Tumi Kortat Tem Soglem “Doiallponnachi Xikovnn” Apnnaun Korat

LISA ani Anne nanvachea don bhoinnank atam Bible vachunk ani tacher niall korunk khub avoddtta.a Punn tim sotant ieunk ek vegllench karonn aslem. Tem karonn kitem zaun aslem? Lisa sangta, “Bhav-bhoinnamnim dakhoilʼlea doiallaiek lagon mhojer chodd porinnam zalo.” Toxench Anne sangta, “Tanche xikounnek lagon nhoi, punn doiallaiek lagon hanv sotant ieunk pavlem.”

Dusreank urba melltta tea toren ami doiallai koxi dakhounk zata? Hea vixim ami don vatto polloum-ia: (1) amchea utramnim, ani (2) amchea kornneamnim. Ani uprant, ami konnank doiallai dakhounk zata tem ami polloitolim.

“DOIALLPONNACHI XIKOVNN” TUMCHEA VONTTANCHER ASUM-DI

Ek bore bailek kosle gunn asonk zai tea vixim sangtana Mhonnʼnneo odheai 31-ant tiche jiber “doiallponnachi xikovnn” asa mhunn sanglam. (Mho. 31:26) Ani ti uloita tednam, ti kitem uloitoli ani koxi uloitoli hacher hea ‘xikounnecho’ porinnam zata. Bapaimnim pasun aplea uloupant hi “xikovnn” apnnaunk zai. Karonn choddxim avoi-bapui manun ghetolim ki tim tanchea bhurgeam lagim khor toren uloitat tednam tanchea bhurgeancher vaitt porinnam zata, ani tim aplea avoi-bapaichem aikonk toiar asonant. Punn avoi-bapui bhurgeam lagim doiall toren uloitat tednam, bhurgeank tanchem utor aikonk ani tem pallunk sompem zata.

Tor ami avoi-bapui asum vo na, punn ami sogleamnim doiall toren koxem ulounk zata? Mhonnʼnneo 31:26-achea poilea bhagant amkam hache vixim kitem tori kollon ieta. Thoim mhunntta: “Xanneponnan ti aplem tondd ugoddta.” Tor hantuntlean amkam kollon ieta ki ulounche poilim ami xanneponnan amchim utram vinchun kaddunk zai. Ani ami tem koxem mhunnttolim tem adim-fuddench chintunk zai. Tor ami kitem-i ulounche poilim amkanch ho prosn vicharunk zata, ‘Hanv jem atam uloitolom tem aikon mhozo aiknnaro ragar zatolo vo xanti zaunk modot zatoli?’ (Mho. 15:1) Khorench, ulounche poilim chintop ekdom gorjechem.

Toxench, Mhonnʼnneo 12:18-nt oxem sanglam: “Ovichari utram torvari bhaxen toptat.” (Mho. 12:18) Tor ami kitem uloitat ani koxem uloitat tacho dusreancher kitem porinnam zatolo, tea vixim ami poilinch chintat tednam ami amchi jib tabeant dovrunk pavtolim. Hea vorvim, ami “doiallponnachi xikovnn” apnnaitat tednam ami dusreank toptat toslim utram uzar korchimnant vo tankam vaitt dista tea toren ulounchim nant. (Ef. 4:31, 32) Punn ami doiall-movall utram uzar kortolim, ani tankam urba melltta tea toren uloitolim. Hea vixim Jehova Devan ek ekdom borem udharonn dovorlam. Provadi Elija bhielʼlo aslo tednam Jehovan taka ghottai diunk aplea eka ainzak dhaddlo. Ani Bible-ant tea ainzacho avaz “ek mond-xitoll vareacho avaz” koso aslo mhunn sanglam. (1 Raz. 19:12) Punn ami utramnich doia dakhoilear puro nhoi. Ami amchea kornneamnim pasun doia dakhounk zai. Hem ami koxem korunk zata tem fuddem polloum-ia.

TUMCHEA DOIALL KORNNEAMNIM DUSREANK URBA DIAT

Ami amchea utramnim ani kornneamnim doiallai dakhoitat tednam ami Jehovachi dekh ghetat. (Ef. 4:32; 5:1, 2) Sakxeamnim apleak koxi doiallai dakhoili tea vixim Lisa, zache vixim ami poilim uloilʼlim tem sangta: “Amkam okosmat amchem ghor khali korunk poddlem tednam, sobhentlea don zoddpeamnim kama thaun sutti gheun amchem saman bandunk amkam modot keli. Tea vellar hanv Bible pasun xikonaslem!” Tor tea zoddpeamnim kornneamnim doia dakhoilolean Lisa-k sota vixim anik zannam zaunk urba mellʼlli.

Bhav-bhoinnanchea doiallaiek lagon Anne, zache vixim ami poilim uloilʼlim tem pasun upkari aslem. Tem sangta: “Mhaka aiz porian mellʼllolim munxam mhojea sangata jea toren vaglim, tea pasot mhaka konnacherui visvas dovrunk kotthin zatalem. Tor mhaka Sakxi mellʼllim tednam mhaka tancher visvas naslo. Hanv chintʼtalem, ‘Tankam mhoji itli kallji kiteak asa?’ Punn mhaka Bible xikoitali tea bhoinniche doiallaiek lagon hanv ticher visvas dovrunk pavlem. Ani uprant hanv jem kitem xiktalem tea vixim hanv bariksannen chintunk laglem.”

Tor sobhentlea bhav-bhoinnamnim Lisa-k ani Anne-ak doiallai dakhoili dekhun kitem zaunk pavlem? Tancher khub boro porinnam zalo. Karonn tankam sot xikonk modot zali. Toxench, Jehova ani tachea lokancher visvas dovrunk tankam modot zali.

DEVACHI DEKH GHEUN DUSREANK DOIALLAI DAKHOIAT

Thoddim zannam tanche sonskrutaiek lagon vo tankam jea toren vaddoileant taka lagon, dusream lagim uloitana doiall utram uzar kortat vo eka hanstea tonddan dusreank zap kortat. Oxem korop borem. Punn ami fokot amche sonskrutaiek vo sobhavak lagon dusream sangata bore toren vagtat zalear, ami ghoddie Devachea doiallaiechi dekh gheunk pavchimnant.—Itihas 28:2 sor korat.

Khori doiallai povitr xoktecho ek gunn zaun asa. (Gal. 5:22, 23) Tor doiallai dakhounk amkam povitr xokti zai. Ani povitr xoktechea modotin ami Jehova ani Jezuchi dekh gheun doiallai dakhounk pavtolim. Toxench Jezu bhaxen amkam dusreanchi khorench kallji asa. Tor amkam Jehovacho ani amchea xezariancho mog asa dekhun ami doiallai dakhounk fuddem sortolim. Tednam ami amchea kallzantlean doiallai dakhounk pavtolim ani Devak manvololim zatolim.

AMI KONNANK DOIALLAI DAKHOUNK ZAI?

Amchea sangata doiall toren vagtat vo ami vollkhotat tankam doiallai dakhounk amkam sompem zata. (2 Sam. 2:6) Ani ami tankam doiallai dakhoitat ti ek vatt mhunnttlear, ami tanche upkar attoitat. (Kol. 3:15) Punn konnakui doiallai dakhovop favo na, oxem amkam dista zalear kitem?

Hea vixim chintat: Doiallai dakhounche vixim Jehova ek ekdom borem udharonn zaun asa. Karonn tannem dusreank favo nasloli doia dakhoilea. Ani tachea Utrant pasun hea gunna vixim amkam ek mhotvachem lisanv xikonk melltta. Toxench, Grek bhaxen boroilʼlea pustokamnim ‘favo naslole doiallaie’ vixim zaite pavtti boroilam. Tor Dev doiallai koxi dakhoita?

Jehova Devan aiz porian soglea munxank tankam jieunk goroz asa tem soglem diun doiallai dakhoilea. (Mt. 5:45) Itlench nhoi, punn ami tachi vollokh gheunchea poilim tannem amkam doiallai dakhoilea. (Ef. 2:4, 5, 8) Udharonnak, tannem aplea boreantlea-borea, ekleach Putak amche pasot moronk dilo. Hea vixim, apostl Paulun sanglem ki Jehova Devan “favo nasloli doia dakhoun” amche pasot soddvonnechi manddavoll keli. (Ef. 1:7, NW) Toxench, ami patok kortat ani Jehovak dukhoitat. Tori astana, to amkam margdorxon dita ani xikoit ravta. Ani tachi hi xikounn ‘pavsachea thembeam porim xitoll’ zaun asa. (D.S. 32:2) Tor Jehovan amkam itli doiallai dakhoilea ki ami taka kednach farik korunk pavchimnant. Khorem mhunnttlear, Jehovan amkam doiallai dakhounk na zalear amkam fuddaracho bhorvonso aschoch naslo!—1 Pedru 1:13 sor korat.

Jehovachi doiallai amkam khub avoddtta. Ani tachea doiallaiechi dekh gheun amkam-i dusreank doiallai dakhounk urba melltta. Tor thoddeankuch doiallai dakhounchea bodlek, ami dor ek disak sogleank doiallai dakhounk proitn korum-ia. (1 Tes. 5:15) Hea toren, amchea familichea sodoxiank, bhav-bhoinnank, amchea sangata kam kortoleank, amchea sangata iskolant xiktat tankam ani amchea xezariank ami doiallai dakhoit ravtat tednam tankam bhuzvonn mellttoli. Ani eka thonddechea disa, ujeachi gormi mellʼllolea porim tankam distolem.

Tor tumchea doiall utramnim ani kornneamnim tumchea familintlea vo sobhentlea konnakui tumi modot korunk xoktat kai? Zoxem, tumchea sobhent konnakui khas korun, tanchem ghor vo garden nitoll korunk zai zalear, vo sodanchem khoinchem-i kam, zoxem bazar korunk zai zalear, tumi tankam modot korunk xoktat kai? Vo porgottnni kortana, modotichi goroz aslolo konnui tumkam melltta zalear, tankam tumi adar korunk xoktat kai?

Tor Jehovachi dekh gheun, amchea utramnim ani kornneamnim ami sodanch “doiallponnachi xikovnn” apnnaum-ia.