DUKH-TRASAN BHORLOLEA SONVSARANT

1 | Tumchea Bholaikechi Kallji Gheiat

HEM KITEAK MHOTVACHEM?

Tras ietat vo odruxtt ghoddtta tacho khoinchea-na-khoinchea vatten lokanchea bholaikecher porinnam poddttach.

Lokank tension zata ani hem tension chodd vell urlem zalear tim duent poddonk xoktat.
Odruxttank lagon zaite lok duent zatat vo zokhmi zatat. Oxem zalʼlean, hospital-ant tankam ilaz mellonk kotthin zata.
Kam-dhondo bond poddtta ani lokanchi sirvis voita. Oxem zalʼlean, jevonn-khann ani vokhdam gheunk poixe uronant.

Ami Kitem Ugddas Dovrunk Zai?

Gombhir duensank lagon vo tension-ak lagon tumi chukiche nirnnoi gheunk xoktat. Ani aplea bholaikechi kallji ghevop soddun diunk xoktat. Oxem zalʼlean, tumi anik duent poddonk xoktat.
Tumchea duensacho tumi vellar ilaz korinant zalear, tumchem duens anik vaddonk xokta. Itlench nhoi, tumchea jivak pasun dhoko zaunk xokta.
Tumchi bholaiki bori asa zalear, kotthin poristhitint pasun tumi chintun panvl gheunk xoktat.
Tumi gorib aslear pasun tumchi bholaiki samballunk kitem-na-kitem korunk xoktat.

Ami Atam Kitem Korunk Zata?

Zannvai aslolo munis, fuddem kitem zaunk xokta ani tancho fuddo korunk kitem korunk zai tem poilinch chintʼta. Tor duent poddona zaunk ami nitoll ravonk zai ani amchem ghorui nitoll dovrunk zai. Ami duent astat tednam pasun oxem kelear borem. Karonn, oxem kelʼlean amchi bholaiki anik bigoddchina.

Andreasa mhunntta: “Hanv ani mhoji bail nitoll ravonk ani amchem ghorui nitoll dovrunk khub vavurtat. Oxem kelʼlean, amkam porot-porot dotorager vochonk poixe moddunk poddonant.”

a Hea masikent thoddim nanvam bodolʼleant.

FUDDO KOSO KORCHO? Thodde Solʼle

Trasanchea vellar tumchea bholaikechi kallji gheunk him panvlam gheiat

NITOLLSANN DOVORCHI SONVOIM KORAT

Nitollsann Dovorchi Sonvoim Korat

Bible mhunntta: “Xittuk monis sonkoxtt polleun asro gheta.” (Mhonnʼnneo 22:3) Jea vostum thaun tumchi bholaiki bigddonk xokta, teo vollkhon, tanchea thaun pois ravonk zata titlo proitn korat.

Sabanv ani udkan porot-porot hat dhuiat. Chodd korun, jevchea poilim ani toilet-in vochon ailea uprant.
Sodanch tumchem ghor nitoll dovrat ani sanitize korat. Chodd korun tumi porot-porot hat laitat teo vostu, zoxem darachem handle, switch ani fon.
Zata zalear, posorta toslem duens asa tanchea thaun pois ravat.

BHOLAIKEK BOREAK PODDTTA TOSLEM JEVONN JEIAT

Bholaikek Boreak Poddtta Toslem Jevonn Jeiat

Bible mhunntta: “Khoinchoch munis aplea kuddicho dves korina. Punn to ti posta ani ti moladik mhunn lekhta.” (Efezkarank 5:29) Svotachi kallji gheunk ek vatt mhunnttlear, bholaikek boreak poddtta toslem jevonn jevop, ani bholaikek mal poddtta toslea vostum thaun pois ravop.

Bhorpur udok pieiat.
Tore-torechim follam ani bhaji khaiat.
Telacheo ani godd vostu unneo khaiat. Jevnnant tel ani ghi unni vaprat.
Chodd soro pienakat, tombaku khainakat ani drugs ghenakat.

Carlos mhunntta: “Ami duent zaina zaunk, hanv ani mhoji bail bholaikek boreak poddtta toslem jevonn jevtat. Ami chodd zoddinant, taka lagon amchea lagim asat te thodde poixe, vokhdank ghalchea bodlek bholaikek boreak poddtta toslea jevnnacher khorch korunk ami chintlam.”

EXERCISE KORAT ANI VISOV GHEIAT

Exercise Korat

Bible mhunntta: “Donui hatamnim kamak gulʼl zaun vareak dhorunk tachea fattlean dhanvche poros thoddo visov ghevop chodd borem.” (Upodexok 4:6, NW) Dekhun ami kamam borabor visovui gheunk zai.

Thoddi tori exercise korit ravat. Oxem korunk tumkam kotthin dista zalear, survatek tumi walk-ak vochonk zata. Tumi zannttim asum, opong asum vo tumkam koslem-i gombhir duens asum, thoddi tori exercise kelear tumchea bholaikek boreak poddttoli.
Visov Gheiat

Goroz titlo visov gheiat. Tumi bori nhid ghenant zalear, tumchem tension vaddttolem ani tumi kamacher dhean diunk pavchimnant. Fuddarak tumkam ghoddie koslim-i gombhir duensam zaunk xoktat.
Nhidpacho ani utthpacho vell chintun tharaiat. Ani uprant dor disa teach vellar nhidpacho ani utthpacho proitn korat.
Nhidonk voichea poilim TV vo mobile polloinakat.
Ratchem chodd jevnakat. Nhidchea poilim, chav, kofi vo soro pienakat.

Justin mhunntta: “Mhoji bori nhid zaina tednam, mhoji bholaiki bigoddtta mhunn hanvem polloilam. Zaite pavtti mhoji tokli ani ang dukhta. Punn jednam hanv bori nhid ghetam tednam mhaka ekdom fresh dista. Mhoje koddlean khoinchem-i kam korun ghetlear, hanv korunk xoktam oxem mhaka dista. Toxench, hanv porot-porot duent poddona.”