• Xevottachea Kallar “Utʼtorecho Raza”
    Pahrogopur (Obheas)—(2020) | May

    • 8. Nimannea disamnim dokxinnecho raza konn?

      8 Sonvsarachea Poilea Zhuzant, United States ani Britain sangata mellon zhuzle ani ekdom bollixtt zale. Hea toren, Britain ani United States sangata mellon Anglo-America, sonvsarantli vorixtt razvottki zali. Danielan bhasaunnent sanglolea pormonnem, hea razan “ek vhodd ani bollixtt fouz” toiar keli. (Dan. 11:25) Tor nimannea disamnim Anglo-America dokxinnecho raza zaun asa.c Punn, utʼtorecho raza konn kai?

      UTʼTORECHO NOVO RAZA KONN?

      9. Utʼtorecho novo raza kednam ailo, ani Daniel 11:25 koxem purnn zalem?

      9 1871-ant, Russell ani tachea vangddeamnim sangata mellon Bible obheas korunk suru kelea uprant, ek novo utʼtorecho raza ailo. Tea vorsa, Otto von Bismarck-an German Somraz stapon korunk modot keli. Prussia-cho Raza Wilhelm I, hea somrazacho vo raxttracho poilo somratt zalo, ani tannem tea somrazachea sorkaracho fuddari mhunn Bismarck-ak nemlo.d Fuddlea thoddea vorsamnim, Germany-n, Afrika ani Pacific Ocean-ant aslolea desank, aplea tabeant kele ani Britain-a poros chodd bollixtt zaunk proitn kelo. (Daniel 11:25 vachat.) Germany-n osli ek soin toiar keli ji sumar Britain-achea soinea itlich bollixtt asli. Sonvsarachea Poilea Zhuza vellar aplea dusmana sangata zhuzonk Germany-n ti soin uzar keli.

      10. Daniel 11:25b, 26-ant sanglolim utram koxim purnn zalim?

      10 Germany-chea Somrazak ani tachea soineak kitem zatolem tea vixim Daniel fuddem sangta. Tea bhasaunnent utʼtorecho raza “iesvont zauncho na” mhunn sanglolem. Kiteak? Karonn, te ‘tacher naddbudhim manddtole.’ Ani “tachea borabor eke boxent jevtale tech tache ghorttan kortole.” (Dan. 11:25b, 26a) Daniel-achea disamnim, raza borabor eke boxent jevtale vo “razki meza voilem jevonn” jevtale te, ‘razachi seva’ korpi dorbarantle odhikari zaun asle. (Dan. 1:5) Hi bhasaunni konnak lagu zata? Hi bhasaunni, Germany-chea Somrazantlea odhikareank lagu zata. Tantunt Somrattache senapoti ani soinikache odhikari mellon asat.e Hea odhikareamnim jem kitem kelem taka lagon razacho odhikar gelo ani Germany-nt novo sorkar ghoddon ailo. Hea bhasaunnent fokot German Somraz haravtolem mhunn sangonk na, punn dokxinnechea raza sangata kelʼlea zhuzacho porinnam kitem zatolo hem-ui sanglolem. Utʼtorechea raza vixim sangtana, thoim oxem boroilam: “Tachi fouz ximpoddtoli; ani puskoll soinik zhuzant morun poddtole.” (Dan. 11:26b) Adim sanglolea pormonnem, Sonvsarachea Poilea Zhuzant, German ‘fouz ‘ximpoddli’ ani zaite “soinik zhuzant morun” poddle. Munxachea itihasant, khoincheach zhuzant moronk na titlo lok hea zhuzant melo.