Febrer—Jivit ani Porgottnni Mittingechea Pustike Pasot Modot
FEBRER 3-9
DEVACHEA UTRANTLE THEVE | UTPOTI 12-14
“Tujer Probhav Poddtta Toslo Ek Korar”
(Utpoti 12:1, 2) Tea disamnim Sorvesporan Abramak mhollem: “Tuzo des, tuzo ghorabo ani tujea bapaichem ghor-dar sodd, ani Hanv tuka dakhoitolom tea desant voch. 2 Hanv tuje thaun ek vhodd porza upzoitolom, tujer Hanv axirvad ghaltolom, ani tujem nanv itlem xrextt kortolom, ki axirvad ghalpak lok tem nanv vapurtolo.
it-1 522 ¶4
Korar
Abrahama Sangata Kelʼlo Korar. Kanaan desant vochonk Abram-an (Abraham) Eufrates nodi par keli tednam ho korar lagu zalo. Anik 430 vorsam uprant Jehova Devan Somurticho korar kelo. (Gal. 3:17) Abraham Mesopotamia-nt Babiloniechea Ur xarant astana, Jehova taka apunn dakhoitolo tea desant vochonk sangta. (D.I. 7:2, 3; Ut. 11:31; 12:1-3) Suttka 12:40, 41 (LXX) amkam sangta ki Ejipt ani Kanaan desant ravlea uprant 430 vorsam ‘bhorlim teach disa’ Israel porza, ji Ejipt desant gulamponnant asli ti bhair sorli. Nisan 14, 1513 K.X.A. Paskancho dis aslo karonn hea disa Ejipt desa thaun tankam suttka mellʼlli. (Sutt. 12:2, 6, 7) Ghoddiek, Abrahaman Nisan 14, 1943 K.X.A. heach vorsa Kanaan vochonk Eufrates Nodi par keli astoli. Ani chodd korun, heach vellar Abrahama sangata kelʼlo korar lagu zalo astolo. Abraham Kanaan desant Shekem mhunntta thoim pavlo tednam Dev taka porot dixtti poddlo ani bhasaunni kelʼli tea vixim anik sanglem, “Ho des hanv tuje sonstik ditolom.” Oxem korun, Eden bagent kelʼle bhasaunne modem ani hea korar-a modem sombond asa mhunn Jehovan taka dakhoilem. To sombond mhunnttlear, Eden bagent bhasailoli ti sonsot tachea sonsti udexim ietoli mhunn Jehova Abrahamak sangta. (Ut. 12:4-7) Hea bhasaunnea vixim Jehova, Utpoti 13:14-17; 15:18; 17:2-8, 19; 22:15-18-ant, anik bariksannen sangta.
(Utpoti 12:3) Tujer axirvad ghaltat tancher Hanv-ui axirvad ghaltolom; tujer xirap ghaltat tancher Hanv-ui xirap ghaltolom; prithumevelim sogllim kullam tujem nanv gheun apnnancher axirvad magtolim.”
w89 7/1 3 ¶4
Tumi Abrahama Vixim Sot Kiteak Zannam Zaunk Zai
Jehovan Abrahamak kelʼli bhasaunni khorench ojapachi asli ani Abrahaman ti don pavtti tori aikoli. (Utpoti 18:18; 22:18) Hi bhasaunni purnn korunk, Jehova tea familichea melolea munxank porot jivont kortolo. Porot jivont zaloleank khorench, borem jivit mellttolem karonn Dev hi prithum porot Eden bage bhaxen kortolo ji poilea munxan hogddailʼli. Punorjivont zalea uprant, sasnik jivitachim besanvam koxim melloun gheunk zata tem tim xiktolim.—Utpoti 2:8, 9, 15-17; 3:17-23.
(Utpoti 13:14-17) Lot Abrama sorxilo kuxin sortoch, Sorvesporan Abramak mhollem: “Tuje dolle ubarun tum asai thoim thaun utʼtorik ani dokhinnek, ostomtek toxem udentik polle, 15 Tuka dixtti poddta to akʼkho des Hanv tuka ani tuje sonstik sasnnak ditolom. 16 Zomniche matiechea konniam bhaxen Hanv tuji sonsot vaddoitolom; konnachean zomniche matiecheo konnio mezunk zait tor, tuji sonsot tachean mezunk zatolem. 17 Utth, hea desachi lambi ani rundi bhonvun polle, kiteak to Hanv tuka ditolom.”
it-2 213 ¶3
Kaido
Itihasant mellʼllolea puraveam pormonnem thodde zannar mantat ki, jednam ek munis zomin vikti gheunk sodhtalo tednam taka ek unch sthanar vochon zomnicheo sogleo ximo dakhounk poddttaleo. Ani jednam to munis “Hanvem polloilem” oxem mhunnttalo tednam kaidea pormonnem ti zomin tachi zatali. Jednam Jehovan Abrahamak Kanaan des diunk bhasaunni keli tednam Jehovan taka charui dixamnim to des pollounk sanglem. Punn, Abrahaman “Hanvem Polloilem” oxem mhunnonk na karonn, Bhasailolo Des Devan tachea sonstik ditolo mhunn sanglolem. (Ut. 13:14, 15) Moizes Israelacho prothinidhi aslo ani Jehova Devan taka ho des pollounk sanglem. Tea zannar-anchem mhunnop sarkem asa zalear, kaidea pormonnem ho des, Joshua-achea mukhelponnam khala, Israel porjek mellʼllo. (D.S. 3:27, 28; 34:4. Matev 4:8-ant Soitanan Jezuk kitem sanglem tem-ui polloiat.) Kaidea pormonnem anik ek ritin zomin eka munxan apli korunk zatali. Jednam ek munis zomin bhovon polloitalo ani tatunt ravonk lagtalo tednam-i ti zomin tachi zatali. (Ut. 13:17; 28:13) Ek zomin vikpachi asa tednam tea zomnir kitlim zhaddam asat tancho ankddo pasun dilʼlo astalo mhunn adlea kagdam pormonnem kollon ieta.—Ut. 23:17, 18 polloiat.
Bible-ant Motiam Sodhum-ia
(Utpoti 13:8, 9) Hea khatir Abraman Lotak sanglem: ‘Polle, tuje ani mhoje modem, toxench tujea rakhnneam ani mhojea rakhnneam modem, tontto ascho nhoi, kiteak ami bhav-bhav. 9 Sogllo ganv tuje mukhar mekllo na? Tum mhoje sorxilo kuxin sor; tum dave vatten vexi zalear hanv uzve vatten vetolom, ani tum uzve vatten vexi zalear hanv dave vatten vetolom.”
w16.05 5 ¶12
Mogan Kestanvam Suttavim Korat
12 Devachea adlea sevokanim tanchea modem aslolim kestanvam koxim suttavim kelim tem amkam Bible-achea eka ghoddnent pollounk melltta. Abraham ani tacho bhacho Lot, hanchea lagim khub gorvam-menddram aslim. Hea hinddank chorvak vhortana tanchea rakhnneam modem kestanvam zatalim. Him kestanvam suttavim korunk, Abrahaman Lotak avoddtta ti zomin poili vinchunk sangli, zoim Lot ani tachea kuttumban ttikann korunk zatalem. (Ut. 13:1, 2, 5-9) Hem kitlem borem udharonn zaun asa! Abrahaman svotacho faido pollounk na punn xanti korunk tharailem. Tannem udar mon dakhoilem mhunn taka luksonn zalem kai? Na. He ghoddnne uprant, Jehova Devan Abrahamak zaitim besanvam ditolo mhunn bhasailem. (Ut. 13:14-17) Aplim sevokam Bible-achea totvam pormonnem jietat ani dusream sangata mogan kestanvam suttavim kortat tednam Jehova Dev tankam sasnak zata toslem luksonn zaunk kednanch diuncho na.
(Utpoti 14:18-20) Tea disamnim Melkizedekan, Salemachea razan, unddo ani soro haddlo; to Bhov Vortea Devacho iadnik aslo. 19 Tannem axirvad ghalun oxem mhollem: ‘Bhov Vorto Dev, sorga ani prithumecho Rochnnar, Abramacher axirvad ghalum; 20 Ani tujea dusmanank tuje adhin kele dekhun Bhov Vortea Devak vakhannʼnni!’ Ani Abrahaman aple dhon-girestkaiecho dhavo vantto taka dilo.
(Hebrevank 7:4-10) Tor to kitlo vorto to polleiat: amchea porzapoti Abrahaman porian zhuzache luttichea mhalacho boreantlo boro dhavo vantto taka dilo. 5 Soglli Israelachi porza Abrahamachi sonsot, punn fokot Levichea kullantle ki iadnik zatat; tori, je iadnik asat, tankam Somurti pormonnem porje koddsun, mhonnge apleach bhavam-bhoinnim koddsun, dhavo vantto vosul korcho kaido asa. 6 Melkizedek Abrahamache sonstintlo nhoi aslo. Tori astana, tannem Abrahama koddcho dhavo vantto ghetlo ani Devacheo bhasavnnio ghetlolea Abrahamak tannem axirvad dilo. 7 Dubava viret axirvad dita to axirvad ghetolea poros vorto. 8 Tea bhair, dhavo vantto ghetat te ek dis mortole tosle sade monis; punn Melkizedeka vixim oxem sangchem asa: amkam mhaiti asa tea pormonnem, zachea mornnachi khoboruch na, tannem Abrahama koddcho dhavo vantto ghetlo. 9 Mhonnttech, oxem Levi dusream koddcho dhavo vantto vosul korta zalearui, jednam Abrahaman dhavo vantto farik kelo, tednam Levin-ui kelo, oxem zalem, 10 Karonn Melkizedek Abrahamak mellʼlo tednam, Levi ozun zolmunk naslo, to ozun aplea purvozanchea angant aslo.
it-2 683 ¶1
Iadnik
Melkizedek Salem-acho raza ani iadnik (ko·henʹ) zaun aslo. Tachea sarko iadnik anik konnuch naslo. Tachea purvozam vixim vo to kednam zolmolo, kednam melo tea vixim Bible kainch sangona. Taka iadnikponnachi podvi vonxallvolli udexim mellonk na. Hi podvi tachea poilim konnank mellonk na vo tachea uprant ti konnakuch vochonk na. Melkizedek-ak razachi toxench iadnikponnachi podvi asli. Tachem iadnikponn Levi-chea iadnikponnam thaun vortem aslem karonn, Levi-n pasun Melkizedekak dhavo vantto dilo. Tem koxem? Levi Abrahamache sonstint zolmolo, ani jednam Abrahaman Melkizedekak dhavo vantto dilo tednam Levi-nuch dhavo vantto dilo koxem zalem. Uprant, Melkizedekan Abrahamak axirvad zalo. (Ut. 14:18-20; Heb. 7:4-10) Khorench, Melkizedek eke toren Jezu Kristachi savlli zaun aslo zo ‘Melkizedeka porim sasnnachea-sasnnak Iadnik astolo!’—Heb. 7:17.
FEBRER 10-16
DEVACHEA UTRANTLE THEVE | UTPOTI 15-17
“Jehovan Abram ani Sarai Hanchim Nanvam Bodolʼlim—Kiteak?”
(Utpoti 17:1) Abramak nnoveannov (th obheas 99) vorsam aslim tedna Sorvespor taka dixtti poddlo. Tannem taka mhollem: ‘Hanv Sorvespor. Mhojea dolleam mukhar chuki-vinnem chol.
it-1 817
Chuk, Chuki Kaddop
Munis apli vatt vinchun kaddtta ani aplim kamam kortana choddxe pavtti chukta. Karonn soglea munxank Adanvam thaun patok ailam. (Rom. 5:12; St. 51:5) Jehova kosleoch chukeo korina ani taka koslench khot na. Toripunn, to amkam doia dakhoita karonn “amkam kiteachim rochleant tem To bes-boro zanna, ami fokot dhulʼl-mati mhonn Taka ugddas asa.” (St. 103:13, 14) Noah Devak visvaxi aslo ani sodanch Devacheo adnea pallttalo. Jehovachea nodren Noah ‘aplea kallache pinddke modem chuki vinnem’ aslo. (Ut. 6:9) Jehovan Abrahamak sanglem, “Mhojea dolleam mukhar chuki-vinnem chol.” (Ut. 17:1) Noah ani Abraham dogui patki asle ani uprant te mele. Torui, Jehovachea nodren te chuki vinnem jiele karonn Jehova “kalliz polleta.” (1Sam. 16:7; 2Raz. 20:3, 2It. 16:9 sor korat.) Devan Israel porjek aplea nodren sodanch chuki vinnem ravat mhunn sanglem. (D.S. 18:13; 2Sam. 22:24) Jehova Dev nitivont ani chuki vinnem nit korpi monsubidar. Tannem aplea niropradhi putak (Heb. 7:26) amche soddvonne pasot dilo. Heach pasot jim konn Jezuchea bolidancher visvas dovortat ani tacheo adnea pallttat tankam to promannik vo niropradhi mhunn lekhta.—Rom. 3:25, 26; INTEGRITY; PERFECTION polloiat.
(Utpoti 17:3-5) Abramʼ zomni porian sokla bagvolo ani Devan taka mhollem: 4 “Ho polle Hanv tuje lagim korar kortam. Ixob-naslolea raxttrancho tum bapui zatoloi. 5 Fuddarak tuka Abramʼ mhonnchim nant; tujem nanv zatolem Abrahamʼ, kiteak Hanv tuka ixob-naslolea raxttrancho bapui kortam.
it-1 31 ¶1
Abraham
Vell soron gelo. Abrahamak ani Sarak Kanaan desant ravonk laglear sumar dha vorsam zalʼli ani azunui tika bhurgem zaunk naslem. Taka lagon, Sara apli Ejiptkar daxi Agar hika Abrahamak bail koxi dita ani tichea vorvim apleak ek bhurgem diunk sangta. Abrahaman tichem sangnnem manun gheta. Uprant, 1932 K.X.A hea vosra Abraham 86 vorsancho astana Ishmael zolmolo. (Ut. 16:3, 15, 16) Anikui thoddo vell soron gelea uprant 1919 K.X.A. hea vorsa jednam Abraham 99 vorsancho aslo tednam Jehova Dev Abrahamak tachea kuttumbantlea soglea cheddeanchi ani dadleanchi sunot korunk sangta. Jehovan Abrahama sangata ek khas korar kelʼlo, ani sunot hea korarachi ek khunna zaun asli. Heach vellar, Jehovan Abram-achem nanv bodlun Abraham dovorlem, karonn Devan taka “ixob-naslolea raxtrrancho bapui” kortolo mhunn sanglem. (Ut. 17:5, 9-27; Rom. 4:11) Uprant, Abraham-achea ghora munxache rupan tin devdut ietat ani te Devache munis koxe chintun to tacho poramos korta. Devdut taka Jehovacho sondex dita ki ieta tea vorsak Sara gorbest zatoli ani eka putak zolm ditoli.—Ut. 18:1-15.
(Utpoti 17:15, 16) Devan Abrahamak mhollem: ‘Tuje potinik Saraik hea fuddem tum anink Sarai mhonncho naim, punn Sara. 16 Hanv ticher axirvad ghaltolom ani ti tuka ek put ditoli. Hanv ticher axirvad ghaltolom ani tiche thaun raxttram utpon zatolim; porzanche raza tiche thaun upzotole.”
w09 2/1 13
Eka Nanvant Kitem Mellon Asa?
Aplo udʼdhex ghoddoun haddunk Devan thoddea munxanchi nanvam bodolʼleant. Udharonnak, Abram, zacho orth “Utʼtom Bapui,” hem nanv bodlun tannem taka Abraham, mhunnge “Zaiteancho bapui” hem nanv dovorlem. Aplea nanvam pormonnem, Abraham khoreanich zaitea raxttrancho bapui zalo. (Utpoti 17:5, 6) Teach toren, Abrahamache potinichem nanv, Sarai, mhunnchem “zhogddi korpi” aslem. Uprant, Devan tichem nanv “Sara,” mhunnchem “Rajkunvri,” dovorlem karonn tichea sonsti udexim raza ieunche asle. Hem zannam zaun ti khub khuxal zali astoli.—Utpoti 17:15, 16.
Bible-ant Motiam Sodhum-ia
(Utpoti 15:13, 14) Sorvesporan taka mhollem, ‘Tuji sonsot bhailea ganvant pordexi zaun astoli; charxim vorsam ti gulamponn ani piddapidd bhogtoli. 14 Punn tankam gulam’ korta te des-porjek hanv motti xikxa laitolom, ani tim ho bhailo ganv soddun ietana, thoinchi vhodd girestkai ghevun tim ganvantlim bhair sortolim.
it-1 460-461
Tarke Pormonnem Ghoddnneo
Jehovan Abramak (Abraham) sanglem: “Tuji sonsot bhailea ganvant pordexi zaun astoli; char-xim vorsam ti gulamponn ani piddapidd bhogtoli.” (Ut. 15:13. D.I. 7:6, 7 polloiat.) Jehovan hi bhasaunni ‘sonsot’ vo Izak zolmak ieunchea poilim kelʼli. 1932 K.X.A. vorsa Abrahamak Ejiptachi daxi Agara vorvim Ishmael zolmolo. Ani 1918 K.X.A hea vorsa Izak zolmolo. (Ut. 16:16; 21:5) 1513 K.X.A. vorsa, Abrahamachi sonsot Ejiptachea gulamponna thaun bhair sorli tednam “piddapidd” bhogpacho ho kall somplo. (Ut. 15:14) Tor ami hea ghoddne thaun 400 vorsam fattim mezlim zalear ami 1913 K.X.A-nt pavtat. Tednam Izak Kanaan desant “pordexi” mhunn aslo. Ani hea vellar to sumar panch vorsancho aslo ani tannem dudh soddlolem. Ani Ishmael 19 vorsancho aslo ani Izakacheo moskoreo korun taka challoitalo. Jehovan bhakit kelʼlea pormonnem Abrahamachi sonsot tednam thaun gulamponnan bhitor sorli. (Ut. 21:8, 9) Aichea kallar, thoddim chintunk puro ki moskoreo korop hatunt titlem kainch vaitt na. Punn, Abrahamachea kallar hem ekdom gombir aslem mhunn amkam Sarachea vagnnukentlean dison ieta. Agarak ani tichea putak dhanvddai mhunn Sara Abrahamak sangta. Ani Jehova Devan-ui Sarachem aik mhunn Abrahamak sanglem. (Ut. 21:10-13) Hea ghoddnne vixim bariksannen Bible-ant boroun dovorlolem asa. Tor hea vellar, bhakit kelʼlea pormonnem, Abrahamachi sonsot piddapidd bhogpachim 400 vorsam suru zalim. Ani Israel porza Ejiptantli bhair sorli tednam ho kall somplo.—Ga. 4:29.
(Utpoti 15:16) Ani tuji sonsot hanga porot ie-sor char pinnka sortoleo, ani Amorit-lokak hanv hangasorle bhair dhanvddaunchona, ani tanchem khotteponn vhodd zatoch te bhair poddtole.”
it-1 778 ¶4
Suttka
“Char pinddka.” Abrahamachi sonsot Kanaan desant porot iesor char pinddka sortoleo mhunn Jehovan Abrahamak sanglolem. (Ut. 15:16) Abrahama sangata kelʼlo korar lagu zalo tea vorsa thaun Israelachi suttka zali tea meren 430 vorsam sompli. Bible-ant sanglolea pormonnem tea kallacho lok chodd vorsam jietalo. Hem motint dovrun sudʼdam ami polloit zalear tea 430 vorsanchea kallar char pinddka poros chodd pinddka soron gelʼleo. Punn, Israel porza Ejipt desant fokot 215 vorsam asli. Tor Israel vo Jakob Ejiptant bhitor sorlea uprant char pinddka soron geleo teo zannam zaunk ami Jakobacho put Levi-chem udharonn gheum-ia. (th obheas 1) Levi, (th obheas 2) Kohat, (th obheas 3) Amram, ani (th obheas 4) Moizes.—Sutt. 6:16, 18, 20.
FEBRER 17-23
DEVACHEA UTRANTLE THEVE | UTPOTI 18-19
• “‘Akʼkhe Prithumecho Monsubidar’ Sodom ani Gomorracho Nas Korta”
(Utpoti 18:23-25) Tache boglek vochun tannem mhollem: ‘Khottea borabor promannik monxacho-i Tum khorench ibadd kortoloi? 24 Hea xarant aslolea ponʼnas promannik monxam astit: khorench hanchem Tum nisontton kortoloi? Hea xarant aslolea ponʼnas monʼxank lagun tem xar Tum vattauncho naim? 25 Osli vost korunk chintinaka: khottea borabor promannik monʼxak-ui marop mhollear promannik ani khotteak ekech toren vagoilole bhaxen zalem. Oslem korunk chintunkuch naka! Akʼkhe prithumecho Monʼsubidar nit korcho na?”
w17.04 18 ¶1
“Akʼkhe Prithumecho Monʼsubidar” Sodanch Sarkem Tench Korta
“Akʼkhe prithumecho Monʼsubidar nit korcho na?” (Ut. 18:25) Jehova Sodom ani Gomorrachi khori nit kortolo hem Abrahamak khatri asli mhunn hea prosna thaun kollon ieta. Jehova “Khottea borabor promannik monʼxak-ui” kednanch marcho na mhunn Abraham zannam aslo. Jehova oxem kortolo mhunn tachean chitunk porian zaina aslem. Sumar 400 vorsam uprant, Jehovan aplea vixim oxem mhunnttlem: “Sorvespor tumcho ek bolixtt rakhnno, korta titleant-ui sopurnn ani nitt; Tumcho Dev utrak visvaxi ani khoro; favo ani nitt titlem-i to korta.”—D.S. 31:19; 32:4.
(Utpoti 18:32) Abrahaman mhollem: “Hanv anink ekuch pavtt uloilear mhojea Sorvesporak vaitt dischem na mhonn mhaka bhorvanso asa: ghoddiek thoim dhach astit.” Sorvesporan mhollem: “Hea dha zannam khatir Hanv xarachem nisontton korcho na.”
w18.08 30 ¶4
Pasiens—Ek Udʼdhex Dovorun Thir Ravop
Pasiens dakhounk Jehovachem udharonn sogleamvon borem asa mhunn kainch dubhav na. (2 Ped. 3:15) Bible-ant zaiteo oxeo ghoddneo asat zoim Jehovan khub pasiens dakhoilem mhunn amkam vachunk melltta. (Neh. 9:30; Iz. 30:18) Udharonnak, Jehovan Devan Sodom xaracho nas korunk tharailolem tednam kitem ghoddlem tem polloiat. Abraham tache lagim prosn vicharta tednam Jehova koso portipall korta? Poilem mhunnttlear, Abraham uloitalo tednam Jehova Devan taka addaunk na. Punn, Abrahamak je uske ani prosn asle te Jehovan pasiensan aikole. Uprant, Abrahamachinch utram uzar korun Jehova Dev taka zap dita ani dakhoita ki tannem Abrahamachem sangnnem dhean diun aikolam mhunn. Fuddem, Jehova taka khatri dita ki Sodom xarant dha pasun promannik munis asat zalear tea lokam pasot To tea xaracho nas korcho na. (Ut. 18:22-33) Jehovan pasiens dakhoilem ani to rokddoch ragar zaunk na. Tachem hem kitlem borem udharonn zaun asa.
(Utpoti 19:24, 25) Sorvesporan Sodomacher ani Gomorracher sorgar thaun gondhofacho ani ujeacho paus dhaddlo. 25 Oxem tea xaranchem ani tea akʼkhea falkeachem ani thoim ravtolea soglleanchem ani thoim utpon zatali te vonospotichem tannem nisontton kelem.
w10 11/15 26 ¶12
Jehova Amcho Sorvpodvedar Dev!
12 Beginuch Jehova dakhoun ditolo ki fokot takach raz cholounk odhikar asa mhunn. Ami hea sonvsarachea nimannea disamnim ravtat ani Jehova Dev vaittponn sodam oxench uronk diuncho na mhunn ami zannant. Bhuddtti dhaddun Jehovan vaitt lokancho nas kelʼlo. Tannem Sodom ani Gomorra ani toxench Faraoh ani tachea foujecho nas kelʼlo. Siserak ani tache foujek toxench, Assyriacho raza Sennacherib ani tache foujek Jehova mukhar kainch boll naslem. Jehovan tancho-i nas kelo. (Ut. 7:1, 23; 19:24, 25; Sutt. 14:30, 31; Fudd. 4:15, 16; 2 Raz. 19:35, 36) Lok aplea nanvacho opman kortat ani aplea sevokank piddapidd ditat tem Jehova Dev sodanch sosun gheuncho na mhunn ami khatri dovorunk zata. Toxench, Jezuchea ienneachi ani kallachea xevottachi khunna aiz ami polloitat.—Mt. 24:3.
Bible-ant Motiam Sodhum-ia
(Utpoti 18:1) Mamrechea Xindur rukha-xim Abrahamak Sorvespor dixtti poddlo. Abrahamʼ, disachea chodd-chodd gormechea vellar, tombuchea darar boslolo aslo.
(Utpoti 18:22) Mhonnttoch te dadle thoim thaun Sodomache vatten gele, punn Abrahamʼ Sorvespora mukhar thoinch ubo ravlo.
w88 5/15 23 ¶4-5
Konnem Tori Devak Polloila Kai?
Abrahama lagim uloitalo to devdut Jehova pasot uloitalo. Tannem Jehovacho sondex asa tosoch Abrahamak dilo. Dekhun, Bible sangta ki “Abrahamak Sorvespor dixtti poddlo.”—Utpoti 18:1.
Zoxem telephone vo reddeo munxanchim utram dusrea munxank asa toxinch pavounk xoktat toxench Devdutan Jehovacho sondex asa tosoch munxank pavoilo. Dekhun, Abraham, Moizes, Manoah ani her munxam Jehova Deva lagim uloilolea porim devduta lagim uloilim. Munxamnim devdutank ani Devachim mhoima polloili hem khorem, punn tim Devak pollounk xokonaslim. Tor, Juanvachim utram sarkim zaun asat, thoim mhunntta: “Devak konnem kodinch polleunk na.” (Juanv 1:18) Hatuntlean kollon ieta ki hea munxamnim Jehovak pollounk na punn tannem dhaddlolea dutank polloile.
(Utpoti 19:26) Lotache bailen pattlean pollelem ani ti ek mittacho khambo zali.
w19.06 20 ¶3
Khonti-dukhink Tondd Diunk Herank Modot Korat
3 Sodom xarant vochon ravonk Lotacho nirnnoi chukicho aslo karonn thoincho lok khub pozddem jivit jietalo. (2 Pedru 2:7, 8 vach.) Thoinchi zomin khub foladik asli hem khorem punn thoim vochon Lot trasant poddlo. (Ut. 13:8-13; 14:12) Tache bailek tea xaracho vo thoinchea thoddea lokancho itlo mog zalo ki tinnem Jehovachi adnea moddli. Jednam Jehovan gondhofacho ani ujeacho pavs dhaddun tea xaracho nas kelo tednam tinnem aplo jiv hogddailo. Ani Lotacheo don dhuveo jea munxam lagim kazar zauncheo asleo tancho nas zalo. Lotachem ghor gelem, tachi aspot geli ani chodd dukhachem mhunnttlear tachi bail-ui moron geli. (Ut. 19:12-14, 17, 26)
FEBRER 24–MARS 1
DEVACHEA UTRANTLE THEVE | UTPOTI 20-21
“Apnnem Dilam Tem Utor Jehova Sodanch Palltta”
(Utpoti 21:1-3) Sorvesporan sanglole porim To Sarak bhettlo ani tika bhasailole porim tiche sovem Tannem purem kelem. 2 Ti gorbhest zaun, Abrahamak mhatare piraier Devan nemlolea kallar ek put zolmolo. 3 Abrahaman taka Izak nanv dilem.
wp17.5 14-15
Jehovan Tika “Rajkunvri” Mhunnttli
Sarak Jehovacher bhavarth naslo dekhun ti hansli kai? Na. Bible oxem sangta: “Bhavarthak lagun Sara porian utar piraiechi zaun-ui avoi zaunk pavli, kiteak Dev Aple bhasavnnek visvaxi ravtolo mhunn tika khatri asli.” (Hebrevank 11:11) Sara Jehovak vollkhotali; tannem kelʼli khoinchi-i bhasavnni to purnn korunk xokta mhunn tika khatri aslim. Amkam sogleank Sara bhaxen bhavarth asonk zai. Ami Devak bore bhaxen vollkhon gheunk zai. Jednam ami Bible-ant thaun tache vixim zannam zaunk pavtat tednam amkam somzotolem ki Saran tacher kiteak bhavarth dovorlo to. Jehova khoreanich visvaxi Dev ani to apleo sogleo bhasaunneo purnn kortach. Kednam-kednam-i to apli bhasaunni oxea toren purnn korta ki ami ojap zaunk pavtat vo Sara pori amkam hanso ieunk puro.
‘TICHEM AIK’
Xekim novod vosranche piraier, Sarak ho khuxecho dis pollounk mellʼllo zo ti sodanch axetali. Ti aplea mogall ghovak ek bhurgo diunk pavli. Hea vellar, Abraham 100 vorsancho aslo. Jehovan saglolea porim Abrahaman tea bhurgeachem nanv Izak dovorlem. Tacho orth ‘hanso’. Sara thokloli asli astoli punn tinnem hanson mhunnttlem: “Devan mhaka hansum-xi keli; zo konnui hem aikotolo to mhojea borabor hanstolo.” (Utpoti 21:6) Jehovan vizmit korun dilʼlea hea dennea udexim tika moro porian khuxalkai mellʼlli astoli. Toxench, tika hi ek vhodd zobabdari zaun asli.
Izak panch vorsancho zalʼlo ani tannem dudh soddlem tednam tachea kuttumban ek vhodd jevonn dovorlem. Punn, hea vellar soglinch khuxal asonk nant. Agaracho put Ishmael 19 vorsancho aslo ani Izakacheo moskoreo korta tem Saran polloilem. Tacheo heo moskoreo khub vaitt asleo. Karonn, uprant apostl Paulun Devachea preronnan Ishmael-a vixim mhunnttlem ki tachi hi vagnnuk ek piddapidd zaun asli. Hea moskoreancho Izakacher kitem porinnam zaunk xokta tem Sara bori zannam asli. Izak fokot aplo put nhoi punn Jehovan khas ritin vinchun kaddlolo mhunn ti zannam asli. Taka lagon, tinnem dhir ghetlo ani Abrahama lagim ti ukteponnim uloili. Agarak ani Ishmaelak dhanvddai mhunn tinnem Abrahamak sanglem.—Utpoti 21:8-10; Galasiekarank 4:22, 23, 29.
Abrahaman koso portipall kelo? Amkam oxem vachunk melltta: “Aplea putak lagun Abraham ekdom dukhabhorit zalo.” To Ishmaelacho khub mog kortalo. Ishmael bhi tacho put aslo dekhun kitem korchem hem taka somzona zalem. Punn, Jehova soglem pollounk xoktalo ani taka lagon to Abraham-ak oxem mhunntta: “Tujea putak ani tuje chakornik lagun tum dukhabhorit zaum naka. Sara tuje lagim magta titlem-i tika di, kiteak Izaka vorvim tuka sonsot mellttoli.” Agar ani tichea putachi apunn kallji ghetolo mhunn Jehova Devan Abrahamak khatri dili. Bhavarthan Abrahaman Devachem sangnnem aikolem—Utpoti 21:11-14.
(Utpoti 21:5-7) Izak zolmolo tedna Abrahamak xembor vorsam aslim. 6 Ani Saran mhollem: ‘Devan mhaka hansum-xi keli; zo konnui hem aikotolo, to mhoje borabor hanstolo.” 7 Tinnem aninkui mhollem: ‘Abrahamak konnui sangot, Sara bhurgeank dud diunk pavot mhonn konn mhonnot aslo? Toripunn tache mhatare piraier, Hanvem tachea putak zolm dila.”
(Utpoti 21:10-12) Tinnem Abrahamak mhollem: ‘Te chakornik ani tichea putak dhanvddai. Mhojea puta Izaka borabor chakornichea putak daizant vantto mellpacho na!” 11 Aplea putak lagun Abraham’ ekdom’ dukhaborit zalo. 12 punn Devan taka mhollem: ‘Tujea putak ani tuje chakornik lagun tum dukhabhorit zaum naka. Sara tuje lagim magta titlem-i tika di, kiteak Izaka vorvim tuka sonsot melltoli.
(Utpoti 21:14) Sokallim fuddem utthun Abrahaman ilem jevonn ghetlem ani chamddeache potient udok ghalem ani tem Hagara kodde dilem, bhurgeak tichea bhuzar ghalo ani tika dhadli. Ti Beershebachea oronneantlean bhonvli.
Bible-ant Motiam Sodhum-ia
(Utpoti 20:12) Ti khoreponnim mhoji ek khas bhoinn: mhojea bapaichi dhuv, punn mhoje avoichi nhoi; hanv tiche kodde logn zalam.
wp17.3 12, ftn.
“Tum Ek Sobit Ostori”
Sara Abrahamachi souti bhoinn asli. Abrahamacho bapui, Terahk don baileo asleo. Eka baile udexim Abraham zolmolo ani dusre baile udexim Sara zolmoli. (Utpoti 20:12) Aiz gorcheam munxam lagim kazar zavop sarkem nhoi hem khorem punn tea kallar poristhiti veglli asli. Adanv ani Eve-n sompurnn jivit hogddailʼlear chodd kall soronk naslo. Dekhun, tea kallar munxam khub temp jietalim ani tanchi bolaiki bori astali. Taka lagon, aiz gorcheam modem kazar zalʼlean bhurgeank duens zaupacho dhoko aslo vo dusro dhoko aslo to adlea kallar naslo. Punn, Abrahamachea kallar thaun sumar 400 vorsam uprant munxanchi pirai unni zait geli. Taka lagon, Jehova Devan Moizesa udexim Israel lokank je kaide dilʼle tatunt tannem sanglem ki laginchea soiream modem loigik sombond dovorop sarkem nhoi.—Levi-Xastr 18:6.
(Utpoti 21:33) Uprant Abrahaman Beershebant zhau nanvachem zhadd lailem ani Sorvesporak, sasnnachea Devak tannem ulo marlo.
w89 7/1 20 ¶9
Abraham—Devachim Ixttam Zaunk Sodtoleank Ek Udharonn
9 Abrahamak bhavarth aslo mhunn amkam dison ieta. Bible-ant oxem mhunnttlam: “Sorvesporachea (Jehovachea) manak Abraman ek vedi bandli.” (Utpoti 12:7) Tor, Abrahaman zonvaracho iodn bhettoilo astolo karonn, Hebrew bhaxen “vedi” mhunnttlear bolidan diuncho ek zago. Uprant, Abrahaman tea ganvchea dusrea zagear pavtoch toxench kelem. Tea bhair tannem “ Sorvesporachem (Jehovachem) nanv gheun taka ulo marlo.” (Utpoti 12:8; 13:18; 21:33) Nanv gheun ulo marop hea Hebrew vollicho orth nanv kollovop vo porgott korop. Abraham dhiran Jehova Devachem nanv porgott kortalo tem tachea gorcheamnim ani toxench Kanaanit lokamnim aikolem astolem. (Utpoti 14:22-24) Toxench, aiz Devachi ixttagot korunk sodtoleamnim Devachem nanv bhavarthan gheunchem gorjechem. Hacho orth mhunttlear, tannim lokank vochon porgott korunk zai. Tannim ‘Devak onttamnim vakhannunk taka Jezu vorvim nirontori vakhannʼnnecho iodn bhettounk zai.’—Hebrevank 13:15; Romkarank 10:10.