Devachem Raj ho Bible-antlo mukhel vixoi zaun asa. Hem Raj prithume pasot Devacho udʼdhex purnn kortolem. Punn, Devachem Raj mhunnttlear kitem? Tem Raj sorgar suru zalam mhunn koxem kolltta? Devan aplea Rajea udexim atam porian kitem kelam ani fuddarak to kitem kortolo? Hea prosnanche zobab amkam hea ani fuddlea don odheai-ant mellttole.

1. Devachem Raj mhunnttlear kitem ani hem Raj cholounk Devan konnank vinchun kaddla?

Devachem Raj mhunnttlear Jehovan stapon kelʼlo ek sorkar. Hem Raj vo sorkar cholounk Jehovan Jezuk vinchun kaddla. (Matev 4:17; Juanv 18:36) Jezu “sodankal raj choloitolo” mhunn Bible sangta. (Lukas 1:32, 33) Devachea Rajeacho Raza Jezu sorgar thaun sonvsarbhor raz choloitolo.

2. Jezu sangata konn raz choloitolim?

Jezu sangata raz cholounk Devan ‘dor eka kulla thaun, bhaxe thaun, zati thaun ani raxttra thaun lokank raza koxe prithumecher raj’ korunk vinchun kaddleant. (Prokasovnni 5:9, 10) Jezu prithumer ailo tednam thaun lakʼkhamnim lok tache xis zait asat. Punn ho soglo lok tachea sangata raz choloitolo kai? Na. Fokot 1,44,000 zannam Jezu sangata sorgar raz choloitolim. (Prokasovnni 14:1-4 vachat.) Toxem zalear, Jezuche xis zaleat tea lakʼkhamnim lokanchem kitem zatolem? Tankam hea prithumer Devachea Rajea khala sasnak jieunk mellttolem.—Stotr 37:29.

3. Devachem Raj munxanchea sorkaram thaun koxem vegllem asa?

Munxanche sorkar boreponn haddunk vavurtat punn toxem korunk tanche lagim titli xokti na. Toxench, munxanche sorkar vo raz choloitat te montri bodoltat. Mhunnche, thoddea tempan dusro konn montri zata ani to ghoddie lokam vixim chintina. Punn, Devachea Rajea vixim Bible mhunntta, “sorgincho Dev kednanch bhosm zaun vechem na toslem ek raj sthaptolo.” (Daniel 2:44-45) Tor, beginuch Jezu hea akʼkhea prithumer raz choloitolo. To raz choloita tednam konnacheruch onʼneai zauncho na ani to bhed-bhav korcho na. To lokam sovem mogan ani doiall ritin vagtolo ani dusreankui teach bhaxen vagonk xikoitolo.—Izaias 11:9 vachat.

4. Akʼkhe prithumer Jezu raz choloitolo

Munxam poros Jezuk chodd xokti asa. Matev 28:18 vachun sokol dilʼlea prosnacho zobab zannam zaum-ia:

• Munxank zo odhikar asa ani Devan Jezuk zo odhikar dila tantunt kitem ontor asa?

Munxancho sorkar bodlot asta ani ho sorkar fokot umkeach desacher odhikar cholounk xokta. Punn Devachea Rajea vixim kitem? Daniel 7:14 vachun sokol dilʼlea prosnache zobab zannam zaum-ia:

• Devachea Rajeachem “kednanch nisontton zaunchem na” mhunn zannam zaun tumkam kiteak borem dista?

• Hem Raj akʼkhe prithumer raz korta tednam kitem borem zatolem?

5. Munxank eka borea sorkarachi goroz asa

Munxachea sorkara poros Devachem Raj kiteak borem zaun asa? VIDEO polloun sokol dilʼlea prosnacho zobab zannam zaum-ia.

VIDEO: Devachem Raj Mhunnttlear Kitem?—Hacho thoddo bhag (1:41)

• Aiz munis sorkar choloita dekhun kitem porinnam zala?

Upodexok 8:9 vachun sokol dilʼlea prosnacho zobab zannam zaum-ia:

• Devachem Raj munxanchea sorkara poros borem oxem tumkam dista kai? Kiteak?

6. Jezu borabor raz korpi amkam somzotolim

Amcho Raza Jezu hea prithumer jielo dekhun to “amcheo oskotaieo somzon” gheunk xokta. (Hebrevank 4:15) Jezu sangata 1,44,000 visvaxi munxam raz choloitolim. Jehovan tankam “dor eka kulla thaun, bhaxe thaun, zati thaun ani raxttra thaun” vinchun kaddleant. Tim-ui amkam bore bhaxen somzotolim.—Prokasovnni 5:9.

• Jezu ani tachea sangata raz korpi amkam bore toren somzotolim hem zannam zaun tumkam koxem dista? Kiteak?

7. Devache kaide munxamnim kelʼlea kaideam poros khub bore asat

Lokanchea boreak lagon sorkar kaide kortat. Teach bhaxen, Devan pasun aplea Rajeant jietolea lokam pasot kaide keleat. 1 Korintkarank 6:9-11 vachun sokol dilʼlea prosnanche zobab zannam zaum-ia:

• Soglo lok Devache kaide palltta tednam sonvsar koso astolo oxem tumkam dista?a

• Aplea Rajeant jietolea lokamnim aple kaide pallunk zai mhunn sangonk Jehovak hokʼk asa kai? Kiteak?

• Kaide pallinant te lok bodlonk xoktat mhunn amkam koxem kolltta?—Vers 11 polloiat.

KITEM XIKLIM

Devachem Raj mhunnttlear ek sorgincho sorkar zo akʼkhea prithumer raz choloitolo.

Porot Ugddas Korum-ia

• Jezu sangata konn raz choloitolim?

• Munxanchea sorkaram poros Devachem Raj kiteak borem zaun asa?

• Jehova aplea Razvottke khala jietolea lokam thaun kitem opekxa korta?

ANIK SODHAT

Devachem Raj khoim astolem mhunn Jezun xikoilem?

“Devachem Raj Tujea Kallzant Asa Kai?” (Web article)

Jehovachim Sakxi munxanchea sorkaram poros chodd Devache Razvottkek kiteak visvaxi ravtat?

Devachea Razvottkek Visvaxi (1:43)

Jezu sangata raz cholounk Jehovan 1,44,000 munxank vinchun kaddleant. Bible tanchea vixim kitem sangta tem zannam zaiat.

“Sorgar Konn Voitolim?” (Web article)

Devuch hea sonvsarant neai haddttolo mhunn ek bailek koxem kollʼllem?

“Hea Sonvsarant Onʼneai Kiteak Ghoddtta Tacho Zobab Mhaka Mellʼllo” (Awake!, November 2011)

Jezun aplea pattlavdarank tumi hea “sonvsarache nhoi” mhunn sanglem. (Juanv 15:19) Tor, ami hea sonvsarachea rajkaronnant ani zhuzamnim bhag gheunk zaina. Hem korunk amkam sodanch sompem zaunchem na. Lok amchim fokannam korunk xoktat, tori astana ami Jehovak visvaxi koxim ravonk zata tem ami hea odheai-ant polloum-ia.

1. Kristanvam munxachea sorkarak man ditat kai?

Kristanvam munxachea sorkarak man ditat. Jezun mhunnttlem: “Somrazachem asa tem Somrazak diat.” (Marku 12:17) Jezuchea hea utrank pallo diun ami sorkarache kaide pallttat, zoxem ami tax farik kortat. Bible amkam sangta ki munxachea sorkarak Devan odhikar cholounk dila. (Romkarank 13:1) Hantuntlean amkam kollon ieta ki munxachea sorkarank zo odhikar asa to Deva poros khub unno asa. Tor, munxacheo sogleo oddchonneo Dev aple Razvottke udexim suttaveo kortolo mhunn ami tacher visvas dovortat.

2. Ami hea sonvsarache bhag nant mhunn ami koxem dakhounk zata?

Jezu hea prithumer aslo tednam, tannem kelʼlem vizmit polloun lok taka raza korunk sodhtale. Punn to thoinchean pollon gelo. (Juanv 6:15) Tor, Jezun hea sonvsarantlea rajkaronnant bhag gheunk na mhunn amkam kollon ieta. Punn oxem tannem kiteak kelem? Tannem mhunnttlem: “Mhojem Raj hea sonvsarantlem nhoi.” (Juanv 18:36) Tor, Jezu bhaxen ami pasun hea sonvsarache bhag zainant. Taka lagon, ami zhuzant bhag ghenant. (Mika 4:3 vachat.) Tea bhair, desachim khunnam mhunn uzar kortat tea vostunk, zoxem bavtteak ami solam korinant. Karonn ami toxem kelear tachi bhokti kelʼlea sarki zata, punn hea vostunk ami man ditat. (1 Juanv 5:21) Titlench nhoi, ami eka rajkaronnachea pokxeachi vo eka montreachi bazu ghenant. Hea soglea vattamnim ami Devache Razvottkek visvaxi asat mhunn dakhoun ditat.

KHOLAIEN XIKAT

3. Khore Kristanv hea sonvsarache bhag nhoi

Jezun ani tachea pattlavdaramnim amchea pasot ek borem udharonn dovorlam. Romkarank 13:1, 5-7 ani 1 Pedru 2:13, 14 vachat. Uprant, VIDEO polloun sokol dilʼlea prosnanche zobab zannam zaum-ia.

VIDEO: Khorim Kristanvam Konnachich Bazu Ghenant—Bhag 1 (4:28)

• Ami sorkari odhikareank kiteak man diunk zai?

• Ami tankam koso man diunk zata?

Zhuzachea vellar, thodde des apunn konnachech vatten na mhunn sangtat. Punn khorem mhunnttlear, te donui pokxeank zhuzant modot kortat. Punn, ami konnachoch pokx ghenastana ravonk kitem korunk zata? Juanv 17:16 vachat. Uprant, VIDEO polloun sokol dilʼlea prosnacho zobab zannam zaum-ia.

VIDEO: Khorim Kristanvam Konnachich Bazu Ghenant—Bhag 2 (3:11)

• Konnachich bazu ghenastana ravop mhunnttlear kitem?

Sorkari odhikari amkam Devachea kaideam add kitem-i korunk sangtat tednam ami kitem kortolim? Itihas 5:28, 29 vachat. Uprant, VIDEO polloun sokol dilʼlea prosnanche zobab zannam zaum-ia.

VIDEO: Khorim Kristanvam Konnachich Bazu Ghenant—Bhag 3 (1:18)

• Ami konnacheo adnea pallunk zai—munxacheo vo Devacheo?

• Kristanvam khoinchea poristhitint sorkari odhikareanche kaide pallchimnant? Udharonn diat.

4. Chintnamnim ani korneamnim konnachich bazu ghenakat

1 Juanv 5:21 vachat. Uprant, VIDEO polloun sokol dilʼlea prosnanche zobab zannam zaum-ia.

VIDEO: Khorea Kristanvank Dhirachi Goroz Kiteak Poddtta—Zhuzant ani Rajkaronnant Bhag Ghenastana Ravonk (2:49)

• Bhav Ayenge-n khoincheach rajkaronnachea pokxeachi bazu kiteak gheunk na vo raxttram pasot aslolea kariavollint bhag kiteak gheunk na?

• Tannem sarkem tem kelem oxem tumkam dista kai?

Ami konnachich bazu ghenastana ravtat mhunn ami anik khoinchea poristhitimnim dakhounk zata? VIDEO polloun sokol dilʼlea prosnanche zobab zannam zaum-ia.

VIDEO: Pahrogopurant Xiklolim Lisanvam—Futt Poddlolea Sonvsarant Konnachich Bazu Ghenakat (5:16)

• Don des khellttat tednam ami konnachich bazu ghenant mhunn ami koxem dakhounk zata?

• Rajkaronnachea fuddareamnim ghetlolea nirnnoi-ak lagon amchea jivitacher koslo-i porinnam zata zalear pasun ami konnachich bazu ghenant mhunn ami koxim dakhoitolim?

• News-ar vo lokam koddlean kosleo-i khobro aikotat tednam ami konnachich bazu ghenant mhunn koxim dakhoitolim?

KITEM XIKLIM

Kristanvam aplea chintnamnim, utramnim ani korneamnim rajkaronnant konnachich bazu ghenastana ravonk khub proitn kortat.

Porot Ugddas Korum-ia

• Sorkari odhikareank ami kitem diunk favo?

• Rajkaronnant ami konnachich bazu kiteak ghenant?

• Khoinchea poristhitint ami konnachich bazu ghenant mhunn dakhoitolim?

ANIK SODHAT

Konnachich bazu ghenastana ravtat tednam amkam kosle teag korunk poddot?

Jehova Amkam Kednanch Soddun Diunchona (3:14)

Bazu ghenastana ravonk poddtta toslea poristhitincho fuddo korunk familintlea sogleamnim sangata mellon koxi toiari korunk zata?

Jahir Kariavollimnim Bazu Ghenastana Ravop (4:25)

Eka munxak jivitant kitem kelear sogleam-von chodd man mellonk xokta?

“Deva Lagim Sogllem Ghoddta” (5:19)

Kamam vixim nirnnoi ghetana, ami hea sonvsarache bhag nhoi mhunn koxem dakhounk zata tem polloiat.

“Zonn-Eklean Ap-Aplem Ojem Ukollchem” (The Watchtower, March 15, 2006)