jehovan apli vedi nakarlea,
Aplea povitr zagea voilean apli maniotai kaddlea.
Tannem tachea vhoddlea gopurancheo vontteo dusmanachea hatant dileat.
Porbecho dis zalʼlea bhaxen, te Jehovachea ghorant vhoddlean bovall kortat.
ח [Heth]
8 Sionachea dhuvechem durig apunn moddun uddoitolo mhunn Jehovan nichov kela.
Tannem mezpache dorien taka mezlam.
Tacho nas korunk* to fatti soronk na.*
Tachea durgak ani tachea rakhnnechea vonttik to dukh korunk laita.
Tankam tannem oskot keleant.
ט [Teth]
9 Tache darvontte zomnint purovleat.
Tannem tache lokhnnache dandde moddun, tancho nas kela.
Tacho raza ani tache kunvor raxttram modem koident asat.
Kaido* mhunnttlear nanch, tachea provadeank pasun Jehova koddlean koslench dorxon mellona.
י [Yod]
10 Sionachea dhuveche vhoddil zomnir vogi bosleat.
Te aplea mathear dhulʼl uddoitat ani sak ghaltat.
Jeruzalemacheo ankvareo apleo mano bagoun bosleat.
כ [Kaph]
11 Dukam golloun-golloun mhojea dolleank puro zalam.
Hanv bhitorlean* dukhin tollmollttam.
Mhojea lokanchea dhuvechea* nisonttonak lagon,
Ani lhan bhurgim ani ballkam xarachea nakeancher ghunvoll ieun poddttat dekhun, mhojem kalliz samkem tunttlam.*
ל [Lamed]
12 Xarachea nakeancher, zokhmi zalʼlea lokam bhaxen tankam ghunvoll ieta tednam,
Ani te ap-aplea avoichea vengent jiv soddttana,
“Dano ani drakxancho soro khoim asa?” mhunn te ap-aplea avoik vicharit ravtat.
מ [Mem]
13 Jeruzalemache dhuve, hanv tuka koslem udharonn dium?
Vo tum kitea sarkem oxem hanv mhunnom?
Sionache ankvar dhuve, tuka bhuzvonn diunk hanv kitea sangata tuji sor korum?
Doria bhaxen tujem nisontton pois-pois meren posorlam, konn tuka borem korunk xokta?
נ [Nun]
14 Tujea provadeamnim tujea vixim jim dorxonam polloilim tim khottim ani pokoll aslim,
Ani tuje guneanv tuka ukteponnim sangon tannim tuka koident vochpachem addaunk na,
Punn te tuka khottim ani fosoitat toslim dorxonam sangot ravle.
ס [Samekh]
15 Rostear pasar zaupi soglim tujeo moskoreo korun talleo martat.
Jeruzalemache dhuvek polloun ojap zaun fivnneo* ghaltat ani apli tokli haloun mhunnttat:
“‘Sogleant sobit xar, soglea prithumecho sontos,’ oxem zachea vixim mhunnttale tem hench xar kai?”
פ [Pe]
16 Tuka polloun soglea dusmanamnim aplem tondd ugoddlam.
Te fivnneo* ghaltat ani aple dant korkoraun mhunnttat: “Ami taka gillun uddoilam.
Ami jea disachi vatt polloitale, to dis aila! Ami to dis amchea dolleamnim polloila!”
ע [Ayin]
17 Jehovan jem korunk tharailʼlem toxench kelam, tannem jem sanglolem tem kelam.
Adlea kallar tannem ji adnea diloli tea pormonnem tannem kelam.
Tannem doia-maia dakhoinastana taka moddun uddoilam.
Tannem tujea dusmanak, tuka haroun khuxal zaunk sondhi dilea, tannem tujea dusmananchem boll vaddoilam.*
צ [Tsade]
18 Sionachea dhuvechea durga, tanchem kalliz Jehovak ulo marta.
Dis-rat tanchea dolleantlean nhoim-e bhaxen dukancheo zhori vhanvot ravom.
Tum tukach suseg dinaka, tujea dolleank matui visov dinaka.
ק [Qoph]
19 Utth! Ratchea vellar, nodor dovrunk* suru kortat tea vellar, rodd.
Jehova mukhar tujem kalliz udka bhaxen votoi.
Tujea bhurgeanchea jivak lagon, je rosteachea dor eka konnxear bhuken ghunvoll ieun poddttat,
Tankam lagon tachea mukhar tuje hat ubar.
ר [Resh]
20 Jehova Deva, zanchea sangata tum itlo khoraien vagla tea tujea lokank polloi.
Bailamnim heach toren aplea sonstik,* apnnem zolmak haddlolea ghot-mutt bhurgeank khait ravchim kai?
Vo iadnikank ani provadeank, Jehovachea povitr zagear jivexim marche kai?
ש [Shin]
21 Tornatte ani zanntte rosteancher moron poddlole asat.
Mhojeo ankvareo* ani tornatte tolvarin moron poddleat.
Tujea ragachea disa tunvem tankam jivexim marle, doia-maia nastana tunvem tankam marun uddoile.
ת [Taw]
22 Lokank porbek apoitat tea bhaxen, tum mhojer charui vatten akant apoita.
Jehovachea ragachea disa konnuch pollon vochonk na vo vanchonk na.
Zankam hanvem zolm dilo* ani vaddoilim, tancho mhojea dusmanamnim nas kelo.