Tum kitlea Jehovachea Sakxeank vollkhota? Ami ghoddie tumchim xezari, tumchea sangata kam korpi vo iskolant xikpi asonk xoktat. Vo ami tumchea sangata Bible-a vixim bhasabhas kelea zait. Punn ami konn, ani ami kitem patietat tem soglea lokank kiteak sangtat?

Ami sade lok. Ami veg-vegllea sonskrutaientlean ani kullantlean ailole lok. Amchea modlim thoddim, poilim dusrea dhormant aslolim ani thoddim Dev asa mhunn patiena aslim. Sakxi zaunchea poilim Bible-antleo xikounneo bariksannen topasunk ami sogleamnim vell ghetlo. (Itihas 17:11) Ami jem kitem xiklim tem amkam manvolem, ani magir Jehova Devachi bhokti kortolim mhunn ami svotacho nirnnoi ghetlo.

Bible xiklolean amkam faido zata. Her soglea lokam bhaxen amkam-i trasancho fuddo korcho poddtta ani amchea oskotkaie add zhuzonk poddtta. Punn amchea sodanchea jivitant Bible-antlim totvam apnnaun, ami tea pormonnem jieunk vavurtat. Oxem kelolean amchem jivit khub sudharlam. (Stotr 128:1, 2) Hea ek karonnak lagon ami Bible-antlean xiklole bore vixoi dusreank sangtat.

Ami Devachea totvam pormonnem jietat. Bible-antlim totvam amchea jivitant khuxalkai haddttat, dusreank man diunk xikoitat, ani toxench promannikponn ani doia osle gunn vaddounk modot kortat. Him totvam amkam borem chintop dovrunk ani somazant bore munis zaunk modot kortat. Toxench, familint ekvottaien ravonk ani noitik dorje samballunk xikoitat. “Dev . . . ontor korina” mhunn khatri aslolean, ami Devachi bhokti kortolea ontoraxttria familiche bhag zaun asat, zantunt ami zati-katik lagon vo raxttrak lagon ontor korinant. Ami sade lok zalear pasun ami dusream poros veglle.—Itihas 4:13; 10:34, 35.

• Jehovache Sakxi ani her lokam modem kitem ek-sarkem asa?

• Bible xiklolean Jehovache Sakxi koslim totvam zannam zaleant?

Zaite lok, Jehovache Sakxi hem eka novea dhormachem nanv mhunn chintat. Punn 2,700 vorsam poilinch khorea Devachea sevokank, tachim “sakxidaram” mhunnttlolem. (Izaias 43:10-12) 1931 porian, amkam Bible-ache Videarthi mhunn vollkhotale. Tor atam ami Jehovache Sakxi hem nanv kiteak apnnailam?

Hem nanv Devachi vollokh dita. Adlea hostolekham pormonnem, Jehova hem Devachem nanv, hozaramnim pavtt Bible-ant asa. Zaitea bhaxontoramnim hem nanv kaddun, tachea bodlek Sorvespor vo Dev ghatlam. Toriastana, khorea Devan Moizesak aplem nanv Jehova mhunn kolloun oxem mhunnttlem: “Sodam sorvodam hem mhojem nanv.” (Suttka 3:15) Hea toren, apunn khottea devam poros vegllo mhunn tannem dakhoilem. Devachem povitr nanv apnnaunk amkam vhodd obhiman bhogta.

Hem nanv amchem kam dakhoun dita. Adlea tempa voile zaite lok, Jehovacher aslolea aplea bhavartha vixim sakx di-it aileat. Visvaxi munis Abela thaun suru zaun Noah, Abraham, Sara, Moizes, David, ani her zaite lok hea ‘sakxidaranchea urponjeche’ bhag zale. (Hebrevank 11:4–12:1) Niropradi munxa pasot eklo korttant sakx diunk fuddem sorta, toxem ami-i Deva vixim sot sangonk ghott nichov kela.

Hem nanv uzar korun ami Jezuchi dekh ghetat. Bible-ant Jezuk, “visvaxi ani khoro sakxi” mhunnttla. (Prokasovnni 3:14) Apnnem ‘Devachem nanv kolloilem’ ani apunn Deva vixim “sotak govai” di-it ravlo mhunn Jezun sanglem. (Juanv 17:26, Povitr Pustok - Novo Korar; 18:37) Tor, Kristachea khorea pattlavdaramnim Devachem nanv apnnaunk zai ani tem nanv dusreank kollounk zai. Jehovache Sakxi hench korunk vavurtat.

• Bible-achea Videartheamnim Jehovache Sakxi hem nanv kiteak apnnailem?

• Jehovache Sakxi hea prithumer kednam thaun asat?

• Jehovacho sogleant vhoddlo Sakxi konn?

Kristachea mornna uprant, Kristanvam modle fottkire xikoupi uprastole ani Bible-antlem sot broxtt kortole mhunn Bible-ant bhakit kelʼlem. (Itihas 20:29, 30) Thoddea vorsam uprant, sanglolem toxench zalem. Tannim Jezuchi xikounn onbhavarthi dhormache xikounne sangata misoll keli ani khottea Kristanvancho dhorm suru zalo. (2 Timotak 4:3, 4) Tor, Bible khorench kitem xikoita tachi aiz amkam sarki somzonni asa mhunn ami koxim mhunnonk xoktat?

Sot kollouncho Jehovacho vell ailo. ‘Xevottachea kallar khorem ginean vaddttolem’ mhunn Jehovan bhakit kelʼlem. (Daniel 12:4, NW) 1870-ant sotacho sodh kortolea eka lhan zomeak igorjentli zaiti xikounn Bible-a pormonnem na mhunn kollon ailem. Taka lagon, Bible khorench kitem xikoita tem somzonk tannim sodh kelo ani Jehovan tankam tem somzonk modot keli.

Promannik munxamnim bariksannen Bible-acho obheas kelo. Tea Bible Videartheamnim, Bible obheas korunk ji rit pallʼlli ti ami aiz pasun pallttat. Tannim ek-ek vixoi gheun, Bible-a thaun bhasabhas keli. Bible-antlo khoincho-i bhag somzonk tankam kotthin zatalo tednam, tem somzonk tim dusrim versam ugddun polloitalim. Ani tankam versam pormonnem somzonni mellttali tednam tim tem boroun dovortalim. Hea toren, somzonni mellonk Bible-uch uzar kelolean, tim Devachem nanv ani Rajea vixim, munxa pasot ani prithume pasot aslolea Devachea udʼdhexa vixim, meloleanchea poristhiti vixim ani punorjivontponnachea bhorvonxea vixim aslolim sotam xikonk pavlim. Oso sodh kelolean tankam zaitea khottea xikounne thaun ani riti-rivazam thaun suttka mellʼlli.—Juanv 8:31, 32.

1879-ant Bible-achea Videartheank, sogleank sot sangcho vell pavlo mhunn somzolem. Tor, tea vorsa thaun tannim amkam aiz pasun melltta, The Watchtower Announcing Jehovah’s Kingdom hem masik chhapunk suru kelem. Atam ami Bible-antlem sot 240 desamnim ani 900 poros chodd bhasamnim lokank porgottʼttat. Khorem ginean poilim kednanch vaddonk na titlem aiz vaddlam!

• Kristachea mornna uprant, Bible-antlea sotachem kitem zalem?

• Devachea Utrantlem sot porot sodhun kaddunk kitem kelolean modot zali?

Jehovachea Sakxeamnim zaitea vorsam thaun, Bible-achim veg-vegllim bhaxantoram uzar keleant, chhapleant ani vanttleant. Punn, soglea lokank “purnn sotacho onnbhov” mellʼllolo Devak zai dekhun eka novea bhaxantorachi goroz asa mhunn amkam kollon ailem. (1 Timotak 2:3, 4) Hea karonnak lagon, 1950-ant ami somzonk sompi zata tosli bhas uzar korun, New World Translation Bible-ache lhan-lhan bhag toiar korunk laglim. Ho Bible, 160-am poros chodd bhasamnim sarke ritin bhaxantor kela.

Somzonk sompo zata toslea Bible-achi goroz asli. Vell sorta toso, bhas bodolta. Zaitea Bible-achea bhaxantoramnim orth sarko somzona toslim utram, vo pornim utram uzar keleant, jim vachtana somzonk kotthin zatat. Toxench, atam sodh kelea uprant Bible-achim borinch poilinchim hostolekham mellʼlleant, zachea vorvim bhaxantor kortoleank, adim Bible borounk uzar keloli Hebrev, Aramaik ani Grek bhas bore toren somzonk sompi zalea.

Devachea Utrantlo sondex sarke ritin dita toslea bhaxantorachi goroz asli. Devan prerit kelʼlo sondex, bhaxantor korpeamnim apleak zai toso nhoi, punn asa tosoch bhaxantor korunk zai. Punn, choddxea bhaxantor korpeamnim Devachem nanv Jehova, Bible-ant uzar korunk na.

Devak mhoima dita toslea Bible-achi goroz asli. (2 Samuel 23:2) Soglea-von adlea Bible-achea hostolekhamnim Jehovachem nanv sumar 7,000 pavtti aslem. Oslea eka hostolekhachem chitr sokol asa. New World Translation hea Bible-ant tem nanv tea-tea zagear ghatlam. (Stotr 117:1) Zaitim vorsam khub vavr ani sodh korun toiar kelolo ho Bible vachunk boro dista, karonn tantunt Devachim chintnam spoxtt ritin kolloileant. New World Translation tumchea bhaxent asum vo nasum, dor disa Jehovachem Utor vachpachi sonvoim korunk ami tumkam urba ditat.—Joshua 1:8; Stotr 1:2, 3.

• Novea Bible bhaxantorachi goroz asli mhunn amkam kiteak dislem?

• Devachi khuxi zannam zaunk sodhtolean dor disa kosli sonvoim korop borem?