Setembr—Jivit ani Porgottnni Mittingechea Pustike Pasot Modot
SETEMBR 2-8
DEVACHEA UTRANTLE THEVE| HEBREVANK 7-8
“Melkizedeka Porim Ek Iadnik Sasnna-Sasnnak”
(Hebrevank 7:1, 2) Melkizedek Salemacho raiza ani Bhov-Vortea Devacho iadnik aslo. Razancher zoit vhorun Abraham porto ietalo tednam, Melkizedek taka mellʼllo ani tannem Abrahamak axirvad dilo, 2 Tednam Abrahaman apunn gheun ailʼlo titleacho-i dhavo vantto taka dilo. Melkizedek, tachea nanvacho orth dhorun, poile svater “Promannikponnacho Raza”; tea bhair, to Salemacho raza dekhun, to “Xanticho Raza.”
it-2 366
Melkizedek
Adlea Salem-antlo Raza ani, ‘Bhov Vorto Dev,’ Jehovacho iadnik. (Ut. 14:18, 22) Ho poilo iadnik zaun asa, zachea vixim Bible-ant sanglam. Taka hi podvi 1933 K.X.A.-chea thoddea tempa poilim kednam tori mellʼlli. Salem xarachea nanvacho orth “Xanti”, ani Melkizedek thoincho raza aslolean apostl Paulu taka “Xanticho Raza” mhunntta ani tachea nanvachea adarit, “Promannikponnacho Raza” mhunn tachi vollokh dita. (Heb. 7:1, 2) Adlem Salem Jerusalem xaracho modlo bhag zaun aslem mhunn lok mantat, ani hem nanv Jerusalem hea nanva bhitor zoddlam, zaka lagon Jerusalemak kednam-kednam “Salem” pasun mhunnttlam.—St. 76:2.
Abram-an (Abraham-an), Kedorlaomer ani tachea vangdda aslolea razank haroilea uprant, Melkizedek Shavechea Gholint vo ‘Patxaiachea Gholint’ ailo. Thoim, tannem “unddo ani soro haddlo” and Abraham-acher axirvad ghalun oxem mhunnttlem: “Bhov Vorto Dev, sorga ani prithumecho Rochnnar, Abramacher axirvad ghalum; Ani tujea dusmanank tuje adhin kele dekhun Bhov Vortea Devak vakhannʼnni!” Tednam Abrahaman, raza ani iadnik aslolea Melkizedek-ak “aple dhon-girestkaiecho dhavo vantto” mhunnche tachea add zhuzonk ailolea razancher zoit vhoron, taka mellʼllole ‘zhuzachea lutticho mhal’ taka dilo.—Ut. 14:17-20; Heb. 7:4.
(Hebrevank 7:3) Tachea bapaichi vo avoichi, nhoi mhonn tachea khoincheach purvozachi, khoboruch na; to kednam zolmolo vo kednam melo hachi-i khobor na. Tachem iadnikponn Devachea Putachea iadnikponna sarkem: sodankal Melkizedekachi itlich khobor urtoli, ki to iadnik.
it-2 367 ¶4
Melkizedek
Melkizedek ‘kednam zolmolo vo kednam melo hachi khobor na,’ hem koxem khorem aslem?
Paulun oxem sangon Melchizedeka vixim ek khas vixoi ugddasak haddlo: “Tachea bapaichi vo avoichi, nhoi mhonn tachea khoincheach purvozachi, khoboruch na; to kednam zolmolo vo kednam melo hachi-i khobor na. Tachem iadnikponn Devachea Putachea iadnikponna sarkem: sodankal Melkizedekachi itlich khobor urtoli, ki to iadnik.” (Heb. 7:3) Soglea munxa bhaxen, Melkizedek pasun zolmolo ani melo. Punn, tachea bapaichem vo avoichem nanv, vo tache purvoz vo sonste vixim mhunnche tachi jivitachi survat vo tacho xevott koso zalo tea vixim Bible kainch sangona. Toxem zalolean, Melkizedekak, xevott naslolo iadnik Jezu Krista sarko sor korunk zata. Melkizedekak asloli iadnikponnachi podvi tachea poilim aslolea konna thaun taka mellʼlli vo tachea uprant ti konnank tori geli mhunn Bible sangona. Teach toren, Krista poilim konnankuch tachea sarki porom iadnikachi podvi nasli, vo tachea uprant konnankuch tachi podvi mellchina mhunn Bible dakhoun dita. Tea bhair, Jezu Judachea kullant zolmolo ani Raza zaunche asat tea Davidachea sonsti thaun to zolmolo mhunn taka tachem iadnikponn mellonk na. Na mhunn taka iadnik ani raza zaunchi donnui podvi mellonk to zolmola tea munxachea vonxavolli udexim mellʼlli. Punn hem soglem, Jehova Devan taka dilolea soputa udexim zaunk pavlem.
(Hebrevank 7:17) Khorench Tache vixim Povitr Pustokar oxi govaiki dilʼli asa: Melkizedeka porim konn adlo-fuddlo nastana Iadnik Tum sasnna-sasnnak.
it-2 366
Melkizedek
Kristachem Iadnikponn Sor Kelam. Mesiasa vixim dilolea eka mhotvachea bhakitant, Jehova Davidachea “Somiak” ho soput dita: “Melkisedeka porim ekloch eklo, Iadnik tum sasnna-sasnnak!” (St. 110:1, 4) Hea prerit zalolea stotra udexim Mesiasak iadnik ani raza, heo don podvi sangata astoleo mhunn Hebrev lokank zannam zaunk modot zali. Hebrevank boroilolea chittint apostl Paulun, “Melkizedeka porim konn adlo-fuddlo nastana Iadnik Tum sasnna-sasnnak” mhunn bhakit kelolea Jezu vixim sangon, tachi vollokh ditat tea vixim aslole dubav kaddun uddoile.—Heb. 6:20; 5:10; COVENANT, hem polloi.
Bible-ant Motiam Sodhum-ia
(Hebrevank 8:3) Dor-ek porom-iadnik danam ani iodn somorpunk sthaplolo asa; hea-i Porom-Iadnika lagim kitem-i tori somorpunk asunk zai.
w00 8/15 14 ¶11
Iodn Je Devak Manvotat
11 “Dor-ek porom-iadnik danam ani iodn somorpunk sthaplolo asa,” mhunn apostl Paulu sangta. (Hebrevank 8:3) Dhean diat, adle Israelache porom iadnik bhettoitale teo bhettounneo don torecheo asat mhunn Paulu sangta, tem mhunnche “danam” ani “iodn” vo “patkanchea bhogsonnea khatir” bhettoiloleo bhettounneo. (Hebrevank 5:1) Chodd korun lok aplo mog ani upkariponn dakhounk, toxench ixttagot zhoddunk, moipas dakhounk vo manoitai melloun gheunk, dennim ditat. (Utpoti 32:20; Mhonnʼnneo 18:16) Teach toren, Somurte pormonnem diunk asloleo bhettounneo Devachi maniotai melloun gheunk taka dilolim “danam” koxim mhunn sangonk zata. Somurt pallunk eklo chukta tednam tachem farikponn diunk zai aslem, ani taka lagon “patkanchea bhogsonnea khatir” taka bhettounneo diunk poddttaleo. Pentateuk vo Bible-antlim poilim panch pustokamnim, khas korun Suttka, Levi-Xastr, ani Lokgonnti pustokant, veg-veglle iodn ani bhettounneo koxeo bhettounk zai tea vixim zaiti mahiti dilea. Ti sogli bariksannechi mahiti xikon, ugddas dovrunk amkam kotthin zaunk puro, punn tea veg-vegllea torechea iodnanchea mukhel vixoi-ancher dhean dilear amkam faideak poddttolem.
(Hebrevank 8:13) Novea eka korarachi khobor korta mhonnttoch, to poilo korar Devan rodʼd kelo. Tor jem kitem pornnem zalem ani zache dis bhorle, tem xekim nanch zaunk pavta.
it-1 523 ¶5
Korar
Somurticho korar koso “rodʼd” zalo?
Devan provadi Jeremiasa vorvim eka novea korara vixim kolloilem tednam eke toren Somurticho korar “rodʼd” zalo. (Jer. 31:31-34; Heb. 8:13) Punn, 33 K.X.-ant Kristan khambear aplo jiv dilo tednam Somurticho korar sarkoch rodʼd zalo (Kol. 2:14), ani tachea bodlek novo korar stapon zalo.—Heb. 7:12; 9:15; D.I. 2:1-4.
SETEMBR 9-15
DEVACHEA UTRANTLE THEVE | HEBREVANK 9-10
“Fuddarak Dev Diuncho Asa Tachi Savlli”
(Hebrevank 9:12-14) Toxench To bokddeanchem vo paddkuleanchem rogot gheun bhitor vochunk na; punn Aplench rogot gheun Tannem ekech pavtti Gabhareant proves kelo ani sasnnik taronn amkam zoddlem. 13 Bokddeanchem ani paddkuleanchem rogot ani laslole paddiecho gobor oxudʼdh asloleancher xitoddaun, tim tancho mhell kaddun tankam dharmik nemam pormannem xudʼdh kortat; oxem zalear, 14 Kristachem rogot kitlem odik gunnvont zaunchem na?! Tannem sasnnik Atmea vorvim nixkollonk boli koxi Apnnakuch Devak bhettoilo; mhonnttoch, ami jivea Devak bhozche khatir, tem Tachem rogot kitlem odik amchim ontoskornnam mornnadik kortubantlim xudʼdh korchem na?
it-1 862 ¶1
Bhogsonnem
Israel raxttrak Devan dilolea Somurte pormonnem, eka munxan Deva add vo aplea bhava add patok kelam zalear, tannem Somurtent sanglam toxem apli chuk sudharchi goroz asli. Tachea uprant, choddxea poristhitimnim tannem Jehovak ek rogtachi bhettounni diunk zai asli. (Lev. 5:5–6:7) Taka lagon, Paulun hem totv sanglem: “Ani somurti pormannem chodd-chodd vostunchi xudʼdhavnni rogot vaprun zata ani rogot vikrailea xivai bhogsonnem na.” (Heb. 9:22) Khorem mhunnttlear, zonvaranchem rogot bhettoilolean eka munxak aplem patok kaddun uddoun, ek poripurnn nitoll ontoskornn mellonk xokonaslem. (Heb. 10:1-4; 9:9, 13, 14) Punn, bhakit kelolea novea korara udexim ekleak Jezu Kristachea bolidanachea adarit, khorem bhogsonnem mellonk xokta. (Jer. 31:33, 34; Mt. 26:28; 1Kor. 11:25; Ef. 1:7) Hea sonvsarant astana pasun, Jezun eka arkarak boro kelo tednam patkam bhogsuncho odhikar apleak asa mhunn tannem dakhoun dilem.—Mt. 9:2-7.
(Hebrevank 9:24-26) Monxamnim kelʼlo Gabharo khorea Gabhareachem fokot ek chitr: oslea Gabhareant Krist bhitor sorunk na; to khorem mhollear khud sorgar bhitor sorlo ani oso to atam amche khatir Deva mukhar ubo zalo. 25 Porom-iadnik vorsachea vorsa aplem nhoi tem rogot gheun Gabhareant proves korta; oxem Kristak Apli bhettovnni bogor-bogor korchi goroz na; 26 na tor, sonvsar rochla te meren tannem zaite pavtti soschem poddtolem aslem. Punn atam, kallam-iuganche sompadnnek, patok kaddun udounk to dixtti poddlo ani hea khatir ekech pavtti tannem Apnnacho iodn kelo.
cf 183 ¶4
“Mhoje Patthlean Ie”
4 Jezu jivont zaun sorgar gelo tednam taka dilolea ieukara vixim, ani to aplea Bapaik mellʼllo tea khuxalkaiechea vella vixim, Bible kainch sangona. Punn, Jezu sorgar portolea uprant rokddench kitem ghoddttolem tea vixim Bible-ant adim fuddench sanglolem. 15 xekddea-von chodd temp, Judev lok dor vorsak eka povitr kariavollik hajir zatale. Dor vorsa ek dis, porom iadnik devmondirachea Bhov Povitr zagear vochon arkpettechea mukhar Farikponnachea Disak bhettoilolea iodnanche rogot ximpddaitalo. Tea disak, porom iadnik Mesiasak suchit kortalo. Hi kariavoll jea bhakitacho orth ditali, tem bhakit Jezun apunn sorgar gelo tednam ekech pavttin purnn kelem. To Jehovachea fuddem ailo—vixvant soglea poros povitr zagear. Ani thoim tannem aplea Bapaik aplea soddvonnechea bolidanachem mol dilem. (Hebrevank 9:11, 12, 24) Jehovan tem manun ghetlem kai?
(Hebrevank 10:1-4) Dev fuddarak ditolo aslo tea denneanchem Somurtint khorem sorup na; Somurt tanchi fokot ek savlli. Ti portun-portun, vorsachea vorsa, tech-tech iodn bhettounk formaita. Toxem zalear, Deva sorxim ieunk sodtoleank sopurnn korunk Somurtik podvich na. 2 Karonn Devak bhoztat tim ekech pavttin xudʼdh zalʼlim zalear, tanchea ontoskornnant kosleach patkacho bhar ascho naslo ani dekhun iodn bhettovpachem sodankal bond zatolem aslem? 3 Punn portench, tea iodnam vorvim vorsachea vorsa patkancho ugddas zata. 4 Kiteak boilanchea ani bokddeanchea rogtak patkam kaddun uddounk koslich podvi na.
it-2 602-603
Poripurnntai
Moizesachea Somurtechi Poripurnntai. Israelitkarank Moizesa udexim dilolea Somurtent her manddavolle sangata, iadnikponnachi ek manddavoll asonk zai asli, ani tannim veg-vegllea zonvaranche iodn bhettounk zai asle. Hi manddavoll Deva thaun asli dekhun ti poripurnn asli. Toripunn, ti Somurt, iadnikponnachi manddavoll, vo iodn, Somurte khala asloleank poripurnntai diunk xokonk na mhunn apostl Paulun dakhoilem. (Heb. 7:11, 19; 10:1) Patkantlean ani mornnantlean svotontrtai diunchea bodlek, hea Somurten lokanchim patkam anik dakhoun dilim. (Rom. 3:20; 7:7-13) Devan jea karonnak lagon heo sogleo manddavoll kelʼleo teo purnn zaunk xokleo. Hea Somurtin, eka “ball-xikxoka” sarkim tankam Krista sorxim vhelim, ji ‘fuddarak Dev diunchi asa tachi savlli’ zaun asli. (Gal. 3:19-25; Heb. 10:1) Teach karonnak lagon, Paulu “Monxasoimbache osoktaiek lagun jem Somurti kodde ghoddonaslem” mhunn sangtana, (Rom. 8:3) to Judev porom iadnika lagim jem ghoddona tea vixim uloitalo. (Porom iadnikak, Somurte pormonnem iodn bhettounchea manddavollechi dekhrekh korunk nemlolo, ani toxench to Farikponnachea Disa iodnachem rogot gheun Bhov Povitr zageant bhitor sortalo) Mhunnche, Hebrevank 7:11, 18-28-ant somzailʼlea porim, Porom iadnik zanchi seva kortalo, tankam to purnn toren “taronn diunk” xokonaslo. Aaronachea iadnikponna khala bhettoilole iodn, Devachea nodren lokank nitoll kortale tem khorem. Punn te guneavkari mhunn tankam aslolea bhavnam thaun, te iodn tankam poripurnn toren suttka diunk xokonasle. Hea vixim apostlan, farikponnacho iodn “Deva sorxim ieunk sodhtoleank sompurnn korunk” xokona, vo tanchem ontoskornn nitoll korunk xokona mhunn sangon somzailem. (Heb. 10:1-4; sor kor Heb. 9:9.) Porom iadnik, patkantlean khori suttka diunk, farik korchem aslem tem mol diunk xokonaslo. Fokot Kristachi sasnak urtoli ti iadnikponnachi seva ani faideak poddtta tem bolidan, farikponn diunk xokta.—Heb. 9:14; 10:12-22.
Bible-ant Motiam Sodhum-ia
(Hebrevank 9:16, 17) Zoim moronn-potr kelʼlem asa, thoim tem potr korun dovorlo to monis mela mhonn ruzu korchi goroz asa, 17 Moronn-potr korta to jivo aso-sor tem potr vhevarant ghalunk zaina; fokot tea monxachea mornna udexim tem potr vhevarant ghalunk zata.
w92 3/1 31 ¶4-6
Vachpeam Thaun Prosn
Deva ani munxa modem aslole korar khore mhunn khatri korunk eka mornnachi goroz asli mhunn Paulun sanglem. Somurticho korar hachem ek udharonn zaun asa. Deva ani Israel lokam modem aslolo ho korar stapon zaunk Moizes tacho modesti aslo. Israelitkarank koraracho bhag zaunk goroz ti modot korunk Moizesan ek mhotvachi zobabdari samballʼlli. Tor, Jehovan kelolo ho Somurticho Korar korpi munis Moizes mhunn mhunnonk zata. Punn Somurticho Korar stapon korunk, Moizesak aplem rogot vharoun jiv diuncho poddlo kai? Na. Moizesachea rogta bodlek zonvaranchem rogot bhettoilem.—Hebrevank 9:18-22.
Devachem Israel raxttr ani Jehova modem aslolea novea korara vixim kitem? Jehova ani Devachea Israela modem modesti zaunchi ek mhoimebhorit zobabdari Jezu Kristak asli. Ho korar Jehovan kelʼlo toripunn, Jezu Kristacher to adarit aslo. To tea koraracho modesti aslo tachea bhair, tannem kuddin prithumer ieun tea korarache bhag zaunche asle tanchea sangata korar kelo. (Lukas 22:20, 28, 29) Tea bhair, korar khoro mhunn khatri korun diunk zai aslo to iodn bhettounk Jezu purto aslo. Ho iodn bexttoch zonvarancho nhoi punn ek poripurnn munxacho jiv aslo. Taka lagon Paulu, Krist novea koraracho korar korpi munis mhunn sangonk xoklo. “Krist . . . khud sorgar bhitor sorlo ani oso to atam amche khatir Deva mukhar ubo zalo.”—Hebrevank 9:12-14, 24.
Moizesak ani Jezuk korar korpi munis mhunnttle tednam, Paulu to korar tannim staplo mhunn sangom naslo, karonn to korar Devan staplolo. Te dogui munis to korar stapon korunk purnn ritin modesti asle. Ani dor ek korar stapon zaunk, ek moronn gorjechem aslem. Somurtichea korarant, Moizesachea jivachea bodlek zonvarank morchem poddlem, ani novea korarant asloleam khatir Jezun aplem svotachem rogot vharoun aplo jiv diuncho poddlo.
(Hebrevank 10:5-7) Heach pasot sonvsarant bhitor sortana Jezun oxem mhollem: “‘Iodn ani bhettovnnio Tuka naka zalim, punn Mhaka Tunvem ek kudd toiar keli; 6 hom ani patkam pasot bolio Tuka manonk nant.’ 7 Tednam Hanvem mhollem: ‘ho polle Hanv ietam. Pustokachea kovlleacher Mhoje vixim oxem boroilolem asa. Tuji khuxi korunk, Deva, Hanv ietam.’”
it-1 249-250
Bautizm
Aplea bautizmachea vellar, Jezu magnnem kortalo mhunn Lukas sangta. (Luk. 3:21) Uprant, Hebrevank chitt boroupi sangta ki Jezu Krist “sonvsarant bhitor sortana” (mhunnche, to zolmolo tednam nhoi vo him utram to vachunk vo ulounk xokonaslo to vell nhoi, punn to bautizm gheunk fuddem sorlo ani apli seva suru keli to vell) tannem Stotr 40:6-8-a (LXX) pormonnem oxem sanglem: “Iodn ani bhettovnnio Tuka naka zalim, punn mhaka tunvem ek kudd toiar keli . . . (Xastrachea Gronthacher mhaka formailolem asa) Tuji khuxi korunk, Deva, Hanv ietam.” (Heb. 10:5-9) Jezu zolma thaun Judev raxttracho sodoxia aslo. Hem raxttr, Deva sangata eka koraracho, mhunnche Somurtichea koraracho bhag aslem. (Sutt. 19:5-8; Gal. 4:4) Hea karonnak lagon, Juanva lagim vochon bautizm gheunchea adinch, Jezu Jehova Deva sangata eka koraracho bhag aslo. Tor hanga, somurte pormonnem Jezun kitem korchem aslem tachea poros odik kelem. Tannem Aplea Bapachi “khuxi” korunk apnnak bhettoilo. Tea khuxent, Somurti pormonnem zonvarancho iodn bhettounchi rit rodʼd korun, apli “toiar” keloli kudd bhettovop mellon asli. Hea vixim apostl Paulun sanglem: “Jezu Kristan hi Devachi khuxi manun ghetli dekhun, tache kuddicho ekech pavttin iodn zalʼlean, amkam povitrtai mellʼlea.” (Heb. 10:10) Jezu pasot aslolea Bapachea khuxent, Rajea sombondit kamam sudʼda mellon aslim, ani taka lagon pasun Jezun apnnank bhettoilo. (Luk. 4:43; 17:20, 21) Jehovan aplea putachi bhettounni apnnaun ghetli ani manun ghetli ani povitr xokte vorvim taka obhixikt korun mhunnttlem: “Tum Mhozo Put, soglle opurbaiecho; Tujer asa Mhojem dhadosponn.”—Mk. 1:9-11; Luk. 3:21-23; Mt. 3:13-17.
SETEMBR 16-22
DEVACHEA UTRANTLE THEVE | HEBREVANK 11
“Bhavarth Kiteak Gorjecho”
(Hebrevank 11:1) Tor bhavarth mhonnge kitem? Devan bhasailʼlea dananchi ami vatt polletana bhavarth amkam hea bhorvanxeant thir dovorta; ani amkam dixtti poddonant teo vostu khorench asat mhonn hoch bhavarth amkam poripunn khatri dita.
w16.10 27 ¶6
Jehovachea Bhakitancher Bhavarth Dovrat
6 Bhavarthacho orth amkam Bible-ant Hebrevank 11:1 (vach) hantunt melltta. Amkam dixtti poddona tea don vostuncher aslolea bhavartha vixim thoim sanglam: (1) ‘Devan bhasailʼlim danam.’ Him, fuddara vixim azun ghoddonk nant teo bhakit keloleo ghoddnneo asonk xoktat, zoxem soglea vaittponnacho xevott ani ieunk aslolo novo sonvsar. (2) “Dixtti poddonant teo vostu.” Hea versant “poripunn khatri” hea utrank uzar kelolea Grek utrancho orth, khorem ostitvant aslolem punn disona toslea vixoi-am vixim “khatri dita toslo puravo.” Disona tosle vixoi, zoxem Jehova Dev, Jezu Krist, devdut, ani sorginchea Rajeachim kamam. (Heb. 11:3) Amcho bhavarth jivo asa, ani Devachea Utrant sangleat tea disona toslea vixoi-ancher ami patietat mhunn koxim dakhoun ditolim? Amchea utramnim ani korneamnim. Hem korinant zalear amcho bhavarth purnn aschona.
(Hebrevank 11:6) Bhavartha viret konnacheanuch Devak manonk zaina, kiteak Deva-xim vetoleamnim Dev asa mhonn ani Apnnak sodtoleank to inam dita mhonn bhavarth dhorunk zai.
w13 11/1 11 ¶2-5
“Apnnak Sodtoleank To Inam Dita”
Jehovak manonk kitem gorjechem? “Bhavartha viret konnacheanuch Devak manonk zaina,” mhunn Paulu boroita. Dhean diat, Paulu hanga, bhavartha viret Devak khuxal korunk kotthin mhunn sangona, punn tachea viret konnachean Devak manokuch zaina mhunn sangta. Dusrea utramnim mhunnot zalear, Jehovak manonk bhavarth sarko gorjecho.
Jehovak koslo torecho bhavarth manvota? Devacher amkam asa tea bhavarthant don vixoi mellon asonk zai. Poilo, ‘to asa mhunn ami bhavarth dovrunk zai.’ Her bhaxantoramnim hea utranchea bodlek “to khoro asa mhunn patieunk zai” ani “to ostitvant asa mhunn patieunk zai” oxem mhunnttlam. Dev ostitvant asa vo na mhunn ami dubavtat zalear, ami taka manvota tem koxim korunk pavtolim? Tori astana, khorea bhavarthant anik kitem mellon asa, karonn denvchar pasun Jehova ostitvant asa mhunn patietat. (Jakob 2:19) Dev khoroch asa mhunn amkam bhavarth asa zalear, ami to korneamnim dakhounk zai, mhunnche ami to bhavarth, taka manvota tea toren jieun dakhounk zai.—Jakob 2:20, 26.
Dusro, ‘to inam dita mhonn ami bhavarth dovrunk zai.’ Eka munxak khoro bhavarth asa zalear, Devak manvota tea toren jieunk to korta to proitn follabhorit zatoloch mhunn taka purnn khatri asta. (1 Korintkarank 15:58) Amkam inam diunk Jehovak tank vo khuxi asa vo na hea vixim ami dubavtat zalear ami Jehovak koxim manonk xoktat? (Jakob 1:17; 1 Pedru 5:7) Dev kallji korina toslo, upkar naslolo, ani udar kallzacho nhoi mhunn chintʼta tea munxak, Bible-ant sanglam tea Devachi vollokh na oxem mhunnonk zata.
Jehova konnank inam ditolo? “Apnnank sodtoleank,” Jehova inam dita mhunn Paulu sangta. Bible bhaxantor kortoleank mahiti dita toslem ek pustok sangta, ki “apnnank sodtoleank” hea utrank uzar kelolea Grek utrancho orth, “taka sodhunk vochop” ho nhoi, punn, Devachi “bhokti korunk” ievop zaun asa. Oslem anik ek pustok sangta, ho Grek kriapod hanga, choddan-chodd proitn korop ho orth diunk uzar kela. Hoi, je konn bhavarthak lagon Jehovachi bhokti purnn kallzantlean, mogan ani urben kortat, tankam to inam dita.—Matev 22:37.
(Hebrevank 11:33-38) Bhavarthak lagun tannim raxttram jikhun ghetlim, Devak manta toslea jivitachi chal tannim dhorli, ani Devan bhasailʼlem tem tankam mellʼllem. Tannim xinvanchim tonddam dhamplim, 34 ujeachim agttim paloilim, ani zhuzant te torsadin morun poddunk nant. Te osokt asle, punn ghott zale, zhuzant bollixtt zale ani porkea fouzank tannim pattim dhanvddaileo. 35 Kai bailank tanche ghov mornnantle jivont zaun porte mellʼle. Thoddea zannamnim, apli suttka soddun diun, odik borea jivitak punorjivont zaunche khatir moro porian koxtt-dogd bhogle. 36 Kitlea zannamnim kenddnnio ani sotteancho mar khelo, ani dusrea kitlea zannank khoddea-sankllimnim bandlim ani bondkhonnint uddoilim. 37 Tankam fatrailim, tankam khorvontin chirlim, torsadin tancho jiv kaddlo. Xellianchea ani bokddeanchea chama bhair ang pangrunk tankam anink kai naslem. Lacharponnant, hal-upodreamnim ani dogdogamnim tim aple dis kaddtalim. 38 Khorench him monxam sonvsarak favo naslim. Nirvaxi zaun tim oronneamnim ani dongrancher bhonvtalim ani zomnichea bhuimaramnim ani koddeamnim jietalim.
w16.10 23 ¶10-11
Tumchea Bhorvonxeacher Tumcho Bhavarth Ghott Korat
10 Hebrevank odheai 11-ant, Devachea zaitea sevokamnim soslolea trasam vixim apostl Paulu sangta, zanchi nanvam Bible-ant diunk nant. Udharonnak, apostl Paulu, bhavarthi bailam vixim sangta zanche put melole, punn magir punorjivont zalolean tankam te porot mellʼlle. Uprant, Paulu “apli suttka soddun diun, odik borea jivitak punorjivont zaunche khatir moro porian koxtt-dogd bhogle” toslea lokam vixim sangta. (Heb. 11:35) Paulu konna vixim sangtalo tem ami khatren sangonk zaina, punn Devachem aikon tachi khuxi keli dekhun Nabot ani Zekaria sarkea thoddeank fatraun jivexim marlole. (1 Raz. 21:3, 15; 2 It. 24:20, 21) Daniel ani tachea vangddeank aplem visvaxiponn soddun diun, ‘apli suttka’ melloun gheunchi sondhi asli. Punn tachea bodlek, tankam Devachea xoktecher bhavarth aslo dekhun, tea xoktechea adaran tannim ‘xinvanchim tonddam dhamplim ani ‘ujeachim agttim paloili.’—Heb. 11:33, 34; Dan. 3:16-18, 20, 28; 6:13, 16, 21-23.
11 Bhavarthak lagon, Mikaia ani Jeremiasa sarkea provadeancheo ‘kenddnnio keleo ani . . . tankam bondkhonnint uddoile’. Elija sarke her, ‘nirvaxi zaun oronneamnim ani dongrancher bhonvle ani zomnichea bhuimaramnim ani koddeamnim jiele.’ Tankam ‘Devan bhasailʼlea danancher purnn khatri’ aslolean te sogle tras sosunk pavle.—Heb. 11:1, 36-38; 1 Raz. 18:13; 22:24-27; Jer. 20:1, 2; 28:10, 11; 32:2.
Bible-ant Motiam Sodhum-ia
(Hebrevank 11:4) Bhavarthak lagun Abelan Kainachea iodna-von vorto iodn Devak bhettoilo ani hea bhavarthan taka Devan Apnnak manovlolo kelo, kiteak khud Devan tachi bhettovnni manun ghetli. To melo zalear legun, bhavartha vorvim to ozun uloita.
it-1 804 ¶5
Bhavarth
Adlea Kallantlim Bhavarthachim Udharonnam. Paulun sanglolea ‘sakxidaranchea urponjent’ (Heb. 12:1) aslolea dor ekleak bhavarth dovrunk ek borem karonn aslem. Udharonnak, ek ‘sonsot, sorpachem’ mostok maddoitoli mhunn Devan kelolea bhakita vixim Abel zannam aslo. Ani aplea avoi-bapaicher Jehovan Eden bhagent marlolem formonn koxem purnn zalem, tem patieupak tannem purave polloilole. Bhagechea bhair, Adanv ani tachea familik koxttamnim zomin kamais korun aplem pott bhorchem poddlem karonn Devan zomnicher xirap ghatlolo ani taka lagon zomin kantte-khuntte ani kunsam utpon kortali. Abelan ghoddie Eve aplea ghova vatten koxi voddttali ani Adanv ticher aplo odhikar koso choloitalo tem polloilem astolem. Zolm ditana kitlem dukh soschem poddtta tea vixim tachea avoin taka sanglem astolem. Tea bhair, Eden bhagecho darvontto rakhonk aslole kerobeank ani ujeachi tolvar Abelan polloili astoli. (Ut. 3:14-19, 24) Hem soglem, ek “poripunn khatri” asli, jea vorvim Abelak ‘bhakit kelole sonste’ udexim soddvonn mellttoli mhunn khatri mellʼlli. Taka lagon, bhavarthan tannem Kaina poros vorto “iodn Devak bhettoilo.”—Heb. 11:1, 4.
(Hebrevank 11:5) Bhavarthak lagun Devan Enokak mornnantlo vattaun uklun vhelo, ani to konnakuch mellunk na, kiteak Devan taka ubarun vhelo. Karonn, taka uklun vhorche adim, Enok Devak manovlolo monis mhonn Povitr Pustok sangta.
wp17.1 12-13
“To Devak Manovlolo”
Enokak “mornnantlo vattaun uklun vhelo.” Hacho orth kitem? Chodd korun Jehovan Enokak mornnachem dukh sosunk poddona toslem ek xant torechem moronn dilem astolem. Punn morchea adim Enokak apunn, “Devak manovlolo monis” mhunn khatri mellʼlli. Tem koxem? Morchea poilim, Devan taka ghoddie ek Sobit Bag zalolea hea prithumechem dorxon dakhoilem astolem. Hea khunna udexim apunn Devak manovlolo mhunn taka khatri mellʼllea uprant to melo. Enok ani her bhavarthi dadleam ani bailam vixim boroitana apostl Paulun sanglem: “Him sogllim bhavarth dhorun melim.” (Hebrevank 11:13) Hachea uprant, tache dusmanamnim tachi kudd sodli astoli, punn ti “konnakuch mellunk na” karonn lokamnim ti kudd gheun povitr korchi nhoi vo khottea dhormant uzar korchi nhoi mhunn Jehovan ghoddie ti kabar keli astoli.
SETEMBR 23-29
DEVACHEA UTRANTLE THEVE | HEBREVANK 12-13
“Xisti Udexim Jehova Aplo Mog Dakhoita”
(Hebrevank 12:5) Tumi Tachim bhurgim dekhun, tumkam dhir divpak Dev tumkam kitem sangta tem visorleant tumi? Him Tachim utram: “Mhojea puta, Sorvespor tujeo chuki tuka dakhoita tednam, tum Taka chit di; ani To tuka zupatti dita tednam, tujem mon moddonk dium naka.
w12 3/15 29 ¶18
“Pattim Soddlam Tem” Polloinaka
18 Dukh haddtta toslo solʼlo. Amkam fatti mellʼllolea eka solʼleak lagon ami ragar asat zalear kitem? Hem amkam fokot dukhuch haddina punn amkam oskot korunk xokta, mhunnche ami amchem ‘mon moddonk diunk’ xoktat. (Heb. 12:5) Amkam mellʼllolo solʼlo nakartat dekhun ami tacher ‘chit dinant’, vo ami to manun ghenant dekhun amchem ‘mon moddonk ditat’ vo soddun ditat zalear, tacho porinnam ekuch—tea solʼleak lagon amkam zo faido zauncho aslo vo ami sudorchim aslim tem zaunchem na. Taka lagon, Solomonan sanglolim utram ami aikon ghetlear kitlem borem: “Xist samball tichi kednach beporva kori naka, Tuje dolle ticher dovor, ti tujem jivit.” (Mho. 4:13) Rostear gaddi cholounk dileat te kaide palltta tea driver-a bhaxen, ami amkam dila to solʼlo manun gheum-ia, apnnaum-ia, ani fuddem sorum-ia.—Mho. 4:26, 27; Hebrevank 12:12, 13 vachat.
(Hebrevank 12:6, 7) Kiteak zancho Sorvespor mog korta, tankam xist laita, ani zankam Apleo put-dhuvo mhonn lekhta, tankam to xikxa dita.” 7 Dev tumkam Aplim bhurgim koxim vagoita mhonn somzun, tumi xist xikche khatir xikxa sosnnikaien gheiat. Bapain xikxa diunk naslolim konn tori bhurgim astit?
w12 7/1 21 ¶3
“Tumi Magnnem Kortat Tedna Oxem Mhonnat, ‘Bapa’”
Aplim bhurgim koxim vaddttolim, tea vixim eka mogall bapaik, khont asta dekhun to tankam xist dita. (Efezkarank 6:4) Toslo bapui aplea utrak thir asta toripunn, aplea bhurgeank nittaier haddunk lagon to tanchea thaim krur toren vagona. Teach toren, amchea sorginchea Bapak kednam-kednam amkam goroz ti xist diunk poddot. Punn Dev xist ditana opman korchea toren nhoi, punn sodanch mogan dita. Jezu pasun aplea Bapa sarkoch aslo. Xisank tannem solʼlo dilo tednam tannim to rokddoch apnnaunk na. Toriastana, Jezu tanchea thaim kednanch krur toren vagonk na.—Matev 20:20-28; Lukas 22:24-30.
(Hebrevank 12:11) Xikxa poddta tea vellar ti khuxalkaiechi vost nhoi, punn budh xiklolim monxam Devak manta toslea jivitachim xantichim follam bhogunk pavtat.
w18.03 32 ¶18
“Xist Manun Gheiat ani Xannim Zaiat”
18 Xist melltta tednam amkam dukh zaunk puro, punn tea dukha poros chodd dukhachem mhunnttlear, ti xist nakarlolean zata to vaitt porinnam. (Heb. 12:11) Don udharonnam polloum-ia—Kainachem ani Raza Zedekiachem. Kainan Abela add rag vaddoun taka jivexi marunk ievjilem tednam Devan taka solʼlo dilʼlo: “Kiteak mhonn tum ragan bhorlai ani tujem mukhamoll bodolʼlam? Tunvem borem kelʼlem zalear, tum manovcho nasloi? Punn vaitt korxi zalear, eke monzati bhaxen tuka girasunk patok tujea dara-xim lipun ravchem na? Punn tunvem taka domaunk zai?” (Ut. 4:6, 7) Kainan Devachem aikonk na. Ani to patkacho gulam zalo. Kainan apleacher kitlem dukh ani tras voddun haddlem! (Ut. 4:11, 12) Hea dukhak sor kelear, Devan Kainak solʼlo dilo tednam zalolem tem dukh kainch nhoi aslem.
Bible-ant Motiam Sodhum-ia
(Hebrevank 12:1) Tor atam hi sakxidaranchi urponz eka vhodda porzollit kupa vori amkam veddho ghalun asa mhonn ami polletanv. Mhonnttoch aplea bharan amkam chepun dovorta tem sogott ami soddun dium-ia, bhov korun patok, kiteak tem amkam ghott chikttota. Ami dhanvunk suru kelam: urlea te vattechea xevottak porian thiraien dhanvot ravum-ia.
w11 9/15 17-18 ¶11
Thiraien Dhanvat
11 “Sakxidaranchi urponz” ek khell pollounk boslolea lokam sarki nasli vo apleak avoddtta tea ttimik vo khellgoddeak jikta tem pollounk ailolea lokam sarki nasli. Tachea bodlek, ti eka dhanvddent bhag gheupea khellghoddeam sarki asli, zannim dhanvon ti dhanvodd kabar kelea. Te atam mele zalear pasun, dhanvddent nove aileat tea khellgoddeank urba diupi onnbhovi dhanvpi koxe tankam lekhunk zatat. Ek dhanvpi dhanvddent bhag gheta tednam, dhanvddent ies mellʼllole khellgodde apnnank polloitat mhunn to zannam aslear taka koxem distolem tem chintat. Tednam, apnnachean zata titlem vo apleachean zata tachea poros chodd korunk to vavurcho na kai? Tea adlea tempa voilea sakxidaranchem jivit polloitana, hi amchi dhanvodd kotthin aslear pasun, ti dhanvon jikonk zata mhunn amkam khatri melltta. Tor, poilea xekddeantlea Hebrev Kristanvamnim hea ‘sakxidaranchea urponjechem’ udharonn monant dovorlolem zalear, aiz amchea bhaxen tankam “thiraien dhanvot” ravonk dhir mellonk xoktalo.
(Hebrevank 13:9) Veg-veglle atvech xikovnnen tumkam nitt rostea velim koddsoraunk dium nakat. Jevnna-khannache nem dhorun nhoi punn Devache doiallaien tumchim kallzam ghott kelear ekdom borem, kiteak mhollear jevna-khannache osle nem palltale tankam te kiteakuch upkarunk nant.
w89 12/15 22 ¶10
Jehovak Manta Tosle Iodn Bhettoiat
10 Tor Hebrev Kristanvamnim, Judev chali riti pallunkuch zai mhunn sangtolea Kristanvanchea ‘veg-vegllea atvech xikovnne vorvim tankam nitt rostea velim koddsoronk diunk’ nozo aslem. (Galasiekarank 5:1-6) Tannim tea xikounne vorvim nhoi, punn ‘Devache doiallaie udexim tanchim kallzam ghott korunk’ zai aslim. Thoddim ghoddie omkea torecheo jevonn-khannancheo ani bhettounneancheo riti pallop gorjechem mhunn sangtale. Taka lagon, Paulu ‘jevnna-khannache osle nem pallʼllolean kallzam ghott zainant’ mhunn sangta, jem tem ‘tankam kiteakuch upkarona.’ Omkea torechem jevonn-khann khaunchea udexim, vo omke dis palltta tea udexim Deva sangata ekleachi ixttagot vaddona, punn Devachi bhokti kelolean ani soddvonnek lagon upkariponn dakhoilolean ti vaddtta. (Romkarank 14:5-9) Tea bhair, Kristachea bolidana udexim Levitkar ditale tim bolidanam anik faideachim uronk nant.—Hebrevank 9:9-14; 10:5-10.
SETEMBR 30–OTUMBR 6
DEVACHEA UTRANTLE THEVE | JAKOB 1-2
“Patkak ani Mornnak Pavoita Ti Vatt”
(Jakob 1:14) Punn zonn-ekleak ap-apli vondovnni vaittache vatten oddta ani bhuloita.
g17.4 14
Tallnni
Tuka kitem tori avoddtta zalear, ani chodd korun tem chukichem asa zalear, tuka ti ek tallnni zaunk xokta. Udharonnak, bazarant tuka avoddtta ti ek vost tuka dixtti poddtta. Ani tednam tujea monant, tujean sampoddnastana ti vost sompeponnim chorun, pollon vochonk zata mhunn vichar ieta. Punn, tujem ontoskornn tuka toxem korinaka mhunn sangta! Tednam tum tem chintop nakarta ani fuddem sorta. Tea vellar ti tallni sompta, ani tum jikta.
BIBLE KITEM SANGTA
Tuka tallnni ieta mhunn tum ek vaitt munis zaina. Dor ekleak tallnni ieta mhunn Bible sangta. (1 Korintkarank 10:13) Punn tallnni ieta tednam ami kitem kortat tem chodd mhotvachem asa. Tallnni ieta tednam thoddim tea vixim chintit ravtat ani rokddinch vo uprant tea tallnnent poddttat. Punn her thoddim, ti vaitt tallnni mhunn vollkhon ti rokddich nakartat.
“Punn zonn-ekleak ap-apli vondovnni vaittache vatten oddta ani bhuloita.”—Jakob 1:14.
(Jakob 1:15) Zoxi ek bail gorbhest zaun bhurgeak zolm dita, toxi amchi vondovnni vaittacho gorb dhorun patkak zolm dita, ani magir patka thaun upzota tem sasnnachem moronn.
g17.4 14
Tallnni
Vaitt korneank pavoitat tim pavlam khoinchim, tanchi Bible vollokh dita. Jakob 1:15 sangta: “Zoxi ek bail gorbhest zaun bhurgeak zolm dita, toxi amchi vondovnni vaittacho gorb dhorun patkak zolm dita.” Dusrea utramnim sangchem mhunnttlear, ami eka vaitt vonddovnne vixim chintit ravtat tednam, amchi poristhiti eka gorbest baile bhaxen zata zaka bhurgem zaunk kainch addaunk xokona. Toriastana, ami chukichea vonddovnneanche gulam zainastana ravonk zata, karonn ami tancher tabo dovrunk xoktat.
Bible-ant Motiam Sodhum-ia
(Jakob 1:17) Borem asa titlem, ek-ek sopurnn vordan, voir thaun amkam ieta, Deva thaun amcher denvun ieta. Tannench Suria, chondrim ani noketram, he soglle uzvadd mollbar rochun ghaleat; punn tanche bhaxen to apunnuch kodinch bodolna ani oxem amchim monam kednanch kallokhant sanddina.
it-2 253-254
Uzvadd
Jehova ‘uzvaddacho Bapui’ zaun asa. (Jak. 1:17, Povitr Pustok - Novo Korar) Tannem fokot ‘uzvadd ghalunk suria, ani ratchea vella uzvadd diunk chondrim ani noketram’ diunk na, (Jer. 31:35) punn to sotacho uzvadd diunchi zhor zaun asa. (2Kor. 4:6) Tachi somurt, kaide ani utor, tachea pormonnem choltoleank ek uzvadd zaun asa. (St. 43:3; 119:105; Mho. 6:23; Iz. 51:4) Stotrkaran oxem sanglem: “Tujeach uzvaddan ami uzvadd dekhtanv.” (St. 36:9; St. 27:1; 43:3 sor korat.) Suriacho uzvadd fantear thaun dis uzvaddtta tea meren vaddot voita. Teach toren promannik lokancho rosto Devachea zannvaien uzvaddot voita. (Mho. 4:18) Jehovachea uzvaddan cholop mhunnttlear to dakhoita tea vatten cholop. (Iz. 2:3-5) Punn tachea bodlek ek munis oxudh toren vo vaitt nodren vostunk polloita tednam to Devachem khorem ginean naslolea kallokhant asta. Jezun sanglolem toxem: “Tuzo dollo nivoll nasot tor, soglli tuji kudd kallokhant buddtoli. Hea pasot, tuje bhitor asa to uzvadduch kallokh zalo zalear, to kallokh kedo vhoddlo zauncho na!”—Mt. 6:23; D.I. 15:9; 28:54-57 sor korat; Mho. 28:22; 2Ped. 2:14.
(Jakob 2:8) Tuzo mog kortai tosoch tujea peleacho kor. Ho Povitr Pustokant dilʼlo Devachea Rajeacho mukhel kaido tumi samballxat zalear, borem kortat.
it-2 222 ¶4
Kaido
“Mukhel Kaido.” Zoxem, eka razak lokam modem unch podvi ani mhotv asta, toxem munxanchea sombonda vixim aslolea her kaidea modem ‘mukhel kaideak’ chodd mhotv asa. (Jak. 2:8) Somurtechea Koraracho mukhel sondex, mog zaun aslo ani “tuzoch kortai toso, tujea peleacho mog kor” (mukhel kaido) ho dusro kaido aslo. Sogli Somurt ani Provadianchi xikounn hea don adneancher adarit asli. (Mt. 22:37-40) Aiz Kristanv Somurtichea Korara khala nant, toriastana te novea korara pormonnem, Raza Jehova ani tacho Put Raza Jezu Kristachea kaidea khala asat.