Bible obheas kelear amkam khub faido zata. Punn hem korop ghoddie sodanch sompem zaunchem na. Kotthin zata tednam pasun Bible xikot ravonk tumkam koxi modot zatoli? Hea vixim ami fuddem polloum-ia.

1. Bible obheas kelʼlean amkam koso faido zata?

Bible sangta: “Devachem utor jivem ani xoktivont asa.” (Hebrevank 4:12) Amche vixim Dev kitem chintʼta ani taka koxem bhogta tem amkam Bible-antlean kollon ieta. Bible obheas korun amkam khorem ginean melltta. Punn titlench nhoi, amkam zannvai ani bhorvonso pasun melltta. Ani sogleant mhotvachem mhunnttlear, Jehova lagim ixttagot korunk amkam modot zata. Toxench, Bible obheas kelʼlean ami amchea jivitant sudharnni korunk pavtat.

2. Bible-antlea sotancho valor zannam zavop kiteak gorjechem?

Bible-antlim sotam moladik motiam sarkim asat. Taka lagon, Mhonnʼnneo 23:23 mhunntta, “kedeai molan sot melloi. Tem viki naka.” Ami Bible-antlea sotancho valor zannam zatat tednam, kitleo-i oddchonneo asat zalear pasun ami Bible obheas korpachem soddun diunchimnant.—Mhonnʼnneo 2:4, 5 vachat.

3. Bible obheas korit ravonk Jehova tumkam koso modot kortolo?

Jehova Dev amcho Rochnnar ani Ixtt zaun asa ani aplea vixim xikot ravonk to tumkam modot korunk sodhta. Bible xikonk to tumkam “itsa dita ani ti itsa purnn korunk xokti-i dita.” (Filipkarank 2:13 vachat.) Tor Bible xikonk vo xikleant tem lagu korunk tumkam anik urba zai zalear to tumkam ti ditoloch. Toxench, tumcher oddchonneo ietat ani tumkam virodh sosunk poddtta tednam Dev tumkam ghottai ditolo. Bible xikot ravonk adar di mhunn tumi Jehova lagim magnnem korit ravonk zata.—1 Tesalonikekarank 5:17.

KHOLAIEN XIKAT

4. Tumchea jivitant Bible obheasak poilo zago diat

Ek-ek pavtt amkam itlim kamam astat ki Bible obheas korunk amche lagim velluch na oxem amkam dista. Tor ami kitem korunk zata? Filipkarank 1:10 vachun hea prosnanche zobab zannam zaum-ia:

• Tumchea jivitant khoinchim kamam ‘chodd mhotvachim’ oxem tumkam dista?

• Bible obheasak tumi jivitant poilo zago koso diunk zata?

1. Eke baldent tumi poilim renv ani magir fator ghaltat zalear tantunt sogle fator ghalunk zago urcho na

2. Punn te baldent tumi poilim fator ghaltat zalear tumkam renv pasun ghalunk mellttoli. Tech bhaxen, tumi mhotvachea kamank poilo zago ditat zalear tumkam dusrim kamam korunk vell mellttolo

Amkam Devachea margdorxonachi bhuk asa. Tor ami Bible xiktat tednam Devachi vollokh gheun tachi bhokti korunk pavtat. Matev 5:3 vachun hea prosnacho zobab zannam zaum-ia:

• Amchea jivitant ami Bible obheasak poilo zago ditat tednam amkam koso faido zata?

5. Virodh sosunk poddtta tednam pasun Bible xikot ravat

VIDEO: Thir Ravlolean Mellʼllolim Besanvam (5:22)

• Francesco Bible xikta mhunn tachea ixttank ani familik kollʼllem tednam tannim kitem kelem?

• Tannem Bible xikpachem bond korunk na dekhun taka koslim besanvam mellʼllim?

2 Timotak 2:24, 25 vachun hea prosnanche zobab zannam zaum-ia:

• Tumi Bible xiktat mhunn tumchea familik ani ixttank koxem dista?

• Tumi Bible obheas kortat tem dusreank avoddna zalear hea versam pormonnem tumi kitem korunk zata? Ani kiteak?

6. Jehovacher patieun ravat

VIDEO: Bodlav Korunk Jehova Amkam Modot Korta (3:56)

• Jehovak manvota tea toren jieunk Jim kosle bodlav korta?

• Tachea udharonnantlean tumkam kitem borem dislem?

Hebrevank 11:6 vachun hea prosnanche zobab zannam zaum-ia:

• ‘Kallzantlean jim Jehovak sodhtat,’ mhunnttlear taka manvota tem korunk vavurtat, tanchea pasot Jehova kitem kortolo?

• Tumi Bible xikonk vavurtat tem polloun Jehovak koxem bhogta?

KITEM XIKLIM

Bible obheas chalu dovrunk tumkam addkholli ieunk xoktat. Punn tumi xikot ravtat tednam tumi sasnak khuxalkaien jieunk pavtolim. Jehovacher patieun ravat ani to tumkam besanvamnim bhortolo.

Porot Ugddas Korum-ia

• Bible-antlim sotam tumkam kiteak moladik zaun asat?

• Tumchea jivitant kitem “chodd mhotvachem” tem tumi koxem vinchun kaddunk zata?

• Bible obheas korit ravonk Jehova lagim modot magop kiteak gorjechem?

ANIK SODHAT

Thoddeamnim char vatto uzar korun aplo vell xanneponnan koso uzar kelo tem zannam zaiat.

“Tumcho Vell Xanneponnan Uzar Korat” (Awake!, February 2014)

Ek bail Jehovak manvota tem korunk sodhtali punn ticho ghov tika somzonaslo. Jehovan tika koxi modot keli tem polloiat.

Amchem Vojem Uklunk Jehova Amkam Xokti Dita(5:05)

Eke bailen Bible obheas bond korunk na dekhun tichea ghovak koxi modot zali tem polloiat.

Hanvem Sotachi Porikxa Keli (6:30)

Jehovachim Sakxim kuttumbant futt ghaltat mhunn lok tancher arop ghalta. Punn hem khorem kai?

“Jehovache Sakxi Kuttumbant Futt Ghaltat vo Mog Vaddoitat?” (Web article)

Amchea jivitant amkam zaite nirnnoi gheunche poddttat. Zoxe, ami khoim ravtolim, koslem kam kortolim, ami kazar zatolim vo na. Punn ami ghetat tea nirnnoi-ancho porinnam amcher ani Jehova lagim aslolea amchea ixttagoticher poddonk xokta. Tor, ami bore nirnnoi ghetlear ami khuxal astolim ani Jehova pasun khuxal zatolo.

1. Bore nirnnoi gheunk Bible-antlean amkam koxi modot melltta?

Ami zo nirnnoi gheunchim asat tea vixim Jehovak koxem dista tem zannam zaunk ami Bible-ant sodh korunk zai. Punn poilim, ami magnnem korun Jehova lagim adar magonk zai. (Mhonnʼnneo 2:3-6 vachat.) Thodde pavtti ami kitem korunk zai tea vixim Bible-ant kaide dilʼle astat ani te kaide pallʼlle zalear amkam boreak poddttolem.

Punn umkoch kaido dilʼlo na tednam ami kitem korunk zata? Jehovan amkam Bible-ant zaitim totvam dilʼlim asat, tim ami pallunk zatat. Him totvam amkam Jehovachem chintop zannam zaunk modot kortat. Jehova Dev munxam sangata koso vaglo hem ami Bible-antlean vachtat tednam tachem chintop amkam kollon ieta. Tor tea pormonnem ami nirnnoi ghetat tednam Jehova khuxal zatolo. Khorench, Bible-a udexim ami khoinchi “vatt dhorunk zai” tem Jehova amkam dakhoita.—Izaias 48:17.

2. Ek nirnnoi gheunchea poilim ami kitem monant dovrunk zai?

Bible sangta: “Xittuk monis apunn koso cholta tacher nodor dovorta.” (Mhonnʼnneo 14:15) Tor, ek nirnnoi gheunchea poilim ami tea vixim bore bhaxen chintunk zai. Ami amkanch vicharunk zata: ‘Hea vixim Bible-ant koslim-i totvam dilʼlim asat kai? Hea nirnnoi-acho dusreancher kitem porinnam zatolo? Ho nirnnoi ghetlea uprant mhaka koxem bhogtolem? Ani Jehovak koxem distolem, to khuxal zatolo kai?’—Dusri Somurt 32:29.

Dusrem mhunnttlear, amchem ontoskornn vo konsiens pasun amkam bore nirnnoi gheunk modot korunk xokta. Ontoskornn mhunnttlear borem ani vaitt somzon gheupachi tank. Tor, ami Devache kaide ani totvam zannam zaun tim pallttat tednam amchem ontoskornn bore bhaxen kam kortolem. (Romkarank 2:14, 15) Amchea pasot kitem borem ani kitem vaitt tem tharaunk fokot Jehovak odhikar asa karonn taka amchem borem zalʼlem zai.

KHOLAIEN XIKAT

3. Bible-achi modot gheiat

VIDEO: Bible Totvam Adarit Nirnnoi Gheiat (5:54)

• Jehovan amkam koslem dennem dilam?

• Hem dennem Jehovan amkam kiteak dilam?

• Hem dennem bore bhaxen uzar korunk Jehovan amkam kitem dilam?

Bible-antlim totvam mhunnttlear kitem tem zannam zaunk ek udharonn polloum-ia. Ami Efezkarank 5:15, 16 vachum-ia. Uprant tumi . . .

• sodanch Bible vachop korunk koso vell kaddunk zata tem polloiat.

• borim avoi-bapui, borim ghov-bail vo borim bhurgim zaunk koso vell kaddunk zata tem polloiat.

• sobhechea mittingek vochonk koso vell kaddunk zata tem polloiat.

4. Bore nirnnoi gheunk ontoskornn toiar korat

VIDEO: “Ek Borem Ontoskornn Samballunk Vavrat” (5:13)

• Emma-n aplem ontoskornn toiar korunk ani Jehovak manvota te nirnnoi gheunk kitem kelem?

Ami koslo nirnnoi ghetlear boro tea vixim ami dusreank kiteak vicharunk zaina? Hebrevank 5:14 vachun hea prosnanche zobab zannam zaum-ia:

• Ami koslo nirnnoi gheuncho tem dusreank vicharche bodlek amkam koslo ontor vollkhon gheunchi tank asonk zai?

• Video-nt dakhoilʼlea pormonnem bore nirnnoi gheunk amchem ontoskornn toiar korunk amkam koxi modot zatoli?

5. Dusreanchem ontoskornn dukhovta toxem vagonakat

Amchea jivitant ami soglim veg-veglle nirnnoi ghetat. Punn amchea nirnnoi-ank lagon dusreanchem ontoskornn dukhovna zaunk ami kitem kortolim? Ami don poristhiti polloum-ia:

Poristhiti 1: Eke bhoinnik umkech toreche kopdde ghalunk avoddtta. Punn ti oslea sobhent voita, zoim bhav-bhoinnank tosle kopdde ghatlear borem disona.

Romkarank 15:1 ani 1 Korintkarank 10:23, 24 vachun sokol dilʼlea prosnanche zobab zannam zaum-ia:

• Hea versam pormonnem hi bhoinn kitem kortoli? Tumchea ontoskornna pormonnem umkench korunk tumkam ghoddie sarkem disot punn dusreanchem ontoskornn dukhovna zaunk tumi kitem kortolim?

Poristhiti 2: Thoddo soro pievop chukichem nhoi mhunn Bible sangta hem ek bhav zannam. Tori astana, apunn kednanch soro pieuncho na mhunn tannem tharailam. Sobhentle bhav taka jevnnak apoitat ani thoim pavtoch to polloita ki te soro pietat.

Upodexok 7:16 ani Romkarank 14:1, 10 vachun sokol dilʼlea prosnanche zobab zannam zaum-ia:

• Hea versam pormonnem ho bhav kitem kortolo? Tumchea ontoskornna pormonnem umkench korop sarkem nhoi oxem tumkam disot. Punn dusrim tem kortat tednam tumi kitem kortolim?

Ek nirnnoi gheunchea poilim kitem korunk zata?

1. Magnnem korun Jehova lagim adar magat.—Jakob 1:5.

2. Bible-ant ani Bible adarit prokaxonamnim aslolim totvam sodhat. Toxench, tumi sotant ghott aslolea bhav-bhoinnancho adar gheunk zata.

3. Umkoch nirnnoi ghetlear, tumkam ani dusreank koxem distolem tem chintat.

KITEM XIKLIM

Ek nirnnoi gheunchea poilim tea vixim Jehovak koxem distolem ani dusreank koxem distolem tem chintʼtat tednam ami bore nirnnoi gheunk pavtat.

Porot Ugddas Korum-ia

• Jehovak manvotat tosle nirnnoi gheunk tumi kitem kortolim?

• Koslo-i nirnnoi gheunchea poilim tumi tumchem ontoskornn koxem toiar kortolim?

• Ek nirnnoi ghetat tednam dusreanchem ontoskornn dukhovna zaunk tumi kitem kortolim?

ANIK SODHAT

Jehova lagim tumchi ixttagot ghott zatoli zalear nirnnoi gheunchea poilim tumi kitem korunk zai?

“Devak Manvotat Tosle Nirnnoi Gheiat” (The Watchtower, April 15, 2011)

Jehova amkam koso modot korta tea vixim anik zannam zaiat.

Jehova Aplea Lokank Vatt Dakhoita (9:50)

Eka munxak ek nirnnoi gheunk kotthin zalem tednam taka koxi modot zali tem polloiat.

Jehova Amkam Bore Nirnnoi Gheunk Modot Korta (5:51)

Eka vixoi-acher Jehovan kaide diunk nant tednam pasun ami taka manvota tem koxem korunk zata tem zannam zaiat.

“Tumkam Sodanch Ek Kaido Zai Poddtta Kai?” (The Watchtower, December 1, 2003)