ODHEAI 49
Tumcho Kuttumb Koso Khuxal Asonk Xokta?—Bhag 1
Novinch kazar zatat tankam aplem kazari jivit sodanch khuxal aslolem zai. Punn, oxem zaunk xokta kai? Jim kazari zoddpim zaitim vorsam thaun Bible-antlim totvam aplea jivitant lagu kortat tim khuxal astat. Tor, him totvam lagu korun tumi pasun tumchem kazari jivit khuxal korunk zata.
1. Bible-ant ghovank koslo solʼlo dila?
Jehovan ghovak familicho mukheli mhunn nemla. (Efezkarank 5:23 vachat.) Tor, tannem famili pasot bore nirnnoi gheunk zai. Toxench, Efezkarank 5:25 sangta: “Tumi tumchea bailecho mog korit ravat.” Hem korunk to aple baile lagim bore toren vagtolo, zaum tim doganch astana vo lokam modem astana. Toxench, to tichim bhavnam somzon ghetolo. Titlench nhoi, ti surokxit uronk ani ticheo gorzo purnn korunk apleachean zata titlem-i kortolo. (1 Timotak 5:8) Ani mhotvachem mhunnttlear, to Jehova lagim tichi ixttagot ghott korunk tika modot kortolo. (Matev 4:4) Hem korunk to tichea sangata magnnem kortolo ani Bible vachtolo. Oxem to korta tednam Jehova lagim tachi ixttagot ghott urtoli.—1 Pedru 3:7 vachat.
2. Bible-ant bailank koslo solʼlo dila?
Bible sangta: “Bailen aplea ghovak kallzant thaun man diuncho.” (Efezkarank 5:33) Hem korunk, tinnem aplea ghovachea borea gunnacher dhean diunk zata ani to familicheo gorzo purnn korunk zo vavr korta tea pasot tachi tokhnnai korunk zata. Toxench, tinnem ghovan ghetlolea nirnnoi-ak tenko diunk zata. Tea bhair, tache lagim uloitana ani tache vixim dusreank sangtana taka manan lekhunk zata. Ticho ghov Jehovachi seva korina tednam pasun ti hem soglem korta tednam ti aplea ghovak man diunk pavtoli.
3. Eka zoddpean aplem kazari jivit koxem ghott korunk zata?
Kazari zoddpim “dogaim ek kudd zatolim” mhunn Bible sangta. (Matev 19:5) Hacho orth, tim aplem kazari jivit moddonk dinant. Hem korunk, tim eka-meka sangata ulounk vell kaddttat, mogan uloitat ani apnnak koxem bhogta tem ukteponnim eka-mekak sangtat. Toxench Jehova bhair, tim konnakuch vo kiteakuch aplea kazari sangatea poros chodd mhotv dinant vo dusrea konnacheach chodd lagim soronant.
KHOLAIEN XIKAT
Tumchem kazari jivit ghott korunk tumkam Bible-antlim khoinchim totvam modot kortolim tem zannam zaiat.
4. Ghovamno, tumche bailecho mog korat ani tichi kallji gheiat
Bible sangta: “Ghovan aplea kuddicho mog korta toso aplea bailecho mog korcho.” (Efezkarank 5:28, 29) Hacho orth kitem? VIDEO polloun sokol dilʼlea prosnacho zobab zannam zaum-ia:
Khoinchea vattamnim ghovan aple bailek mog ani kallji dakhounk zata?
Koloskarank 3:12 vachun sokol dilʼlea prosnacho zobab zannam zaum-ia:
He gunn eka ghovan aplea kazari jivitant koxe dakhounk zatat?
5. Bailamno, tumi tumchea ghovacho mog korat ani taka man diat
Ek ghov Jehovachi seva korina zalear pasun bailen aplea ghovak man diunk zai mhunn Bible sangta. 1 Pedru 3:1, 2 vachun sokol dilʼlea prosnanche zobab zannam zaum-ia:
Tumcho ghov Jehovachi seva korina, punn tannem ek na ek dis Jehovachi seva keloli tumkam zai. Tor, tumi kitem kortolim? Dis-rat taka Bible-a vixim sangot ravtolim vo tumcho sobhav boro dovrun taka man dakhoitolim? Ani kiteak?
Ek bail aplea ghovak man koso dakhoita? Famili pasot nirnnoi gheunchi zobabdari Jehovan ghovak dilea. Punn thodde pavtti ghov gheta to nirnnoi bailek avoddnnam astolo. Tednam apleak koxem dista tea vixim ti taka bore bhaxen ani respedan sangtoli. Ani aplea famili pasot nirnnoi gheunchi zobabdari Jehovan ghovak dilea mhunn ti monant dovortoli. Uprant, ghovan ghetlolea nirnnoi-ak ti purnn ritin tenko ditoli. Hea toren, ghov ani bail sangata mellon bore nirnnoi gheunk pavtolim. Oxem tim kortat tednam ghorabeant khuxalkai astoli. 1 Pedru 3:3-5 vachun sokol dilʼlea prosnacho zobab zannam zaum-ia:
Ek bail aplea ghovak man dita tednam Jehovak koxem dista?
6. Kazari jivitant ailoleo oddchonneo tumi suttaveo korunk zatat
Kazari jivitant kainch oddchonneo ascheonant oxem na. Tor, jeo oddchonneo ietat teo ghov-bailamnim sangata mellon suttaveo korunk zatat. VIDEO polloun sokol dilʼlea prosnanche zobab zannam zaum-ia:
Hem zoddpem eka-meka thaun pois sortalem mhunn koxem kollon ieta?
Tanchem kazari jivit ghott korunk tannim kitem-kitem kelem?
1 Korintkarank 10:24 ani Koloskarank 3:13 vachat. Dor ek vers vachun sokol dilʼlea prosnacho zobab zannam zaum-ia:
Hea versant dilʼlo solʼlo lagu korun eka zoddpean aplem kazari jivit koxem ghott korunk zata?
Ami eka-mekak man diunk zai mhunn Bible sangta. Man divop mhunnttlear, eka-meka sangata doiall ritin ani respedan vagop. Romkarank 12:10 vachun sokol dilʼlea prosnanche zobab zannam zaum-ia:
Mhojea ghovan vo bailen mhaka man dilo zalearuch hanv taka man ditolom. Hem chintop sarkem kai? Kiteak?
THODDO LOK MHUNNTTA: “Amchea modem poilim bhaxen atam mog nam.”
Bible tankam modot korunk xokta mhunn tumi tankam koxim somzaitolim?
KITEM XIKLIM
Ek ghov ani bail eka-mekacho mog kortat, eka-mekak man ditat ani Bible-antlim totvam apnnaitat tednam tim khuxal asonk xoktat.
Porot Ugddas Korum-ia
Aplem kazari jivit khuxal dovrunk eka ghovan kitem korunk zata?
Aplem kazari jivit khuxal dovrunk eke bailen kitem korunk zata?
Tumchem kazarachem natem ghott korunk Bible-antlim khoinchim totvam tumkam modot kortolim?
ANIK SODHAT
Tumi tumchem kuttumbik jivit koxem khuxal korunk zata tea vixim thoddeo suchounneo polloiat.
Kazari jivitant Bible totvam apnnailear koslim besanvam mellttat tem zannam zaunk ho songit video polloiat.
Ghovak khalti ravop mhunnttlear kitem tem zannam zaiat.
“Bailamno, Tumi Tumchea Ghovak Kiteak Khalti Ravonk Zai?” (The Watchtower, May 15, 2010)
Eka zoddpeachea kazari jivitant vhoddleo oddchonneo aileo zalear pasun tannim tancho koso fuddo kelo?
Devachea Modotin Ami Amchem Kazari Jivit Porot Bandun Haddunk Pavlim (5:14)