May—Jivit ani Porgottnni Mittingechea Pustike Pasot Modot
MAY 6-12
DEVACHEA UTRANTLE THEVE | 2 KORINTKARANK 4-6
“Ami Soddun Diunchimnant”
(2 Korintkarank 4:16) Hea pasot ami kednanch ang kaddinanv. Zorui bhailean amchem jivit bigddun veta, torui bhitorlean tem disan dis novsoron veta.
w04 8/15 25 ¶16-17
Thoktat punn Soddun Dinant
16 Deva lagim ghott ixttagot samballop ekdom mhotvachem. Jehova Deva lagim amchi ixttagot ghott asta tednam, tachi bhokti korunk ami kuddin thokonk xoktat, punn tachi bhokti korchi ami kednanch soddun diunchimnant. Jehova ‘thokloleak xokti dita, ani boll-nasloleak ghottai dita.’ (Izaias 40:28, 29) Him utram kitlim khorim aslim tim apostl Paulun onnbhovlim ani tannem oxem boroilem: “Hea pasot ami kednanch ang kaddinanv. Zorui bhailean amchem jivit bigddun veta, torui bhitorlean tem disan dis novsoron veta.”—2 Korintkarank 4:16.
17 “Disan dis,” hea utrancher dhean diat. Hacho orth, ami dor disa Jehova dita tea modoticho faido ghetat. Jehovachi seva 43 vorsam visvaxiponnim keloli ek mixinori bhoinn kednam-kednam kuddin thoktali ani nirax zatali. Punn tinnem soddun diunk na. Ti sangta: “Koslem-i kam suru korchea poilim mhaka Jehova lagim magnnem korunk ani tachem Utor vachunk zai dekhun hanvem sokallim begin uttchi sonvoim kelea. Hi sonvoim mhaka aiz porian sosunk modot korta.” Ami sodam, hoi “disan dis” Jehova lagim magnnem kortat tednam ani tachea gunnancher ani bhasaunneancher niall kortat tednam, khoreamnich, ami Jehovachea boll ditolea xokticher patieunk zata.
(2 Korintkarank 4:17) Kiteak heo amcheo lhan ani thoddea kallacheo khonti-dukhi sasnnache utʼtom mhoimek amkam toiar kortat: hea khontim-dukhim ani he sasnnache utʼtom mhoime modem koslich sor korunkuch zaina.
it-1 724-725
Sosnikai
Kristanvank aslolea bhorvonxeacher pasun ami sodanch nodor dovrop gorjechem. Tem mhunnttlear, patka vinnem sasnachem jivit. Amchea virodheanchea hatamnim amkam moronn pasun ailem zalear, ho bhorvonso amchea thaun konnacheanuch kaddun gheunk zaina. (Rom. 5:4, 5; 1Tes. 1:3; Prok. 2:10) To bhorvonso purnn zata tednam, atanchea dukh-trasam sangata taka sor korit zalear he dukh-tras kainch nhoi koxem distolem. (Rom. 8:18-25) Sasnanchem jivit amchea dolleam fuddem asta tednam, aiche kosle-i dukh-tras kitle-i vhodd asum, te ‘lhan ani thoddea kallache’ distat. (2Kor. 4:16-18) Ek Kristanv, apleak asat te tras thoddea vellache mhunn ugddas dovorta tednam, ani apleak asa tea bhorvonxeacher ghott bhavarth dovorta tednam to niraxi zaun Jehova Devak ovisvaxi zaunk pavcho na.
(2 Korintkarank 4:18) Mhonnttoch dolleank dixtti poddtat toslea vostuncher ami amchem dhean-mon lainanv, punn dixtti poddonant toslea vostuncher; dixtti poddtat teo vostu thoddoch vell urtat, punn dixtti poddonant teo sasnnak togtat.
Bible-ant Motiam Sodhum-ia
(2 Korintkarank 4:7) Punn ami fokot matiechim aidonam, ani hem bhanddar oslea aidonamnim ghalʼlem asa; mhonnttoch hi amkam dilʼli vorti podvi amche thaun upzona; ti sogllich Devachi.
w12 2/1 28-29
“Jehovachea Tonddar ek Hanso Haddat”
Sonchalon Monddollacho vangddi David Splane, hea Bible adarit vixoi-acher uloilo. (2 Korintkarank 4:7) Tem bhanddar kitem zaun asa? Ginean vo zannvai? “Tantuntlem khoinchech nhoi,” mhunn bhavan zobab dilo. “Apostl Paulun sanglolem bhanddar, ‘sot spoxtt porgott’ korchi ‘porgottnni’ zaun asa.” (2 Korintkarank 4:1, 2, 5) Bhav Splane-an videartheanchea ugddasak haddlem ki tannim gelʼle panch mhoine ghetlam tem proxikxon tankam porgottnnent khas kam korunk toiar korunk lagon aslem. Ani hea kamank ami khub mhotv diunk zai.
“Matiechim aidonam,” mhunnche amchi kudd mhunn bhavan somzailem. Tannem eka matiechea aidona modem ani bhangarachea aidona modem aslolo ontor dakhoilo. Bhangarachim aidonam chodd uzar korinant. Punn, matiechim aidonam kamank lagon uzar kortat. Bhanddar vo moladik vostu ami eka bhangarachea aidonant ghaltat zalear, amchem dhean tea bhanddara sangata tea aidonacher voita. Bhav Splane-an sanglem, “Videartheamno, tumi lokanchem dhean tumchea lagim voddun haddinakat. Mixinori zalʼlean, tumi lokank Jehova lagim vochonk vatt korat. Tumi khaltikai aslolim matiechim aidonam zaun asat.”
(2 Korintkarank 6:13) Tumi mhojim bhurgim zalʼle porim oxem tumkam sangtam: mog mogan farik korunk, tumchim-i kallzam mhaka sarkim uktim korat.
w09 11/15 21 ¶7
Bhav-bhoinnanchea Mogant Vaddot Vochat
7 Amchea vixim kitem? Ami ‘kallzam uktim korun’ bhav-bhoinnank mog koso dakhounk zata? Ekech piraieche vo kullache lok eka-mekak lagim sorop sobhavik zaun asa. Ekech bhaxechem monoronjon avoddtta tim eka-meka sangata chodd vell sartat. Punn amkam avoddtta teo vostu thoddea bhav-bhoinnank avoddna mhunn ami tanchea thaun pois sortat zalear, ami amchim ‘kallzam uktim korunk’ zai. Ami amkanch he prosn vicharop xanneponnachem: ‘Mhojim laginchim ixttam asat tea bhav-bhoinnam poros hanv her bhav-bhoinnam sangata porgottnnent vo her vellar unno vell sartam kai? Raj-ghorant novim asat tanchea sangata hanv vell sarina, karonn mhaka dista thoddo vell soron gelea uprantuch tim mhoji ixtt zaunk xoktat, oxem hanv chintʼtam kai? Sobhent hanv zantteank toxench tornnatteank vochon melltta kai?’
MAY 13-19
DEVACHEA UTRANTLE THEVE | 2 KORINTKARANK 7-10
“Modot Korchi Seva”
(2 Korintkarank 8:1-3) Atam, bhavam-bhoinnimno, Masedoniechea Povitr-Sobhank Devan doiallai dakhoili tichi khobor tumkam sangtam. 2 Bhov vhoddam koxttam-dogdamnim tanchi porikxa zali. Tim ekdom gorib zalʼlim, tori tim sodanch khuxal aslim. Osle poristhitint bhoron otʼta toslem udarponn tannim dakhoilem. 3 Kiteak aple kuveti pormannem ani kuveti voir porian,
w98 11/1 25 ¶1
“Hanstea Tonddan Ditat, Tancho Dev Mog Korta”
Poilem, Paulun Korintkarank, Masedonient aslolea Kristanvam vixim sanglem. Tannim modot korchea kamant ek bori dekh dovorloli. Paulun oxem boroilem: “Bhov vhoddam koxttam-dogdamnim tanchi porikxa zali. Tim ekdom gorib zalʼlim, tori tim sodanch khuxal aslim. Osle poristhitint bhoron otʼta toslem udarponn tannim dakhoilem.” Masedonientlea Kristanvank modot magot ravonk poddonk na. Tachea bodlek, Paulun mhunnttlem, “amchea bhavam-bhoinnink mozot korpache sevent apnnank-ui vantto di mhonn teo sobha ap-khuxen amche kodde prarthun magtaleo.” Masedonientlea Kristanvamnim khuxemonan dakhoilolem udarponn chodd valorachem aslem, karonn te “ekdom gorib” asle.—2 Korintkarank 8:2-4.
kr 209 ¶1
Modot Korchi Seva
VELL sumar 46 K.X., ani Judea dukhollant buddlam. Thoim aslolea thoddea jevnna-khannachem mol khubuch vaddlolean thoinchea Kristi Judevam lagim tem jevonn gheunk title poixe nasle. Te bhuken asat, ani bhukek lagon te moronk pasun xoktat. Punn, beginuch Jehova tankam koso rakhta tem tim onnbhovchim aslim jem, hachea poilim kednanch Kristachea khoincheach xisamnim onnbhovunk naslem. Tor kitem zaunchem aslem?
(2 Korintkarank 8:4) amchea bhavam-bhoinnink mozot korpache sevent apnnank-ui vantto di mhonn teo sobha ap-khuxen amche kodde prarthun magtaleo: hachi hanv govai ditam.
kr 209-210 ¶4-6
Modot Korchi Seva
4 Koritkarank dusrem potr boroitana, Kristanvanchi seva don bhagachi asa mhunn Paulun somzailem. Hem potr Paulun obhixikt Kristanvank boroilem, punn tim utram Kristachea ‘her menddrank’ pasun lagu zatat. (Juanv 10:16) Amchea sevecho poilo bhag “sondhanachem muniarponn,” mhunnchem amchem porgottchem ani xikounchem kam zaun asa. (2 Kor. 5:18-20; 1 Tim. 2:3-6) Dusro bhag, ami amchea bhav-bhoinnam pasot kortat ti seva zaun asa. Paulun hea toreche sevek ‘amchea bhavam-bhoinnink modot korchi seva’ mhunnttli. (2 Kor. 8:4) “Sondhanachem muniarponn” ani ‘amchea bhavam-bhoinnink modot korchi seva,’ hea utramnim uzar kelolim utram “muniarponn” vo “seva”, him di·a·ko·niʹa hea Grek utra thaun bhaxantor kelolim utram zaun asat. Hem mhotvachem kiteak?
5 Hea don-ui kamam vixim sangonk Paulun ekuch Grek utor uzar korun, Kristi sobhent kortat tea veg-vegllea kamam sangata modot korchem kam pasun mellon asa mhunn dakhoilem. Tannem hachea poilim sanglolem: “Veg-veglli seva asa, punn Somi ekloch; veg-vegllim kamam, . . . ek ani toch atmo korta.” (1 Kor. 12:4-6, 11) ‘Khore bhoktent vo povitr sevent’ veg-veglleo seva mellon asat mhunn Paulun dakhoun dilem. (Rom. 12:1, 6-8) Teach karonnak lagon, “Devachea bhoktanchi seva korunk” aplo thoddo vell divop sarkem aslem mhunn Pauluk dislem.—Rom. 15:25, 26.
6 Bhav-bhoinnank modot korop Jehovachi seva ani bhokti korcho bhag kiteak zaun asa tem dakhounk Paulun Korintkarank modot keli. Paulun oxem sangon somzailem: Kristanvamnim ‘Kristachem Xubhvortoman manun ghetlam’ dekhun tim modot kortat. (2 Kor. 9:13) Tor Kristanvank, Kristachi xikounn korneamnim dakhounchi itsa aslolean tim bhav-bhoinnank modot kortat. Oxem, bhavam pasot tim kortat tea doiallaiechea kamam udexim, ‘Dev aplo mog’ dakhoun dita mhunn Paulu hanga sangta. (2 Kor. 9:14; 1 Ped. 4:10) Gorjevont bhav-bhoinnank modot korchea vixim The Watchtower, Dezembr 1, 1975-ant sarkem sanglolem: “Jehova Dev ani tacho Put Jezu Krist oslea kamank khorench mhotv ditat kai na, mhunn ami kednanch dubhavunk zaina.” Hoi, tor bhav-bhoinnank modot korchem kam amchea povitr sevecho moladik bhag zaun asa.—Rom. 12:1, 7; 2 Kor. 8:7; Heb. 13:16.
(2 Korintkarank 9:7) Apnnem diunk tharailam tem zonn-eklean diunchem, tondd vankddem korun vo diunchem suttona mhonn nhoi; kiteak jim konn hanstea tonddan ditat, tancho Dev mog korta.
kr 196 ¶10
Rajeachea Kamank Lagon Poixe Khoim Thaun Ietat
10 Poilim, ami Jehovacho mog kortat dekhun ani ‘taka manta tem korunk’ axetat dekhun ami ap-khuxen denngim ditat. (1 Juanv 3:22) Apli bhokti korpi konnui udar kallzan dita tednam Jehova sontosta. Kristanv bhav-bhoinnam kitem-i ditana tem koxem ditat tea vixim Paulun kitem sanglem tem polloum-ia. (2 Korintkarank 9:7 vachat.) Ek khoro Kristanv, diunk suttona mhunn vo diunk dobhav asa dekhun dina. Punn, “apnnem diunk tharailam” mhunn to dita. Hacho orth, goroz asa mhunn zannam zalea uprant, ti goroz apunn koso puro korunk xokta tem chintun to dita. Jehova toslea, ‘hanstea tonddan diupeancho’ mog korta. Anik ek bhaxantor oxem sangta, “Mogan ditat tancho Dev mog korta.”
Bible-ant Motiam Sodhum-ia
(2 Korintkarank 9:15) Devan amkam kelʼlem dennem utramnim ucharunk zaina: oslea dennea khatir Devak dhinvasum-ia.
w16.01 12 ¶2
“Utramnim Ucharunk Zaina” Toslem Devachem Dennem Tumkam Urba Dium
2 Devan keloleo vhodd bhasaunneo Kristachea poripurnn bolidana udexim khoreo zaleo mhunn Paulu zannam aslo. (2 Korintkarank 1:20 vachat.) Tor, tea “utramnim ucharunk zaina” toslea denneant Jehovan Jezu udexim dakhoilolem soglem boreponn ani visvaxi mog mellon asa. Khoreanich, tem dennem kitlem vhodd ani kherit asa, tem munxachean utramnim sangonk zaina. Hem sogleam poros vegllem aslolem dennem mellʼllolean amcher koslo porinnam zaunk zai? Ani 23 Mars, 2016, Budvarak, ami Kristachea Mornnachea Ugddas Disak toiari kortat tednam hea dennea vorvim amkam khoinchea vattamnim urba mellonk zai?
(2 Korintkarank 10:17) “Jim konn vhoddvik sangunk sodtat, tannim Sorvesporan kelʼlea kamachi vhoddvik sangchi.”
g99 7/8 20-21
Gorv Asop Chukichem Kai?
Grek Bhaxen Boroilolea Pustokamnim, kau·khaʹo·mai, hea Grek kriapodacho orth “gorv asop, khuxalbhorit zavop, vhoddvik sangop” zaun asa. Him utram vaitt toren ani bore toren pasun uzar keleant. Udharonnak, “Devachi mhoima amkam melltoli mhonn bhorvanso dovrun ami murgottʼttanv” mhunn Paulun sanglem. Tannem hem pasun sanglem: “Jim konn vhoddvik sangunk sodtat, tannim Sorvesporan kelʼlea kamachi vhoddvik sangchi.” (Romkarank 5:2; 2 Korintkarank 10:17) Hacho orth, Jehova amcho Dev zaun asa mhunn amkam gorv asop. Oslim bhavnam amkam asot zalear, ami tachea borea nanvam pasot murgottʼttolim vo khuxalbhorit zatolim.
MAY 20-26
DEVACHEA UTRANTLE THEVE | 2 KORINTKARANK 11-13
“Pauluchea ‘Angant Romblolo Ek Kantto’”
(2 Korintkarank 12:7) Teach mhojea utʼtom prokasnniam pasot hanv gorvan fulona zaunk, mhojea angant Devan romblolo ek kantto asa: to mhaka sotaunk dhaddlolo Soitanacho ek dut; haka lagun hanv gorvan fulonk xokona.
w08 6/15 3-4
Osoktaio Aslear Pasun Xoktivont
Anik eka visvaxi sevokan Jehovak aplea ‘angant romblolo ek kantto,’ vo apleak sodanch tras korta tosli ek oddchonn asa ti kaddun uddounk sanglem. Apostl Paulun Deva lagim tin pavtti, apleak hea oddchonne thaun suttka di mhunn vinoti keli. Ti oddchonn kitem-i asum, punn eka sotaita toslea kanttea sarki ti Jehovachea sevent asloli Pauluchi khuxalkai piddʼddear korunk xoktali. Hi oddchonn apleak sodanch thapttam marlea sarki asli mhunn Paulu sangta. Jehovan zobab diun mhunnttlem: “Mhoji mozot puro tuka, kiteak osoktaient Mhojem boll sopurnnaien porzollta.” Jehovan Pauluchea angant aslolo kantto kaddun uddounk na. Pauluk tachea add zhuzchem poddlem, punn tannem fuddem mhunnttlem: “Hanv osokt titlo hanv Kristache xoktin soktivont.” (2 Kor. 12:7-10) To hanga kitem mhunnonk sodhtalo?
(2 Korintkarank 12:8, 9) Hea vixim, hea sonnsonneantlo mhaka nivar mhonn tin pavtti prarthon korun hanvem Somiak maglem, 9 punn Somian mhaka oxem sanglem: “Mhoji mozot puro tuka, kiteak osoktaient Mhojem boll sopurnnaien porzollta.” Dekhun, Kristachem boll mhoje sovem vosche khatir, bhov vhodde khuxen mhojea osoktaianchi vhoddvik kortolom.
w06 12/15 24 ¶17-18
Jehova ‘Aplea Lagim Magtoleank Povitr Xokti Dita’
17 Pauluchea magnneak zobab diun Devan taka sanglem: “Mhoji mozot puro tuka, kiteak osoktaient Mhojem boll sopurnnaien porzollta.” Paulun mhunnttlem: “Kristachem boll mhoje sovem vosche khatir, bhov vhodde khuxen mhojea osoktaianchi vhoddvik kortolom.” (2 Korintkarank 12:9; Stotr 147:5) “Mhoje sovem vosche khatir,” hea utrank uzar kelʼlea Grek utrancho orth, ek tombu bandop. Krista udexim Devachi vhodd rakhonn eka tombu sarki tacher vistarloli tem apnnem onnbhovlem mhunn Paulu sangta. Teach toren, aiz pasun Jehova amchim magnnim aikota. To aplea sevokancher apli rakhonn vistarta.
18 Ek tombu, paus poddtta to bond korunk xokona, vo varem marta tem bond korunk xokona. Punn, hanchea thaun thoddi tori rakhonn dita. Teach toren, ‘Kristachea bolla’ udexim melltta ti rakhonn, amcher ietat teo oddchonneo vo kosle-i tras addaina. Punn, Jehova sangata asloli ixttagot piddʼddear korta toslea hea sonvsarachea vostu thaun ani ho sonvsar choloupi Soitanachea akromonna thaun rakhonn melltta. (Prokasovnni 7:9, 15, 16) Toxem zalolean, ‘nivarunk’ zaina tosle oddchonnek tuka tondd diunk poddlear pasun, tum kitem sonsta tem Jehova zannam ani “tuzo tallo aikona fuddench” to tuka zobab ditolo. (Izaias 30:19; 2 Korintkarank 1:3, 4) Paulun boroilem: “Devacher visvas dovrat: tumchean sosunk zata tea-von khor tallnni tumcher ieunk To kednanch nirmicho na vo ieunk diuncho na; punn kosli-i tallnni aili zalear, ti sosunk To tumkam boll ditolo ani oxem tantlim bhair sorunk To tumkam vatt dakhoitolo.”—1 Korintkarank 10:13; Filipkarank 4:6, 7.
(2 Korintkarank 12:10) Mhonnttoch hanv osokt mhonn, mhaka beman kelo mhonn, veg-vegllea gorzank sampoddlom mhonn, dhumallo bhoglo vo tore-torechea oddchonnimnim cheplom mhonn, porvach na: Krista pasot he soglle gotint hanv murgottʼtam, kiteak jitlo hanv osokt titlo hanv Kristache xoktin soktivont.
w18.01 9 ¶8-9
“Thokloleak To Xokti Dita”
8 Izaias 40:30 vachat. Ami kitlim-i purtim asum, ami amchea xokten fokot thoddench korunk zata. Hem ek lisanv, jem ami sogleamnim xikonk zai. Apostl Paulu purto aslo torui tachim thoddim unneponnam taka zai tem soglem korunk addaitalim. Tannem aple khonti vixim Devak kolloilem tednam Devan taka sanglem: “Osoktaient Mhojem boll sopurnnaien porzollta.” Pauluk hem somzolem ani tannem oxem mhunttlem: “Jitlo hanv osokt titlo hanv Kristache xoktin soktivont.” (2 Kor. 12:7-10) To oxem mhunnon kitem sangonk sodhtalo?
9 Devachea modoti vinnem to thoddench korunk xoktalo mhunn Pauluk somzolem. Pauluk jea xoktechi goroz asli, ti xokti, Devachea povitr xokte udexim to melloun gheunk xoktalo. Titlench nhoi, Paulu apleach bollan jim kamam korunkuch xokona, tem to Devachea xokte udexim korunk xoktalo. Amchea vixim pasun hem khorem zaun asa. Amkam asa to xokti Deva thaun ieta zalear, ami khoreanich ghott astolim!
Bible-ant Motiam Sodhum-ia
(2 Korintkarank 12:2-4, Povitr Pustok - Novo Korar) Kristachea ekvottant aslelea eka monxak hanv ollkhotam. Chouda vorsam pattim taka uklun tisre sorgar porian ubarlo—hem tache kuddi soit vo kuddi bhair ghoddlem tem hanv nokllom tem Devuch zanno. 3-4 Ani teach monxak voikunttant ubarun vhelo ani thoi, monxachean ulounk zainant ani sangum ienant toslleo gupit vostu tannem aikoleo mhonn hanv zannom—hem tache kuddi soit vo kuddi bhair ghoddlem tem hanv nokllom, tem Dev zanno.
w18.12 8 ¶10-12
Vachpeam Thaun Prosn
2 Korintkarank 12:2-ant sanglolo ‘tisro sorg,’ ghoddie Jezu Kristachea ani 1,44,000 hanchea hatant asloli Mesiasachi Razvottki zaun asa, mhunnche ‘novem mollob.’—2 Ped. 3:13.
To ‘tisro sorg,’ karonn tem Raj ekdom unch stanar asloli razvottki zaun asa.
Dorxonant Pauluk jea “voikunttant ubarun vhelo,” tem ghoddie (1) prithumer zatoli tea Sobit Bagek suchit korta, (2) tea vellar Jehova aplea lokank ditolo ti khas xanti suchit korta, ji aichea poros chodd astoli, ani (3) sonvsar novo zatolo tednam, sorgar astolem tea ‘Devachea Voikunttak’ suchit korta.
(2 Korintkarank 13:12, Povitr Pustok – Novo Korar) Povitr umo diun, ekamekak noman korat, soglim bhavarti tumkam noman korat.
it-2 177
Umo
“Povitr Umo.” Adle Kristanv eka-mekak “povitr umo” (Rom. 16:16; 1Kor. 16:20; 2Kor. 13:12; 1Tes 5:26) vo “pritimogacho umo” (1Ped. 5:14) ditale. Ho ghoddie ekach lingache lok eka-mekak ditale. Kristanv eka-mekak mellttat tednam umo diunchi rit, ghoddie adle Hebrev riti thaun ailoli astoli. Bible-ant hea vixim amkam bariksannechi mahiti mellona, punn ho “povitr umo” vo “pritimogacho umo” Kristi sobhent aslolo mog ani ekvottkai dakhoun ditalo.—Ju. 13:34, 35.
MAY 27–JUN 2
DEVACHEA UTRANTLE THEVE | GALASIEKARANK 1-3
“Hanvem Taka Sobhemazar Virodh Kelo”
(Galasiekarank 2:11-13) Punn Kefas Antiokiek ailo tednam hanvem taka sobhemazar virodh kelo, kiteak mhollear tachi chal sarki vankddi asli. 12 karonn Jakoba thaun ailole kai monis thoim pavche adim to videxi bhavam-bhoinnim borabor jevtalo; punn te ietoch, sunot kelʼlea hea bhavank bhieun, to ilo-ilo pattim sorlo ani videxi bhavam-bhoinnim borabor jevpachem tannem soddlem. 13 Ani heram Judev bhavarthiamnim tachea ddhongeponnachi oxi dekh ghetli, ki Barnabas porian tankam lagun teach ddhongeponnache vatten oddon gelo.
w17.04 27 ¶16
Neai-a Vixim Jehovachem Chintop Asa Toxem Tumchem-i Chintop Asa Kai?
16 Galasiekarank 2:11-14 vachat. Pedru munxanchea bhirantechea fasant poddlo. (Mho. 29:25) Pedru hea vixoiacher Jehovachem chintop kitem aslem tem ekdom boro zannam aslo. Toripunn, Jerusalemantlea sobhentlim sunot zalolim Judev bhav-bhoinnam kitem chintolim kai mhunn chintun to bhielo. Jerusalemant 49 K.X.-ant zalolea tea mittingent apostl Paulu pasun aslolo. Tor, Antiokant tannem Pedrucho fuddo korun tachem ddhongeponn dakhoun dilem. (Itihas 15:12; Gal. 2:13) Pedrun kelolea chukik lagon onʼneai sosche poddlole tea Videxi Kristanvamnim kitem kelem? Hi tankam ek addkoll zatoli kai? Aplea chukik lagon Pedru aple moladik sueog hogddaita aslo kai?
(Galasiekarank 2:14) Punn Xubhvortomanachea sotache vatten te nitt-sarke cholonant mhonn polletoch, hanvem soglleam hujir Kefasak mhollem: “Tum ek Judev, tori Judevanchi chal soddun videxiam bhaxen tum jietai. Oxem zalear, videxiank Judevanchi chal pallunk lavunk sodtai tem koxem?”
w13 3/15 5 ¶12
Jehovacho Mog Kortat Tim, “Kiteakuch Addllun Poddchim Nant”
12 Pedruk munxachi bhirant asli mhunn to zaite pavtti hea addkollek lagon adllun poddlo. Tori astana, to Jezuk ani Jehovak visvaxi ravlo. Udharonnak, Pedrun sogleam hujir ek pavtt nhoi, punn tin pavtti aplea Dhoniak nakarlo. (Lukas 22:54-62) Uprant, Pedru anik ek pavtti Kristi sobhav dakhounk pavlo na. To, sunot zalole Judev Kristanv, Videxi Kristanvam poros vorte asat koxe vaglo. Kristi sobhent vhodd vo lhan mhunn bhed-bhav korunk zainaslo hem apostl Pauluk sarkem kollon ailem. Pedrucho sobhav chukicho aslo. Pedruchea vagnnukek lagon bhav-bhoinninchea ekvottak dhoko zaina zaunk, Paulun Pedru lagim tonddaruch uloun solʼlo dilo. (Gal. 2:11-14) Apli loz zali mhunn Pedrun aplea jivitachea dhanvddent dhavop soddun dilem kai? Na. Paulun dilolea solʼleacher tannem niall kelo, to apnnailo, ani jivitachea dhanvddent to dhanvot ravlo.
Bible-ant Motiam Sodhum-ia
(Galasiekarank 2:20) Hanv atam jietam to hanv nhoi; tor Krist mhoje thaim jieta; Mhojea osokt monxa-soimbant hanv atam jietam tem jivit koslem tem sangtam: mhozo mog kela ani mhoje khatir apnnakuch somorpun dila tea Devachea Putacher bhavarth dovrun hanv jietam.
w14 9/15 16 ¶20-21
“Zaite Koxtt-dogd” Aslear Pasun Visvaxiponnim Devachi Seva Kor
20 Rokddoch disona toslea dhokea vixim kitem? Udharonnak amkam niraxiponnachim bhavnam ietat tednam ami tankam koxem tondd diunk zata? Sogleam poros ek bori vatt mhunnttlear soddvonnecher niall korop. Apostl Paulun oxench kelem. Thodde pavtti tor taka apunn kiteakuch upkarona oxim bhavnam ailim. Punn, Krist poripurnn lokam pasot nhoi patkeam pasot mela. Ani tea patkeam modem apunn-ui asa hem pasun to zannam aslo. Tor tannem oxem boroilem: “Mhozo mog kela ani mhoje khatir apnnakuch somorpun dila tea Devachea Putacher bhavarth dovrun hanv jietam.” (Gal. 2:20) Hoi, Paulun soddvonn manun ghetli. Soddvonn aplea svotak lagun dilea mhunn to somzolo.
21 Heach toren, tunvem pasun soddvonn hem Jehovan tukach lagon dilolem dennem mhunn ugddas dovorlear tuka khub modot zatoli. Hacho orth, tujem niraxiponn rokddench na zatolem oxem na. Amchea modlea thoddeank ghoddie novo sonvsar ie-sor niraxiponnachea hea dhokea add zhuzchem poddttolem. Punn ugddas dovor: Soddun dinant tankanch inam mellttolo. Devachem Raj portun xanti haddttolem ani soglea munxank poripurnn kortolem to dis chodd ani chodd lagim pavot asa. Tea Rajeant bhitor soronk zaitea tallnneank fuddo korcho poddtta zalear pasun tumi kitench tumkam addaunk diunchimnant mhunn nichov korat.
(Galasiekarank 3:1) Ginean-naslolea Galasiekaramno, tumkam konnem montr bi kelam? Khursar [khambear, NW] marlolo Krist Jezu tumchea dolleam mukhar nivoll chitarlolo tor asa!
it-1 880
Galasiekarank, Potr
Paulun “Ginean-naslolea Galasiekaramno,” mhunn sanglem tednam tachea monant Galasiechea utʼtore vatten ravtolea Gaul kullache lok asle, oxem mhunnonk kainch puravo na. (Gal. 3:1) Punn, Paulun hea sobhentlea umkea lokank xittkaile, je Judev dhorm apnnaunk urba ditolea lokanchem aikonk laglole. He Judev lok, apunn novea korara udexim ‘bhavartha vorvim manvolole vo nitivont’ mhunn lekhchea bodlek, Moizesachea somurti pormonnem aplench nitivontponn dakhounk sodhtale. (2:15–3:14; 4:9, 10) Paulun jea “Galasiechea povitr-sobhank” (1:2) boroilem, thoim Judev ani Judev naslole lok asle. Judev naslole lok mhunnche, sunot korun Judev dhorm apnnailole ani sunot korunk naslole Videxi, ani toxench thodde Celts hea kulla thaun pasun asle mhunn kainch dubhav na. (D.I. 13:14, 43; 16:1; Gal. 5:2) Hankam sogleank melloun, Paulun tankam Galasieche Kristanv mhunnttle, karonn te jietale tea zageak Galasia mhunnttale. Paulun apnnem boroilolea hea potracho akʼkho sondex, Romachea dokxinnent aslolea prantantlea lokanchi bori vollokh asloleank dilo. Tannem ho sondex utʼtore vatten to vollkhoch naslo tankam diunk na, zankam tannem ghoddie kednanch bhett diunk nasli.