Amchea songottnnent pagarak lagon kam korpi dhorm guru nant. Bodlek, Kristi sobha suru zali tednam kortale toxem, “Devache povitr-sobhecho samball korunk,” purte aslolea vhoddilank nemtat. (Itihas 20:28) Deva lagim ghott ixttagot aslole he vhoddil, ‘kaido pallunk boll korta mhonn nhoi, punn ap-khuxen, Devak zai tea pormonnem; mhelle zoddiche axen nhoi, punn kallzache urben’ sobhent fuddakar ghetat ani tachi kallji ghetat. (1 Pedru 5:1-3) Te amche pasot kitem kortat?

Te amchi kallji ghetat ani amkam rakhtat. Vhoddil Bible-antlem margdorxon ditat ani sobhentlea bhav-bhoinnank Jehovak lagim ravonk modot kortat. Hi zobabdari Devan dilea mhunn zannam zalolean te dusreancher aplo hukum choloinant. Tachea bodlek te sobhechea boreponnak lagon ani khuxalkaiek lagon vavurtat. (2 Korintkarank 1:24) Ek gonvlli mhenot korun dor eka menddrachi kallji gheta. Teach toren, vhoddil sobhechea dor ekleak zannam zauncho proitn kortat.—Mhonnʼnneo 27:23.

Te amkam Devachi khuxi korunk xikoitat. Amcho bhavarth ghott korunk, dor sumanak vhoddil sobhecheo mitting ghetat. (Itihas 15:32) He bhoktivont dadle porgottnnent pasun fuddakar ghetat. Te amchea sangata kam kortat ani veg-vegllea torechea porgottnnent bhag gheunk amkam modot kortat.

Te dor ekleak urba ditat. Sobhentle vhoddil amchea ghora bhett diun, vo Raj-ghorant mellon Jehova thaim asloli dor ekleachi ixttagot ghott korunk modot kortat. Hea toren te amkam Bible-antlean buzvonn ditat ani modot kortat.—Jakob 5:14, 15.

Sobhechea kamam bhair zaite vhoddil sirvis kortat ani tankam familichi zobabdari pasun asta. Hem korunk tankam vell ani dhean diunchem poddtta. Khorench, zaito vavr kortolea hea bhavank amcho man favo.—1 Tesalonikekarank 5:12, 13.

• Sobhechea vhoddilank kosleo zobabdareo astat?

• Dor ekleachi porva asa mhunn vhoddil khoinche ritimnim dakhoitat?

Sobhecheo zobabdari samballchea vixim Bible don torechea Kristi dadleanchea zomea vixim sangta. Te mhunnttlear, ‘vhoddil ani sevok.’ (Filipkarank 1:1) Chodd korun, dor eke sobhent zaite bhav vhoddil ani sevok mhunn vavurtat. Te amchea pasot kitem kortat?

Te vhoddilank modot kortat. Sobhechea sevokanchi Jehova lagim ghott ixttagot asta, te pirai-en lhan vo vhodd asonk xoktat, te patieupa sarke astat ani aplem kam bore bhaxen kortat. Te, sobhe pasot gorjechim kamam kortat, zantunt zaito vavr ani mhenot mellon asta. Hea toren vhoddilank, xikounchea ani dekhrekh korchea kamacher dhean diunk modot zata.

Te gorjechim kamam kortat. Mittingek ietoleank ieukar diunk thodde sevok attendant mhunn vavurtat. Her thodde sevok, avazachim sadhonam samballchea kamant, sahitʼtiam vanttpachea kamant, sobhechea poixeancho hixob dovorchea kamant, ani sobhentlea bhav-bhoinnank porgottnni korunk vattar vanttun diunchea kamant vavurtat. Anik thodde, Raj-ghorachi dekhrekh korunk ani tacho samball korunk pasun modot kortat. Kednam-kednam vhoddil tanchea thaun zanttea bhav-bhoinnnanchi kallji gheunk modot magonk puro. Sobhechea sevokank kosli-i zobabdari dilear, te ti ap-khuxen ani mhenotin kortat dekhun sobhentlim bhav-bhoinnam tankam man ditat.—1 Timotak 3:13.

Te ek borem udharonn dovortat. Tanchea Kristi gunnank lagon tankam sobheche sevok mhunn vinchun kaddttat. Sobhechea mittingeche bhag kortana, te amcho bhavarth ghott kortat. Porgottnnechea kamant fuddakar gheun te amkam urba ditat. Te vhoddilank tenko ditat dekhun sobhechi khuxalkai ani ekvottkai vaddot voita. (Efezkarank 4:16) Vell sorta toso, te-ui ghoddie vhoddil mhunn kam korunk purte zatole.

• Sobhechea sevokank kosle gunn astat?

• Sobha bore toren cholonk sevok koxe modot kortat?

Grek bhaxen boroilolea Bible-achea pustokamnim, Barnabas ani apostl Paulu vixim zaite pavtti sanglam. He dogui bhonvddi korun sobhank bhett ditale. Kiteak? Tanchea Kristi bhav-bhoinnam vixim tankam kallji asli. Tim koxim asat tem pollounk, apunn “portun vochun . . . bhavambhoinnink bhett” korunk sodhtalo mhunn Paulu sangta. Tankam ghottai diunk to xemboramnim kilometr pois provas korunk toiar aslo. (Itihas 15:36) Aiz amchea bhonvddi korpi vhoddilank pasun hich itsa asa.

Te amkam urba diunk ietat. Dor ek sorkittachi dekhrekh korpi, vorsak don pavtt, sumar 20 sobhank bhett dita, zoim to dor ek sobhe sangata ek suman asta. Hea bhavanchea onnbhovam thaun ani te kazari asat zalear tanchea bailam thaun pasun amkam zaitem xikonk melltta. Tornnatte vo zantte zaum, te sogleanchi vollokh korun gheuncho proitn kortat. Te amchea sangata sevek ani Bible obheasak ieunk khuxal zatat. He bhav vhoddilam sangata amkam bhett diun urba ditat. Toxench mittingent ani zomatimnim te urbebhorit bhaxonnam ditat.—Itihas 15:35.

Te sogleank kallji dakhoitat. Sorkittachi dekhrekh korpi, ap-aplea sorkittantlea sobhamnim aslolim bhav-bhoinnam Devache sevent kitli udorgot korit asat tacher chodd dhean ditat. Vhoddil ani sobhechea sevokam sangata mellon, te sobheche udorgoti vixim bhasabhas kortat. Toxench, bhavamnim apli zobabdari bore toren koxi korunk zata tea vixim te tankam faideak poddttat tosle solʼle ditat. Pioneer seva kortat tankam, tanche sevent ies melloun gheunk te modot kortat. Mittingek novim ietat tanchi vollokh korun gheunk ani tim sotant koxim fuddem sortat tem zannam zaunk te khuxal zatat. Sorkittachi dekhrekh korpi dor eklo bhav amchea pasot zata titlem korun ‘sangata’ vavurta. (2 Korintkarank 8:23) Tanchi bhokti ani Devacher aslolea tanchea bhavarthachi ami dekh gheunk zai.—Hebrevank 13:7.

• Sorkittachi dekhrekh korpi sobhank kiteak bhett dita?

• Tanchea bhettentlean tumkam koso faido zata?

Odruxtta vellar amchea bhavank modot korunk Jehovache Sakxi rokddech manddavoll kortat. Oxe toren, eka-meka pasot aslolo amcho khoro mog dison ieta. (Juanv 13:34, 35; 1 Juanv 3:17, 18) Ami tankam khoinchea ritin modot kortat?

Ami poixe dhaddun modot kortat. Judeiant vhodd dukoll poddlo tednam, Antiokientlea Kristanvamnim tankam poixe diun modot keli. (Itihas 11:27-30) Teach bhaxen, sonvsarantlea khoinchea-i zagear amchim bhav-bhoinnam odruxttak sampoddleant mhunn amkam kolltta tednam, tankam modot korunk ami amche sobhe udexim tanchea pasot dan dhaddttat.—2 Korintkarank 8:13-15.

Ami her toren modot kortat. Odruxtt ailam tea zagear aslole vhoddil aplea sobhentlea dor ekleak sodhun, tim surokxit asat mhunn khatri korun ghetat. Odruxttak sampoddloleank modot korpi somiti jevonn-khann, pieunk nitoll udok, kopdde, ravonk ghor ani vokhdam diun tancheo gorzo purnn korunk manddavoll korta. Kola aslole zaite Sakxi aple poixe moddun toslea zagear vochon bhav-bhoinnanchim ghoram toxench Raj-ghoram moddleant tim sarkim korunk modot kortat. Amchea songottnnent aslolea ekvottkaiek lagon, ani sangata kam korun mellʼllolea onnbhovak lagon, gorjechea vellar thoim rokddinch pavonk amkam modot zata. “Bhavartha vorvim amchim bhavbhoinn zalʼleank,” ami modot kortatuch, punn ghoddtta tednam her dhormachea lokank modot korunk ami fattim soronant.—Galasiekarank 6:10.

Ami Bible-antlean buzvonn ditat ani bhavnik ritin modot kortat. Odruxttak sampoddloleank buzvonnechi chodd goroz asta. Oslea vellar, “sogllea amchea gorzamnim amkam dhir-diupi” Jehova thaun amkam ghottai melltta. (2 Korintkarank 1:3, 4) Dukhi aslolea lokank ami Bible-antlea besanvam vixim sangtat. Devachem Raj, amcher dukh ani koxtt haddtta tosle opgath beginuch kaddun uddoitolem mhunn ami tankam khatri ditat.—Prokasovnni 21:4.

• Odruxtta vellar Sakxi rokddech kiteak modot korunk pavtat?

• Odruxttantlean salvar zaloleank ami Bible-antlean kosli buzvonn diunk zata?

Jezu morche thoddeach vella poilim, to aple char xis, Pedru, Jakob, Juanv, ani Andre lagim uloilo. Tednam xevottachea disamnim aplea ienneachea khunnam vixim sangtana tannem ek mhotvacho prosn vicharlo: “Ghorant asloleank vogtar jevonn diunk dhoni visvaxi ani xannea chakrak aplea ghorabeacher odhikar dita: oslo chakor konn zait?” (Matev 24:3, 45; Marku 13:3, 4) Jezu apunn tancho “dhoni” zalolean nimannea disamnim aplea pattlavdarank chukonastana Deva vixim xikounn di-it ravtolo mhunn tankam khatri ditalo. Tor, ho chakor konn kai?

Jezuchea obhixikt pattlavdarancho ek lhan zomo. Ho “chakor,” Jehovachea Sakxeanchem Sonchalon Monddoll zaun asa. Jehovachi bhokti kortoleank hem monddoll vella-vellar Deva vixim xikounn di-it ravta. Amkam “vogtar jevonn vaddun” di-it ravonk ami hea visvaxi chakra lagim polloitat.—Lukas 12:42.

Te Devachea ghorabeachi dekhrekh kortat. (1 Timotak 3:15) Jezun tea chakrak, Jehovachea songottnnechea prithumer aslolea bhagachi dekhrekh korchi mhotvachi zobabdari dilea. Tantunt, songottnnechi sompotʼti samballchi, porgottnnechea kamank margdorxon diunchi ani sobhe vorvim amkam xikounn diunchi zobabdari mellon asa. Tor goroz tea vellar, ‘visvaxi ani xanno chakor’ ami porgottnnent uzar kortat tea prokaxonam udexim, toxench amche mittinge ani zomate udexim amkam Deva vixim gorjechi xikounn dita.

Ho chakor visvaxi asa, karonn to Bible-antlem sot ani bori khobor porgottchi adnea palltta. Toxench to xanno zaun asa, karonn to prithumer aslolo Kristacho karbhar xanneponnan samballtta. (Itihas 10:42) Aplim sakxidaram zaunk, Jehova chodd ani chodd lokank aplea lagim voddun haddtta ani aplea vixim zaiti xikounn di-it ravonk visvaxi ani xannea chakrak modot korta.—Izaias 60:22; 65:13.

• Aplea xisank Deva vixim xikounn diunk Jezun konnak nemlo?

• Chakor khoinchea ritimnim visvaxi ani xanno zaun asa?

Poilea xekddeant, Jerusalemant ‘dhormdutancho ani zantteancho’ ek lhan zomo sonchalon monddoll mhunn kam kortalo. Soglea obhixikt Kristanvanche sobhe pasot te mhotvache nirnnoi ghetale. (Itihas 15:2) Te ekmotan ghetale te nirnnoi, Devachea Utracher bhasabhas korun, ani tachea povitr xoktechea margdorxona pormonnem astale. (Itihas 15:25) Aiz pasun Sonchalon Monddoll toxench korta.

Dev tankam apli khuxi korunk uzar korta. Sonchalon Monddollant seva kortat tea obhixikt bhavank Devachem Utor kholaien zannam zaunchi umed asa. Toxench, amchem kam koxem korchem tea vixim ani amche patienne vixim aslolea prosnanche zobab diunk tankam zaito onnbhov asa. Dor sumanak, sangata mellon ieun te sonvsarbhor aslolea bhav-bhoinnanchea gorzam vixim bhasabhas kortat. Poilea xekddeant kortale toxem, te chitti udexim vo sorkittachi dekhrekh korpi ani her bhavam udexim Bible adarit margdorxon ditat. Oxem kelolean Devache lok ek-sarkem chintun, ekvottan vavrunk pavtat. (Itihas 16:4, 5) Sonchalon Monddoll Devachi xikounn diuchem kam samballtta, porgottnnechea kamank poilo zago diunk sogleank urba dita ani toxench bhavank zobabdari diunche manddavollicher nodor dovorta.

Te Devachea povitr xoktechem margdorxon pallttat. Sonchalon Monddoll, Vixvacho Sorvpodvedar Dev Jehova ani sobhecho Mostok Jezu lagim margdorxonak lagon polloitat. (1 Korintkarank 11:3; Efezkarank 5:23) Sonchalon Monddollache vangddi apunn Devachea lokanche fuddari mhunn chintinant. Te soglea obhixikt Kristanvam sangata, “zoi menddro [Jezu] veta, thoi tache pattlean” vetat. (Prokasovnni 14:4) Ami Sonchalon Monddolla pasot ani tanchea kama pasot magnnem kortat dekhun te amche khub upkari asat.

• Poilea xekddeantlea sonchalon monddollant konn asle?

• Aichem Sonchalon Monddoll Devachea margdorxona pormonnem cholonk kitem korta?

Bethel, hem ek Hebrev nanv, zacho orth “Devachem Ghor.” (Utpoti 28:17, 19, futtnott) Porgottnnechea kamank margdorxon ani tenko diunk Jehovache Sakxi sonvsarbhor uzar kortat tea bilddingek dilolem hem nanv, sarkem asa. Sonchalon Monddollantle bhav, U.S.A-chea New York Rajeant aslolea mukhel xakhent kam kortat, ani thoim thaun zaitea desanchea xakha ofisanchem kam polloun ghetat. Oslea xakhent kam korpi lok ek famil koxe ekvottan jietat, kam kortat, sangata mellon jevtat, ani sangata Bible xiktat. Taka lagon haka Bethel famil mhunnttlea.—Stotr 133:1.

Ekuch famil koxi svarth nastana vavurtat toslo khas zago. Dor eka Bethel-ant, Devachi khuxi korunk ani Rajea pasot purnn-vell seva korunk toiar asat tosle Kristi dadle ani bailo asat. (Matev 6:33) Thoim konnakuch pagar mellona, punn tankam ravonk ani jevunk toxench tancho gorjecho khorch suttonk manddavoll keloli asa. Bethel-ant aslolea sogleank veg-vegllem kam dilolem asta, zoxem ofisant, kujinant vo jevpachea zagear. Toxench, thoddim zannam prokaxonam chhapchem vo pustokam toiar korchem kam kortat. Ani thoddim zago nitoll dovorchem, kopdde dhuvchem, mixinancho vo vostuncho samball korchem vo her kamam korun modot kortat.

Rajeachea porgottnnek tenko diunk khub vavr cholta toslo zago. Bible-antlem sot zata titlea lokank pavchem, ho dor eka Bethel-acho dhei zaun asa. Hachem ek udharonn mhunnttlear, hi pustika. Hi pustika Sonchalon Monddollachea margdorxona khala toiar kelea, ani sonvsarbhor aslolea xemboramnim bhaxantor kortolea ttimink kompiuttora udexim dhaddlea. Tea uprant, veg-vegllea Bethel-ant aslolea eka dopkeant chhapnni zaupi mixinar ti chhaplea, ani magir 1,20,000 poros chodd sobhank ti dhaddlea. Hem soglem korun Bethel famil, sogleam-von mhotvachea kamank, mhunnche bori khobor porgottchea kamank tenko dita.—Marku 13:10.

• Bethel-ant konn seva kortat, ani tanchi dekhrekh korunk kitem manddavoll keloli asa?

• Dor eka Bethel-ant choltolea kama udexim khoinchea chodd mhotvachea kamank tenko melltta?

Bethel familintlim bhav-bhoinnam, ek vo chodd desachea porgottnnechea kamachi dekhrekh korunk veg-vegllea khateamnim kam kortat. Te bhaxantor korpeam sangata kam korunk, masikam chhapunk, pustokam toiar korunk, prokaxonam eka zagear ektthaim korun dovrunk, audio/viddeo prokaxonam toiar korunk, vo tea vattarachea her gorzanchi dekhrekh korunk vavurtat.

Xakha Somiti porgottnnechea kamachi dekhrekh korta. Sonchalon Monddoll dor eka xakha ofisachi dekhrekh korchi zobabdari Xakha Somitik dita. Tea somitint, purte aslole tin vo chodd vhoddil astat. Tea somitichea khala aslolea dor eka desant zaupi sevechea vaddavolle vixim te Sonchalon Monddollak kollit kortat. Toxench, kosleo-i kotthinaio aileo zalear tea vixim pasun kolloitat. Osle mahiti vorvim, fuddarak prokaxonamnim, toxench mittingent ani zomatimnim koslea vixoi-ancher bhasabhas korchi goroz asa to nirnnoi gheunk Sonchalon Monddollak modot zata. Veg-vegllea xakhenk bhett diunk ani Xakha Somitichem kam bore toren zaunk tankam margdorxon diunk Sonchalon Monddoll, vella-vellar apnnem nemlolea prothinidink dhaddtta. (Mhonnʼnneo 11:14) Hi bhett asta tednam ek khas kariavollichi manddavoll keloli asta, zantunt xakhechea vattarant asloleank urba diunk mukhel xakhechea prothinidichem ek bhaxonn asta.

Sobhank tenko dita. Xakha ofisant zobabdari aslole bhav, novi sobha suru korunk porvangi ditat. Te bhav, xakhechea vattarant kam kortolea pioneer-ank, mixinoreank, ani sorkittachi dekhrekh korpeank margdorxon ditat. Te zomati ani odhivexonanchi toxench, novea Raj-ghoranchem bandkam korchi manddavoll kortat, ani sobhechea gorje pormonnem tankam prokaxonam pavleant kai na tem polloitat. Xakhent kortat tea soglea kamam udexim porgottnnechem kam manddavollin zaunk pavta.—1 Korintkarank 14:33, 40.

• Xakha Somiti Sonchalon Monddollak koxi modot korta?

• Xakha ofisant koslem kam kortat?

“Dor-eka desak, dor-eka kullak, dor-eke bhaxechea lokak, . . . xubhvortoman” vo bori khobor diunk ami sumar 900 poros chodd bhasamnim sahitʼtia toiar kortat. (Prokasovnni 14:6) Itlem kotthin kam ami koxim korunk pavtat? Ontoraxttria boroupeanchea modotin ani bhaxantor korpeanchea modotin ami hem kam kortat. Te sogle Jehovache Sakxi zaun asat.

Mahiti poilim Inglez bhaxen toiar zata. Sonchalon Monddoll mukhel xakhent aslolea Borovop Khateant choltolea kamachi dekhrekh korta. Hem khatem, mukhel xakhent ani thoddea xakha ofisantlea boroupeank nemlam tea kamachi manddavoll korta. Amche boroupi veg-vegllea desantle aslolean, zaite torechea sonskrutaiechea lokancher probhav poddonk xokta tosle vixoi, te amchea prokaxonamnim borounk pavtat.

Ti mahiti bhaxantor korpeank dhaddttat. Mahiti toiar zalea uprant ti topastat, magir maniotai mellʼllea uprant kompiuttora udexim sonvsarbhor aslolea bhaxantor korpeank dhaddttat. Hi mahiti tim bhaxantor korun, bariksannen topastat ani magir vachun somzonk sompi asa zalear polloitat. Bhaxantor kortana, tim Inglez bhaxent aslolea utrancho ‘sarko orth diupi utram’ aplea bhaxent vinchun kaddttat.—Upodexok 12:10.

Kompiuttoram udexim kam begin zata. Kompiuttor, munxam bhaxen borounk vo bhaxantor korunk xokona. Punn tacher veg-veglle sobdkox sompe toren pollounk mellttat ani kam begin zata. Tacher bhaxantor korunk modot zata tosle program ani her vostu astat, toxench sodh korchim sadhonam pasun astat. Jehovachea Sakxeamnim, Multilanguage Electronic Publishing System (MEPS) program toiar kela. Hachea udexim xemboramnim bhasamnim type korunk zata, utram sangata favo tim chitram bosoupak zatat, ani chhapunk toiar korunk zata.

Thoddech hozar lok uloitat tosleo bhaso pasun bhaxantor korunk ami itlo vavr kiteak kortat? Karonn, ‘soglea monxank soddvonn mellonk, ani sotacho onnbhov mellonk zai,’ hi Jehovachi khuxi zaun asa.—1 Timotak 2:3, 4.

• Amchim prokaxonam borounk koslo vavr mellon asa?

• Amchim sahitʼtiam ami zaitea bhasamnim kiteak bhaxantor kortat?

Dor vorsa amchem songotton lakʼkhamnim Bible ani her prokaxonam chhapta ani poixe magonastana lokank dita. Ami amchim Raj-ghoram ani xakha ofisam bandtat ani tancho samball kortat. Ami hozaramnim Bethel Sevokank ani mixinoreank tenko ditat ani toxench odruxttak sampoddlolea bhav-bhoinnank modot diunk manddavoll kortat. Tor tumi ghoddie chintit, ‘Hem soglem korunk amkam khoim thaun poixe mellttat?’

Ami lokam koddlean dhavo vantto ghenant, poixe magonant vo tatt bhonvddainant. Amchea porgottnnechea kamank tenko diunk zaito khorch zata, tori astana, ami poixe magonant. Xembhor vorsam poilim, Agost 1879-ant chhaplolea Watchtower-ant sanglolem ki, ami “modotik lagon munxam lagim kednanch bhik magchimnant vo vinoti korchimnant,” ani ami toxem kednanch korunk na, karonn amkam tenko diunk Jehova asa mhunn ami mantat.—Matev 10:8.

Ap-khuxen dilolea denngeam udexim amchem kam cholta. Zaite lok amchea Bible xikounnechea kamacho valor kortat ani modot korunk denngim ditat. Sonvsarbhor Devachi khuxi korunk Sakxi khuxe-monan aplo vell, xokti, poixe ani her vostu ditat. (1 Itihas 29:9) Dan diunk khuxi asa tanchea pasot Raj-ghorant ani amchea zomatichea ani odhivexonachea zagear dan petteo dovorloleo astat. Vo tanchean, jw.org website-i udexim pasun dan diunk zata. Choddxe poixe girest lokam thaun nhoi, punn Jezun sanglolea, devmondirachea dhormpettent don lhan nanne ghatlolea te gorib vidve sarkea lokam thaun ietat. (Lukas 21:1-4) Tor konnem-i, neman “kitem-i ganttik marun kuxin” dovrun, “tharailam tem” diunk zata.—1 Korintkarank 16:2; 2 Korintkarank 9:7.

Rajeachea kamak tenko divop, hi Jehovachi khuxi purnn zaunk, jim konn ‘aplea dovlotin taka man diunk’ sodhtat tanchim kallzam Jehova uktim korit ravtolo mhunn amkam khatri asa.—Mhonnʼnneo 3:9.

• Her dhorma thaun amchem songotton vegllem koxem?

• Ap-khuxen dilolim denngim koxim uzar zatat?

Raj-ghor hea nanva voileanuch, thoim melltta te Bible-ache mukhel xikounnecho vixoi Devachem Raj mhunn kolltta. Ani hoch, Jezuchea porgottnnecho mukhel vixoi aslo.—Lukas 8:1.

Te khore bhokteche zage zaun asat. Hea zagear thaun Jehovache Sakxi, Rajeachi bori khobor vattarant porgott korchi manddavoll kortat. (Matev 24:14) Raj-ghoram vhodd, lhan, vo veg-vegllea akarachim astat, punn soglim disonk sadim. Zaitea Raj-ghoramnim eka poros chodd sobha mellon ietat. Halinchea vorsamnim, amche porgottnnar ani sobha, vaddot asat dekhun ami hozaramnim novim Raj-ghoram bandleant (odmas kaddlo zalear disak panch). Hem ami koxim korunk pavleant?—Matev 19:26.

Udar kallzan dilolea denngeam udexim tim bandtat. Him denngim xakha ofisak dhaddttat. Uprant, jea sobhank Raj-ghor bandchi vo tacho akar bodolchi goroz poddtta tednam he poixe tankam dhaddun ditat.

Veg-vegllea sonskrutaieche lok pagar nastana ap-khuxen bandkam kortat. Zaitea desamnim, Raj-ghor Bandkam Korpeanche Zome asat. Zaite bandkam korpi sevok ani ap-khuxen modot korunk fuddem ailolim bhav-bhoinnam, eka desant aslolea Raj-ghoranchem bandkam korunk eke sobhe thaun dusre sobhek voitat. Te poisulʼlea zageamnim pasun vochon thoinchea sobhank, tanchim Raj-ghoram bandunk modot kortat. Her desamnim, eka vattarant aslolea Raj-ghoranchea bandkamachi dekhrekh korunk ani thoddim Raj-ghoram porot bandchem kam samballunk, purte aslolea Sakxeank nemtat. Bandkam cholta tea dor eka zagear, tea vattarant umkench kam korchi kola aslolim bhav-bhoinnam ap-khuxen vavurtat tem khorem, punn tea sobhentlim bhav-bhoinnam tanche poros chodd astat. Jehovache xokte udexim, ani tache lok purnn kallzan vavurlolean hem soglem zaunk pavta.—Stotr 127:1; Koloskarank 3:23.

• Amchea bhokti korchea zageank Raj-ghor kiteak mhunnttat?

• Ami sonvsarbhor Raj-ghoram koxim bandunk pavtat?

Jehovachea Sakxeanchem dor ek Raj-ghor, Jehovachea povitr nanvan vollkhotat. Taka lagon tem nitoll korunk, tem bore toren dovrunk ani tem sarkem korunk vantto ghevop ek vhodd sueog ani amche bhoktecho ek mhotvacho bhag zaun asa. Him kamam korunk konnem-i bhag gheunk zata.

Mitting zalea uprant nitoll korunk ap-khuxen vantto gheun. Dor ek mitting zalea uprant, bhav-bhoinnam barik-barik kamam korun Raj-ghor nitoll dovrunk vavurtat. Sumanak ek pavtt, Raj-ghor anik chodd nitoll kortat. Ek vhoddil vo ek sevok hea kamachi dekhrekh korta ani list-a pormonnem kitem kam korunk zai tem sangta. Gorje pormonnem bhav-bhoinnam zhaddu marunk vo mixin uzar korun koir kaddunk, zomin pusunk, kodelam pusun tim manddunk, toilet nitoll korunk, zonelam ani tache harxe pusunk, kochro uddounk, Raj-ghorachea bhailea vatten nitoll korunk ani garden nitoll korunk ap-khuxen vavurtat. Vorsak ek pavtti tori, soglim Raj-ghorachea bhitor ani bhair anik chodd bariksannen nitoll korpachem kam kortat. Oslea nitoll korchea kamamnim, ami amchea bhurgeam sangata vantto ghetat zalear ami tankam amchea bhoktechea zageak man diunk xikoitat.—Upodexok 5:1.

Kitem-i moddlam zalear tem sarkem korunk ap-khuxen vantto gheun. Dor ek vorsa, Raj-ghor bhitorlean ani bhailean bariksannen topastat. Hi topasnni kelolean, Raj-ghor bore toren samballunk tachi dekhrekh korchi manddavoll kortat. Oxem kelolean goroz naslolo khorch unno korunk modot zata. (2 Itihas 24:13; 34:10) Nitoll dovorlolem ani bore toren dekhrekh kelolem Raj-ghor, Devachi bhokti korunk favo toslo zago zaun asa. Hea kamant bhag ghetlear, ami Jehovacho kitlo mog kortat, ani amchea bhoktechea zageacho ami kitlo valor kortat tem dison ieta. (Stotr 122:1) Toxench, ami kortat tea soglea kamam udexim, Raj-ghor aslolea vattarantlea lokancher boro porinnam zata.—2 Korintkarank 6:3.

• Amchem Raj-ghor samballchea kamachi ami beporva kiteak korchi nhoi?

• Raj-ghor nitoll dovrunk kosleo manddavoll keloleo asat?

Bible-a vixim tumchem ginean vaddounk, tumi sodh korunk sodhtat kai? Bible-antlem ek vers, ek munis, ek zago vo eka vostu vixim zannam zaunk tumkam utsuktai asa kai? Vo tumchi ek oddchonn suttavi korunk Devachem Utor modot korunk xokta kai oxem tumkam kednam-i dislam? Toxem zalear tumi Raj-ghorant aslolem vachnaloi uzar korunk zata.

Amkam modot zaunk thoim sodh korchim sadhonam asat. Tumche bhaxent aslolim Jehovachea Sakxeanchim soglim prokaxonam tumchea kodden ghoddie aschimnant. Punn halinch prokaxit zalolim choddxim prokaxonam Raj-ghorantlea vachnaloi-ant mellttolim. Tea bhair, veg-vegllea Bible-achim bhaxantoram, ek boro sobdkosh, ani her modot korpi sadhonam thoim asot. Tumchean mittinge poilim vo mittinge uprant, vachnaloi uzar korunk zata. Thoim kompiuttor asa zalear, tacher Watchtower Library ghatloli astoli. Tantunt zaitea torechim prokaxonam asat, ani tacher tumi eka vixoi-acher, utracher vo eka versacher sompeponnim sodh korunk zata.

Jivit ani Porgottnni Mittingent bhag ghetoleank faideachem zata. Tumkam mellttat tim bhaxonnam vo tumche bhag toiar kortana, tumi Raj-ghorantlea vachnaloi-acho boro faido gheunk zata. Jivit ani Porgottnni Mitting, hachi dekhrekh korpi bhav hea vachnaloi-achi dekhrekh korta. Vachnaloi-ant halinchim prokaxonam asat kai, tim manddavollin dovorleant kai, hache vixim to khatri korta. Ho bhav, vo tuzo Bible xikoupi tuka zai ti mahiti koxi sodhunk zata tem dakhounk xokta. Punn, vachnaloi-antlim khoinchinch pustokam tumkam ghora vhoronk mellonant. Ami tim prokaxonam bore bhaxen uzar korunk zai ani tancher mak korunk vo borounk zaina.

“Devachi zannvai” mellonk, ami ti ap-khuxen ‘liplolo thevo’ sodhtat toxi sodhunk zai mhunn Bible sangta. (Mhonnʼnneo 2:1-5) Raj-ghorant asloli vachnaloi uzar korun tumi tumcho sodh suru korunk zata.

• Tumchea Raj-ghorant aslolea vachnaloi-ant sodh korchim koslim sadhonam asat?

• Vachnaloi-acho boro upeog korunk tumkam konn modot korunk xokta?

Jezu Kristan aplea xisank sanglem: “Tumcheo boreo kornnio polleun sorgar astea tumchea Bapak monxamnim vakhannche khatir, tumcho uzvadd tanche mukhar porzollum-di.” (Matev 5:16) Hem korunk, aichea kalla voilea tontrvidneanacho zoxem, Internet-acho ami boro upeog kortat. Amchi website jw.org, hacher Jehovachea Sakxeanchea patienne vixim ani tanchea kamam vixim online mahiti diloli asa. Tacher kitem melltta?

Choddxe pavtt vicharlolea prosnanche Bible-antle zobab. Lok vichartat toslea soglea-von mhotvachea prosnache zobab tumkam thoim mellttole. Udharonnak, Kednai Tori Koxtt Kabar Zatole? ani Melolim Khorench Portun Jietolim? him ttrekttam 900 poros chodd bhasamnim online mellttat. New World Translation ho Bible, 160-a poros chodd bhasamnim melltta. Toxench, Bible obheas korunk zaitim sadhonam asat zoxem, Bible Khorench Kitem Xikoita? hem pustok, ani halinchim The Watchtower ani Awake! masikam. Hantuntlim zaitim prokaxonam vachunk zatat vo online aikonk zatat vo MP3, PDF vo EPUB format-ant download pasun korunk zatat. Chodd zannam zaunk sodhtoleank tumi tanchea bhaxent thoddim panam print korun pasun diunk zatat! Tea bhair, sign language-int zaite viddeo asat. Toxench, tumi nattkachea rupan Bible vachop, Bible adarit nattkam, ani tumkam zai tea vellar aikonk songit pasun download korunk zata.

Jehovachea Sakxeam vixim sarki mahiti. Amchem sonvsarbhor cholta tem kam, bhav-bhoinnam odruxttak sampoddloleo ghoddnneo ani tednam ami eka-mekak koxim modot kortat hache vixim halincheo khobro ani viddeo tacher ghatlole astat. Amchim odhivexonam kednam ani khoim astolim tea vixim, ani amchea xakha ofisank sompork korunk zai ti mahiti pasun website-ir melltta.

Hea toren, ami prithumechea sarkea poixilʼlea zageamnim sotacho uzvadd porzollunk pavtat. Dor eka bhoim-khonddachea lokank, toxench Antarctica-nt aslolea lokank pasun faido zata. Jehovache mhoime pasot soglea prithumer, tachem “utor suddsuddit porgott zait vochum” mhunn ami magtat.—2 Tesalonikekarank 3:1.

• Bible-antlem sot xikonk zaiteank jw.org website koxi modot korta?

• Tumi amchea website-ir kitem sodhunk axetat?