DUKH-TRASAN BHORLOLEA SONVSARANT

3 | Tumchem Natem Samballat

HEM KITEAK MHOTVACHEM?

Aiz sonvsarant aslolea trasank lagon lokank usko zala. Tea pasot, tim eka-meka thaun pois zaleant.

Zaitea zannamnim aplea ixttank mellop ani tanchea lagim ulovop unnem kelam.
Zaitea kazari zoddpeam modem zhogddim vaddleant.
Aplea bhurgeank koslo usko zata tacher zaitim avoi-bapui dhean dinant.

Ami Kitem Ugddas Dovrunk Zai?

Amkam sogleank ixttam zai, ani chodd korun trasanchea vellar. Ixttam aslear amkam khuxalkai ani dhir melltta, ani tea udexim amchi bholaiki bori urta.
Sonvsarantlea somosiank lagon ghov-bailank tension zaunk xokta ani tea udexim tanchea kazari jivitant osleo oddchonneo ieunk xoktat, jea vixim tannim kednanch chintunk na astolem.
Sonvsarant ghoddttat tea vaitt vostunk lagon tumchea bhurgeanchea monacher tumi chintunk na toslo porinnam poddonk xokta.

Ami Atam Kitem Korunk Zata?

Bible mhunntta: “Ixtt sogllea vellar mog korta, Punn, oddchonniche gorje khatir bhav zolmota.”—Mhonnʼnneo 17:17.

Tumkam oslo ixtt asa kai, zo trasanchea vellar tumkam modot korunk xokta ani boro solʼlo diunk xokta? Tachea lagim tumchem natem samballat. Oxem kelʼlean to tumkam dhir diunk xoktolo ani tumkam eksurponn bhogchem na.

FUDDO KOSO KORCHO? Thodde Solʼle

Trasanchea vellar tumchem natem samballunk him panvlam gheiat

TUMCHEA KAZARI SANGATEA BORABOR NATEM GHOTT KORAT

Tumchea Kazari Sangatea Borabor Natem Ghott Korat

Bible sangta: “Eklo aslolea poros dog zann aslear odik borem . . . Zor eklo sokla poddlo, dusreachean taka uklum-ieta.” (Upodexok 4:9, 10) Koslea-i kotthin poristhiticho fuddo korunk ghov-bailamnim eka-mekachea add voichea bodlek, eka-meka sangata mellon kam korunk zai.

Tumi kitlim-i tension-ant aslear pasun, tumi eka-mekacher rag kaddchimnant mhunn ghott nichov korat. Pasiens dakhoiat ani eka-mekacheo chuki bhogsat.
Dor sumanak, unneant-unnem ek pavtti tori tumchea somosiam vixim eka-meka lagim ukteponnim uloiat. Eka-mekak bott dakhounchea bodlek, teo soddouncho proitn korat.
Tumkam avoddttat tosleo vostu sangata mellon korunk vell kaddat.
Tumchea kazaracho album vo dusre fottu polloun, tumi sangata sarlolo boro vell ugddas korat.

David mhunntta: “Ghov-bailanche vichar sodanch ek-sarkech astat oxem nhoi, tori tim sangata mellon kam korunk xoktat. Eka zoddpean sangata nirnnoi gheun, tannim dogaimnim tacher kam korunk vavrunk zata.”

IXTTAGOT SAMBALLAT

Ixttagot Samballat

Tumchea ixttam koddlean tumkam koxi modot mellttoli, fokot tench chintinakat punn tumi tankam koxi modot korunk zata tem-ui chintat. Tumi dusreank urba ditat tednam tumkam-i urba mellttoli.
Dor disa tumchea thoddea ixttanchi khobor gheiat.
Tumcher aileat tosle tras, tumchea ixttancher ailʼle zalear, tannim tancho koso fuddo kelo tem vicharat.

Nicole mhunntta: “Trasanchea vellar kitem korchem tem amkam kainch somzona. Oslea vellar, amchim ixttam amkam sarki vatt dakhoitat. Zaite pavtti ami kitem korunk zai tem amkam khobor asta, tori astana konnem-i amkam tem porot ugddasak haddlear boreak poddtta. Ani amchim ixttam tench kortat. Tim amchi kallji ghetat ani ami tanchi.”

BHURGEANK SOMZON GHEIAT ANI TANKAM MODOT KORAT

Bhurgeank Somzon Gheiat Ani Tankam Modot Korat

Bible mhunntta: “Aikonk utsuk aschem, uloupant tabo dovorcho.” (Jakob 1:19) Survatek ghoddie tumchea bhurgeank kosli bhirant vo usko asa tem tumkam sangonk tim fattim sorot. Punn tumi pasiens dakhoilear, tim ghoddie uprant tumkam sangonk xoktat.

Oslo vell sodhun kaddat, jednam bhurgim tanchea monant kitem asa tem ukteponnim sangonk xoktolim. Tumi ulounk sodhtat tednam tankam aplea kallzant kitem asa tem sangonk kotthin zait. Punn, tumi sangata bhonvonk voitat vo jevtat tednam tim ghoddie hea vixim ulounk toiar astolim.
Tumchea bhurgeank vaitt ani bhirankull ghoddnneam vixim chodd aikonk dium nakat.
Familik surokxit dovrunk tumi kitem panvlam ghetleant tea vixim bhurgeank sangat.
Emergency-chea vellar kitem korchem tem poilench tharaiat ani tea vixim tumchea bhurgeank sangon practice korat.

Brenda mhunntta: “Ghoddie tumchea bhurgeanchea kallzant kosli tori bhirant asot vo tankam koslo tori usko zala vo tankam ekdom rag aila astolo. Ani hea vixim tim ghoddie lipoitat zait vo ukteponnim sangonant astolim. Tankam zoxem bhogta, toxem tumkam-i thodde pavtt bhogta mhunn tankam sangat ani tea bhavnancho fuddo korunk tumi kitem kelʼlem tem-ui tankam sangat.”