Mika
3 Hanvem mhunnttlem: “Jakobachea mukheleamno,
Ani Izraelachea ghoranneachea odhikareamno, upkar korun aikat.
Neai korop tumchi zobabdari nhoi kai?
2 Punn tumi boreacho dves kortat ani vaittacho mog kortat.
Tumi mhojea lokanchi kat solun kaddttat ani tanchea haddam voilem mas voddun kaddttat.
3 Itlench nhoi, tumi mhojea lokanchem mas khatat,
Ani tanchi kat kaddttat.
Zoxem aidonant* mas xizounk tache kuddkean-kuddke kortat,
Toxench, tumi mhojea lokanchim haddam moddttat ani tancho churo kortat.
4 Tea vellar, te modoti pasot Jehovak ulo martole,
Punn to tankam zobab diunchona.
Tanchea noxttea kamank lagon,
To tanchea thaun pois voitolo.*
5 Provadi mhojea lokank chukichea vatter vhortat.
Tankam khaunk melltta* tednam te mhunnttat, ‘Xanti asa!’
Punn konnui tankam khaunk dina* tednam te tachea add zhuzachi kollounni kortat.
Oslea provadeam add Jehova oxem mhunntta:
6 ‘Rati porim tumi kallkhant astole, ani tumkam koslench dorxon mellchem na,
Tumchea bhonvtonnim fokot kallokhuch astolo, tumi fuddar parkhupeachem kam korunk pavchenant.
Provadeam pasot suria buddttolo,
Disacho kallokh zatolo.
7 Dorxonam polloitoleank loz zatoli,
Fuddar parkhupi niraxi zatole.
Tankam sogleank aplem tondd dhampchem poddttolem,*
Karonn tankam Deva koddlean zobab mellchona.’”
8 Nitin ani dhiran,
Jakobak tacho oprad* ani Izraelak tachem patok sangonk,
Jehovachea povitr xokten mhaka bollan bhorlo.
9 Jakobachea mukheleamno,
Ani Izraelachea ghoranneachea odhikareamno, upkar korun aikat.
Tumkam nitichi vitt ieta ani nitt asa tem tumi vankddem kortat.
10 Tumi Sionak rogot varoun ani Jeruzalemak onitivontponnan bandun kaddlam.
11 Tiche fuddakar gheupi zhoddtti korunk lonch* ghetat,
Tiche iadnik xikounk poixe ghetat,
Ani provadi fuddar parkhunk poixe* magtat.
Tori astana, te Jehovacher patieun* oxem mhunnttat:
“Jehova amchea sangata na kai?
Amcher koslench odruxtt ieunchem na.”
12 Tor tumkam lagon,
Sion zot ghatlolea eka xeta sarkem zatolem,
Jeruzalem fatranchea raxi sarkem zatolem,
Ani Devachem Ghor aslolea dongrachem* ran zatolem.