Devache Nem-kaide Amkam Koxe Boreak Poddtat?

1. Kosle-i tharav gheunk amkam modot kiteak zai?

Amchea Rochnnarak amche poros chodd zannvai asa. Eka mogall Bapai sarko, To amcho samball korta. Amkam zai te bhaxen tharav gheun jieunk, tannem amkam rochunk nant. (Jeremias 10:23) Eka lhan bhurgeak aple avoi-bapaichea adarchi goroz asta toxench, amkam Devachea adarachi goroz asa. (Izaias 48:17, 18) Bible amkam Devachem ek dennem ani tantuntle nem-kaide, amkam tharav gheunk modot kortat.​—2 Timotak 3:16 vachat.

Jehovache nem-kaide amkam, atamchem jivit bore toren jieunk, ani fuddarak, ami sasnachem jivit koxem melloun gheunk zata, tem dakhoitat. Jehovan amkam rochleant ani amkam kaide diunk taka odhikar asa. Jehova amkam hea ritin vatt dakhoita, mhunn ami upkari asunk zai ani tache nem-kaide khuxen pallunk zai.​—Stotram19:7, 11; Prokasovnni 4:11 vachat.

2. Devachem Utor amkam koxem vatt dakhoita?

Choddxe poristhitinim ami koxim vaglear Devak borem dista, tem Bible-antlim mullavim sotam amkam dakhoitat. Bible-ant anikui nem-kaide asat, je kherit poristhitinim, ami kitem korchem tem dakhoitat. (Dusri Somurt 22:8) Dor ek poristhitint, Bible-antlim sotam koxim lagu zatat tem pollounk, ami amchea gineanacho vapor korunk zai. (Mhonnʼnneo 2:10-12) Udharonnak, jivit ek Devachem dennem mhunn Bible amkam xinkoita. Hem mullavem sot, ami kamank vetat thoim, amchea ghorant vo khoimsorui provas kortana amchi chal koxi asunk zai tem xinkoita. Jivit ek Devachem dennem mhunn monant dovorlear, ami amchem vo dusreanchem jivit sonkoxttant ghalchinant.​—Itihas 17:28 vachat.

3. Khoinche don nem-kaide chodd mhotvache?

Jezun amkam don mhotvache nem-kaide xinkoile. Poilo nem-kaido, munxakullachea jivitacho udhex dakhoita. To mhunnttlear, Devachi vollokh gheunk, tacho mog korunk ani visvaxi ravun tachi seva korunk. Amchea jivitant koslo-i tharav ghetana, hea poilea nem-kaidea vixim niall korunk gorjechem. (Mhonnʼnneo 3:6) Je konn hea poilea nem-kaidea pormonnem jietat, tankam Devachi ixttagot, khori khuxalkai ani sasnik jivit melltta.​—Matev 22:36-38 vachat.

Dusro nem-kaido amkam heram thaim xantin jieunk adar korta. (1 Korintkarank 13:4-7) Ho kaido lagu korit zalear, Dev munxam thaim vagta tech porim ami-i dusream thaim vagtolim.​—Matev 7:12; 22:39, 40 vachat.

4. Devache nem-kaide amkam koxe boreak poddtat?

Ghorabeant soglleanim mogan ektthaim ravunk, Devache nem-kaide amkam xinkoitat. (Koloskarank 3:12-14) Bible amkam anink ek sot dakhoita, tem mhunnttlear, kazaracho ekvott kednach moddcho nhoim. Hi xinkounn apnnailear ghorabeancho boro samball zata.​—Utpoti 2:24 vachat.

Bible-achi xinkounn apnnaun, amkam ghorabeacheo gorzo purnn korunk ani huskea vinnem jieunk modot melltta. Udharonnak, Bible-achea nem-kaideam pormonnem, promannikponnan ani mhennotin aplem kam kortat tankanch, lok sirvisek dovorunk sodtat. (Mhonnʼnneo 10:4, 26; Hebrevank 13:18) Sonvsarache gireskaie poros, Deva thaim amchi ixttagot chodd molachi oxem Bible amkam dakhoita, dekhun amche lagim asat titleach vostumnim ami dadhoxi ravunk zai.​—Matev 6:24, 25, 33; 1 Timotak 6:8-10 vachat.

Bible-achea nem-kaideam pormonnem cholʼlear amchi bholaiki bori urta. (Mhonnʼnneo 14:30; 22:24, 25) Udharonnak, bebdikai korchi nhoi, ho kaido pallʼlear, ami bhirankull duensantlean ani her sonkoxttantlean amcho jiv vattaitolim. (Mhonnʼnneo 23:20) Soro mannsugen ani favo titloch upeog korunk, Jehova porvangi dita. (Stotram 104:15; 1 Korintkartank 6:10) Devache nem-kaide amkam boreak poddtat, karonn te amkam, amcheo vaitt kornneoch nhoi punn vaitt chintnam dekhun pois korunk adar ditat. (Stotram 119:97-100) Tor, khori bhokti kortat te, Devache nem-kaide apnnak boreak poddtole mhunn pallinant, punn Jehovak man diunk palltat.​—Matev 5:14-16 vachat.