Jehovache Sakxi Raxttr-bhoktechea Kariavollimnim Kiteak Bhag Ghenant?

Jehovache Sakxi sorkarank ani raxttrache nixannik, mhunnche bavtteak vo her vostunk man ditat. Karonn dor ekleak bavtteak solam korcho, pledge vo soput gheuncho, vo raxttr-git vo raxttr-bhoktechim gitam gaunchim vo na, tem vinchun kaddunk hokʼk asa mhunn ami manun ghetat.

Punn, oxem korop Bible-antlea xikounnechea add asa dekhun Jehovache Sakxi hea kariavollimnim bhag ghenant. Tor, dusrim kitem mantat taka tim man ditat toxem, dusrim pasun tanchea patiennek man ditolim mhunn tim opekxa kortat.

Tor,

• Bible-achea khoinchea xikounne adarit ami nirnnoi ghetat?

• Raxttr-bhoktechea kariavollimnim ami bhag gheunkuch zai oso kaido asa zalear ami kitem kortat?

• Jehovache Sakxi somazant vo rajkaronnant konnachi bazu ghetat kai?

Hea tin prosnanche zobab ami hea lekhant polloitolim.

Bible-achea khoinchea xikounne adarit ami nirnnoi ghetat?

Ami Bible-achea don xikounne adarit nirnnoi ghetat:

• Rochnnar Devakuch amchi bhokti favo. Bible sangta: “Tum fokot Jehova Devachich bhokti kor, ani tachi ekleachich povitr seva kor.” (Lukas 4:8) Tor, eklo pledge vo soput gheta vo raxttr-bhoktechim gitam gaita tednam to sogleam poros aplea desacho mog kortolo vo tachi bhokti kortolo mhunn bhas dita. Tea pasot, oslea raxttr-bhoktechea kariavollint bhag ghevop chukichem mhunn Jehovache Sakxi manun ghetat.

  Oxem korop murti puza mhunn te lekhtat ani Bible murti puza korop chukichem mhunn sangta. (1 Korintkarank 10:14) Eka bavtteak solam korop, bhokti korchea sarkem asa mhunn itihaskaranchea utrantlean kollon ieta. Itihaskar Carlton J. H. Hayes-an oxem boroilem: “Des-bhokti eka dhorma sarki asa, ani tachi bhokti korchi mukhel nixanni bavtto zaun asa.”a Poilea xekddeantlea Kristanvam vixim ek boroupi Daniel P. Mannix-an oxem mhunnttlem: “Adlea tempar Romi somrattachi rakhonn korunk ek ainz asa mhunn lok mantale ani Kristanv tachi bhokti korunk nakartale. Tor, bavtteak solam korchem nakarop pasun heach bhaxen zaun asa.”b

  Jehovache Sakxi bavtteak solam korinant tem khorem, punn teach borabor te bavtteak vo raxttrachea khoinchea-i nixannek pinzun uddoinant, laxinant vo khoinchea-i ritin opman pasun korinant.

• Soglim munxam Deva mukhar ek-sarkim zaun asat. (Itihas 10:34, 35) Bible-ant sanglam ki Devan ‘eka munxa thaun soglem munxakull utpon kelem.’ (Itihas 17:26) Tea pasot, khoinchem-i ek kull vo raxttr dusream poros vhodd mhunn chintop chukichem mhunn Jehovache Sakxi mantat. Tor, ek munis khoinchea-i desantlo zaum, ami taka man ditat.—1 Pedru 2:17.

Raxttr-bhoktechea kariavollimnim ami bhag gheunkuch zai oso kaido asa zalear ami kitem kortat?

Jehovache Sakxi sorkara virodh vochonant. Karonn ‘sorkarachi stapon vo manddavoll zaunk’ Devan tankam porvangi dilea mhunn ami manun ghetat. (Romkarank 13:1-7) Tea pasot, khorim Kristanvam sorkari odhikareank khaltim astat.—Lukas 20:25.

Punn sorkaracho kaido amkam Devachea kaidea add vochonk laita tednam kitem? Thodde pavtti oslea kaideamnim thoddo bodol kor mhunn ami boroun vinoti korunk zata.c Punn, te toxem korunk nakartat tednam Jehovache Sakxi “monxanchi adnia nhoi, punn Devachi adnia” pallttat.—Itihas 5:29.

Jehovache Sakxi somazant vo rajkaronnant konnachi bazu ghetat kai?

Na. Toxench, te bavtteak solam korinant, pledge vo soput ghenant vo raxttr-bhoktechim gitam gainant. Hacho orth, te somazant bodlav haddunk sodhtat oxem nhoi. Punn, Bible hea vixim kitem sangta tem tim pallunk sodhtat.