Dezembr—Jivit ani Porgottnni Mittingechea Pustike Pasot Modot
DEZEMBR 4-10
DEVACHEA UTRANTLE THEVE | ZEFANIA 1–HAGGAI 2
“Jehovachea Ragachea Disa Poilim, Taka Sodhat”
(Zefania 2:2, 3) “Ekach disa bhitor na zata toslea pola bhaxen tumkam duspottaunche adim, ektthaim zaiat, zoma zaiat; Sorvesporachea zolltea ragachi xiront tumcher poddche adim, ektthaim zaiat! 3 Sogllim tumi, prithumechea khaltea monxamno, Tacheo adnia palltoleamno, Sorvesporak sodat. Promannikponnan cholat, nomrutaien cholat: oxem Sorvesporachea ragachea Disa tumkam ghoddiek asro mellot.”
w01 2/15 18-19 ¶5-7
Jehovachea Ragachea Disa Poilim, Taka Sodhat
5 Tumi mhunnot: ‘Hanv somorponn korun bautizm ghetlolo Devacho sevok, ek Jehovacho Sakxi. Hem tor hanv pallunuch ailam.’ Khorem mhunnttlear, somorponnuch kelem mhunn zaina, tantunt anik mellon asa. Israel, Devak somorponn kelʼlem ek raxttr aslem punn Zefaniachea disamnim Judache lok tea somorponna pormonnem jieunk nant. Tea pasot, xevottak Jehovan tea raxttrak nakarlem. ‘Jehovak Sodhat’ mhunnche Jehova lagim ami ghott ixttagot vaddounchi ani sodanch ti samballchi. Ani toxench, pritumecher aslolea tachea songottonne sangata mellon ravchem. Hacho orth, eka mudʼdhea vixim Devacho vichar kitem ani tea vixim taka koxem bhogta tem zannam zavop. Tachem utor chotraien obheas korun, tacher niall korun tem amchea jivitant apnnaitat tednam ami Jehovak sodhtat. Ani ami kallzant thaun magnnem korun, povitr xokti dakhoita tea margdorxona pormonnem choltat tednam Jehova lagim amchem natem ghott zata ani amkam ‘purnn kallzan, otmean ani jivachea bollan’ tachi seva korunk urba melltta.—Dusri Somurt 6:5; Galasiekarank 5:22-25; Filipkarank 4:6, 7; Prokasovnni 4:11.
6 Zefania 2:3-ant sanglolo dusro gorjecho mudʼdho mhunnttlear, ‘promannikponnan cholchem.’ Amchea modlea choddxea zannamnim bautizm gheunk jivitant mhotvache bodlav keleat. Punn Devachea heach nitichea dorjeank ami jivitbhor chittkon ravonk zai. Hea ritin thoddeamnim bore toren survat kelʼli, punn uprant tim hea sonvsarachea melleponnant buddlim. Promannikponnan cholop sompem nhoi karonn ami oslea lokam modem jietat je loingik pozoddponn, fottingponn ani her patkam svobhavik mhunn lekhtat. Jehovak khuxal korunk amkam kallzant thaun itsa asa zalear, sonvsarachi maneatai mellounk ani tea bhaxen vagonk kosle-i anvdde aslear-ui ami zoit vhoronk xoktolim. Xezarchea raxttranchi khotti vagnnuk apnnavun, Juda raxttran Devachi maneatai hogddaili. Tor, Devak “manta toslea jivitachim ani povitrtaien cholpi novim monxam” zaun ami Devachi “dekh” gheum-ia, sonvsarachi nhoi!—Efezkarank 4:24; 5:1.
7 Zefania 2:3-ant sangla to tisro mudʼdho mhunnttlear, ‘nomrutaien cholchem.’ Jehovachea ragachea disa asro mellonk zai zalear hem gorjechem asa. Dor disa ami oslea dadleank, bailank ani tornnatteank mellttat zankam nomrutai ho gunn nanch. Nomrutaien vagop tankam unnemponn koxem dista. Ani khaltikaiecho gunn asop tankam ek vhoddli oskotkai koxi dista. Tim apnnak zai tem magpi, apsuvarthi ani apnnench sanglolem khorem oxem mhunnpi astat. Tankam khoinchea-i poristhitint apunn sangtam toxench zalʼlem zai asta. Chintat, oslo sobhav ami apnnailear kitlem dukhachem zatolem nhoi! ‘Nomrutaien cholonk’ hoch vell zaun asa. Koxem? Khaltikaien Devachi khuxi korun tachi xist apnnavun.
Bible-ant Motiam Sodhum-ia
(Zefania 1:8) “Sorvesporachea iodnachea Disa, odhikariank, razkunvrank ani videxi koxe nhestolea soglleank Hanv khast laitolom.”
w07 11/15 11 ¶3
Nahum, Habakuk, ani Zefania Pustokantle Mukhel Mudʼde
1:8. Zefaniachea disamnim Israelitkar bhonvtonnchea raxttranchi maneatai zoddunk ‘videxeanchem nhesop’ apnnaitale. Aiz-ui Jehovachi bhokti kortole sonvsarachi maneatai zoddunk vavurtat zalear kitlem pixemponnachem zatolem nhoi!
(Haggai 2:9) “Hea novea Dev-mondirachi mhoima adlea mondirache mhoime poros odik oprub zatoli—Sorvsoktivont Sorvespor sangta—ani hea zagear Hanv xanti ditolom. Uloita to Sorvsoktivont Sorvespor!”
w07 12/1 9 ¶3
Haggai ani Zekaria Pustokantle Mukhel Mudʼde
2:9—Jerubbabelachea devmondirachi mhoima Solomanachea devmondira poros odik oprub koxi asli? Hea tin karonnank lagon: Jerubbabelachem devmondir kitlim vorsam urlem, thoim konnem xikoilem ani Jehovachi bhokti korunk konn ietalim. Solomonachem mhoimebhorit devmondir 1027 K.X.A. thaun 607 K.X.A., mhunnche 420 vorsam porian urlem. Punn Jerubbabelachem devmondir vo ‘hem novem Dev-mondir’ 580 vorsam urlem, mhunnche bandhun somplolem voros 515 K.X.A. thaun 70 K.X. poriant, jednam devmondiracho nas zalo. Tea bhair, Mesias Jezu Kristan hea ‘novea Dev-mondirant’ xikoilem ani ‘adlea mondira’ poros hea mondirant chodd lok ietale.—Itihas 2:1-11.
DEZEMBR 11-17
DEVACHEA UTRANTLE THEVE | ZEKARIA 1-8
“Eka Judevachea Mangak Dhorat”
(Zekaria 8:20-22) “Sorvsoktivont Sorvespor oxem mhonntta: “Zaite lok ani sobar xaranchim nagrikam fuddarak ietolim; 21 ani eka xarant ravpi dusrea xarant vetolim ani oxem mhonnttolim: dubava vinnem Sorvesporachi mozot vinovunk vochum-ia ani Sorvsoktivont Sorvesporak sodum-ia; hanv-ui vetam.’ 22 Hoi, puskoll lok ani podvedar raxttram, Sorvsoktivont Sorvesporak sodunk ani Sorvesporachi mozot magunk, Jerusalea ietolim.”
w14 11/15 27 ¶14
‘Atam Tumi Devachi Porza Zaleant’
14 Hea xevottachea disamnim zaite lok Jehovachea lokam sangata tachi bhokti korunk ektthaim ietole mhunn adlea don provadeamnim bhasailolem. Izaiasan bhakit kelʼlem: “Sogllim raxttram cholot-cholot thoim vetolim. Hispa bhair porza tachi vatt dhortoleo; ani teo oxem mhonnttoleo: ‘Ieiat, Sorvesporachea porvotar choddum-ia, Jakobachea Devachea Mondirant vochum-ia. To amkam Apleo vatto xikoitolo ani ami Tachea vattamnim cholunk pavtoleanv;’ kiteak Siona thaun ietoli Somurt ani Jerusalea thaun Sorvesporachem utor.” (Iz. 2:2, 3) Toxench, “puskoll lok ani podvedar raxttram, Sorvsoktivont Sorvesporak sodunk ani Sorvesporachi mozot magunk, Jerusalea ietolim” mhunn Zekaria provadean sanglolem. Tanche vixim sangtana tannem oxem boroilem: “sogllea bhasanchea raxttrantle dha dadle” eka Judevachea mangak dhorun mhonnttole: “Tuje borabor vochunk amkam zai kiteak tumche sovem Dev asa mhonn ami aikolam.”—Zek. 8:20-23.
(Zekaria 8:23) “Sorvsoktivont Sorvespor oxem sangta: Tea disamnim, sogllea bhasanchea raxttrantle dha dadle eka Judevachea mangak dhortole ani mhonnttole: Tuje borabor vochunk amkam zai kiteak tumche sovem Dev asa mhonn ami aikolam.”
w16.01 23 ¶4
“Tujea Borabor Vochunk Amkam Zai”
4 Aiz sonvsarant aslolea otmik Israelitkaranchim nanvam zannam zavop xokio na zalear, her menddranchea zomeantlim tanchea “borabor vochunk” koxim xoktolim? Zekariachem bhakit dha dadleam vixim kitem mhunntta tem polloiat. He “eka Judevachea mangak dhortole ani mhonnttole: ‘Tuje borabor vochunk amkam zai kiteak tumche sovem Dev asa mhonn ami aikolam.’” Hanga eka Judeva vixim uloilam zalear-ui, hem eka poros chodd munxank suchit korta. Tor ho otmik Judev eka munxak nhoi punn eka zomeak suchit korta. Taka lagon, dor eka otmik Judevak vollkhon tachea vo tichea borabor voichi goroz na. Bodlek, tankam ami ek zomo mhunn vollkhon gheun tenko diunk zai. Bible-antlim khoinchinch versam amkam eka munxacho pattlav korunk sangonant. Jezuch amcho Guru ani Fuddari zaun asa.—Mt. 23:10.
w09 2/15 27 ¶14
‘Menddreachea Fattlean Tim Vetat’
14 Ami visvaxiponnim Jezu Kristachea bhavank ditat to tenko apnnank dilʼlea sarko mhunn Jezu lekhta. (Matev 25:40 vachat) Tor, prithumer jieuncho bhorvonso asloleamnim, Kristachea otmik-obhixikt bhavank khoinchea ritin tenko diunk zata? Khas korun, Rajeachea porgottnnechea kamant modot korun. (Mt. 24:14; Juanv 14:12) Vorsam voitat toxim prithumer obhixiktancho ankddo unno zala ani her menddrancho ankddo vaddla. Prithumer jieuncho bhorvonso aslolim porgottnnechea kamant bhag ghetat tednam, ghoddtta zalear purnn-vellache porgottnnar mhunn seva kortat tednam, te otmik-obhixiktank xis korchem kam purnn korunk tenko ditat. (Mt. 28:19, 20) Toxench, hea kamank tenko diunk veg-vegllea toren denngim diuncho sueog pasun mhotvacho.
Bible-ant Motiam Sodhum-ia
(Zekaria 5:6-11) “Hanvem vicharlem: ‘Hem kitem?’ Tannem zobab dilo: ‘Ti ek paili; ti fuddem veta.’ Tannem mhollem: ‘Hem mhollear akʼkhea desant cholta tem tanchem khotteponn.’ 7 Magir ek xinxeachem dhampnnem ugoddlem, ani pailent bosloli ek ostori hanvem dekhli. 8 Ani tannem mhollem: ‘Hem mhollear Noxtteponn.’ Ani tannem tika porot pailent uddoili, ani pailechea tonddak tem xinxeachem dhampnnem damun ghalem. 9 Hanvem mhoje dolle ubarle ani don ostorio fuddem sortaleo teo hanvem dekhleo. Tanchea paktteamnim varem bhorlolem; tankam bokeachea paktteam sarke paktte asle, ani tannim sorga ani sonvsara modem ti paili ukolʼli. 10 Tedna mhoje lagim uloitalo tea devdutak hanvem vicharlem: ‘Tim ti paili khoim vhortat?’ 11 Tannem portipallun mhaka mhollem: ‘Ti Shinar desant vhortat; thoim tika ek mondir bandtole ani tem bandun zatoch ti paili eka asonar dovortole.’”
w17.10 25 ¶18
Zekarian Polloilʼlim Dorxonam—Tujer Koso Porinnam Zata
18 Him dorxonam Judevank tanchi bhokti nitoll dovorchi zobabdari ugddasak haddtta. Jehovachea lokam modem kosleach torechem noxtteponn ieunk favo na ani taka bhitor ieun rigok-ui ami diunk zaina. Devachea nitoll songottnnent bhitor sorlea uprant amkam surokxa ani mog melltta, tor atam nitollsann samballpachi zobabdari amchi zata. Amchem “mondir” nitoll dovrunk ami fuddem sortat kai? Kosleach torechea noxtteponnak amchea modem zago na.
(Zekaria 6:1) “Portun hanvem mhoje dolle ubarle, ani pollelem tem hem: don porvotam modle char roth ietale ani te porvot kaxeache porvot asle.”
w17.10 27-28 ¶7-8
Rotham ani Ek Mukutt Tuka Rakhum
7 Bible-ant, dongor rajeank vo sorkarank suchit korta. Zekariachea pustokant sanglole dongor Danielachea bhakitant vornnon kelʼlea don dongram sarke asat. Ek dongor Jehovacho vixvacher aslolo sasnacho raz-odhikar suchit korta. Dusro dongor Jezuchea hatant aslolea Mesiasache Razvottkek suchit korta. (Dan. 2:35, 45) 1914-achea xorod kallant, Jezu sorgar raza zalea uprant he donui dongor mellon prithumer Devachi khuxi purnn korunk ek khas kam kortat.
8 He porvot kaxeache vo tambeache kiteak asat? Bhagara bhaxen, tambem hem dhatu chodd valorachem. Jehovan aplo tombu bandunk ani uprant Jerusalemachem mondir bandunk hem chok-chokit dhatu uzar korunk sanglolem. (Sutt. 27:1-3; 1 Raz. 7:13-16) Tambem hem dhatu chodd valorachem aslolean, te don sanketik dongor Jehovacho vixv raz-odhikaracho ani Mesiasachea Razvottkecho ekdom khaxelo gunn dakhoun dita. Heo razvottkeo munxakulla pasot thirai ani besanvam haddttoleo.
DEZEMBR 18-24
DEVACHEA UTRANTLE THEVE | ZEKARIA 9-14
“‘Dongra Modlea Falkeant’ Ravat”
(Zekaria 14:3, 4) “Tedna Sorvespor fuddem sortolo ani, eka zhuzachea disa To zhuzta toso, To tea raxttrancher add zhuztolo. 4 Tea disa, Tache paim Zoitunanchea Dongrar thartole; ho Dongor Jerusaleache udentek asa; ani Zoitunancho Dongor udentek thaun tem ostomtek porian doxim futtʼtolo ani modem ek mottem-vhoddlem falkem ghoddon ietolem. Dongrachem ord uttore vatten ani dusrem ord dokhinne vatten koddsortolem.”
w13 2/15 19 ¶10
Dongra Modlea Falkeant Ravat
10 Zoitunancho Dongor udentek thaun ostomtek porian doxi zata tednam Jehovache paim don-ui dongrancher tharlole astat. Ek “mottem-vhoddlem falkem” Jehovachea paim-a khala toiar zata. Hem sanketik falkem Jehova dita ti surokxa suchit korta. Hi surokxa Devachea sevokank tachea vixv raz-odhikara khala ani tacho Put, Mesiasachea Rajea khala mellttoli. Jehova Dev khorea bhoktecho kednanch nas zaunk diuncho na. Tor ho dongor kednam doxi zalo? 1914-ant Videxeancho Kall sompon Mesiasachem Raj sthapon zalem tednam ho dongor doxi zalo. Hea sanketik falkeant Devache bhokt kednam dhanvon voitat?
(Zekaria 14:5) “Ani dongram modlem falkem bhoron ietolem [“Tumi tea dongra modlea falkeant dhanvon voitoleat,” NW], mhonnge Jasol porian tem bond zatolem ani, Uzias Judachea razachea kallar dhornkamp zaun ghoddlolem toxem, tem falkem bhoron ietolem. Ani Sorvespor mhozo Dev ietolo ani Tache borabor sogllim Tachim bhagevont chakram.”
w13 2/15 20 ¶13
Dongra Modlea Falkeant Ravat
13 Ami Jehovak chittkon sotant thir ravlim zalear, to ani tacho Put Jezu Krist amkam salvar kortole. Jehova konnakuch vo kiteakuch ‘tankam aplea hatantlim zhombun vhoronk diuncho na.’ (Juanv 10:28, 29) Tachea Vixv Raz-odhikarak ani Mesiasache Razvottkek khalti ravonk amkam goroz titlo-i adar diunk Jehova toiar asa. Beginuch vhodd sontap ieuncho asa ani tednam amkam Devachea adarachi chodd goroz astoli. Tor tea pasot atam ami tea falkeant ravop chodd gorjechem.
(Zekaria 14:6, 7) “Tea disa, uzvadd ascho na, nhoi mhonn thonddi vo dhukem. Dis ani rat nastana, to zatolo ek nirontor dis: ho dis Sorvesporak tthavo. Sanz pavtoch porian uzvadd astolo.”
(Zekaria 14:12) “Ani jeo porza Jerusaleacher add zhuzloleo, tea soglleancher Sorvespor heo pidda dhaddtolo: ozun aplea paiancher ubim astana tanchem mas kustolem, tanche dolle tanchea poklliamnim kustole, ani tancheo jibo tanchea tonddamnim kustoleo.”
(Zekaria 14:15) “Ani ghoddeancher, kochrancher, unttancher, gaddvancher ani tea fouzamnim aslolea sogllea monzatincher oslich pidda poddtoli.”
w13 2/15 20 ¶15
Dongra Modlea Falkeant Ravat
15 Devachea zhuzachea disa, mottea-vhoddlea falkea bhair asat tanchem kitem zatolem? Tankam uzvadd ascho na, mhunnche Devachi maneatai tancher aschi na. Tea zhuzachea disa “ghoddeancher, kochrancher, unttancher, gaddvancher ani tea fouzamnim aslolea sogllea monzatincher” porinnam zatolo. Mhunnche, raxttranchim zhuz korchim hotʼtearam kosleach kamak upkarchimnant. Tim thonddaien ghott zata toxim ghott zatolim. Jehova “pidda” pasun dhaddttolo. Hi pidda sanketik astoli vo khorench ietoli tem ami noko, punn tancheo bhirankull domkavnneo thondd zatoleo. Tea disa “tanche dolle tanchea poklliamnim kustole, ani tancheo jibo tanchea tonddamnim kustoleo.” Mhunnche, te kuddʼddea dolleamnim akromonn kortole ani tanchi urmott tonddam bond zatolim. (Zek. 14:6, 7, 12, 15) Prithumecho khoinchoch bhag nisonnttonantlean salvar zauncho na. Soitanache vatten zhuztoli soin khub vhodd astoli. (Prok. 19:19-21) “Sorvesporan marun uddoileant tim tea disa sonvsarant xekanxek ximpoddtolim.”—Jer. 25:32, 33.
Bible-ant Motiam Sodhum-ia
(Zekaria 12:3) “Tea disa, Hanv Jerusalem sogllea porzank ubarunk zaina toslo ekdom zhodd fator kortolom; sonvsarantlim sogllim raxttram tacher add zomlim zalear-ui, to ubarunk sodtit tim sogllim apunnuch zobor dukhovtolim.”
w07 12/15 22-23 ¶9-10
Tujea Add Ghoddlolea Koslea-i Hotiarak Ies Mellcho Na
9 Zekarian kelʼlem bhakit, khorea Kristanvachea add raxttram kiteak zhuztolim tachem karonn dakhoita. Zekaria 12:3 kitem sangta tem polloiat: “Tea disa, Hanv Jerusalem sogllea porzank ubarunk zaina toslo ekdom zhodd fator kortolom.” Hem bhakit khoinchea Jerusalema vixim uloita? Zekariachem bhakit ‘sorginchea Jerusalemak’ suchit korta. Tem mhunnttlear, sorginchem Raj zantunt obhixikt Kristanvank apounnem mellʼllam. (Hebrevank 12:22) Mesiasachea Rajeant daizi asloleam modle thodde zann azun-ui prithumer asat. Tanchea sangateam borabor mhunnche ‘her menddram’ borabor, te lokank vell sorchea adim Devachea Rajeachea adin zaunk urba ditat. (Juanv 10:16; Prokasovnni 11:15) Raxttramnim hem amontronn koxem ghetlam? Jehova khorea bhoktank aiz koslo adar dita? Zekaria odheai 12 fuddem topastana ami tancho zobab sodhum-ia. Oxem kelʼlean amkam khatri mellttoli ki Devachea obhixikt sevokam add ani tanchea sangateam “add ghoddlolea koslea-i hatiarak kednanch ies mellchem na.”
10 Zekaria 12:3 sangta, raxttram “zobor dukhovtolim.” Hem koxem ghoddtta? Rajeachi bori khobor porgottunk Devan amkam adnea dilea. Ani hi adnea Jehovache Sakxi zobabdaren pallttat. Fokot Devachem Raj munxache sogle dukh-tras suttave kortolem mhunn ami porgott kortat. Punn raxttrank hi khobor “ekdom zhodd fator” koso lagta. To zhodd fator kuxin kaddun uddounk, te Raj porgottnnarank addkoll haddttat. Oxem korun him raxttram apnnakuch khub dukh korun ghetat ani apleakuch ghav kortat. Hem kam bond korunk tancho vavr nirfoll zala ani tankam opman-ui bhogcho poddla. Tannim khorea bhoktanchim tonddam bond korunk zainam kiteak hea sonvsaracho xevott zaunchea poilim, Devachea Mesiasache Razvottke vixim “sasnnachem xubhvortoman” porgott korcho ho sueog tim moladik mhunn lekhtat. (Prokasovnni 14:6) Jehovachea sevokancher onʼneai zata to polloun, Afrika desantlea bondkhonnicho ek rakhonddar oxem sangta: ‘Hea lokank tumi dhumallo diun nirfollim vavurtat. Te aplea Devachi bhokti kednanch soddun diunche nant. Tancho ankddo vaddot asa.’
(Zekaria 12:7) “Sorvespor poilim Judachea tombunk suttka ditolo, ani oxem Davidachea Ghoranneachi mhoima ani Jerusaleant ravtoleanchi mhoima Judache mhoime poros odik vhodd zaunchi na.”
w07 12/15 25 ¶13
Tujea Add Ghoddlolea Koslea-i Hotiarak Ies Mellcho Na
13 Zekaria 12:7, 8 vachat. Adlea Israelant, dusmanchea raxttrantle lok Jerusalem xaracher akromonn korunk ietale tednam, tombunt ravtale tea gonvlleank ani xetant kam korpeank poilim surokxa divop gorjechem aslem. ‘Judachem tombu’ urlolea obhixiktank suchit korta. Te surokxit xarant nhoi punn uktea xetant aslea sarke asat. Thoim te Mesiasachea Razvottkek lagon bhienastana zhuztat. Soitanachea akromonnache te poili nixanni zatat dekhun Jehova “Judachea tombunk” poilo salvar kortolo.
DEZEMBR 25-31
DEVACHEA UTRANTLE THEVE | MALAKI 1-4
“Tumchem Kazari Jivit Jehovak Manvota?”
(Malaki 2:13, 14) “Anink-ui ek vost tumi kortat: Sorvesporache vedicher tumi dukam golloitat. To tumchea danancher dolle laina ani tumchea hatantlim danam mandun ghena dekhun, tumi roddnnem ani vilap kortat. 14 Ani tumi vichartat: To oxem kiteak korta? Kiteak tuje ani tujea tornnattponnache baile modem kelʼlea koraracho sakxi Sorvespor; zorui ti korara vorvim tuji sangatinn ani potin, tori tum tika ovisvaxi zalai.”
jd 125-126 ¶4-5
Tumchem Kuttumbik Jivit Devak Manta Toxem Kor
4 Kristi Xoka adim panchvea xekddeant, Malakichea disamnim Judevam modem divors divop chalti rit zaun gelʼli. Malaki-n tankam sanglem: “Kiteak tuje ani tujea tornnattponnache baile modem kelʼlea koraracho sakxi Sorvespor; zorui ti korara vorvim tuji sangatinn ani potin, tori tum tika ovisvaxi zalai.” Judache ghov aplea bailank visvas-ghat korun divors ditale ani taka lagon Jehovachi vedi, ghat zalʼlea bailanchea dukhamnim bhizloli jeo ‘roddnnem ani vilap kortaleo.’ Iadnik-ui tanchi hi ghatki rit manun ghetale.—Malaki 2:13, 14.
5 Malakichea disamnim logna vixim hi dukhest poristhiti polloun Jehovak koxem dislem? “Logn-moddnneacho Hanv dves dhortam, mhonntta Sorvespor, Israelacho Dev,” oxem Malaki-n boroilem. Toxench, tannem khatri dili ki Dev azun bodlonk na. (Malaki 2:16; 3:6) Hanga amkam kitem kolltta? Devan divorsa vixim aplem mot adinch kolloilʼlem. (Utpoti 2:18, 24) Malakichea disamnim pasun tannem aplem mot dakhoilʼlem, ani aiz-ui tachem mot bodlonk na. Thoddim zannam aplea kazari sangatea borabor dhadoxi asonant, ani hea sadea karonnak lagon tim aplem kazar moddunk puro. Punn tanchem visvas-ghatkiponn Jehova pollounk xokta. (Jeremias 17:9, 10) Ghoddie divors divpi aplo nirnnoi sarko mhunn sangot punn divors diunk koslem-i fottingponn vo naddbudʼdi apnnaileo zalear Jehova tem zannam. “Tache nodrek sogllem vingllem ani uktem, ani Takach ami amchea jivitacho hixob diunk zai.”—Hebrevank 4:13.
(Malaki 2:15 (NW), 16) “Thoddea lokamnim oxem korunk na kiteak tancher azun pasun Devachi povitr xokti asa. Te lok kitem sodta? Devan dilʼli sonsot. Mhonnttoch tujeach jivacho samball kor ani tujea tornnattponnache bailek ovisvaxi zaum naka. 16 Logn-moddnneacho Hanv dves dhortam, mhonntta Sorvespor, Jehovah Israelacho Dev, ani apli darunnai zhubea ponda dhamptat tancho dves kortam, mhonntta Sorvsoktivont Sorvespor. Mhonnttoch tumcheach jivak man diat, ani ovisvaxi zaum nakat.”
w02 5/1 18 ¶19
Jehova Ghatkiponnacho Dves Korta
19 Dusre vatten, Malaki sangta thodde ghov aplea bailam sangata ghatkiponnan vagona asle karonn tancher azun pasun Devachi povitr xokti asli. (Vers 15, NW) Devachea songottnnent aiz zaite ghov asat je aplea bailank “favo to man . . . ditat.” (1 Pedru 3:7) Te aplea bailank marinant vo tancho utramnim opman korinant. Aplea bailancher mhellim loingik kamam korunk te dobhav ghalinant. Te aplea bailank soddun dusrea bailam lagim mironant, ani pozddem sahitia pasun polloinant. Jehovachea songottnnent zaiteo visvaxi Kristi bailo asat jeo Devak ani tachea kaideank visvaxiponnim pallo ditat. Him ghov-bailam Devak kitem manvota tem zannant ani tim tea pormonnem chintat ani vagtat. Tanche bhaxen “Devachi adnea pallit” ravat, ani tednam tumkam to povitr xokti ditolo.—Itihas 5:29.
Bible-ant Motiam Sodhum-ia
(Malaki 1:10) “Kiteak mhonn tumche bhitorlo eklo tori daram dhampina ani mhoje vedicher uzo pettounchi hi orth-nasloli chal bond korina? Tumche sovem Mhaka sontos mellona! mhonntta Sorvsoktivont Sorvespor; tumchea hatantleo bhettovnnio Hanv mandun gheuncho na.”
w07 12/15 27 ¶1
Malaki Pustokantle Mukhel Mudʼde
1:10. Jehovan oslea axechea iadnikanchi bhettovnni manun gheunk na, je lokam koddlean barik-xim kamam korunk, zoxem daram dhampunk vo vedicher uzo pettounk poixe ghetale. Ami kortat tim bhoktechim kamam, zoxi amchi Kristi porgottnni, ami poixeachea axek lagon nhoi punn Devacher ani xezaream pasot amkam svarth naslolo mog asa mhunn korchi.—Matev 22:37-39; 2 Korintkarank 11:7.
(Malaki 3:1) “Polle, Mhaka ek vatt toiar korunk Mhozo niropi Mhoje mukhar pattoitolom. Ani zaka tumi sodtat, to Sorvespor ovchituch Aplea Mondirant ietolo; hoi, jea korarachea dutak tumi gheunk axetat, to ietolo, oxem Sorvsoktivont Sorvespor mhonntta.”
w13 7/15 10-11 ¶5-6
“Sodanch-sodam . . . Hanv Tumchea Sangata Asam!”
5 Jezun gonv ani nerachi vopar diunchea thoddea xekddeam adim, voparint sanglolea thoddea ghoddneam vixim, Jehovan Malaki provadeak bhakit korunk sanglem. (Malaki 3:1-4 vachat.) Juanv Batist ‘vatt toiar korpi niropi’ zaun aslo. (Mt. 11:10, 11) To 29 K.X.-ant ailo tednam, Israel raxttracho nisonnttonacho vell lagim pavlʼlo. Jezu dusro niropi zaun aslo. Tannem Jerusalemachem Devmondir don pavtti nitoll kelʼlem—poilem, tannem seva suru kelʼli tednam ani dusrem, seva soponk pavli tednam. (Mt. 21:12, 13; Juanv 2:14-17) Tor, Jezuchem nitoll korchem kam thoddo temp porian aslem.
6 Malakichem bhakit vhoddlea promannan koxem purnn zalem? 1914 hea vorsa poilim, C. T. Russell ani tachea vangddeamnim Juanv Batist-a bhaxen kam kelem. Tannim, Bible-antlem sot porot ugddapem korchem ek mhotvachem kam kelem. Bible-achea Vidheartheamnim, Kristachea soddvonnechea bolidanacho khoro orth xikoilo, irfernachi xikounn fott mhunn dakhoun dili, ani Videxeancho Kall sompchea vixim porgott kelem. Tori astana, zaite dhormik zome apunn Kristache pattlavdar mhunn davo kortale. Taka lagon, ek mhotvacho prosn ubo zalo: Tea zomea modem gonv konn asle? Tea mhotvachea prosnak zobab diunk, 1914 hea vorsak Jezun otmik devmondir topasunk suru kelem. Ti topasnni ani tem nitoll korchem kam thoddo vell mhunnche, 1914 thaun 1919-achea survatechea thoddea mhoinea porian chalu aslem.