May—Jivit ani Porgottnni Mittingechea Pustike Pasot Modot
MAY 7-13
DEVACHEA UTRANTLE THEVE | MARKU 7-8
“Aplo Khambo Ukholcho ani Mhozo Pattlav Korit Ravcho”
(Marku 8:34, NW) Ani lokank ani Aplea xisank borabor apoun Jezun tankam mhollem: “Konnank Mhoje pattlean ieunchi khuxi asa zait, tannim apnnak nakarchem, aplo khambo ukholcho ani Mhozo pattlav korit ravcho.
nwtsty obheasachi ttipnni Mk. 8:34
tannim apnnak nakarchem: Vo “apnnancher aslole sogle hokʼk soddun divop.” Hacho orth, ek munis apkhuxen apleakuch nakarta vo apleacher aslole aple hokʼk Devacher soddun dita. Hea utrank uzar kelʼlea Grek utrancho orth, “apleakuch na mhunnop” ani ho orth sarko asa karonn tantunt eklean aplea svotachea anvddeank, havesak vo faideak na mhunnop mellon asa. (2Kor. 5:14, 15) Hanga uzar kelam tench Grek kriapod, Pedrun Jezuk nakarlo tea vixim sangtana Markun uzar kelem.—Mk. 14:30, 31, 72.
w92 8/1 17 ¶14
Jivitache Dhanvddent Tumi Koxim Dhanvtat?
14 Jezun lokank ani aplea xisank oxem sanglem: “Konnank Mhoje pattlean ieunchi khuxi asa zait, tannim apnnak nakarchem” (vo, “apleakuch, ‘Na’ mhunnonk zai,” Charles B. Williams) aplo khambo ukholcho ani Mhozo pattlav korit ravcho.” (Marku 8:34, NW) Ami amkanch nakarun Jezucho pattlav kortat tednam ami tem sodanch ‘korit ravonk’ toiar asonk zai. Hem ami amkam koslo-i khas faido melltta mhunn korinant, punn ami sodanch toiar asonant zalear, ami Jezucho pattlav korunk chukonk xoktat. Ani ami ek pavtt pasun chuklim, vo ek pasun chukicho nirnnoi ghetlo zalear, ami poilim kelolea soglea boreponnacher udok votlea sarkem zatolem. Titlench nhoi, ami sasnachem jivit-ui hogddoitolim. Sotant udorgot korunk, choddxe pavtt vell lagta punn ami sodanch xittuk ravonant zalear ami kelʼlea soglea udorgoticho kainch faido zauncho na!
(Marku 8:35-37) Aplo jiv samballun dhorunk sodtat tim aplo jiv hogddaitolim; punn Mhoje khatir ani Xubhvortomana khatir aplo jiv hogddaitat tim aplo jiv samballun dhortolim. 36 Sogllo sonvsar zoddit ani aplo jiv ibaddit zalear, monxak koslo adav? 37 Vo aplea jivache bodlek monxachean kitem diunk zait?
w08 10/15 25-26 ¶3-4
Tumi Jieunk Kitem Teag Korunk Toiar Asat?
3 Teach vellar, Jezun don chintpa sarke prosn vincharle: “Sogllo sonvsar zoddit ani aplo jiv ibaddit zalear, monxak koslo adav?” ani “Aplea jivache bodlek monxachean kitem diunk zait?” (Marku 8:36, 37) Poilea prosnacho zobab munxachea nodren sangonk sompo. Ek munis akʼkho sonvsar jikon, aplo jiv hogddaita zalear tem kosleach faideachem nhoi. To jivont asa zalearuch apnnem zoddlam tem khuxalkaien khaunk xoktolo. Jezun vincharlolo dusro prosn oso aslo: “Aplea jivache bodlek monxachean kitem diunk zait?” Ho prosn aikolea uprant, aiknnareank, Soitanan Jobacher ghatlolea aropacho ugddas ailo astolo. Soitanan mhunnttlolem: “Aplo jiv vattaupak monis kiteim korta.” (Job 2:5) Jehovachi bhokti korinant tankam, Soitanan mhunnttlolem tem khorem disot. Zaite lok, aplo jiv samballunk kitem-i kortat ani koslim-i totvam moddunk toiar astat. Punn, Kristanvanchem chintop vegllem asa.
4 Jezu hea prithumer amkam bori bolaiki, girestkai ani lamb jivit diunk ieunk naslo mhunn ami zannnant. To amkam novea sonvsarant sasnnank jieunchi vatt ukti korunk ailo, jem jivit amkam khub valorachem. (Juanv 3:16) Jezun vincharlolea poilea prosnancho orth ek Kristanv oso somzonk xokta, “Sogllo sonvsar zoddit ani sasnank jieuncho aplo bhorvonso hogddait zalear, munxak koslo faido?” Hacho zobab, Kosloch faido na. (1 Juanv 2:15-17) Jezuchea dusrea prosnancho zobab mellonk ami amkanch prosn vincharunk zai, ‘Novea sonvsarant jieunk hanv kitle pasun teag korunk toiar asam?’ Hea prosnacho zobab, ami jea toren amchem jivit jietat tachea voilean dison ietolo, toxench, novea sonvsarant jieuncho bhorvonso amchea kallzant kitlo ghott asa tem kollttolem.—Juanv 12:25 sor korat.
(Marku 8:38) He baskoll ani patki pinddke modem Mhoji ani hea Mhojea utranchi konnank loz disot zalear, Monxachea Putak-ui, Aplea bhagevont dutam sangatim Aplea Bapache mhoimen To ietolo tednam, tanchi loz distoli.”
jy 143 ¶4
Munxacho Put Konn?
Hoi, Jezuchi maniotai zai zalear, tachea xisamnim dhirvont zaunk zai ani svotachea khoxecho teag korunk zai. Jezun sanglem: “He baskoll ani patki pinddke modem Mhoji ani hea Mhojea utranchi konnank loz disot zalear, Monxachea Putak-ui, Aplea bhagevont dutam sangatim Aplea Bapache mhoimen To ietolo tednam, tanchi loz distoli.” (Marku 8:38) Hoi, Jezu ieta tednam, to “zonn-ekleak ap-aplea kornniam pormannem inam ditolo.”—Matev 16:27.
Bible-ant Motiam Sodhum-ia
(Marku 7:5-8) Mhonnttoch Farizevamnim ani dhormxastriamnim Tache lagim vicharlem: “Zannteanche chali pormannem tuje xis kiteak cholonant, punn mhellea hatamnim kiteak jevtat-khatat?” 6 Tannem portipallun tankam sanglem: “Izaiasan tumam ddhongiam vixim adinch sangun dovorlam tem sarkem; tor oxem boroun asa: ‘Hi porza onttamnim Mhaka vakhannta, punn tanchem kalliz Mhoje-sun pois asa. 7 Tor monxamnim kelʼle kaide, xastram koxim xikoun, ti Mhoji polki puza korta.’ 8 Devachi adnia sanddun, monxancheo chali tumi palltat.”
w16.08 30 ¶3
Vachpeam Thaun Prosn
Jezuchea virodheamnim hat dhunvchea vixim prosn kiteak ubarlo?
▪ Jezuchea virodheamnim taka vicharlem: “Zannteanche chali pormannem tuje xis kiteak cholonant, punn mhellea hatamnim kiteak jevtat-khatat?” (Marku 7:5) He dhormxastri ho prosn vincharun, hat dhuv-nastana jevlear bolaikek borem nhoi mhunn sangonk sodhinasle. Punn, jevchea poilim konnem tori jevtolea munxachea hatacher udok votcho rivaz pallʼllolo tankam zai aslo. Hea rivaza vixim, eka pustokant oxem mhunnttlam: “Udok votunk khoinchem aidon uzar korunk zai, koslem udok uzar korunk zai, tem udok konnem votunk zai, ani khoim porian hat dhuvunk zai, hea soglea vixoi-ancher te bhasabhas kortale.”
(Marku 7:32-35) Tednam konneklea zodd jibechea bhereak Tache sorxem haddlo ani tacher hat dovor mhonn lokan Jezu kodde maglem. 33 Ani loka modlo taka kuxin vhorun Jezun tachea kanamnim Aplim bottam ghalim ani Apli thimpi kaddun tache jibek laili. 34 Magir sorgak dolle ubarun, Tannem suskar soddlo ani mhollem: “Efʼfatha!,” mhonnche: “Tuje kan ukte zaum!.” 35 Mhonntta mhonnosor tache kan ugoddle ani tache jibecho bandpas suttlo ani to sarko ulounk laglo.
w00 2/15 17-18 ¶9-11
Tumkam ‘Kristachem Mon’ Asa Kai?
9 To munis bhero aslo ani tachean sarkem ulounk-ui zainam aslem. Jezun tea munxachi bhirant ani loz somzon ghetli astoli. Magir, Jezun sodanch kortalo tachea poros kitem-tori vegllem kelem. Tannem tea munxak zomea thaun pois vhelo. Uprant, Jezun taka apunn kitem korcho asa tem hatamnim ixaro korun somzailem. Tannem, “tachea kanamnim aplim bottam ghalim ani apli thimpi kaddun tachea jibek laili.” (Marku 7:33) Magir, sorgar dolle ubarun, suskar soddun magnnem kelem. Hea kornne vorvim Jezu tea munxak oso mhunnonk sodhtalo, ‘Hanv tujea pasot jem korcho asam, tem hanv Devachea xokten kortam.’ Xevttak, Jezun mhunnttlem: “Tuje kan ukte zaum!” (Marku 7:34) Oxem mhunntta mhunnosor, taka aikunk ieunk laglem ani to sarko ulounk laglo.
10 Khorench, Jezun dusreank kallji dakhoili! Tanchim bhavnam bore bhaxen somzon Jezu tea pormonnem vagtalo. Oxe toren tannem tanchea bhavnancho apunn valor korta mhunn dakhoilem. Kristanv zalolean, ami Jezuchem mon apnnaun tachi dekh gheunk zai. Bible sangta: “Tumi sogllim tumche modem eka monachim zaiat, dusreanchem sukh-dukh tumchem korat, tumchea bhavam-bhoinnincho mog korat, peleak konnvallaien vagoiat, khaltea kallzachim zaiat.” (1 Pedru 3:8) Tor, ami dusreank koxem bhogta tem monant dovrun ulounk ani vagonk zai.
11 Sobhent dusreank man ditat tednam ami tanchim bhavnam somzon ghetat mhunn dakhoun ditolim. Tannim amchea lagim jea toren vaglolem amkam zai, toxench ami tanchea lagim vagtolim. (Matev 7:12) Hacho orth, uloitat tednam ami kitem uloitat ani koxim uloitat tacher ami dhean ditolim. (Koloskarank 4:6) Ugddas dovrat, ‘Ovichari utram torvari bhaxen toptat.’ (Mhonnʼnneo 12:18) Kuttumba vixim kitem? Eka-mekacho khoro mog kortat tim ghov-bailam eka-mekachim bhavnam somzon ghetat. (Efezkarank 5:33) Tim, kallzak toptat toslim utram uzar korchimnant, sodanch eka-mekachi khodd kaddchimnant, ani kottor ritin eka-mekacho opman korchimnant karonn hem soglem dusreak dukhoita ani toslem dukh sompeponnim pekona. Mogall avoi-bapui aplea bhurgeanchea bhavnancho sudʼdha valor kortat. Bhurgeank sudharchi goroz asa tednam, avoi-bapui tancho man rakhun, tankam loz zainam tea toren xist ditat. (Koloskarank 3:21) Oxe toren, ami dusreanchim bhavnam somzon ghetat tednam amkam Kristachem mon asa mhunn dakhoun ditat.
MAY 14-20
DEVACHEA UTRANTLE THEVE | MARKU 9-10
“Bhavarth Ghott Korta Toslem Dorxon”
(Marku 9:1) Ani Tannem mhollem: “Hanv tumkam khorench sangtam: hanga ubim asat tantlim kai zannam Devachem Raj podven ailʼlem dekhlea bogor morchim nant.”
w05 1/15 12 ¶9-10
Krist—Bhakitancho Mukhel Vixoi
9 Jezun apunn Mesias mhunn purave diun ek voros maiz zalʼlem. 32 K.X. hea vorsachem Pask zaun gelʼlem. Jezucher visvas dovortolea zaitea xisamnim dhumallo, girestkaiechi asa, vo jivitachea askea-uskeank lagon Jezucho pattlav korcho soddun dilʼlo. Toxench thodde, Jezun Raza zaunk nakarlem mhunn ghuspole vo nirax zale astole. Jezuchi porikxa korunk, Judev dhormxastriamnim taka sorga veli ek khunna korun dakhoi mhunn sanglem tednam Jezun nakarlem. (Matev 12:38, 39) Oxem korunk Jezun narkarlem tednam thodde lok ghuspole astole. Hachea bhair, Jezu aplea xisank, tankam somzonk khub kotthin zatolem tea vixim khobor sangonk laglo—“Hanv Jeruzaleak vecho asam; zannteanchea, mukhel iadnikanchea ani dhormxastrianchea hatantlem Hanvem zaitem soschem asa; te Mhaka jivexim martole.”—Matev 16:21-23.
10 Nov te dha mhoinea bhitor, “Jezu hea sonvsarantlo bhair sorun Bapa-xim vecho” vell pavlolo. (Juanv 13:1) Aplea visvaxi xisam vixim kallji aslolean, Jezun bhavarth naslolea Judevank sorga veli ek khunna korun dakhounk nakarloli, ti khunna to aplea xisank dakhoitolo mhunn to bhasaita. Jezu mhunntta, “Hanv tumkam khorench sangtam: hanga asat tantlim kai zannam Monxachea Putak Aplea rajeant ailolo polleunche adim morchim nant.” (Matev 16:28) Hea utram vorvim, Jezu aple thodde xis 1914-ant Mesiasachem Raj sthapon zaum meren jivont urtole mhunn sangonk sodhi naslo. Punn Jezu aplea tin laginchea xisank dakhouncho aslo, tem dorxon tachea monant aslem. Tea dorxona vorvim, fuddarak Jezu apnnachea Rajeant mhoime bhorit zatolo tem pollounchi sondhi tankam mellchi asli. Hea dorxonak Rupantor mhunnttat.
(Marku 9:2-6) Sov dis uprant, Jezu Pedruk, Jakobak ani Juanvak Apnna borabor gheun ekvodde asche khatir eka unch dongrar gelo, ani tanche mukhar Tannem Aplem rup bodolʼlem. 3 Tachim vostram loklokit ani sonvsarant moddvolla lagim dhovim korunk zainant titlim dhovim-ful zalim. 4 Ani Moizesa borabor Elija tankam dixtti poddlo ani te Jezu lagim uloitale. 5 Tedna Pedrun uloun jezuk mhollem: “Rabʼbi (mhonnge “Guruji”), ami hangasorunch aslear borem; tor tin tombu korum-ia, ek Tuka, ek Moizesak ani ek Elijak.” 6 Kitem mhonnchem tem toch nokllo aslo; te bhieun kamplole.
w05 1/15 12 ¶11
Krist—Bhakitancho Mukhel Vixoi
11 Jezu sov disam uprant Pedruk, Jakobak, ani Juanvak ek unch dongrar gheun gelo—ghoddie Hermon dongrar aslole eke ukte suvater zait. Thoim Jezun “aplem rup bodolʼlem. Tachem mukhamoll suria porim loklokit zalem ani Tachim vostram uzvadda porim dhovim-ful zalim.” Toxench, Moizes ani Elija provadi Jezu lagim uloitale te-ui dixtti poddle. Hi ghoddni spoxtt disli, karonn ti ghoddie ratik ghoddli astoli. Hem dorxon itlem khorem dislem, ki ti ek khori ghoddnni koxi disli. Karonn Pedru Jezu pasot, Moizesa pasot ani Elija pasot tin tombu bandunk toiar zalʼlo. Pedru uloita astananch tancher eka porzollit kupan savlli ghali, ani ovchit kupantlo ek tallo oso uloilo: “Ho Mhozo Put, kherit opurbaiecho; Tacher asa Mhojem dhadosponn. Tachem tumi aikat.”—Matev 17:1-6.
(Marku 9:7) Ani eka kupan tancher savlli ghali. Ani kupantli oxi ek zap zali: “Ho Mhozo Put, soglle opurbaiecho. Tachem aikat.”
nwtsty obheasachi ttipnni Mk. 9:7
ek zap zali: Dev munxam lagim tin pavtti uloilo mhunn xubvortomananchea pustokamnim vachunk melltta. To dusre pavtt uloilʼlo tem hea versant boroilʼlem asa.—Obheasachi ttipnni Mk. 1:11; Ju. 12:28 polloiat.
Bible-ant Motiam Sodhum-ia
(Marku 10:6-9) Punn rochnnechea orombak thaun ‘Devan tankam dadlo ani bail kelim. 7 Hea pasot monis aplea bapaik ani avoik soddtolo [ani aple potinnik ektthovtolo,] 8 ani tim dogam-i ek zatolim.’ Dekhun tim hea fuddem dogam nhoi, punn ekuch. 9 Mhonnttoch Devan ektthai kelam tem monxan doxim korum noie.”
w08 2/15 30 ¶8
Marku Pustokantle Mukhel Mudʼde
10:6-9. Kazari zoddpeamnim eka-mekak chittkon ravchem, ho Devacho udʼdhex. Tor kazarant kosleo-i oddchonneo ailear pason divors diunchea svater ghov-bailamnim Devachim totvam apnnaun teo oddchonneo suttaveo korunk zai.—Mt. 19:4-6.
(Marku 10:17, 18) To vattek lagchea vellar ek monis dhanvun ailo. Tache mukhar dimbi moddun tannem Jezu kodde vicharlem: “Borea Guruji, Sasnnik Jivit mhojem daiz korun gheunche khatir hanvem kitem korunk zai?” 18 Jezun taka mhollem: “Mhaka boro kiteak mhonnttai? Ekleach Devak kaddun konnuch boro nhoi.
nwtsty obheasachi ttipnni Mk. 10:17, 18
Borea Guruji: To munis Jezuk “Borea Guruji” mhunnon taka chonnea zhaddar choddoitalo ani riti pormonnem ulo kortalo astolo, karonn dhormik fuddareank oslo man dilolo zai aslo. Jezuk lokamnim “Guruji” ani “Somia” mhunnttlear kainch addkoll nasli (Ju. 13:13), punn taka soglo man Bapaik dilolo zai aslo.
Ekleach Devak kaddun konnuch boro nhoi: Jezun hanga, borem kitem asa tem sangonk ani borea ani vaittache dorje korcho sogle-von chodd odhikar Jehovakuch asa mhunn dakhoun dilem. Adanv ani Even borea ani vaittachi zannvai diupi rukhachem foll khaun, Devak aslolo odhikar aplea hatant gheunk proitn kelo. Punn dusre vatten khaltikaien Jezu, borea ani vaittache dorje korcho aplea Bapaicho hokʼk aplea hatant ghena. Borea ani vaittachea dorjea vixim Devan aplea Utrant boroun dovorlam.—Mk. 10:19.
MAY 21-27
DEVACHEA UTRANTLE THEVE | MARKU 11-12
‘Tinnem Soglleam Poros Odik Ghalam’
(Marku 12:41, 42) Devmondirant dhorm- dananche pette mukhar bosun, lok koso pettent duddu ghalta tem Jezu polleun aslo. Ani sobar girest monxam khub duddu ghaltalim. 42 tednam ek goribdolldiri vidva [“gorib vidva,” NW] aili ani tinnem don lepton tantum ghale, mhonnge ek pav asʼsarion.
nwtsty obheasachi ttipnni Mk. 12:41, 42
dhormdananche pette: Adlea Judevanchea boroupant, hea danachea petteank vo koronddak, trompeta sarko vo xingam sarko akar aslo mhunn sanglam. Hea petteank, voilean ek lhan burak astalo zantunt lok apleo veg-veglleo bhettounneo ghaltale. Hea versant uzar kelʼlem Grek utor Ju. 8:20-ant-ui vachunk melltta, zoim “dhormdananche pette-xim,” mhunnttlam. Ho zago Devmondirant aslolea Bailanchea angnnant aslo. (Obheasachi ttipnni Mt. 27:6 ani App. B11-E.) Rabbi-anchea borounneam voilean hea angnnachea vonttichea bhonvttonim 13 dhormdanacheo petteo asleo mhunn kolltta. Hachea bhair, tea devmondirant dhormdanachea pettent ghatlole poixe ektthaim korun dovrunk anik ek vhodd mozuri banddar-ui aslem mhunn mantat.
don lepton: Hacho orth “ek quadrans.” Le·ptonʹ hem Grek utracho orth ek lhan ani patoll vost. Ek lepton mhunnche, ek nanno zachem mol ek denarius-acho 1/128 bhag. Ho nanno Israelant uzar kortale tea nannentlea sogleam-von lhan tambeacho vo kanxeacho nanno zaun aslo. Grek utor ko·dranʹtes (Latin utor quadrans thaun aila) tambeacho vo kanxeacho Romi nanno, zachem mol ek denarius-acho 1/64 bhag astolo. Marku hanga Romi poixe uzar korun Judev uzar kortale tea nanneanchem mol somzoita.—“Lepton,” Utravoll ani App. B14-E polloi.
(Marku 12:43) Aplea xisank apoun haddun Tannem mhollem: “Pettent duddu ghaleat tea soglleam poros he gorib vidven odik ghalam.
w97 10/15 16-17 ¶16-17
Tumi Purnn Kallzan Keloli Seva Jehova Moladik Mhunn Lekhta
16 Thoddea disam uprant Nisan 11 hea disa, Jezun akʼkho dis mondirant sarlo zoim lokamnim tachea odhikaracher prosn ubarlo ani tannem dhondd farik korchea vixim, jivontponna vixim ani her veg-vegllea vixoi-ancher bhasabhas keli. Tannem xastri ani Farizevancher zaitim formonnam marlim. Tantuntlea eka formannant tannem “vidvanchim ghoram-daram te khaun uddoitale” mhunn sanglem. (Marku 12:40) Uprant, Jezun mondirant eka zagear boska ghetli, zoim Judevanchea riti pormonnem 13 dhormdanancheo petteo asleo. Tea zageak bailanchem angonn mhunnttale. Thoddo vell thoim boson, pettent poixe ghaltat tea lokank to pollounk laglo. Zaitim girest munxam apunn dusream poros chodd ghaltat mhunn dakhounk ani thoddim, dusreanchi nodor aplea vatten voddunk poixe dan kortalim. (Matev 6:2 sor kor.) Punn Jezuchi nodor eke bailecher poddtta. Munxachea nodre pormonnem, ti bail vo tichem dan vhoddlem kainch naslem. Punn Jezu lokanchem kalliz vollkhotalo, ani ti “ek gorib vidva” mhunn to zannam aslo. Tinnem kitlem dan dilʼlem tem pasun taka khobor asli—unnea molache “don lepton.”—Marku 12:41, 42.
17 Jezun aplea xisank apoun, tankam xikouncho aslo tea lisanva vixim somzaunk, hea bailechem udharonn uzar kelem. “Pettent duddu ghaleat tea soglleam poros he gorib vidven odik ghalam,” mhunn Jezun sanglem. Jezu pormonnem, her soglleamnim ghatlolem dan melloilem zalear pasun tichem dan, tanchea dana poros chodd aslem. Karonn, tinnem “aplea goribponnantlem kaddun aslem titlem-i ghalem”—tichea lagim aslole te nimanne nanne pasun tinnem ghatlole. Oxem korun tinnem Jehova apli kallji ghetolo mhunn dakhoun dilem. Devak dennem diunchea vixim xikounk, Jezun oslea bailechem udharonn uzar kelem zichem dan kainch valorachem naslem. Punn, Devache nodren tem ekdom moladik aslem!—Marku 12:43, 44; Jakob 1:27.
(Marku 12:44) tor soglleamnim apnnank ogllem aslem tantlem ghalem; punn hinnem aplea goribponnantlem kaddun aslem titlem-i ghalem, aplea jivak zai aslem tem porian.”
w97 10/15 17 ¶17
Tumi Purnn Kallzan Keloli Seva Jehova Moladik Mhunn Lekhta
17 Jezun aplea xisank apoun, tankam xikouncho aslo tea lisanva vixim somzaunk, hea bailechem udharonn uzar kelem. “Pettent duddu ghaleat tea soglleam poros he gorib vidven odik ghalam,” mhunn Jezun sanglem. Jezu pormonnem, her soglleamnim ghatlolem dan melloilem zalear pasun tichem dan, tanchea dana poros chodd aslem. Karonn, tinnem “aplea goribponnantlem kaddun aslem titlem-i ghalem”—tichea lagim aslole te nimanne nanne pasun tinnem ghatlole. Oxem korun tinnem Jehova apli kallji ghetolo mhunn dakhoun dilem. Devak dennem diunchea vixim xikounk, Jezun oslea bailechem udharonn uzar kelem zichem dan kainch valorachem naslem. Punn, Devache nodren tem ekdom moladik aslem!—Marku 12:43, 44; Jakob 1:27.
w87 12/1 30 ¶1
Tumkam Moladik Asa Tem Tumi Bhettoitat Kai?
He ghoddnnentlean amkam zaitim moladik lisanvam xikonk mellttat, punn tantuntlem soglea-von mukhel lisanv tem hem: Ami Devak amcheo moladik vostu ditat tednam tem tachea nodren khub valorachem. Amkam sogleank amche lagim asa teo vostu vo poixe diun, khore bhoktek tenko diuncho sueog asa. Punn ami ditat tem, dilear pasun amkam kainch forok poddona zalear tem tachea nodren valorachem na. Dusrea utramnim mhunnttlear, ami amkam moladik asa ti vost ditat vo amkam moladik na ti vost bhettoitat?
cl 185 ¶15
‘Devachea Utram’ Thaun Zannvai
15 Devmondirant ailolea her soglea lokam modlem, he vidvechem udharonn vinchun Bible-ant boroun dovorlam tem mhotvachem nhoi? Hea udharonnantlean Jehova, apunn ek upkari Dev mhunn amkam xikounk sodhta. Ami ditat tem dennem dusream poros chodd vo unnem asum, purnn kallzan ditat tednam to tem valor korta. Amkam hem kallzak lagta toslem sot xikounk, Jehovan kitlea bore toren hem udharonn uzar kelam nhoi!
Bible-ant Motiam Sodhum-ia
(Marku 11:17) Ani Tannem tankam xikovnn diun oxem mhollem: “‘Mhojea Ghorak sogllea porzank magnneachem Ghor mhonn nanv poddtolem,’ oxem Povitr Pustokar boroilolem asa nhoi? Punn tumi tem choranchi dhol kelea.”
nwtsty obheasachi ttipnni Mk. 11:17
sogllea porzank magnneachem Ghor: Izaias 56:7-antlim utram tin xubhvortomanache borovpi ulʼlekh kortat. Tanchea modlo fokot Marku “sogllea porzank [lokank],” him utram uzar korta. (Mt. 21:13; Luk. 19:46) Jerusalemachem Devmondir, Israelitkarank ani Devachi bhirant aslolea videxi lokank Jehovachi bhokti ani magnnem korunk bandlolem. (1Raz. 8:41-43) Punn tem devmondir Judevamnim veapar dhonddo korunk uzar kelem. Tem polloun Jezun tankam tea mondirak tannim choranchi dhol kelea mhunn guneanvkari kele tem sarkem aslem. Tanchim him kortubam polloun soglea raxttrantle lok Jehovachea magnnechea ghorant magnnem korunk ieunk fatti sorle ani taka lagon Devak zannam zaunchi sondhi tannim hogddaili.
(Marku 11:27, 28) Te portun Jerusalemak aile ani Jezu Devmondirant bhonvtastana mukhel iadnik, dhormxastri ani zannte Tache sorxem aile. 28 Tannim Taka mhollem: “Oxem tunvem korpak koslo odhikar asa tuka? Vo oxem korpak tuka sotʼtia konnem dilea?”
jy 244 ¶7
Bhavartha Vixim Lisanv Xikounk Anjirachem Zhadd Uzar Kelem
Uprant, Jezu ani tache xis Jerusalemant aile. Sodanche sunvoim-e pormonnem, Jezu Devmondirant vochon xikounk suru korta. Jezun adlea disa vattav-dinnarank kitem kelʼlem tem Mukhel iadnikamnim ani vhoddilamnim monant dovrun, taka ghoddie ho prosn vincharlo: “Oxem tunvem korpak koslo odhikar asa tuka? Vo oxem korpak tuka sotʼtia konnem dilea?”—Marku 11:28.
MAY 28–JUN 3
DEVACHEA UTRANTLE THEVE | MARKU 13-14
“Munxachea Bhirantichea Fasant Poddo Nakat”
(Marku 14:29) Pedrun Taka mhollem: “Sogllech porian Tuka soddun gele zalear, hanv kednanch Tuka soddpak na!”
(Marku 14:31) Punn tannem odikuch bhasun sanglem: “Tuje borabor mhaka morunk legun poddlem zalear, hanv Tuka soddun vochpak na!” Heram soglleamnim toxench mhollem.
(Marku 14:50) Tea vellar soglle xis Taka sanddun pollun gele.
(Marku 14:47) Tednam Tache borabor asloleantlea eklean torvar kaddun porom- iadnikachea chakracher marun tacho kanuch katorlo.
(Marku 14:54) Pedru pois thaun Tache fattlean cholun porom-iadnikachea razangnnant bhitor porian gelo, ani sevokam borabor dhogtteak bosun xektalo.
(Marku 14:66-72) Pedru sokla razangnnant astana, porom-iadnikachi konn-ekli chakorn aili, 67 ani dhogtteak boslolea Pedruk dekhona fuddem, taka boro korun polleun tinnem mhollem: “Tum-i Nazaretkar Jezu borabor astaloi.” 68 Punn na mhonnun tannem sanglem: “Tum kitem mhonntai tem hanv nokllom; hanv tem somzo-i na.” Ani thoicho koddsorun to fuddlea angnnant bhair sorun gelo. [Tednam kombean sad ghalo.] 69 Taka novean polleun ti chakorn thoi bhonvtim asloleank mhonnunk lagli: Ho tea monxantloch! 70 Punn tannem novean na mhollem. Ani matxea vogtan thoi asloleamnim novean Pedruk mhollem: “Dubava vinnem tum-i tanche bhitorlo eklo; tum-i Galileikar mum re!” 71 Punn to apnnacher xirap ghalunk ani soput gheun mhonnunk laglo: “Tumi sangtat tea monxak hanv vollkhoch na!” 72 Tedna rokddoch kombean dusre pavtt sad ghalo; ani Jezun sanglolea hea utracho Pedruk ugddas ailo: “Kombean don pavtti sad ghalche adim tin pavtti tum Mhaka vollkhonai mhonn sangtoloi.” Ani to dukhamnim roddunk laglo.
ia 200 ¶14
To Guru Koddlean Boksonnea Vixim Xiklo
14 Pedru cholot-cholot xevttak Jerusalemant aslolea eka vhoddlea ghorachea darvonttea lagim pavlo. Hem Kaifas-achem ghor, zo ek girest ani khub odhikar aslolo mukhel iadnik aslo. Oslea ghoramnim, modem ek angonn astalem ani fuddlean ek darvantto astalo. Pedru tea darvonttea lagim pavlo, punn taka bhitor soronk diunk na. Juanvank mukhel iadnikachi vollokh aslolean, to darvontteachea rakhonnddara lagim uloilo, ani tannem Pedruk bhitor ghetlo. Pedru bhitor ailea uprant ghoddie Juanva sangata ravonk na, ani Jezu aslolo thoim pasun voicho proitn korunk na. To angnnantuch ravlo zoim darvontteache rakhonnddar ani sevok ujea lagim xektale. Jezu add fotti govai diunk ietat-voitat tea lokank to polloitalo.—Marku 14:54-57; Juanv 18:15, 16, 18.
it-2 619 ¶6
Pedru
Pedruchea sangata ailolea vo Jezu fattlean ailolea ani eka xisachi modot Pedru gheta ani mukhel iadnikachea ghorachea angnnant bhitor sorta. (Ju. 18:15, 16) To kallokhant, eka konxeak bosonk na punn uktea agnnant vochon ujea lagim xekta. Tea ujeachea uzvaddant to Jezucho vangddi mhunn dusreank sarko dixtti poddtta. Ani tachem ulovop-ui Galileikaram bhaxen aslem dekhun tankam anik dubav poddtta. Pedru sampoddtta tednam to Jezuk tin favtti nakarta. Titlench nhoi, magir apnnankuch xirapun, soput gheun, to apunn Jezuk vollkhona mhunn sangta. Xarant eka kombean dusre pavtti sad ghalea uprant ‘Jezun porton Pedrucher dixtt ghalta.’ Pedru bhair vochun dukhamnim roddunk lagta. (Mt. 26:69-75; Mk. 14:66-72; Luk. 22:54-62; Ju. 18:17, 18; COCKCROWING; OATH polloi.) Punn, Jezun Pedru pasot magnnem kelʼlem tem khorem zata, Pedrucho akʼkho bhavarth halonk na.—Luk. 22:31, 32.
Bible-ant Motiam Sodhum-ia
(Marku 14:51, 52) Konn-ek tornnatto, aplem ang fokot eke olin pangrun, Tache pattlean vetalo; tannim Taka dhorlo, 52 punn tanchea hatant ol soddun diun, to vinglloch pollun gelo.
w08 2/15 30 ¶6
Marku Pustokantle Mukhel Mudʼde
14:51, 52—“Vinglloch pollun gelo” to tornnatto konn aslo zait? Hea ghoddne vixim fokot Marku sangta, tor to tornnatto Markuch aslo astolo mhunn amchean sangonk zata.
(Marku 14:60-62) Ani porom-iadnikan modekot ubo ravun Jezu kodde oxem vicharlem: “Kaich zap dinai? He tujer add hi firiad ditat tem kitem?” 61 Jezu ogoch ravlo ani Tannem zap kaddli na. Novean porom-iadnikan Tache lagim oxem vicharlem: “Krist tum? Ami vakhanntanv tea Devacho Put tum?” 62 Jezun taka sanglem: “Hoi, Hanv to! Ani Monxachea Putak dev-podvechea uzvea hatak boslolo ani sorginchea kupancher ailolo tumi dekhtoleat.”
jy 287 ¶4
Jezuk Anʼnasa Lagim Vhortat ani Uprant Kaifasa Lagim
Apunn Munxacho Put mhunnttat tosleancho Judev lokank rag ietalo mhunn Kaifas zannam aslo. Poilim ek favtt Jezun Dev aplo Bap mhunn sanglem tednam Judev lok taka marunk sodhtale karonn ‘to munis zaun apnnakuch Dev korta’ mhunn te mhunnonk lagle. (Juanv 5:17, 18; 10:31-39) Hem lokanchem chintop Kaifas zannam aslo tori astana, aple naddbudʼdhen to Jezuk vincharta: “Jivea Devachean hanv tuka hukum ghaltam: soput ghe ani amkam sang: Krist tum? Devacho Put tum!” (Matev 26:63) Hem khorem, ki hachea poilim Jezun, apunn Devacho put mhunn manun ghetlolem. (Juanv 3:18; 5:25; 11:4) Punn hea ghoddier to hem manun ghena zalear, apunn Devacho Put ani Krist mhunn to nakarta koxem zata aslem. Taka lagon, Jezu sangta: “Hoi, Hanv to! Ani Monxachea Putak dev-podvechea uzvea hatak boslolo ani sorginchea kupancher ailolo tumi dekhtoleat.”—Marku 14:62.