Watchtower ONLINE LIBRARY
Watchtower
ONLINE LIBRARY
Konkani (Romi)
  • BIBLE
  • PROKAXONAM
  • MITTING
  • mwbr18 Abril panam 1-8
  • Abril—Jivit ani Porgottnni Mittingechea Pustike Pasot Modot

Tunvem vichun kaddla tea vixoi-acher viddeo na.

Sorry, ho viddeo sarko load zaunk na.

  • Abril—Jivit ani Porgottnni Mittingechea Pustike Pasot Modot
  • Jivit ani Porgottnni Mittingechea Pustike Pasot Modot—2018
  • Vixoi
  • ABRIL 2-8
  • ABRIL 9-15
  • ABRIL 16-22
  • ABRIL 23-29
  • ABRIL 30–MAY 6
Jivit ani Porgottnni Mittingechea Pustike Pasot Modot—2018
mwbr18 Abril panam 1-8

Abril—Jivit ani Porgottnni Mittingechea Pustike Pasot Modot

ABRIL 2-8

DEVACHEA UTRANTLE THEVE | MATEV 26

“Pask ani Ugddas Disa Modem Ek Sarke Vixoi ani Ontor”

(Matev 26:17-20) Fug-naslolea Unddeanchea poilea disa xis Jezu lagim vicharunk aile: “Tujem Pask-Jevonn khoi ami toiar kelʼlem Tuka zai?” 18 Ani Jezun sanglem: “Omkea monxak Xarant mellunk vochat ani taka mhonnat: ‘Guruji oxem sangta: “Mhozo vell lagim pavla; Mhojea xisam borabor tujea ghorant Hanv Pask kortam.”’” 19 Jezun tankam hukum dilʼlo to xisamnim pallʼlo ani Pask toiar kelem. 20 Sanz zatoch, Aplea Bara Xisam sangatim To jevnnak boslo.

nwtsty media

Pask Jevonn

Paskachea jevnnant heo vostu asonkuch zai asleo: ujeant bhazlolo menddro (menddreachem ek-ui hadd tannim moddunk zainaslolem) (1); khomir ghalunk naslolo unddo (2); ani koddu bhaji (3). (Sutt. 12:5, 8; Lok. 9:11) Mishnah pormonnem koddu bhaji mhunnttlear, saladachim panam, koddu panam, vasachim panam, vo holldduvea fulanchem zhadd zaunk xokta. Koddu bhaji khatale tednam Israelitkarank Ejiptant sosunk poddlolea koddu gulamponnacho ugddas ietalo. Jezun khomir naslolo unddo aplea sompurnn kuddik suchit korunk uzar kelo. (Mt. 26:26) Ani apostl Paulun Jezuk “paskacho mendro” mhunnttlo. (1Kor. 5:7) Uprant poilea xekddeant, dakhancho soro (4) paskachea jevnna sangata-i uzar korunk lagle. Jezun dakhancho soro, apunn bolidan diun varouncho asa tea rogtak suchit korunk uzar kelo.—Mt. 26:27, 28.

(Matev 26:26) Ani te jevtastana Jezun unddo ghetlo, Devak dhinvasun to moddlo, to xisank dilo ani mhollem: “Gheiat ani khaiat, hi Mhoji Kudd [“hi mhunnche mhoji kudd,” NW].”

nwtsty obheasachi ttipnni Mt. 26:26

mhunnche: Jezuchim utram Grek bhaxen, “hi mhoji kudd” mhunn bhaxantor korunk zata, punn khoreponnim Jezu, “hi mhunnche mhoji kudd” mhunn sangonk sodhtalo. Hea ortha vixim apostl zannam asle karonn tea vellar tanchea mukhar Jezu vo tachi patok nasloli kudd asli. Toxench thoddeach vella uprant te khaunche asle, to khomir naslolo unddo-ui tanchea mukhar aslo. Tor, to unddo Jezuchi khori kudd zaunk xokona. Toxench, hench vers amkam Mt. 12:7-ant vachunk melltta, ani zaitea Bible bhaxantoramnim tea zagear, “mhunnche” hem utor ghalun bhaxantor kelam.

(Matev 26:27, 28) Magir Tannem patr ghetlem ani Devak dhinvasun tem tankam dilem ani mhollem: “Tumi somest hantlem pieiat: 28 hem Mhojem Rogot, ‘Korarachem Rogot;’ sogllea monxank patkanchem bhogsonnem zoddun gheunche khatir tem Hanvem varounchem asa.

nwtsty obheasachi ttipnni Mt. 26:28

Korarachem Rogot: Jehova ani obhixikt Kristanvam modem kelʼlo novo korar Jezuchea bolidana vorvim ghoddun haddlo. (Heb. 8:10) Israela sangata Jehovan Sinai dongra fuddem Somurticho korar kelʼlo zacho modesti Moizes aslo. To korar korunk Moizesan uzar kelʼlim tinch utram, Jezu hanga uzar korta. (Sutt. 24:8; Heb. 9:19-21) Boilanchem ani bokddeanchem rogot Deva modem ani Israel raxttra modem aslolo Somurticho korar khoro mhunn dakhoun dita. Teach bhaxen Jehovan otmik Israelitkaram sangata novo korar kelo zo Jezuchea rogta vorvim khoro mhunn kollon ailem. Ho korar  33 K.X.-achea Ponʼnasavea Disa thaun chalu zalo.—Heb. 9:14, 15.

Bible-ant Motiam Sodhum-ia

(Matev 26:17) Fug-naslolea Unddeanchea poilea disa xis Jezu lagim vicharunk aile: “Tujem Pask-Jevonn khoi ami toiar kelʼlem Tuka zai?”

nwtsty obheasachi ttipnni Mt. 26:17

Fug-naslolea Unddeanchea poilea disa: Fug-naslolea Unddeanchem Fest Nisan 15 tarker suru zalem mhunnchem, Paskachea uprant (Nisan 14), ani tem sat dis porian choltalem. (App. B15-E polloi.) Pask ani Fug-naslolea Unddeanchea Festa modem lagincho sombond aslolean, Jezuchea disamnim hea don-ui festank “Fug-naslolea Unddeanchem Fest” mhunnttale. Tim don-ui festam mellon att disanchem fest zatalem, zantunt Nisan 14 ho dis-ui mellon aslo. (Luk. 22:1) Tor hea versant, “poilea disa,” mhunnttlam thoim “ek disa adim” oxem-i mhunnonk zata. (Ju. 1:15, 30 sor kor, zoim “poilo” [proʹtos] hea Grek utrak “adim” mhunnttlam mhunnche, “to mhojea adim [proʹtos] aslo.”) Tor, adli Grek bhas ani Judevanchi porompora topastana, Jezuchea apostlamnim vicharlolo prosn Nisan 13 tarker vicharlo mhunn kollon ieta. Nisan 13 hea disa xisamnim Paskak lagon toiari keli, ani “sanz zatoch”, mhunnche Nisan 14-cho dis suru zatana pask monoilem.—Mk. 14:16, 17.

(Matev 26:39) Ani matso fuddem vochun To omto poddlo ani oxem magnnem korunk laglo: “Bapa Mhojea, zata zalear, Mhoje velem hem patr pois vochum-di; toripunn Mhaka zai toxem nhoi, Tuka zai toxem zaum-di.”

nwtsty obheasachi ttipnni Mt. 26:39

hem patr pois vochum-di: Bible-ant “patr” hem utor choddxe pavtt Devachi khuxi vo eka munxak “nemlolo vantto” suchit korunk uzar kelam. (Obheasachi ttipnni Mt. 20:22 polloi.) Jezucher boglantt ghalun taka martat tednam, Jezuk Jehovachea nanvacher opman ietolo mhunn chodd chintʼta zali. Taka lagon, mhoje velem hem “patr” pois vochum-di mhunn Jezun magnnem kelem.

ABRIL 9-15

DEVACHEA UTRANTLE THEVE | MATEV 27-28

“Vochon Xis Korat—Kiteak, Khoim ani Koxem?”

(Matev 28:18) Jezun fuddem sorun mhollem: “Sorgar ani sonvsarar Devan Mhaka sogllo odhikar dila.

w04 7/1 8 ¶4

‘Vochon Xis Korat’

4 Jezuk aplea sobhecher odhikar asa, ani toxench 1914 thaun novean sthapon zalolea Devachea Rajeacher taka odhikar mellʼlla. (Koloskarank 1:13; Prokasovnni 11:15) To Mha-devdut zalolean, kotteamnim devdutanchea, sorginchea soinak hukum dita. (1 Tesalonikekarank 4:16; 1 Pedru 3:22; Prokasovnni 19:14-16) Nitichea totvancher virodh kortolea “sogllea Pordhanancho ani sogllea Odhikariancho ani Podviancho” bhosm korunk taka tachea Bapai koddlean xokti mellʼllea. (1 Korintkarank 15:24-26; Efezkarank 1:20-23) Devan Jezuk fokot jivim asat tancheruch odhikar diunk na, punn tannem taka meloleank pasun jivont korcho odhikar dila. To “jivea ani melʼleancho Monsubidar” zaun asa. (Itihas 10:42; Juanv 5:26-28) Khorench, oslo odhikar aslolea thaun ieta tea hukumek, sogleant chodd mhotv diunk zai. Tor, ‘Vochon Xis Korat’ hea Kristachea adneak resped diun ami ti khuxemonan pallttat.

(Matev 28:19) Mhonnttoch vochun sogllea raxttrank Mhoje xis korat; Bapache ani Putache ani Povitr Atmeache Nanvim tankam snan diat

nwtsty obheasachi ttipnni Mt. 28:19

xis korat: Ma·the·teuʹo, hea Grek kriapodacho orth xis korunk vo pattlavdar korunk “xikounchem.” “Snan di” ani “xikoiat” him kriapodam xis korchea kamant kitem mellon asa tem dakhoun ditat.

sogllea raxttrank: Hea utrank uzar kelʼlim Grek utram uzar korun, Jezun aplea xisank “sogllea raxttrank” xikoiat mhunn sanglolem. Punn, tem akʼkhem vers vachtat tednam him utram soglea raxttrank nhoi, punn raxttrantlea soglea lokank mhunnttlolim mhunn kollon ieta. Karonn tea versant, tankam snan diat vo bautizm diat mhunnttlam, jem lokank diunk zata “raxttrank” nhoi. “Sogllea raxttrank Mhoje xis korat” mhunn sangloli hi adnea novi asli. Jezun apli seva suru korchea poilim, Judev naslolo lok Jehovachi seva korunk ailo zalear tankam Israelitkar ieukar ditale mhunn Bible-antlim versam dakhoitat. (1Raz. 8:41-43) Punn hea adnea vorvim, Jezun aplea pattlavdarank fokot Judev lokankuch nhoi punn soglea lokank porgott korchi goroz asa mhunn sanglem. Oxe toren, Kristanvamnim xis korchem kam sonvsarbhor korunk zai mhunn Jezun dakhoun dilem.—Mt. 10:1, 5-7; Prok. 7:9; obheasachi ttipnni Mt. 24:14 polloi.

(Matev 28:20) ani Hanvem tumkam dileat teo soglleo adnia pallunk tankam xikoiat. Ani zanno zaiat, sodanch-sodam, hoi, kallam-iuganche sompadnne porian, Hanv tumchea sangata asam!”

nwtsty obheasachi ttipnni Mt. 28:20

tankam xikoiat: “Xikovop” hea utrak uzar kelʼlea Grek utracho orth, suchounneo divop, somzavop, bhasabhas korun dakhovop ani purave divop. (Obheasachi ttipnni Mt. 3:1; 4:23 polloi.) Soglleo adnia pallunk xikounchem kam chaluch urta. Hantunt, Jezuchi xikvonn dusreank xikovop, ti xikvonn amchea jivitant apnnavop ani tachi dekh gheun tea pormonnem cholop mellon asa.—Ju. 13:17; Ef. 4:21; 1Ped. 2:21.

Bible-ant Motiam Sodhum-ia

(Matev 27:51) Tednam Devmondirantlea Gabhareacho poddʼddo voir thaun sokol doxim pinzlo, bhuim kampli, khoddpam futtlim,

nwtsty obheasachi ttipnni Mt. 27:51

poddʼddo: Devmondirant, Bhov Povitr ani Povitr zagea modem, ho nettoilolo sobit poddʼddo aslo. Judevanche riti pormonnem ho zhodd poddʼddo sumar 18 m (60 ft) lamb, 9 m (30 ft) rund, ani 7.4 cm (2.9 in.) datt aslo. Poddʼddo doxim pinzlolean, Jehovan fokot aplea Putak jivexim marlolo tancher aplo rag dakhounk na, punn sorgar voichi vatt atam ukti zali mhunn dakhoun dilem.—Heb. 10:19, 20; Utravoll polloi.

Gabharo: Hea utrak uzar kelʼlem Grek utor na·os,ʹ hacho orth Devmondiracho modlo zago, zantunt Bhov Povitr ani Povitr kuddam asat.

(Matev 28:7) ani vegim vochun Tachea xisank sangat: Devan Taka melʼleantlo punorjivont kela ani, polleiat, To tumche fuddem Galileiak veta; thoi tumi Taka dekhtoleat. Polleiat, hench tumkam sangunk ailam.”

nwtsty obheasachi ttipnni Mt. 28:7

Tachea xisank sangat: Devan Taka melʼleantlo punorjivont kela: Jezuchea jivontponnam vixim hea bailank poilem sanglolem. Titlench nhoi, tankam hea vixim her xisank-ui vochon sang mhunn sanglolem. (Mt. 28:2, 5, 7) Devachea utra bhair aslolea Judevanchea riti rivazam pormonnem, neaialoi-ant, eka ostorechi govai manun ghenasle. Punn Jehovachea Devdutan hea bailank hem sontosachem kam diun tankam man dilo.

ABRIL 16-22

DEVACHEA UTRANTLE THEVE | MARKU 1-2

“Tujim Patkam Bhogsolim”

(Marku 2:3-5) choug zann ar-zalʼlea eka monxak uklun Tache sorxem gheun aile; 4 punn lokak lagun tea monxak Tache-xim haddunk zainaslem dekhun, Jezu aslo tea zagea voilo pattos tannim ukto kelo ani, oxi vatt korun, add poddlolea arkara soit tachem antrunn denvoilem. 5 Tancho bhavarth polleun Jezun arkarak mhollem: Puta, tujim patkam bhogsolim.”

jy 67 ¶3-5

“Tujim Patkam Bhogsolim”

Zaite lok ekttovlole tea ghorant Jezu xikoitana, char zannamnim ar zalʼlea eka munxak antrunnacher ghalun tachea lagim haddlo. Tanchea ixttak Jezun boro kelolo tankam zai aslem. Punn, lokanchea gordek lagon, tanchean taka ‘Jezu-xim haddunk zaunk na.’ (Marku 2:4) Te kitle nirax zale astole tem chintat! Punn tannim Jezu aslo tea zagea voilo pattos ukto kelo ani vatt korun tea arkarak antrunna soit denvoilo.

Hem polloun Jezu ragar zalo kai? Na! Tancho ho bhavarth polloun Jezun tea ar zalʼlea munxak mhunnttlem: “Tujim patkam bhogsolim.” (Matev 9:2) Punn patkam bhogsunk Jezuk odhikar aslo kai? Jezuchea utram vixim Xastri ani Farisev aplea monant chintunk lagle, “Ho oxem uloita tem kitem? Devninda korta ho! Devak ekleakuch soddun, konnachean patkam bhogsunk zatat?”—Marku 2:7.

Jezun tanchem chintop vollkhon oxem mhunnttlem: “Oslim chintnam tumchea monant kiteak gholloitat tumi? Hea donantlem khoichem arkarak mhonnunk odik sompem? Tujim patkam bhogsolim!, oxem mhonnunk, vo tujem antrunn ukol ani chol!, oxem mhonnunk?” (Marku 2:8, 9) Jezu diuncho aslo tea bolidana adarit to tea munxachim patkam bhogsunk xoktalo.

(Marku 2:6-12) Tednam thoi bosun aslole kai dhormxastri aplea monant oxem chintunk lagle: 7 “Ho oxem uloita tem kitem? Devninda korta ho! Devak ekleakuch soddun, konnachean patkam bhogsunk zatat?” 8 Te tanche bhitor oxem chintʼtat mhonn Aplea monant rokddench vollkhun, Jezun tankam oxi zap dili: “Oslim chintnam tumchea monant kiteak gholloitat tumi? 9 Hea donantlem khoichem arkarak mhonnunk odik sompem? ‘Tujim patkam bhogsolim!,’ oxem mhonnunk, vo ‘tujem antrunn ukol ani chol!, oxem mhonnunk’? 10 Punn, Monxachea Putak sonvsarant patkam bhogsunchi podvi asa mhonn tumchea monant rigounche khatir” 11 (Tannem arkarak mhollem:) “Hanv tuka hukum ghaltam; utth, tujem antrunn ukol ani tujea ghora voch.” 12 To monis rokddoch utthlo ani aplem antrunn uklun soglleam hujir thoicho bhair sorun gelo. Sogllo lok ojap zalo ani Devak vakhannun mhonnunk laglo: “Oslem ami kednanch dekhlem na!”

nwtsty obheasachi ttipnni Mk. 2:9

khoichem . . . mhonnunk odik sompem: Apunn dusreanchim patkam bhogsunk xoktam mhunn sangonk sompem karonn taka ti xokti asa mhunn dakhounk kaim purave diunchi goroz na. Punn Tujem attrun ukol ani chol oxem mhunnonk ek vizmitachi goroz asli zachea vorvim, Jezuk patkam bhogsuncho odhikar asa mhunn lokank kollon ieta aslem. Hea ghoddnnent sanglam ani Iz. 33:24-ant sanglam tea pormonnem ami duent zatat tem amchea patki poristhitik lagon.

Bible-ant Motiam Sodhum-ia

(Marku 1:11) Ani sorgar thaun oxi zap zali: “Tum Mhozo Put, soglle opurbaiecho; Tujer asa Mhojem dhadosponn.”

nwtsty obheasachi ttipnni Mk. 1:11

sorgar thaun oxi zap zali: Dev munxam lagim tin pavtti uloilo mhunn xubhvortomananchea pustokamnim vachunk melltta. To poile pavtt uloilʼlo tem, hea versant boroilʼlem asa.—Obheasachi ttipnni Mk. 9:7 polloi; Ju. 12:28.

Tum Mhozo Put: Jezu sorgar aslo tednam to Devacho put aslo. (Ju. 3:16) Ani to munis zaun sonvsarant zolmolo tednam-i to “Devacho put” aslo, karonn to Adanva bhaxen sompurnn aslo. (Luk. 1:35; 3:38) Tor Devan him utram, fokot Jezuchi vollokh diunk mhunnonk nant. Devan him utram mhunnon Jezucher Povitr xokti otli. Oxem kelʼlean Devan, Jezu, ho munis Aplo ‘novean zolmolʼlo’ otmik Put ani taka sorgar porot ieun aplem jivit jieuncho bhorvonso asa mhunn dakhoilem. Tea bhair, povitr xokte udexim Devan taka nemlolo Raza ani Porom Iadnik mhunn obhixikt kela hem dakhoilem.—Ju. 3:3-6; 6:51; Luk. 1:31-33; Heb. 2:17; 5:1, 4-10; 7:1-3 sor kor.

Tujer asa Mhojem dhadosponn: Vo “Tum Mhaka manvola.” Oslinch utram amkam Mt. 12:18-ant vachunk mellttat. Tim utram Iz. 42:1-antlean ghetleant jim Mesias vo Krista vixim aslim. Devan Jezucher Povitr xokti otlolean ani aplea Puta vixim him utram sanglolean, Jezuch bhasailʼlo Mesias mhunn sarkem kollon ieta.—Obheasachi ttipnni Mt. 3:17; 12:18 polloi.

(Marku 2:27, 28) Ani Tannem tankam sanglem: “Devan Sonvar monxam khatir kela, monxank Sonvara khatir korunk nant. 28 Mhonnttoch Monxachea Putak Sonvaracher-ui odhikar asa.”

nwtsty obheasachi ttipnni Mk. 2:28

Monxachea Putak Sonvaracher-ui odhikar asa: Him utram mhunnon Jezu aplea vixim sangtalo (Mt. 12:8; Luk. 6:5). Oxem mhunnon, aplea sorginchea Bapain apnnank nemlolem kam, Sonvara disa pasun korunk apleak odhikar asa mhunn tannem dakhoilem. (Juanv 5:19; 10:37, 38 sor korat.) Jezun soglea-von chodd ojapachim vizmitam, zoxem duentank bore korop, Sonvara disa kelem. (Luk. 13:10-13; Ju. 5:5-9; 9:1-14) Oxem kelʼlean, to Razvottki choloitana munxakullak ji suttka haddttolo ti sonvarachea visova sarki astoli mhunn tannem dakhoun dilem.—Heb. 10:1.

ABRIL 23-29

DEVACHEA UTRANTLE THEVE | MARKU 3-4

“Sonvarachea Disa Lokank Bore Korop”

(Marku 3:1, 2) Anink ek pavtt Jezu eka devsthanant bhitor sorlo ani hatak ar zalʼlo ek monis thoi aslo. 2 Tacher guneanv ghalche pasot, Sonvara disa To tea monxak boro korit kai mhonn te Taka tellun asle.

jy 78 ¶1-2

Sonvara Disa kitem korum ieta?

Anik ek Sonvara Disa Jezu devsthanant voita, ghoddie tem Galileint aslem. Thoim to, hatak ar zalʼlea eka munxak melltta. (Lukas 6:6) Xastri ani Farizev taka tellun polloitale. Kiteak? Tanchea fuddlea utramnim amkam kollon ieta: “Sonvara disa konnak boro korum-ieta?”—Matev 12:10.

Jiv dokheant aslo zalearuch eka munxak boro korunk zatalo mhunn Judevanche dhormik fuddari mantale. Udharonnak, eka munxachem hadd moddlam vo tachea haddak dukh zalea zalear Sonvara disa tem borem korunk zainaslolem karonn osli dukh jivak dokheachi nasli. Khorench, hea hatak ar zalʼlea munxachi, Xastriank ani Farizevank porva nasli, punn Jezuk guneavkari korun te tachi chuk kaddunk sodhtale.

(Marku 3:3, 4) Hatak ar zalʼlea monxak Tannem mhollem: “Utth, soglleam modem ubo rav.” 4 Magir tankam vicharlem: “Sonvara disa borem korum-ieta ki vaitt? Jiv vanchoum-iet ki kaddum-iet?” Punn te ogech ravle.

jy 78 ¶3

Sonvara Disa kitem korum ieta?

Jezu tanchem chukichem chintop zannam aslo. Sonvara disa kam korunk zaina mhunn aslolea kaidea pormonnem choltat mhunn dakhoun, te Devachea Utra bhair vochon apnnachech kaide kortale hem Jezu somzolo. (Suttka 20:8-10) Tannim Jezuchea borea kama vixim chuk kaddun hachea poilim taka guneanvkari kelʼlo tem pasun tannem soslem. Atam Jezu tankam bollan zobab diunk, hatak ar zalʼlea munxak oxem mhunntta: “Utth, soglleam modem ubo rav.”—Marku 3:3.   

(Marku 3:5) Tedna ragan tancher nodor bhonvddaun, tanchea kallzache darunnaie pasot khontibhorit zaun, Tannem tea monxak mhollem: “Tuzo hat sodd!” Tannem to soddlo, ani tacho hat adle bhaxen sarko zalo.

nwtsty obheasachi ttipnni Mk. 3:5

tanchea kallzache darunnaie pasot khontibhorit zaun: He ghoddne vixim boroitana fokot Marku amkam dhormik fuddareanchea darunn kallzam vixim sangta. (Mt. 12:13; Luk. 6:10) Jezuchea hea bhavnam vixim Markuk ghoddie Pedrun sanglam astolem, karonn Pedru bhavnamnim bhorlolo munis aslo.—“Marku Pustokachi Vollokh” polloi.

Bible-ant Motiam Sodhum-ia

(Marku 3:29) Punn Povitr Atmeacher devninda kortit tankam kednanch bhogsonnem mellchem na, tim sasnnak urta toslea patkachim guneanvkaram.”

nwtsty obheasachi ttipnni Mk. 3:29

Povitr Atmeacher devninda: Ninda korop mhunnche Deva add vo tachea sombondit aslolea vixoi-a add nanv piddear korop, tancho opman korop vo vaitt ulovop. Povitr xokti Deva thaun ieta dekhun mudʼdom ami tachea add vochop vo ti xokti kam korina mhunn sangop hem Devninda kelʼlea sarkem zata. Mt. 12:24, 28 ani Mk. 3:22-a pormonnem Jezun Devachea xokte vorvim vizmitam kelʼlim tim Judevachea dhormxastriamnim polloilolim. Torui astana, tem soglem Jezun soitanachea xokten kelem mhunn te mhunnttale.

sasnnak urta toslea patkachim guneanvkaram: Hanga ghoddie zannam zaun kelolea patka vixim sangta zait, zacho porinnam sasnak bhogunk poddtta. Oslea patkank kosle-i iodn bhettoilear pasun faideachem na.—Hea versacher adarit Povitr Atmeacher devninda obheasachi ttipnni polloiat ani heach ghoddnne vixim asloli obheasachi ttipnni Mt. 12:31 polloiat.

(Marku 4:26-29) Anink-ui Tannem mhollem: “Devachem Raj oxem: ek monis aplea xetant bim vompta. 27 rat ani dis, to nhidlolo asum vo zago asum, bim kirlota ani vaddta; hem koxem tem to kaich nokllo. 28 Zomin apnna osttongim foll dita, poilim palo, magir konnos ani xekim konnsant gulgulit gotto. 29 Ani xet piktoch, luvnni pavli mhonnun rokddoch to villo laita.”

w14 12/15 12-13 ¶6-8

Tumkam “Orth” Somzolo?

6 Hea voparintlean amkam kitem xikonk melltta? Poilem mhunnttlear, ek Bible vidʼdhearti Deva thaim apli ixttagot vaddounk kitlo proitn korta, tem amchea hatant na mhunn ami manun gheunk zai. Ami amchea vidʼdhearteacher bautizm gheunk dobhav ghalchimnant. Taka ami zata ti sogli modot vo tenko ditolim, punn xevottak somorponn korcho nirnnoi tacho mhunn ami khaltikaien manun ghetolim. To Devacho mog korta mhunn to apunn zaun somorponn korunk fuddem ieta. Hachea bhair anik khoinchea-i karonnak lagon to somorponn korta zalear tem Jehovak manvona.—St. 51:12; 54:6; 110:3.

7 Dusrem, ami hea voparent xiklolem lisanv monant dovorlear, amcho Bible vidʼdhearti survatek vaddavoll korina zalear ami nirax zaunchim nant. Ami sosnikai dakhoitolim. (Jak. 5:7, 8) Ami amchea Bible vidʼdhearteak modot korunk zata titlem vavurlear pasun tem vomplolem bim foll dina zalear, tachem karonn ami nhoi. Zanchem kalliz khaltem asa ani jim aplea jivitant bodlav korunk fuddem sortat toslea lokanchea kallzant sotachem bim Jehova vaddoita. (Mt. 13:23) Ami kitle bore toren seva kortat tem amcho vidʼdhearti udorgot korta vo na tacher adarit na. Ami kitlea lokank udorgot korun fuddem soronk modot kelea tem Jehova polloina, punn ami sevent je proitn kortat te to moladik mhunn lekhta.—Lukas 10:17-20; 1 Korintkarank 3:8 vachat.

8 Tisrem, eka vidʼdheartean kosle bodlav keleat tem ghoddie amkam sodanch kollchem na. Udharonnak, ek mixinori eka zoddpea lagim Bible obheas kortalo. Tea zoddpean tea mixinorik, apnnank ek porgottnnar zaunk zai mhunn sanglem. Tor mixinori bhavan, tankam porgottnnar zaunk zai zalear tannim cigretti voddchi tanchi sunvoim soddchi poddttoli mhunn tanchea ugddasak haddlem. Ojapachem mhunnttlear, zaitea mhoinea poilinch tannim cigretti voddchem bond kelʼlem mhunn tannim tea Mixinorik sanglem. Tim oxem kiteak korunk pavlim? Cigretti voddttat tednam Jehova tankam polloita ani to ddhongiponnacho dves korta mhunn tim somzolim dekhun tim ho nirnnoi gheunk pavlim. Voddpachem zalear, mixinorichea mukhar na tor voddpachem sarkench bond kortolim mhunn tannim nichov kelo. Jehova pasot aslolea tanchea mogak lagon tim sarko nirnnoi gheunk pavlim. Tea zoddpean kosle bodlav kelʼle tem tea mixinorik khobor nasli, punn tea zoddpean bodlav korun Jehova sangata apli ixttagot ghott keloli.

ABRIL 30–MAY 6

DEVACHEA UTRANTLE THEVE | MARKU 5-6

“Amchea Mogachea Meloleank Jivont Korunk Jezuk Xokti Asa”

(Marku 5:38) Devsthanachea odhikariachea ghorant bhitor sortoch Jezun gollboll zata to dekhlo, ani vhoddlean roddtalim ani zaitem sangun vilaptalim tim Tannem pollelim.

(Marku 5:39-41) Bhitor vochun Tannem mhollem: “Tumi kiteak mhonn gollbolltat ani roddtat? Cheddum morunk na, tem nhidlam.” 40 Ani lok Taka hansunk laglo. Punn tankam soglleank bhair ghalun, cheddvachea bapaik ani avoik ani Aplea sangatiank gheun, cheddum aslem thoi To gelo. 41 Ani cheddvachea hatak dhorun Tannem mhollem: “Talitha, kum! mhonnge: Cheddva, tuka sangtam, utth!”

nwtsty obheasachi ttipnni Mk. 5:39

morunk na, tem nhidlam: Bible-ant moronn nhidek sor kelam. (St. 13:3; Ju. 11:11-14) Jezu tea choddvak jivont korcho aslo. Tor, nhidloleank uttoitat toxem meloleank jivont korunk apleachean zata mhunn dakhounk Jezun oxem mhunnttlam astolem. Tea choddvak jivont korunk Jezuk tachea Bapain xokti dilʼli zo “jivit dita ani nant teo vostu aso-xeo korta.”—Rom. 4:17.

(Marku 5:42) Ani rokddench cheddum utthun bhonvunk laglem. Taka bara vorsam aslim. Ani lok ojap zaun bharim thottaklo.

jy 118 ¶6

Ek Tornnattem Choddum Portun Jieta!

Poilim Jezun lokank vizmita vorvim bore kele tednam, tea vixim konnakuch sangonaka mhunn tannem tankam sanglolem. Toxench hea choddvachea avoi-bapaik-ui tannem tench sanglem. Punn, tea khuxal avoi-bapain ani heramnim sogleank sangon “hi khobor tea akʼkhea prantant gazli.” (Matev 9:26) Tumcho mogacho konn jivont zalo zalear tumi umedin dusreank sangchim nant kai? Hem Jezun kelʼlem dusrem jivontponn aslem.

Bible-ant Motiam Sodhum-ia

(Marku 5:19, 20) punn Jezun dilem na, ani taka sanglem: “Tujea ghora ani tujea loka-xim voch ani Sorvesporan tuje khatir kedeo vhoddleo vostu keleo ani koxi Tannem tuji doia keli, tem tankam sang.” 20 To gelo ani Jezun apnna khatir kedeo vhoddleo kornnio keleo teo Dha Nogranchea mulkant porgottunk laglo; ani sogllim ojap zatalim.

nwtsty obheasachi ttipnni Mk. 5:19

tankam sang: Jezun poilim vizmitam kelim tednam tea vixim konnakuch sangonaka mhunn sanglolem (Mk. 1:44; 3:12; 7:36). Punn hea pavtt tea munxak jem ghoddlem tea vixim tannem aplea soireank sangchem mhunn Jezu taka sangta. Karonn Jezuk tea prantantlo bhair soronk sanglolo ani taka thoim porot sakxi diunk mellchi nasli. Hachea bhair, oxem kelolean lokanchem dhean dukranchea luksonnam voichea bodlek, tea munxak boro kelo tea vizmitacher voita aslem.

(Marku 6:11) ani khoicho-i ganv tumkam ievkar dina zait ani thoicho lok tumchem aikunk kobul nasot, tankam ek xiddkavnni diunche khatir, te svate vele bhair sortana, tumchea paianchi dhulʼl zhaddun uddoiat.”

nwtsty obheasachi ttipnni Mk. 6:11

tumchea paianchi dhulʼl zhaddun uddoiat: Oxem kelʼlean, xisamnim porgott kelʼlem tem aikon ghenant tancher ieunk aslole Devache zhoddttek xis zobabdar nant mhunn tannim dakhoun dilem. Oslinch utram amkam Mt. 10:14 ani Luk. 9:5-ant vachunk mellttat. Hea utram sangata Marku ani Lukas, tankam ek xiddkavnni [vo, “tancher add govaiki”] diunche khatir, him-ui utram uzar kortat. Pisidian Antiok-ant astana Paulun ani Barnabasan-ui oxench kelem (D.I. 13:51). Ani Paulun Korinthant astana oxench kitem kelem. Tannem aplim vostram fafddun mhunnttlem: “Hi tumchich zobabdari; mhaka zalear, hantum koslich zobabdari na.” (D.I. 18:6) Judev lok oxem kortale mhunn Jezuche xis zannam asle. Dhormik Judev, Judev naslolea lokanchea xaramnim bhonvon Judev prantant porot bhitor sortale tednam aplea paiank lagloli dhulʼl zhaddttale vo fafuddttale, karonn Judev naslolea lokanchea xarantlim dhulʼl oxudʼd mhunn te somzotale. Punn Jezun aplea xisank hi suchounni dili tednam tachea monant ho orth naslo.

    Konkani Prokaxonam (1972-2025)
    Log Out
    Log In
    • Konkani (Romi)
    • Dhadd
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Dhadd