Devdut Mhunnttlear Konn?

Sorgar Jehovacho ek kuttumb asa ani tea vixim ami zannam zalʼlim taka zai. Tachea kuttumbant zaite devdut vo ainz boddve asat, zankam Bible-ant ‘Devache put’ mhunnttleat. (Job 38:7) Devdutam vixim Bible kitem sangta? Te lokank borem vo vaitt korunk xoktat kai? Sogle devdut Devachea kuttumbacho bhag zaun asat kai?

1. Devdut konn ani te kitem kortat?

Prithum rochʼchea poilim Jehovan sorgar devdutank rochle. Dev amkam disona, toxench te-ui amkam disonant. (Hebrevank 1:14) He devdut kottʼtteamnim asat ani te sogle eka-meka poros veglle asat. (Prokasovnni 5:11) Te ‘Devacho hukum pallttat ani tachem utor aikotat.’ (Stotr 103:20) Adlea kallar, Jehovan thodde pavtti devdutank dhaddun aplea lokank sondex dilo, ghottai dili ani tankam salvar kele. Aiz-ui Deva vixim xikonk sodhtat tankam devdut modot kortat.

2. Soitan ani tache dut konn zaun asat?

Thodde devdut Jehovak visvaxi ravonk nant. Tachea add gelʼlea poilea dutak ‘nanv piddʼddear korpi Soitan mhunnttat ani to akʼkhea prithumer ravtolea lokank fosoita.’ (Prokasovnni 12:9) Soitanak dusreancher raz cholounk zai aslem. Tor, tannem poilea zoddpeak, Adanv ani Evek fosoilim. Uprant, Soitanachem aikon thodde devdut Devachea add gele. Tankam Bible-ant noxtte dut mhunnttleat. Hea noxttea dutank Devan sorgar thaun prithumer xevttileat ani beginuch to tancho nas kortolo.—Prokasovnni 12:9, 12 vachat.

3. Soitan ani tache dut amkam koxe fosoitat?

Soitan ani tache dut Jehovache dusman zaun asat ani te ghaddiponna udexim zaitea lokank fosoitat. Ghaddiponn korpi noxttea dutanchea adaran zaitim kamam kortat. Zoxem, thodde hat vo noketram polloun fuddar sangtat. Thodde lokanchim duensam borim korunk, nodor kaddunk, dusreank vaitt korunk ani her karonnak lagon vareachem vokhod vo zhaddu martat. Toxench, thodde meloleanchi vaspus kortat. Punn Jehovak aplea lokamnim oxem kitench kelʼlem naka. To mhunntta: “Melʼleancho prosad magtat tanche thaim [vo tanche lagim ulounk proitn kortat tanchi] budh gheunk vochum nakat.” (Levi-Xastr 19:31) Soitan ani tache dut amkam trasant ghalunk sodhtat, tor ami fosona zaunk Jehova hi xittkaunni dita.

KHOLAIEN XIKAT

4. Jehovachi vollokh gheunk devdut lokank modot kortat

Devdut vochon lokank porgott korinant tem khorem. Punn te Devachea sevokank porgottnni kortana khaltea kallzachea lokank sodhunk modot kortat. Prokasovnni 14:6, 7 vachun hea prosnanche zobab zannam zaum-ia:

• Porgottnni korunk amkam devdutanchi modot kiteak zai?

• Khaltea kallzachea lokank sodhunk devdut amkam modot kortat mhunn tumi khuxal zainant kai? Kiteak?

5. Ghaddiponn nakarat

Soitan ani tache dut Jehovache ani amche pasun dusman zaun asat. Lukas 9:38-42 vachun sokol dilʼlea prosnacho zobab zannam zaum-ia:

• Noxtte dut lokank koxe tras kortat?

Amchea jivitant noxttea dutancho probhav poddlolo amkam naka. Dusri Somurt 18:10-12 vachun sokol dilʼlea prosnanche zobab zannam zaum-ia:

• Amkam fosounk noxtte dut amcher khoinchea ritin probhav ghalunk xoktat? Tumi ravtat tea zagear kosle torechem ghaddiponn cholta?

• Jehova amkam ghaddiponn nakarunk sangta tem amchea boreak oxem tumkam dista kai? Kiteak?

VIDEO polloun sokol dilʼlea prosnanche zobab zannam zaum-ia.

VIDEO: “Devcharacher Zhuz Korat” (5:02)

• Palesa-chea dhuvechea hatak bandlolo dhago tankam dhokeacho aslo kai? Kiteak?

• Noxttea dutam thaun suttka mellonk Palesan kitem kelem?

Khorim Kristanvam noxttea dutancho virodh kortat. Itihas 19:19 ani 1 Korintkarank 10:21 vachun sokol dilʼlea prosnacho zobab zannam zaum-ia:

• Ghaddiponnacheo sogleo vostu nas korop kiteak gorjechem?

6. Soitan ani tachea dutam add zhuz ami jikhonk xoktat

Noxttea dutancho fuddari Soitan zaun asa punn Devak visvaxi aslolea devdutancho fuddari mha-devdut Mikael zaun asa. Mikael hem Jezuchem dusrem nanv. Mikael kitlo xoktivont asa? Prokasovnni 12:7-9 vachun sokol dilʼlea prosnanche zobab zannam zaum-ia:

• Konn chodd xoktivont zaun asa? Mikael ani tache dut vo Soitan ani tache dut?

• Jezuchea pattlavdaramnim Soitanak ani tachea dutank bhieunk zai kai?

Soitan ani tachea dutam add zhuz tumi jikhonk xoktat. Jakob 4:7 vachun sokol dilʼlea prosnacho zobab zannam zaum-ia:

• Soitan ani tachea dutam thaun tumi tumchi rakhonn koxi korunk xoktat?

KITEM XIKLIM

Devdut amkam modot kortat. Punn Soitan ani tache dut Jehovache dusman zaun asat ani ghaddiponna udexim te lokank fosoitat.

Porot Ugddas Korum-ia

• Jehova vixim xikonk devdut lokank koxe modot kortat?

• Soitan ani tache dut konn zaun asat?

• Tumi ghaddiponna thaun kiteak pois ravonk zai?

ANIK SODHAT

Jezuch mha-devdut Mikael mhunn dakhoita te purave polloiat.

“Mha-devdut Mikael Konn?” (Web article)

Soitan mhunnttlear, amchea bhitor aslolo vaitt gunn oso thoddo lok chintʼta. Punn hi ek fott kiteak zaun asa tem zannam zaiat.

“Soitan Khorench Asa Kai?” (Web article)

Noxttea dutanchea chopkeantlean eke bailek koxi suttka mellʼlli tem polloiat.

“Tika Jivitant Ek Udʼdhex Mellʼllo” (The Watchtower, July 1, 1993)

Ghaddiponn uzar korun Soitan lokank koso fosoita tem polloiat.

“Jadu, Ghaddiponn ani Bhut-vidʼdea Vixim Sot” (The Road to Everlasting Life, part 5)