Ek sanjer, jednam Rebeka kollso bhorun ietali tednam Abrahamacho chakor tichea-xim dhavon gelo. Tannem khaltikaien tika mhunnttlem: “Kurpa korun, tujea kollxeantlem mhaka ilem udok pieunk di.” Ho munis pois thaun aila mhunn Rebekak kollon ailem. Tinnem rokddoch khandavoilo kollso kaddun hatant dhorlo ani taka zai titlem udok pieunk dilem. Uprant, tinnem polloilem ki tachea lagim dha unttam asat ani tankam pieunk kollombent udok na. Aplea unttank konn udok ghaltolo mhunn to munis chinta tem Rebekan polloilem. Ti aplea lagim ghoddtta tem korun taka modot korunk sodhtali. Tor, tinnem mhunnttlem: “Tujea unttankui, tannim pottbhor pieupa itlem, udok hanv kaddun dita.”—Utpoti 24:17-19.

Unttank fokot thoddench udok nhoi punn pottbhor udok diunk ti toiar zata. Ek untt sarko tanelʼlo asa zalear, to sumar 95 litr udok pieunk xokta! Sogle untt tanelʼle asle zalear tika khub voram kotthin vaur korcho poddlo astolo. Te untt ekdom tanelʼlo nasle mhunn uprant amkam kollon ieta. Punn, apunn udok dita mhunn tinnem sanglolem tednam Rebeka hem zannam asli kai? Na. Tea zannttea onvollkhi munxak ap-khuxen poramos dakhounk ani tachea pasot kitlo-i vaur korunk ti toiar asli. Tannem ticho adar ghetlo. Ti soddsoddit kollxeantlem udok kollombent rokoitali ani anink udok kaddunk baincher porot-porot dhavot voitali. Hea soglea vellar to bariksannen ticho vaur polloit aslo.—Utpoti 24:20, 21.

Sanjecho vell zalʼlo. Rebeka khub voram baim-xim urli mhunn Bible amkam sangona. Ti ghora pavta mhunnttlear, gorchim soglim nhidlolim asli vo tika udok haddunk itlo vell kiteak zalo tem pollounk konn-ui ailo oxem-i Bible amkam sangona.