Janer—Jivit ani Porgottnni Mittingechea Pustike Pasot Modot
JANER 6-12
DEVACHEA UTRANTLE THEVE
UTPOTI 1-2
“Jehova Prithumer Jiv Rochta”
(Utpoti 1:3, 4) Devan mhollem: “Uzvadd zaum!’ Ani uzvadd zalo.” 4 Ho uzvadd boro mhonn Devan pollelo ani Tannem kallokh ani uzvadd doxim kele.
(Utpoti 1:6) Devan mhollem: “Udkanche don vantte zauncheak, tanche modem mollob zaum!”
(Utpoti 1:9) Devan mhollem: Ontralla sokoilim udkam eke svater zoma zaum ani suki zomin dixtti poddum!” Ani toxench zalem.
(Utpoti 1:11) Devan mhollem: “Zomnir vonospoti utpon zaum: biam-ditim zhaddam, ani bi-aslolea follanche rukh zomnir utpon zaum!” Ani toxench zalem.
it-1 527-528
Rochnna
Poilea disa, Devan, “Uzvadd zaum” mhunn sanglem tednam, posorlolo uzvadd kupam modlean bhair sortalo punn to khoinchean ietalo tem prithumer ravon kollonaslem. Hem sovka-sovkas zalem mhunn kolltta, karonn bhaxantor korpi J. W. Watts sangta, “sovka-sovkas uzvadd disonk laglo.” (Ut. 1:3, A Distinctive Translation of Genesis) Uzvaddak ani kallokak Devan doxi kele, ani uzvaddak dis mhunnttlo ani kallokak rat mhunnttli. Hem dakhoita ki prithum aplea bhonvtonni ani suria bhovtim ghunvot asli. Teach karonnak lagon prithumechea udente vatten uzvadd poddtta zalear, poschimant kallok poddttalo ani poschimant uzvadd poddtta zalear, udente vatten kallok poddttalo.—Ut. 1:3, 4.
Dusrea disa Devan “Udkanche don vantte” kele. Thoddem udok prithumer urlem, punn choddxe udok Devan prithumechea voir ubharlem, ani hanchea modem aslolo zago mollob zalo. Devan mollbak ontroll mhunnttlem. Hem mollob fokot prithumechea bhonvtonnim aslolo zago zaun aslo, karonn voir ubharlolem udok neketram vo sorgar dixtti poddttat tea her vostum bhonvtim asa mhunn sangona.—Ut. 1:6-8; EXPANSE polloiat.
Tisrea disa Devan aplea ojapachea xokte vorvim prithumer aslolem udok eka suvater ektthaim kelem ani sukhi zomin toiar zali. Devan tika Prithum mhunnttli. Heach disa, ovchit kitem tori zaun vo ek jiv bodlon dusre jiv zaunk nant, punn Devan vostu bhitor aslolea annʼnnu bhitor jivitachi xokti ghatli ani tonn, zhaddam, ani follam ditat te rukh zale. He tin bhaxeche vonospoti aplea “jinsam-bhaxe” anik utpon korunk xoktalim.—Ut. 1:9-13.
(Utpoti 1:14) Devan mhollem: “Disa ani rati modem ontor ghalunk ontrallar uzvaddacheo divttio zaum ani teo divttio kall, dis ani vorsam dakhounk upkarum.
(Utpoti 1:20) Devan mhollem: “Udkam jivea pranneamnim bhorom ani ontrallar, prithume voir, suknnim uddum!”
(Utpoti 1:24) Devan mhollem: “Sogllea jinsanche pranni zomnir utpon zaum: pospacheo monzati, jivannim ani tore-torechim ranvott zonavoram.” Ani toxench zalem.
(Utpoti 1:27) Devan Aplea sarkeacho monxak rochlo, Devachea sarkeacho taka rochlo, Dadlo ani bail tankam rochlim.
it-1 528 ¶5-8
Rochnna
Mhotvachem mhunnttlear, Utpoti 1:16-ant “rochop,” ho orth dita to Hebrev kriapod ba·raʼʹ uzar korunk na. Tachea bodlek, Hebrev kriapod ʽa·sahʹ, uzar kela, zacho orth “korop.” Utpoti 1:1-ant “sorg” mhunnttlam tantunt suria, chondrim ani noketram mellon asat mhunn sanglam dekhun heo vostu chovtea disa poilinch rochloleo mhunn kolltta. Chovtea disa Devan heo sorga voileo uzvadd diupi vostu prithumer ani tachea voir aslolea mollbar uzvadd diunk xokta toxeo “keleo.” Ani thoim, “Prithumer uzvadd ghalunk . . . tankam ontrallar ghalim,” mhunn sangtana, tacho orth teo mollbaruch asat toxem, teo prithumer thaun dixtti poddonk laglim mhunn kollon ieta. Tea bhair, heo uzvaddacheo vhodd divleo “kall, dis ani vorsam” dakhoun munxank veg-veglle toren margdorxon diunk lagon rochloleo.—Ut. 1:14.
Panchvea disa, munxank soddun prithumer her pranni rochleo. Dusrea-dusrea jivant bodolta toslem ek jiv Devan rochonk na. Punn tannem aplea xokte udexim zaiteo pranni rochleo. Thoim sanglam: “Devan somdirantle orixtt rochle ani udkant bhonvte jinʼsam-jinʼsanche pranni, ani toxench tore-toreche pakhotteanche pranni.” Apnnem kelolea kamant khuxal zaun, Devan tancher axirvad ghatlo, ani tankam “vaddat” mhunn sanglem, karonn hea veg-vegllea jinsanchea prannink ‘aplea jinsanchi’ anik utpon korchi xokti Devan diloli.—Ut. 1:20-23.
Sovea disa, “Devan dor-ek jinʼsachem ranʼvott zonʼvar, pospachi monʼzat ani zomni-velim jivannim kelim.” Devan kelolea her rochnne sarki hi pasun bori asli.—Ut. 1:24, 25.
Rochnnechea sovea disachea xevottak, Devan ek sarkich novi jinsachi rochnna rochli, ji monzati-von vorti punn ainzam poros khalti asli. Hi rochnna munis zaun aslo zo Devachea rupacho ani tachea sarkeacho aslo. Utpoti 1:27-ant munxa vixim thoddeach utramnim “Dadlo ani bail tankam [Devan] rochlim” mhunn sangta. Punn heach vixim Utpoti 2:7-9-ant, Jehovan zomniveli mati gheun monʼxak kelo ani Tannem tachea nakachea puddamnim jivitacho svas ghalo ani oso monis ek jivo pranni zalo, zaka ravpak ek sobit bag ani jevonn dilem mhunn sangta. Hi rochnna rochtana, Devan prithume voileoch vostu uzar korun taka rochlo ani dadleak rochlea uprant tannem bailek rochunk Adanvachi bor uzar keli. (Ut. 2:18-25) Bailek rochlea uprant, munxachi “zat” purnn zali.—Ut. 5:1, 2.
Bible-ant Motiam Sodhum-ia
(Utpoti 1:1) Orombak Devan sorg ani prithum rochlim.
w15 6/1 5
Vidneancho Tujea Jivitacher Koso Porinnam Zata
Prithum ani vixv kednam thaun asa
Prithum sumar 400 korodd vorsam poilim, ani vixv sumar 1,300 vo 1,400 korodd vorsam poilim aslo mhunn vidneanik sangtat. Vixv kednam rochlolo ti tarik Bible sangona. Prithum fokot thoddeach hozar vorsam poilim rochloli mhunn pasun Bible khoimsoruch sangona. Bible-antlem poilem vers mhunntta: “Orombak Devan sorg ani prithum rochlim.” (Utpoti 1:1) Tor him utram vidneanikank, vidneanik totvam pormonnem prithum kednam zaloli tem sodhun kaddunk koslich addkoll koriina.
(Utpoti 1:26) Devan mhollem: “Amchea rupacho ani amchea sarkeacho monxak rochum-ia ani somdirantlea maslliancher, ontrallavelea suknneancher, pospache monzaticher, sogllea ranvott zonavorancher ani prithumer sorpottun bhonvtolea jivanneancher to dhoniponn choloum!”
it-2 52
Jezu Krist
Jehova bhaxen rochnnar nhoi. Rochunk Putan modot keli tem khorem. Punn, to aplea bapa sangata rochpi naslo. Rochonk zai ti xokti, Deva thaun ieta ti povitr xokti. (Ut. 1:2; St. 33:6) Ani Jehova jivitachi zhor zalolean, jiv asloli sogli rochnna, dolleak dista vo disona tosli, tankam sogleank Devan jiv dila. (St. 36:9) Tor put ek rochnnar nhoi, punn Jehova aplem kam korunk taka uzar kelo. Bible-ant Jezun sogli rochnnam Devan rochlea mhunn sanglam ani Bible-antlim her versam pasun Jehovach rochnnar mhunn dakhoitat.—Mt. 19:4-6; CREATION polloiat.
JANER 13-19
DEVACHEA UTRANTLE THEVE
UTPOTI 3-5
“Poilea Fottik Lagon Zalole Vaitt Porinnam”
(Utpoti 3:1-5) Sorvespora Devan rochlolea sogllea ranvotti zonavoram modem sorop chodd xidduk aslo; tannem bailek mhollem: “Bhagentlea sogllea zhaddanchim follam khai nakat mhonn Devan tumkam sanglam tem khorem?” 2 Bailen sorpak zobab dilo: “Bhagentlea rukham modekot ek rukh asa tachea folla vixim 3 Devan sanglam: ‘Tumi mornnak sampoddona zaunk, tea rukhachem foll khainakat, nhoi mhonn taka hat porian lainakat.’” 4 Tedna sorpan bailek zobab dilo: “Hem khorem nhoi, tumi morchim nant; 5 jea disa tumi tem khaxat tea disa tumche dolle ugoddtole ani vaitt-borem vollkhun tumi Apnna bhaxen zatoleat mhonn Dev borem zanno.”
w17.02 5 ¶9
Jehovacho Udʼdhex Purnn Zatoloch!
9 Devchar Soitanan ek sorop uzar korun Evek, ticho Bap Jehova add vochonk fosoili. (Utpoti 3:1-5 vachat; Prok. 12:9) “Bhagentlea sogllea zhaddanchim follam” Devachea bhurgeank khaunk diunk nant mhunn dakhoun Soitanan tem vhodd kelem. To mhunnonk sodhtalo: ‘Hacho orth tuka zai tem tujean korunk zaina?’ Magir tannem ukteponnim fott sangli: “Hem khorem nhoi, tumi morchim nant.” Tea uprant tannem Devachem aikunchi goroz na mhunn Evek somzauncho proitn kelo. Tannem mhunnttlem, “jea disa tumi tem khaxat tea disa tumche dolle ugoddtole . . . mhonn Dev borem zanno.” Tor Soitan sangonk sodhtalo ki tannim tem foll khailolem Jehovak naka karonn tem khalear tanche dolle ugoddttole. Fuddem Soitan ek khotti bhas dita: ‘Vaitt-borem vollkhun tumi Deva bhaxen zatolim.’
(Utpoti 3:6) Mhonnttoch tea rukhachem foll khaunk ruchik ani polleunk sobit ani zannvai zoddun gheunk bhulovpi, oxem bailek dislem dekhun, tinnem tem foll kaddlem ani khelem; aplea ghovak-ui dilem ani tannem-i tem khelem.
w00 11/15 25-26
Poilea Zoddpea Thaun Ami Xikonk Zata
Evechean patok addaunkuch zainaslem kai? Na, tichean zatalem! Tumkam tichea suvater ghalat. Sorpachea utramnim, Devan ani Adanvan sanglolem tem khorem nhoi koxem dakhoun dilem. Eka onnvollkhi munxan, tumi mog kortat ani visvas dovortat tachea vixim kitem-i vaitt sanglem zalear tumkam koxem dista aslem? Even vegllech toren vagonk zai aslem. Tem aikon tika tiddok ani rag ieunk zai aslo, ani tinnem aikunk nakarunk zai aslem. Devachea nitivontponnacher ani tichea ghovachea utram add prosn vicharunk sorop konn? Mostokponnachea manddavollik man diun Even nirnnoi gheunchea poilim solʼlo gheunk zai aslo. Tor, konnem-i amkam Devan dilolea suchounne add kitem-i mahiti dili zalear ami pasun solʼlo gheunk zai. Even, tallnni haddli tachea utrancher bhorvonso dovorlo. Borem ani vaitt kitem tem nirnnoi gheunnk melltta ti podvi melloun gheunchi tika as zali. Jitli ti tachea vixim chintlem, titli tika te avoddlem. Eke chukiche axecher niallun, ani tem aplea mona thaun kaddinastana, vo aplea familichea mostoka lagim vicharinastana tinnem kitli vhoddli chuk keli!—1 Korintkarank 11:3; Jakob 1:14, 15.
Adanv Aplea Bailechem Aikota
Even Adanvak rokddoch aplea patkacho bhagidar kelo. Kainch chintinastana Adanvan aplea bailechem kiteak aikolem? (Utpoti 3:6, 17) Adanvan, apunn konnak visvaxi ravtolo to nirnnoi gheunk zai aslo. To aplea rochnnarachem aikotolo kai, zannem taka mogachi bail Eve ani soglem dilolem? Adanv atam, apunn kitem kortolo tea vixim Devachem margdorxon ghetolo kai? Vo aple baile sangata to-ui ti korta tench kortolo? Khaunk zainaslem tem foll khaun ti mellounk sodhta ti vost tika mellchi na mhunn Adanv boro zannam aslo. Apostl Paulu oxem borounk prerit zalʼlo: “Adanv fosovlo na, punn bail ki fosovli ani Devachi adnia tinnem moddli.” (1 Timotak 2:14) Tor Adanv mudʼdom Jehovachea add gelo. Dev ti poristhiti sarki korunk kitem-na-kitem korunk xokta mhunn bhavarth aschea bodlek Adanvak apunn aple baile thaun pois zatolo mhunn chodd bhirant asli.
(Utpoti 3:15-19) Tuje ani baile modem, ani tuje sonsti ani tiche sonsti modem, dusmankai ghaltolom; Ti tujem mostok maddoitoli, ani tum tiche khonttek chabtoloi.” 16 Magir bailek mhollem: “Tuje ballonterache koxtt, Hanv khub vaddoitolom, ani koxttam-dukhimnim, tum bhurgeak zolm ditolii, ani tuji vondovonn, tuka ghova vatten oddtoli, ani to tuje voir odhikar choloitolo.” 17 Uprant dadleak mhollem: “Ani Hanvem addvarlolea rukhachem foll tunvem kheleim dekhun, tuka lagun zomnicher xirap poddum. Sogllea tujea jivitant koxttamnim zomin kamais korun tujem pott bhortoloi; 18 Ti zomin tuka kantte-khuntte, ani kunsam utpon kortoli, ani xetantlem tonn tum khatoloi. 19 Ani tum zomnint porot vocho porian, tujea kopalacho gham varoun tuzo dispotto gras zoddtoloi, kiteak tech zomnintlo tuka kaddlolo. Tum dhulʼl, ani porot tum dhulʼlint vetoloi.”
w12 9/1 4 ¶2
Devak Bailam Vixim Kallji Asa Kai?
Devan bailancher xirap ghatla kai?
Na. Tachea bodlek Devan ‘adlea sorpacher, zachem nanv Devchar,’ tacher “xirap” ghatla. (Prokasovnni 12:9; Utpoti 3:14) Devan, Adanv aplea bailecher “odhikar choloitolo” mhunn sanglem tednam, dadleamnim bailank unnea molacheo mhunn lekhunk apunn maniotai dita mhunn Dev sangonaslo. (Utpoti 3:16) To fokot patkak lagon poilea zoddpeacher zatolo to porinnam sangtalo.
w04 1/1 29 ¶2
Utpoti—I Pustokantle Mukhel Mudʼdhe
3:17—Zomnicher khoinche ritin ani kitlo temp porian xirap ghatlolo?
Zomnicher xirap hacho orth atam zomnicher kitem-i utpon korunk khub kotthin zatolem. Hea xirapak lagon, zomin atam kantte-khuntte, ani kunsam utpon korunk lagli. To porinnam Adanvachea sonsticher itlo poddlo, ki Noahcho bapui Lamekan oxem mhunnttlem, ‘zomnir Devan xirap ghala dekhun koxtti-vavr korcho poddla.’ (Utpoti 5:29) Buddtte uprant, Jehovan Noah-acher ani tachea putancher besanv ghalun hi akʼkhi prithum bhorat mhunn tankam aplo udʼdex sanglo. (Utpoti 9:1) Tantuntlean, Devan zomnicher xirap ghatlolo to tannem kaddlo mhunn amkam kolltta.—Utpoti 13:10.
it-2 186
Ballonterachem Dukh
Hanga zolm dita tednam zata tea dukha vixim sangta. Poili bail Even patok kelea uprant bhurgeank zolm divop kitlem trasachem astolem tem Devan sanglem. Tinnem Devachem aiklolem zalear, tika tachem besanv sodanch aspachem ani bhurgeank zolm divop fokot sontosachem aspachem, karonn “Jehovacho axirvad— girestkai haddtta, ani to tachea sangata kainch dukh dina.” (Mho. 10:22, NW) Punn atam, amchi kudd oporipurn aslolean ti jea toren cholta tache thaun amkam dukh zata. Tor, Ut. 3:16-ant Devan sanglolem: “Tuje ballonterache koxtt, Hanv khub vaddoitolom, ani koxttam-dukhimnim, tum bhurgeak zolm ditoli.” (Karonn, kednam-kednam Dev thoddeo vostu ghoddonk soddun dita, te vixoi toch korta koxem dakhoita.)
Bible-ant Motiam Sodhum-ia
(Utpoti 4:23, 24) Lamekan aplea potinink mhollem: “Ada ani Zilʼla, mhojem aikun gheiat: Mhaka ghaiall kelʼlea eka monxak hanvem jivexim marlo, mhaka dukhoilʼlea eka tornnea-dhaktteacho hanvem jiv kaddlo. 24 Kainacho jiv kaddtolean satpett farikponn diunk zai, punn Lamekacho jiv kaddtolean soteatʼtor (th obheas 77) pavtti farikponn diunchem poddtolem.”
it-2 192 ¶5
Lamek
Lamekan aplea potinink boroilolea kovitentlean (Ut. 4:23, 24) tea disamnim lok kitle hinvsen bhorlole asle tem kolltta. Lamekachi kovita mhunntta: “Ada ani Zilʼla, mhojem aikun gheiat: Mhaka ghaiall kelʼlea eka monxak hanvem jivexim marlo, mhaka dukhoilʼlea eka tornnea-dhaktteacho hanvem jiv kaddlo. Kainacho jiv kaddtolean satpett farikponn diunk zai, punn Lamekacho jiv kaddtolean soteatʼtor (th obheas 77) pavtti farikponn diunchem poddtolem.” Hea utramanim Lamek apunn guneanvkari nhoi karonn Kaina bhaxen apunn mudʼdom jiv kaddunk vochonk na punn aplo jiv vattaunk apnnem taka jivexim marlo mhunn sangonk sodhtalo. Apnnacho jiv vattaunk apnnak marun dukhoilo tea munxak apnnem jivexim marlo mhunn to sangonk sodhtalo. Tor, zor konnem apnnen kelolea khunacho bodla gheunk sodhtalo zalear, taka apunn guneanvkari nhoi, ani apnnancho jiv kaddcho nhoi mhunn hea kovite udexim to vinoti kortalo.
(Utpoti 4:26) Setak ek bhurgo zolmolo tachem nanv Enosh. Tedna thaun monis Sorvesporachea nanvan prarthona korunk lagle.
it-1 338 ¶2
Devninda
Buddtte poilim Enosh-achea disamnim “Sorvesporachea nanvan prarthona” korop suru zalem mhunn sangonk zaina, karonn hachea poilinch, Abelan Devachem nanv uzar korun taka ulo marlolo. Tea vellar lok chukichea toren Devachem nanv uzar kortale. (Ut. 4:26; Heb. 11:4) Thodde ponddit mhunnttat toxem, Devachea nanv vaitt toren uzar korun ulo martale ani tem nanv munxank vo murteank uzar kortale. Hem khorem aslem zalear, hi Devninda zatali.—ENOSH, ENOS polloiat.
JANER 20-26
DEVACHEA UTRANTLE THEVE
UTPOTI 6-8
“Noahn toxem kelem”
(Utpoti 6:9) Hi Noahchi kotha: Tea kallar Noah ekloch promannik, aplea kallache pinddke modem to chuki vinnem, Deva sangata jietalo.
(Utpoti 6:13) Devan Noahk mhollem, “Monxakullacho nas-korunk hanvem ievjilam. Tanche vikottaiek-dharunnaiek lagon hanv tancho bhosm kortolom.
w18.02 4 ¶4
Noah, Daniel, ani Job-a Bhaxen Devachem Aikat ani Bhavarth Dovrat
4 Noahk fuddo korcheo poddleo teo oddchonneo. Noahcho ponzo, Enokachea disamnim lok khub odhormik zalʼle. Te Jehova add “ninda” kortale. (Judas 14, 15) Hinvsa vaddot asli. Khorem mhunnttlear, Noahchea disamnim “Prithumecher . . . soglleak otʼteachar” posorlolo. Vaitt ainz munxachi kudd gheun bailam lagim kazar zale ani tannim ek nixttur, veglleach torechi sonsot utpon keli. (Ut. 6:2-4, 11, 12) Punn Noah dusream poros vegllo ravlo. “Noah Sorvesporak manlolo. . . . Tea kallar Noah ekloch promannik, aplea kallache pinddke modem to chuki vinnem Deva sangata jietalo.”—Ut. 6:8, 9.
(Utpoti 6:14-16) Tea pasot, gofer lankddachem ek tarum bandun kadd; tantunt bhitor sobar kudd kor, ani bhailean-bhitorlean dhamor-dik taka lai. 15 Tinʼxim hat lamb, ponʼnas hat rund, ani tis hat unch tem tarum zaum-di. 16 Voir taka pattos ghal, ani pattosa ani kuxim modem ek hat uktem dovor. Taka tin malle ghal ani kuxik dar asum-di.
w13 4/1 14 ¶1
Noah “Deva Sangata Cholʼlo”
Hem kam korunk zaitim vorsam laglim, sumar 40 tem 50 vorsam. Tankam zhaddam katorchim aslim, vhoddlim lakhddam voddit vhoron tim katrun akar diun tea tea zagear bosounk zai aslim. Tem tarum tin malleanchem asonk zai aslem. Tantunt zaitim kuddam ani kuxik ek dar korunk zai aslem. Tachea voir pattos ani pattosa sokol zaitim zonelam aslim. Pattos modem matso unch aslo ani donnui vatten denvti asli dekhun udok vhavonk xoktalem.—Utpoti 6:14-16.
(Utpoti 6:22) Noahn toxem kelem. Sorvesporan taka jem kitem formailolem tem tannem sarkench pallʼlem.
w11 9/15 18 ¶13
Dhanvodd Sosnikaien Dhanvat
13 Jehovachea hea sevokank dhanvddent sosnikaien dhavonk ani jikonk kitem modot mellʼlli? Noah vixim Paulun kitem boroilem tem polloiat. (Hebrevank 11:7 vachat.) ‘Sogle jiv marun uddoita tosli prithumeveli buddtti,’ Noahn hachea poilim ‘pollounk nasloli.’ (Ut. 6:17) Hache poilim oxem kednach zaunk naslolem. Tori punn, Noahn hem zaunk xokona mhunn chitunk na. Kiteak? Karonn, Jehova sangta tem soglem to kortolo mhunn taka bhavarth aslo. Taka korunk sanglolem tem chodd kotthin oxem Noahk disonk na. Punn, “Noahn toxem kelem.” (Ut. 6:22) Noahk zaitem kam korchem aslem zoxem, tarum bandop, zonvarank ektthaim korop, tarvant munxam ani zonvaram pasot jevonn ektthaim korun dovrop, xittkaunnnecho sondex porgottop, ani Jehova sangata aplea familichi ixttagot ghott dovrunk modot korop. Tor ‘toxem korunk’ taka sompem naslem. Punn, Noahn bhavarth ani sosnikai dakhoili dekhun tacho ani tachea familicho jiv salvar zalo ani tankam besanvam mellʼllim.
Bible-ant Motiam Sodhum-ia
(Utpoti 7:2) Sogllea nitoll monzatintleo, dadlea ani strizaticheo, sat zoddio ghe; mhellea monzatintleo, dadlea ani strizaticheo, don zoddio;
w04 1/1 29 ¶7
Utpoti—I Pustokantle Mukhel Mudʼdhe
7:2—Khoinchea karonnak lagon monzati nitoll ani mhelleo mhunn tharailʼlem? Khoincheo monzati khaunk zatat ani khaunk zainant, tachea adharit nhoi, punn bhoktent khoincheo monzati iodn bhettounk uzar korunk zatat ani khoincheo zainant, tachea adarit hem tharailolem. Buddtte poilim munxank zonvaranchem mas khaunk porvangi nasli. Khoinchem jevonn “nitoll” ani “mhellem” hem Moizesachi Somurt dilʼli tednam suru zalem, ani ti somurt rodʼdh kelʼli tednam bond zalem. (Itihas 10:9-16; Efezkarank 2:15) Jehovachea bhoktent khoinchim zonvaram iodn bhettounk purtim aslim tem Noahk khobor asli mhunn kollon ieta. Karonn, to tarva thaun bhair sorlea uprant, tannem rokddich “ek vedi bandli ani nitoll monzatintleo thoddeo monzati ani nitoll suknneantlim thoddim suknnim gheun vedicher hom bhettoile.”—Utpoti 8:20.
(Utpoti 7:11) Dusrea mhoineachea sotravea disa, Noahk soixim vorsam aslim tedna, somdiracheo soglleo zhori futtleo ani ontrollachim zonelam ugoddlim.
w04 1/1 30 ¶1
Utpoti—I Pustokantle Mukhel Mudʼdhe
7:11—Noahchea disamnim ailolea buddttechem udok khoim thaun ailʼlem? Devan rochnna kelolea dusrea “disa” vo vellar prithumechea bhonvtonnim “mollob” kelem tedna, thoddem udok prithumer urlem, punn choddxem udok prithumechea voir ubarlolem. (Utpoti 1:6, 7) “Sokoilim” mhunnche prithumeruch aslolem tem udok. Ani “voilim” mhunnche prithume thaun voir, mollbachea voir ubarlole udkache konn, je eka ‘somdira’ sarke asle. Hem udok Noahchea disamnim prithumer poddlem.
JANER 27–FEBRER 2
DEVACHEA UTRANTLE THEVE
UTPOTI 9-11
“Akʼkhea Prithumer Ekuch Bhas Asli”
(Utpoti 11:1-4) Akʼkhe prithumer ekuch bhas ani thoddinch utram aslim. 2 Udente thaun to lok bhair sorun Shinar ganvant pavlo tedna, tankam ek moidan mellʼllem ani thoim tannim aplem tthikann kelem. 3 Tannim ekamekak mhollem: “Ieiat, ami vitt korun te ujeant bhazum-ia.” To lok fator vaporche svater vitt vaportalo ani chuneache bodlek damor 4 Tannim mhollem: “Ieiat, amkam ek xar ani sorgak tenkta titlo unch ek minar bandum-ia. Ami he prithumer ximpoddche adim amkam vhodd nanv zoddun dovrum-ia.”
it-1 239
Vorixtt Babel
Adlea Babelachem Khaxeleponn. Shinarachea moidanacher Babel xar stapon zalʼlo tednam Babel Minar bandcho proitn kelʼlo. (Ut. 11:2-9) To minar ani tem xar bandcho udʼdex, Devachem nanv vhodd korunk nhoi, punn bandpeamnim apnnank “nanv zoddun” gheuncho aslo. Adlea Babelant ani Mesopotamiachea her zagear moddun poddloleo ziggurat minaram polloitat tednam, adlo Babel minar koslea-i akarachem bandlolem asonk puro, punn tem dhormak sombondit aslem mhunn kollon ieta. Tem mondir khottea dhormak sombondit aslem mhunn khatri zata, karonn Jehova Devan tachem bandop bond korunk rokddench pavl ghetlem. Babel xarak dilolem Hebrev nanvacho orth “Gondoll” aslear pasun taka dilolem Sumeria bhaxechea nanvacho (Ka-dingir-ra) ani Akkadia bhaxechea nanvacho (Bab-ilu) orth “Devacho Darvantto” zaun asa. Taka lagon, tea xarachem adlea nanvacho orth boro naslo dekhun tea xarant urlolea lokamnim tachem nanv bodolʼlem, punn tachem novem nanv, tea xaracho dhorma sangata sombondh aslo mhunn dakhoita.
it-2 202 ¶2
Bhas
Buddtte uprant, Noahk ani tachea bhurgeank sanglolea Devachea khuxe add aslolea kamant thoddea lokamnim ektthaim zaun bhag ghetlo mhunn Utpoti pustok sangta. (Ut. 9:1) Akʼkhi prithum bhorchea bodlek, te lokank ektthaim korun ekech suvater jieuncho proitn korunk lagle. Tea zageak uprant Mesopotamiantlea Shinarachem Moidan mhunn nanv poddlem. Fuddarak ho dhormacho minar aslolo ek mukhel dhormik zago zauncho aslo.—Ut. 11:2-4.
(Utpoti 11:6-8) ani Tannem mhollem: “Hi ekuch porza ani ti ekuch bhas uloita ani tim fuddarak kitem-kat korchim asat tachi hi survat; tim atam korunk sodtat titlem-i tankam avghodd lagchem na. 7 tim ekamekachem somzona zaunk ami sokol vochum-ia ani thoim tanche bhaxecho gondholl korum-ia.” 8 Mhonnttoch Sorvesporan akʼkhe prithume voir tankam ximpddailim ani xar bandpachem kamʼ tannim bond dovorlem.
it-2 202 ¶3
Bhas
Aplea odhikara bhair fuddem soron hem bandkam kortoleanchem kam Sorvpodvedar Devan addailem. Tannem tanche bhaxecho gondoll korun tancho ekvott moddlo. Taka lagon, te sangata mellon kam korunk pavle na, ani soglea sonvsarant ximpddole. Bhaxecho gondoll kelolean fuddarak munxank Deva add eke chukiche vatten vochonk kotthin zalem karonn tanchi gineanachi xokti ani takot ektthaim korun svotacheo ievzonneo purnn korunk atam tankam sompem naslem. Hem ginean Deva thaun nhoi punn munxanchea onnbhova udexim ani sodha udexim mellʼllolem. Tor veg-vegllea bhaxechea lokank mellʼllolem hem ginean ektthaim korunk kotthin zalem, karonn atam tancheo bhaso veg-veglleo zaleo. (Up. 7:29 sor korat; D.S. 32:5.) Bhaxecho gondoll zalolean munis eka-meka thaun pois zale tem khorem, punn munxank tem faideak poddlem karonn tachea vorvim te dokʼkeak ani dukhak pavoita te dhei melloun gheunk pavle na. (Ut. 11:5-9; Iz. 8:9, 10 sor korat.) Amchea kallar, sonvsarachem ginean ektthaim korun munxamnim tem vaitt toren koxem uzar kelam tem ami chintunk zata. Babel-ant bhaxecho gondoll korina zalear oxem zatolem mhunn Devak zaitea tempa poilinch khobor asli.
(Utpoti 11:9) Tea pasot Babel mhonn tea xarak nanv poddlem, kiteak thoim Sorvesporan akʼkhe prithumeche bhaxecho gondholl kelo; thoim thaun Sorvesporan tankam akʼkhe prithume voir ximpddailim.
it-2 472
Raxttram
Bhaxek lagon veglle zalole lok atam zomeamnim veglle zale. Tannim apleak zai toxi veg-veglli sonskruti, kola, riti-rivazo, sobhav ani dhorm apnnaile. (Lev. 18:3) Deva thaun te pois sorle dekhun he veg-veglle lok aplea khottea kanneam vorvim devancheo zaiteo murteo korunk pavle.—D.S. 12:30; 2Raz. 17:29, 33.
Bible-ant Motiam Sodhum-ia
(Utpoti 9:20-22) Noah xet-molle kamais kortalo, ani soglleam-poilo dakam-mollo tannem lailolo. 21 Ek dis, dakancho ros pielea uprant taka to laglo, ani hea nadar vingllo aplim vostram kaddun to aplea tombunt add poddlo. 22 Haman hi aplea bapaichi got polleun, to gelo ani heram bhavank sanglem.
(Utpoti 9:24, 25) Soro nivllun sudʼdhir ailea uprant aplea dhakttea putan kitem kelem tem Noahk kollʼlem. 25 Tannem mhollem: “Kanaanacher xirap poddum, to aplea bhavancho chakrancho chakor zatolo.”
it-1 1023 ¶4
Ham
Ghoddie Kanaanuch tea ghoddnnent bhagidar aslo astolo ani tacho bapui Ham, hannem taka nittaier haddunk na. Vo Ham-ak asloleo vaitt sonvoim-o, jeo atanch tachea puta bhitor ghoddie dixtti poddttaleo, teo fuddarak Kanaanachea sonstikui ietoleo mhunn Noahk bhakit kortana preronna udexim kollon ailem astolem. Tea xirapacho thoddo bhag, Shemachi sonsot Israelitkaramnim, Kanaanitkarancher zoit velem tednam purnn zalo. Jea Kanaanitkarancho nas korunk na, (udharonnak Gibeonitkar [Josh. 9]) tankam Israelant chakor kele. Zaitea xekddeam uprant, Hamacho put Kanaanachea sonstintle lok, Jafetachea sonsti thaun ailoli sonvsarachi vorixtt razvottki Medie-Persie, Gres, ani Romachea odhikara khala aile tednam ho xirap anik purnn zalo.
(Utpoti 10:25) Eberak dog put asle: poilo Peleg, hachea kallar sonvsarantlo lok fanttlo; ani tachea bhavak Joktan mhonnttale.
w04 1/1 31 ¶3
Utpoti—I Pustokantle Mukhel Mudʼdhe
10:25—Pelegachea disamnim prithume voilo lok koso “fanttlo?” Peleg 2269 thaun 2030 K.X.A. porian jielo. Tachea “kallar” Jehovan Babel bandpeanchea bhaxecho gondoll kelo ani te akʼkhe prithumer ximpddole. (Utpoti 11:9) Oxe toren, Pelegachea disamnim “sonvsarantlo lok fanttlo.”