Sosunk Zaina Toslem Dukh

“Mhaka ani Sophia-ka kazar zaun 39 vorsam zalʼlim. Zaitim vorsam thaun tem duent aslem ani uprant bhair poddlem. Hem dukh sosunk mhojea ixttamnim mhaka adar dilo ani hanv zata titlo bizi ravonk proitn kortalom. Tori astana, sumar ek voros porian hanv dukhant sarko buddon aslom. Ek-ek pavtti mhaka tacho chodduch ugddas ietalo ani hem mhojean sosunk zainaslem. Tem moron atam tin vorsam zalim. Punn azun pasun, mhaka tacho ugddas ieta tednam hanv khub dukhi zatam ani hanv kainch korunk xokona.”​—Kostas.

Tumcho kazari sangati, ghorcho vo lagincho ixtt bhair poddla zalear, tumkam-i ghoddie Kostas-a bhaxen disonk xokta. Karonn, zaitea zannank hem dukh dusrea khoincheach dukha sangata sor korunk zaina. Hem dukh sosunk sogleam-von kotthin asa mhunn zaite zannar pasun sangtat. The American Journal of Psychiatry, hantuntlo ek lekh sangta, “amcho konnui mogacho morta tednam tem dukh sosunk khub kotthin zata, karonn amkam tim porot kednanch mellchimnant, oxem dista.” Oslea vellar amchea monant he prosn ieunk xoktat: ‘Hem dukh sosunk hanvem kitem korunk zata? Hanv hea dukhantlean kednam-i tori bhair soronk pavtolom kai? Hanv porot kednam-i tori khuxal zaunk pavtolom?’

Hea prosnanche zobab tumkam hea Zagrut Ravat! masikent mellttole. Halinch tumcho konnui mogacho mela zalear, tumi kitem ugddas dovrunk zata tem tumkam fuddlea lekhant zannam zaunk mellttolem. Ani tachea uprant aslolea lekhamnim tumchem dukh unnem korunk tumkam koxi modot zatoli tem-ui tumi zannam zatolim.

Jea lokamnim aplea mogacheank mornnant hogddaileant, tankam hea masikentlea lekham thaun bhuzvonn mellttoli ani faideak poddttat tosle solʼle pasun mellttole.