AMCHEM KRISTI JIVIT

Sumanachea Modlea Mittingecho Ek Novo Lekh

Janer 2018 thaun, sumanachea modlea mittingent ami New World Translation of the Holy Scriptures (nwtsty) hachea online study edition-antlea obheasachea tipnnecher ani media-cher bhasabhas kortolim. Tumchea bhaxent study edition na zalear pasun ami tem xiktolim. Khorench, hea mahiti udexim tumchi mittingechi toiari anik bori zatoli. Ani mhotvachem mhunnttlear, oxem kelʼlean amcho mogall bapui Jehova thaim tumi anik lagim sortolim.

OBHEASACHEO TIPNNEO

Obheasacheo tipnneo Bible versanchi sonvskrutik, bhugollik ani bhaxa sombondit bariksannechi mahiti dita.

Matev 12:20

Dhunvorti doxir vo minnminntti vat: Zoitunachea telan bhorlolem ek lhan matiechem aidon ghorant divo mhunn uzar kortale. Tantuntli flax-achi vat telak voir haddun uzo pettoun dovortali. “Dhunvorti doxir” hea grek utracho orth ek vat zacho uzo palonk pavla vo palovla punn tantunt aslolea kittʼttek lagon dhunvor bhair sorta. Jezu khaltea ani khala uddoilolea lokancho bhorvonso kednanch palonk diuncho na mhunn Izaias 42:3-ant tachea doia-maia vixim bhakit kelʼlem.

Matev 26:13

Khorench: ‘A·menʹ hem Hebrev utor, Grek bhaxen-ui a·menʹ mhunn uzar kelam, zacho orth “toxench zaun di,” vo “khorench.” Jezun zaite pavtt ek sangnnim korunk, utor diunk, vo bhakit korchea adim hem utor uzar kelem. Oxem kelʼlean aplem sangnnem kitlem sotachem ani patieupa sarkem tem tannem dakhoun dilem. Povitr borovpant “khorench,” vo amen, him Jezuchim utram dusream borovnnea poros vegllim aslim. Juanvachea xubhvortomanant Jezuchem hem utor sogle pavtti ek-fattlean-ek (a·menʹ a·menʹ) uzar kelam. Him utram, “ekdom khorem” oxim bhaxantor keleant.—Ju. 1:51.

MEDIA

Fotto, chitram ani avaz naslolea viddeo vorvim Bible-ant asloli bariksannechi mahiti dakhoilea.

Betfage, Zoitunancho Dongor, ani Jerusalem

Ho viddeo ek vatt dakhoita zo Jerusalemachea udente thaun bhitor sorta ani zoitunanchea dongrachea unchlea zagear pavta. Hea udentechea zageak Bible-achea disamnim Betfage mhunnttale ani aiz taka et-Tur mhunnttat. Betfagechea udentek Betania asa jem zoitunanchea dongrachea denvter, udentek poddtta. Jezu ani tache xis Jerusalemant astana, te choddxe Betaniant rat sartale. Aichea disamnim hea ganvak el-ʽAzariyeh (El ʽEizariya) mhunnttat, zacho Arabic bhaxen orth, “Lazaracho zago.” Jezu Betaniant astana Marta, Maria ani Lazarachea ghora ravtalo. (Mt. 21:17; Mk. 11:11; Luk. 21:37; Ju. 11:1) Tanchea ghora thaun Jerusalemant vochonk Jezu, viddeo-nt dakhoilʼlea eka vatten voitalo zait. Nisan 9, 33 K.X.-ant, Jezu gaddvachea poracher boson zoitunanchea dongra vatten Jerusalemak voitana to ghoddie Betfagechea hea vatten gelo astolo.

Betania thaun Betfage vochpi vatt
Betfage
Zoitunancho Dongor
Kidron Vhall
Devmondir

Khonttechea Hadda Bhitor Khillo

Ho fotto eka munxeachea khonttechea haddam bhitor topoilolea khilleachi nokʼkol dhakoita. To lokhnnacho khillo 11.5 cm (4.5 in.) lamb aslo. 1968 hea vorsa, Jerusalemachea utʼtore vatten khonddttana oslich ek nokʼkol mellʼlli ji Romi tempa voili asli. Eka munxak jivexim martana, taka lakhddachea khambear marunk khilleancho vapor kortale mhunn hanga puravo melltta. Jezu Kristak khambear marunk Romi soinikamnim osleach khilleacho vapor kelo astolo. Hi nokʼkol eka fatrachea pettie bhitor mellʼlloli. Toslea pettiek ‘ossuary’ mhunnttat. Melʼlea munxachem mas kuslea uprant tachim sukhlolim haddam tantunt dovortale. Eka munxak khambear jivexim marlea uprant, taka purunk zatalem mhunn hem dakhoita.—Mt. 27:35.