7. Devache kaide munxamnim kelʼlea kaideam poros khub bore asat

Lokanchea boreak lagon sorkar kaide kortat. Teach bhaxen, Devan pasun aplea Rajeant jietolea lokam pasot kaide keleat. 1 Korintkarank 6:9-11 vachun sokol dilʼlea prosnanche zobab zannam zaum-ia:

• Soglo lok Devache kaide palltta tednam sonvsar koso astolo oxem tumkam dista?a

• Aplea Rajeant jietolea lokamnim aple kaide pallunk zai mhunn sangonk Jehovak hokʼk asa kai? Kiteak?

• Kaide pallinant te lok bodlonk xoktat mhunn amkam koxem kolltta?—Vers 11 polloiat.

Zaito lok kuddichea sombonda vixim ulounk fatti sortat. Punn Jehova Devan hea vixim Bible-ant ukteponnim ani bore ritin sanglolem asa, karonn to amchem borem chintʼta. Amchea pasot kitem borem tem to zannam. Tor, ami tacheo adnea pallttat tednam ami sasnak khuxal astolim. Toxench, Jehova Dev pasun khuxal zatolo.

1. Kuddichea sombonda vixim Bible-ant kitem sanglam?

Kuddicho sombond Jehova Deva thaun ek dennem zaun asa. Ani hem dennem tannem fokot kazari zoddpeank dilam. Hea dennea vorvim ek zoddpem bhurgeak zolmank haddunk xokta ani toxench eka-meka pasot mog dakhoun dhadoxi zaunk xokta. Bible sangta: “Tujea tornea piraier logn zalolea baile sangata dhadoxi zav.” (Mhonnʼnneo 5:18, 19) Kazari zoddpim eka-mekak visvaxi aslolim Jehovak zai ani tannim pordvar kelʼlo taka naka.—Hebrevank 13:4 vachat.

2. Pozoddponn mhunnttlear kitem?

Bible sangta: “Onoitik kuddicho sombond dovorpi . . . Devachea Rajeache daiji zaunchenant.” (1 Korintkarank 6:9, 10) Bible boroupeamnim onoitik kuddicho sombond vo pozoddponn hea utrak porneia hem Grik utor uzar kelam. Porneia mhunnche (1) kazar zainastana kuddicho sombonda dovrop, (2) apleach lingachea munxa lagim kuddicho sombond dovrop (dadlean-dadlea lagim ani bailen-baile lagim) ani (3) zonvaram lagim kuddicho sombond dovrop. Tor, ami “onoitik kuddichea sombonda thaun pois” ravtat tednam Jehova khuxal zatolo ani ami-i khuxal zatolim.—1 Tesalonikekarank 4:3.

KHOLAIEN XIKAT

3. Pozoddponn pois korat

Juze nanvachea eka visvaxi munxan noitik ritin nitoll ravonk kitem kelem tem polloum-ia. Utpoti 39:1-12 vachun sokol dilʼlea prosnanche zobab zannam zaum-ia:

• Juze thoinchean kiteak dhanvon gelo?—Vers 9 polloiat.

• Tannem kelem tem sarkem oxem tumkam dista? Kiteak?

VIDEO: Pozoddponna Thaun Pois Dhanvat (5:06)

Ami pozoddponna thaun pois ravlolim Jehovak zai. 1 Korintkarank 6:18 vachun sokol dilʼlea prosnanche zobab zannam zaum-ia:

• Khoinchea poristhitint ek munis pozoddponnachea tallnnent poddonk xokta?

• Tumi pozoddponna thaun koxem pois ravonk zata?

4. Tumi tallnneo pois korunk zatat

VIDEO: Tallnneo Pois Korunk Bible Vachat (3:02)

• Tea bhavak apunn aplea chitnamnim ani vagnnukent aple bailek ovisvaxi zaunk xokta mhunn kollʼllem tednam tannem kitem kelem?

Thodde pavtti, thoddea visvaxi Kristanvank pasun vaitt chintnam pois korunk kotthin zata. Tumi vaitt chintnam koxim pois korunk zatat? Filipkarank 4:8 vachun sokol dilʼlea prosnanche zobab zannam zaum-ia:

• Hea versa pormonnem ami kitea vixim chintunk zai?

• Bible vachun ani Jehovache sevent vavrit ravon, tallnneo pois korunk tumkam koxi modot zatoli?

5. Jehovachea dorjeam pormonnem jielear amchench borem zatolem

VIDEO: Okʼkol Naslolim Zaum Nakat (9:31)

• To tornnatto tallnnent koso poddonk pavlo?—Mhonnʼnneo 7:8, 9 polloiat.

• Mhonnʼnneo 7:23 ani 26 dakhoita ki pozoddponn kelem zalear khub vaitt porinnam zata. Ami noitik ritin nitoll ravtat tednam koslea trasant poddchimnant?

• Noitik ritin nitoll ravlear amkam koslim besanvam mellttolim?

Apleach lingachea munxa lagim sombond dovrop chukichem mhunn Bible sangta. Hem aikon thoddeank Dev tancho mog korina oxem disot. Punn Dev sogleancho mog korta ani soglim khuxalkaien sasnak jielʼlim taka zai. Tor, sasnak jietolim zalear ami tachea dorjeam pormonnem jieunk zai. 1 Korintkarank 6:9-11 vachun sokol dilʼlea prosnacho zobab zannam zaum-ia:

• Hea versant, fokot apleach lingachea munxa lagim pozoddponn korop chukichem mhunn sanglam kai?

Devak manvololim zaunk ami amchea jivitant bodlav korunk zai. He bodlav korop faideachem oxem tumkam dista? Stotr 19:8, 11 vachun sokol dilʼlea prosnacho zobab zannam zaum-ia:

• Jehovache dorje amcheach boreak oxem tumkam dista? Kiteak?

KITEM XIKLIM

Kuddicho sombond hem ghov-bailank Jehova Deva thaun dennem zaun asa.

Porot Ugddas Korum-ia

• Pozoddponnant koslim-koslim vaittponnam mellon asat?

• Pozoddponna thaun pois ravonk amkam koxi modot zatoli?

• Jehovache noitik dorje pallttat tednam amkam kosle faide astat?

ANIK SODHAT

Ek cheddo ani cheddum sangata ravonk sodhtat zalear tim kazar zalʼlim Devak kiteak zai?

“Kazar Zainastana Sangata Ravop Sarkem Kai?” (Web article)

Apleach lingachea munxa lagim pozoddponn korop chukichem mhunn Bible sangta. Punn ami toslea munxancho dves kiteak korunk zaina?

“Apleach Lingachea Munxa Lagim Sombond Dovrop Kiteak Chukichem?” (Web article)

Kuddichea sombonda vixim Devan dilʼlea soglea kaideank lagon amchi rakhonn zata.

“Oral Sex Korop Chukichem Kai?” (Web article)

Apleach lingachea munxa sangata sombond dovortolea eka dadleak aplem jivit bodlunk koxi modot zali tem ami “Tannim Mhaka Man Dilo” hea onubhovant polloum-ia.

“Bible Jivit Bodolta” (The Watchtower, April 1, 2011)

Soreaa vixim lokanchem chintop veg-vegllem asa. Thoddim chintʼtat soro pievop sarkem nhoi mhunn. Thoddim kednam-kednam-i pietat, zoxem aplea ixttam sangata astana. Punn thoddim khubuch soro pietat. Soro pieunche vixim Bible amkam kitem sangta?

1. Soro pievop chukichem mhunn Bible sangta kai?

Soro pievop chukichem mhunn Bible sangona. Punn, soro pasun munxank khuxal korunk Devan dilʼlem dennem mhunn Bible sangta. Bible mhunntta, “munxachem kalliz khuxal korta to soro.” (Stotr 104:14, 15) Devachim thoddim visvaxi munxam pasun kednam-kednam-i soro pietalim mhunn Bible dakhoita.—1 Timotak 5:23.

2. Sorea vixim Bible kitem sangta?

Bible sangta, “sodanch soro pietat” tosleancho sangat dovornakat. (Mhonnʼnneo 23:20) Ami chodduch soro pielʼlim vo bebdikai kelʼli Jehovak avoddna. (Galasiekarank 5:21) Ami ekttim astana pasun soro pietat zalear itlo pieunk zaina ki ami kitem uloitat ani kitem kortat tem amkanch khobor asona. Toxench, amchi bholaiki piddʼdear zaunk xokta titlo-i soro ami pieunk zaina. Ami kitlo pietat tacher ami tabo dovrunk xokonant zalear ami soro pievop soddun dilear odik borem zatolem.

3. Dusreanchea nirnnoi-ak ami koso man diunk zata?

Konnui thoddo-so soro pieta zalear ami tachi nit korunk zaina. Toxench, konnui soro pieuncho na mhunn tharaita tednam soro pie mhunn ami tacher dobhav ghalunk zaina. (Romkarank 14:10) Apunn soro pietolo vo na tem dor eklean tharaunk zai. Ami soro pietat mhunn dusreanchem ontoskornn dukhovta zalear ami pienant zalear borem. (Romkarank 14:21 vachat.) Karonn Bible sangta: “Aplea faidea vixim nhoi punn dusreachea faidea vixim chintunk zai.”—1 Korintkarank 10:23, 24 vachat.

KHOLAIEN XIKAT

4. Tumi soro pietolim vo na tem tharaiat

Soro pieunchea vixim Jezu kitem chintʼtalo? Hem zannam zaunk ami Jezun kelʼlem poilem vizmit ugddas korum-ia. Juanv 2:1-11 vachun sokol dilʼlea prosnanche zobab zannam zaum-ia.

• Sorea vixim ani soro pietat tanche vixim Jezuchem chintop kitem aslem mhunn amkam hea vizmitantlean kollon ieta?

• Soro pievop chukichem mhunn Jezun sangonk na. Tor ek Kristanv soro pieta zalear ami kitem korunk zai vo kitem korunk zaina?

Soro pievop chukichem nhoi hem khorem, punn eka Kristanvan thoddea poristhitimnim soro pievop sarkem zaunchem na. Mhonnʼnneo 22:3 vachun sokol dilʼlea poristhitimnim soro pievop sarkem zatolem vo na tem polloum-ia:

• Tumi gaddi cholounchim asat vo ek mexin gheun kam korchim asat.

• Tumi gorbest asat.

• Dotoran tumkam soro pienaka mhunn sanglam.

• Pieunk suru kelear tumkam anik pieunk-xem dista ani tumchean pienastana ravonk zaina.

• Soro pieunk zaina mhunn kaido asa.

• Tumi oslea eka munxa sangata asat zo adim hisba bhair soro pietalo punn atam tannem soro pieuncho na mhunn tharailam.

Kazarak vo kosle-i party-k tumi dusream pasot soro dovrunk zata kai? Hem tharaunk modot zaunk ho VIDEO polloum-ia.

VIDEO: Soro Diuncho Vo Na Tem Tharaiat (2:41)

Romkarank 13:13 ani 1 Korintkarank 10:31, 32 vachun sokol dilʼlea prosnacho zobab zannam zaum-ia.

• Hea versamnim dilʼlim totvam apnnaun Jehovak manvota toslo nirnnoi gheunk tumkam koxi modot zatoli?

5. Tumi kitlo soro pietolim tem tharaiat

Tumi soro pietolim mhunn tharaitat zalear ugddas dovrat ki soro pievop chukichem mhunn Jehova Dev sangona. Punn chodd soro pievop vo bebdikai korop chukichem mhunn to sangta. Kiteak? Hosea 4:11, 18 vachun sokol dilʼlea prosnacho zobab zannam zaum-ia.

• Chodd soro pielear kitem zaunk xokta?

Chodd soro piena zaunk ami kitem korunk zai? Ami kitlo soro pietolim tem ami pieunk suru korchea poilinch tharaunk zai. Mhonnʼnneo 11:2 vachun sokol dilʼlea prosnacho zobab zannam zaum-ia.

• Tumi kitlo soro pietolim tem poilinch tharavop kiteak faideachem?

6. Chodd soro pieunchi sonvoim moddat

VIDEO: ‘Hanv Mhojea Jivitant Samkoch Bejarlolo’ (6:32)

• Dmitry soro pietalo tednam kitem kortalo?

• To soro rokddoch soddunk pavlo kai?

• Soro soddunk taka koxi modot zali?

1 Korintkarank 6:10, 11 vachun sokol dilʼlea prosnanche zobab zannam zaum-ia:

• Bebdikai kelear kitem zatolem?

• Bebdikai korta to munis bodlonk xokta mhunn koxem kolltta?

Matev 5:30 vachun sokol dilʼlea prosnacho zobab zannam zaum-ia.

• Jehovak manvota tem korunk amkam thodde teag korunk poddttole mhunn Jezun dilʼlea udharonnantlean amkam kollon ieta. Tumkam chodduch soro pieupachi sonvoim asa zalear ti soddunk tumi kitem korunk zata?b

1 Korintkarank 15:33 vachun sokol dilʼlea prosnacho zobab zannam zaum-ia.

• Chodduch soro pietat tancho sangat dovorlo zalear kitem zatolem?

KITEM XIKLIM

Amkam jivitant khuxalkai mellonk Jehovan soro dila, punn ami chodd soro pielim vo bebdikai keli zalear taka tem avoddna.

Porot Ugddas Korum-ia

• Soro pieunche vixim Bible kitem sangta?

• Chodduch soro pielear kitem zaunk xokta?

• Sorea vixim dusrim zo nirnnoi ghetat taka ami koso man diunk zata?

ANIK SODHAT

Soro pieuncho vo na hem tornnatteamnim koxem tharaunk zata?

Soro Pieunchea Poilim Chintat (2:31)

Tumkam soro pieunchi sonvoim asa zalear tumi kitem korunk zata tem zannam zaiat.

“Soro Pieunchi Sonvoim Aslear Kitem Korchem?” (The Watchtower, January 1, 2010)

Kristanvamnim toasting korunk zata kai?

“Vachpeam Thaun Prosn” (The Watchtower, February 15, 2007)

“Hanv Soreanuch Buddon Astalom,” hea lekhant khub soro pietalo tea munxak soro soddunk koxi modot zali tem polloiat.

“Bible Jivit Bodolta” (The Watchtower, May 1, 2012)

Ami Jehova Devacho khub mog kortat. Ani taka borem dista tem korunk ami khub proitn kortat. Tori astana, ami ek-ek pavtti chuktat. Ani kednam-i amchea lagim gombhir patok zaunk xokta. (1 Korintkarank 6:9, 10) Ani oxem ghoddtta tednam pasun, Jehova amcho khub mog korta ani to amkam modot korunk toiar asa mhunn ami kednanch visorchem nhoi.

1. Jehovan amkam bhogxilʼlim zai zalear ami kitem korunk zai?

Eklean gombhir patok kelam astolem ani taka lagon taka khub dukh zata. Tea vellar, Jehovachim utram taka bhuzvonn diunk xoktat. To amkam sangta: “Zori patkam tumchim lal-tambddim, tori borfa vori zatoleat tumi nitoll dhovim.” (Izaias 1:18) Zor to munis kallzant thaun poschatap korta zalear, Jehova Dev taka bhogxitolo. Tannem khoroch poschatap kela zalear to aplem patok soddun ditolo ani Jehova lagim bhogsonnem magtolo. Uprant, jea vaitt sonvoim-ank lagon vo chukichea chintpak lagon to patok korunk pavlolo tem soddun diunk to vavurtolo ani Jehovachea noitik dorjeam pormonnem cholonk proitn kortolo.—Izaias 55:6, 7 vachat.

2. Ami patok kelear Jehova vhoddilam udexim amkam koso modot korta?

Ami gombhir patok kelam zalear ami “sobhechea vhoddilank apounche” mhunn Jehova sangta. (Jakob 5:14, 15 vachat.) Te zanntte vo vhoddil Jehovacho ani tachea xelliancho khub mog kortat. Taka lagon, eka munxan gombhir patok kelam zalear, te taka Jehova sangata tachi ixttagot ghott korunk modot kortole ani oxem korunk te purte asat.—Galasiekarank 6:1

Ami gombhir patok kelam zalear vhoddil amkam koxe modot kortole? Don vo tin vhoddil amkam Bible adarit solʼle ditole ani ami kelʼlem patok porot korina zaunk ami kitem korunk zata tea vixim te amkam sangtole. Punn ek munis poschatap korunk toiar na zalear, sobhentlea bhav-bhoinnancher vaitt porinnam zaina zaunk te taka sobhentlean bhair kaddttole.

KHOLAIEN XIKAT

3. Amchim patkam ami lipoun dovorinant zalear amkam faido zatolo

Ami koslem-i patok kelam zalear tea vixim ami Jehovak magnneant sangonk zai. Stotr 32:1-5 vachun sokol dilʼlea prosnacho zobab zannam zaum-ia:

• Ami amchim patkam lipounche bodlek ukteponnim Jehovak sangop kiteak gorjechem?

VIDEO: ‘Jehova Zancho Mog Korta Tankam To Xist Laita’ (3:01)

• Jehova lagim porot ieunk vhoddilamnim Canon-ak koxi modot keli?

Ami amcheo chuki ukteponnim vhoddilank sangtat tednam te amkam modot korunk pavtole. Jakob 5:16 vachun sokol dilʼlea prosnacho zobab zannam zaum-ia:

• Ami kainch lipoinastana vhoddilank soglem sangtat tednam amkam modot korunk tankam koxem sompem zatolem?

4. Jehova patkeank doia dakhoita

Ek munis gombhir patok korta ani to khoro poschatap korina zalear, taka sobhentlean bhair kaddttat ani oslea munxa sangata ami vell sarinant. 1 Korintkarank 5:6, 11 ani 2 Juanv 9-11 vachun sokol dilʼlea prosnacho zobab zannam zaum-ia:

• Ilʼlem-xem khomir akʼkhem pitt ambott korta, tech bhaxen sobhentlean bhair kaddlolea munxam sangata ami vell sarlo zalear kitem zaunk xokta?

Jehova jea toren patkeam lagim vagta tantuntlean to somjikaiecho, doiall ani mogall Dev mhunn koxem kollon ieta?

5. Ami poschatap kortat tednam Jehova amkam bhogxita

Ek munis poschatap korta tednam Jehovak koxem dista tem somzonk Jezun ek vopar sangli. Lukas 15:1-7 vachun sokol dilʼlea prosnacho zobab zannam zaum-ia:

• Hea voparintlean amkam Jehova vixim kitem kollon ieta?

Ezekiel 33:11 vachun sokol dilʼlea prosnacho zobab zannam zaum-ia:

• Poschatap korunk ami koslim panvlam gheunk zai?

KITEM XIKLIM

Ami gombhir patok kelam, punn amkam tea vixim kallzantlean vaitt dista ani toxem porot korina zaunk ami amche lagim zata titlem-i kortat zalear Jehova amkam bhogxitolo.

Porot Ugddas Korum-ia

• Amchea patkam vixim ami magnneant Jehovak sangop kiteak gorjechem?

• Amchim patkam amkam Jehovan bhogxilʼlim zai zalear ami kitem korunk zai?

• Ami gombhir patok kelam zalear ami vhoddilanchi modot kiteak gheunk zai?

ANIK SODHAT

Izaias 1:18-ant sanglolea pormonnem eka dadlean Jehovachi doia koxi onnbhovli tem zannam zaiat.

Jehova Tumkam Bhogxitolo Mhunn Khatri Dovrat (5:02)

Gombhir patok kelam tankam modot korunk vhoddil koxe proitn kortat?

“Patok Kortat Tankam Vhoddil Mog Ani Doia Koxi Dakhoitat?” (Pahrogopur, Agost 2024)

Poschatap korinant toslea patkeank mog ani doia koxi dakhoitat tacheriat.

“Sobhentlean Bhair Kaddloleank Vhoddilamnim Koxi Modot Korunk Zata?” (Pahrogopur, Agost 2024)

“Ami Jehova-xim Porot Ieunchi Goroz Asli,” hea lekhant sot soddun gelʼlea eka munxak porot ieunk Jehovan modot keli mhunn kiteak dislem tem zannam zaiat.

“Bible Jivit Bodolta” (The Watchtower, April 1, 2012)