Bhuzvonn ani Xinkonn Dita Toslim Dev Prerit Gitam

BIBLEANTLEM vhoddlem pustok zavun asa Povitr gitanchi ektthavni. Povitr gitam borovunk sumar 1,000 vorsam laglim. Kednanch borovunk na toslim orthachim ani bhavartak urbha diupachim gitam Stotr pustokant meutat. Stotram monxachim zaitim bhavnam zoxim sontos, vakhanni, dhinvasnni, khont, dukh ani pirachit vornon korta. Stotram boroupeancho Jehovah-xim ek lagimcho ani visvasacho sombondh aslo. Hea gitantlea thoddea mukhel vixoiancher chit diat.

Jehovah khoro Sorvespor, taka favo bhokti ani vakhanni. “Somest lokamno, Devak vakhannat! Sorvoi porzamno, Yahvek nanvaddat” oxem ami Stotram 117:1 vachtat. Zaitim Stotram Jehovahk tachea rochnnek lagun vakhanntat, zoxem noketramnim bhorlolem ontroll, prithume voili ochorianchi jivi rochnam, ani ojeapanchi monxachi kudd. (Stotram 8, 19, 139, 148) Dusrim Stotram Dev aplea nixttavont chakrank salvar ani rakhonn korta mhonnon Jehovahk vakhanntat. (Stotram 18, 97, 138) Torui thodde tachi tokhnnai kortat ki to niticho Dev zo zulumank sampoddloleank soddoita ani noxtteank khast laita.—Stotram 11, 68, 146.

Jehovah aplo mog kornarank adar ani bhuzvonn dita. Ghoddiek chodd prosidh zalʼlem Stotr asa 23 zantum David vornnita ki Jehovah ek mogall gonvlli zo aplea menddrank vatt dakoita, rakhta ani samballta. Stotram 65:2 Devachea bhoktank ugddas korta ki Jehovah amchem “Magnnem aikota.” Zaite zann je gombhir patkant poddleat tankam Stotram 39 ani 51 hantunt vhodd bhuzvonn mellʼlea, zhoim David aplea gombhir patkank lagon kallzantlean pirachit korta ani Devachea bhogsonneacher visvas dakoita. Stotram 55:22 amkam Jehovahcher pattieunk ani sogllo amcho bhar tacher ghalunk hurba dita.

Mesiasachea Razvottke vorvim Jehovah ho sonvsar bodoltolo. Stotrantlim zaitim utram bhasailʼlea Razak, Mesiasak lagtat. Stotram 2 bhakit korta ki ho Raza virodh kortat tea noxttea raxttramcho nas kortolo. Stotram 72 kollit korta ki to Raza bhukecho ani zulumacho xevott kortolo. Stotram 46:9 pormonnem Mesiasachea Razvottke vorvim Dev zhuzancho xevott kortolo ani tanchea hattiaramcho nas kortolo. Stotram 37 amkam mellta ki noxtto lok nanch zatole pun promannik lok hea prithumecher sodankal xhantin ani ekvottan jietele.

​—Stotram pustokacher adarlelem asa.