Eka-meka Sangata Natem Samballunk Ami Kitem Korunk Zai?

Eka-mekak Bhogxiat

“Dusreacher garannem korunk nimit aslear pasun, tumi ekamekak bhogsunk zai.”—KOLOSKARANK 3:13.

Ami soglim chuktat. Thodde pavtti ami dusreank dukhoitat, tor thodde pavtti dusrim amkam dukhoitat. Punn ami sogleamnim eka-mekak bhogsunk zai. Ami dusreank bhogxilam zalear, ami tancho rag dovrun ravchim nant. Vo “vaitt vaittan farik” korchim nant ani tancheo chuko ami voir kaddchim nant. (Romkarank 12:17) Punn konnem tori amkam khubuch dukhoilam ani ami tem visronkuch xokonant zalear ami kitem korunk zai? Amchi ixttagot poilim bhaxen ghott korunk ami tea munxa lagim uloun xanti korunk zai. Punn oxem kortana, konn sarko ani konnachi chuk asa, hem dakhouncho ami proitn korcho nhoi.​—Romkarank 12:18.

Khaltim Ravat ani Eka-mekak Man Diat

“Khalteponnan dusrim tumche-von vortim mhonn dhorat.”​—FILIPKARANK 2:3.

Je lok khalti asat, dusreank man ditat, ani dusream thaim bore bhaxen vagtat toslea lokam lagim amkam ixttagot korunk borem dista. Osle lok mudʼdom dusreank dukhoinant. Punn svotak vhodd mhunn somzotat ani dusreanchem aikonk toiar nant toslea lokam lagim konnuch ixttagot korunk sodhinant.

Bhed-bhav Korinakat

“Dev tonddak polleun monxam modem ontor korina . . . punn konn-ui monis, khoichea-i raxttracho to zaum, Devachi bhokti korta ani Devache khuxe pormannem cholta tor, to ki Devak manovta.”​—ITIHAS 10:34, 35.

Ami khoinchea-i desantlim zaum, kosli-i bhas uloum, girest zaum vo gorib, kallim zaum vo gorim, Devachea nodren ami soglim ek. Karonn Povitr Pustok sangta, “ekach monxa thaun sogllem monxakull tannem utpon kelem.” (Itihas 17:26) Taka lagon, ami soglim bhav-bhoinnam zaun asat. Ami dusream lagim bore toren vagtat tednam tankam-i borem dista ani amkam-i borem dista. Ani chodd mhotvachem mhunnttlear, Dev khuxal zata.

Doiall-movall Sobhavachim Zaiat

“Doiall-movall kallzachim . . . monxam zaiat.”​—KOLOSKARANK 3:12.

Ami doiall-movall sobhavachim asat zalear dusrim amche lagim ulounk kednanch fattim sorchim nant. Amchea chukim vixim pasun tim amche lagim ukteponnim uloitolim. Karonn ami tancher ragar zaunchim nant mhunn tankam khobor asa. Toxench, konnui amchea lagim ragan uloita tednam ami tankam xantponnim zobab ditolim ani tancho rag nivollttolo. Eka xannea munxan oxem sanglolem: “Bholo zobab tiddok pois korta, . . . topta tosli utram rag vaddoitat.”​—Mhonnʼnneo 15:1.

Udar Kallzachim ani Upkari Zaiat

“Dusream koddchem gheunche poros dusreank divop odik vhodd bhag.”​—ITIHAS 20:35.

Aiz zaite lok ap-svarthi asat ani fokot apleach vixim chintʼtat. Punn khori khuxalkai amkam dusreank dita tednam melltta. (Lukas 6:38) Dusreank ditat tednam ami vostuncho nhoi, punn lokancho mog kortat mhunn dakhoitat. Toxench, dusrim amkam kitem-i ditat tednam ami tanche upkar attoitat. (Koloskarank 3:15) Chitat, ‘Tumkam kosle lok avoddttat—chamtte vo udar kallzache? Udar kallzache nhoi! Toxem zalear, ami-i udar kallzachim zaum-ia ani dusreanche upkar attoum-ia.​—Matev 7:12.