ODHEAI 38
Jivitachea Dennea Pasot Upkariponn Dakhoiat
Jivit ek khub sobit dennem. Amchea jivitant tras ietat tednam pasun khuxal ravonk amkam zaitim karonnam asat. Tor Devan dilʼlea, hea jivitachea dennea pasot upkari asat mhunn ami koxem dakhounk zata ani oxem korunk ek mhotvachem karonn kitem tem ami hea odheai-ant polloum-ia.
1. Ami jivita pasot kiteak upkari asonk zai?
Amchem jivit Jehova Deva koddlean ek moladik dennem zaun asa. Bible sangta ki ho mogall bapui amchea “jivitachi zhor” zaun asa. (Stotr 36:9) “Toch sogleank jivit, svas ani sogleo vostu dita.” (Itihas 17:25, 28) Jehova Devan amkam jivim uronk kitem gorjechem asa titlench diunk na. Punn tannem amkam tachea poros chodd dilam, karonn ami jivitant khuxal ravlolim taka zai.—Itihas 14:17 vachat.
2. Jivitachea dennea pasot ami upkari asat mhunn koxim dakhoitolim?
Amchea avoichea kusveant, amchem jivit suru zalem tednam thaun Jehova Devak amchi kallji asa. Jehovan Jeremiasak mhunnttlem: “Kusveant tuka akarche adim hanvem tuka vollkholo.” (Jeremias 1:5) Jehova Deva mukhar dor ekleachem jivit khub moladik zaun asa. (Matev 10:29-31 vachat.) Tor konnem-i mudʼdom zaun aplo vo dusreacho jiv kaddlo zalear Devak khub dukh zata.a (Suttka 20:13) Toxench, ami gorje bhair amcho jiv dhokeant ghatlear vo dusreancho jiv rakhonk goroz tem korinant zalear Jehova Dev dukhi zata. Punn ami amchea ani dusreanchea jivachi kallji ghetat tednam Jehova Devan dilʼlea denneachim ami upkari asat mhunn dakhoun ditolim.
KHOLAIEN XIKAT
Jivitachea dennea pasot ami upkariponn koxem dakhounk zata tem polloiat.
3. Tumchea jivachi kallji gheiat
Somorponn kelʼlea Kristanvamnim jivitbhor Jehovachi seva kortolim mhunn taka bhas dilea. Tor tim apli kudd taka bolidan koxem bhettoitat. Taka lagon, tim aplea jivachi kallji ghetat. Romkarank 12:1, 2 vachun sokol dilʼlea prosnanche zobab zannam zaum-ia:
Ami amchea jivachi kiteak kallji gheunk zai?
Hem ami koxem korunk zata?
4. Sodanch surokxit ravat
Jivak dhoko asa toslem kainch korinakat mhunn Bible sangta. Ami kortat tem soglem surokxit ritin koxem korunk zata tem zannam zaunk VIDEO polloum-ia.
Mhonnʼnneo 22:3 vachun sokol dilʼlea poristhitinim amcho ani dusreancho jiv surokxit uronk ami kitem korunk zai tem polloum-ia.
Tumchea ghorant.
Tumchea kamachea zagear.
Tumi khellttana.
Gaddi choloitana vo provas kortana.
5. Kusveant aslolea bhurgeacho jiv pasun moladik
Avoichea kusveant eka bhurgeacho jiv suru zata tednam thaun to Jehovache nodren moladik zaun asa ani Jehova taka polloita mhunn Davidan aplea Stotrant dakhoun dilem. Stotr 139:13-15 ani 17 vachun sokol dilʼlea prosnacho zobab zannam zaum-ia:
Jehovachea nodren eka bhurgeacho jiv kednam suru zata? Ek avoi gorbest zata tednam vo bhurgem zolmolea uprant?
Adlea kallar, Jehovan Israelitkarank dilʼlea kaideam modem eka zolmonk naslolea bhurgeacho ani tachea avoicho jiv samballunk pasun kaido aslo. Suttka 21:22, 23 vachun sokol dilʼlea prosnanche zobab zannam zaum-ia:
Konnam koddem-i chukon eka zolmonk naslolea bhurgeacho jiv gelo zalear Jehovak koxem dista?
Toxem zalear, konnui mudʼdom oxem korta zalear Jehovak koxem distolem?b
Hea vixim Jehovachem chintop zannam zaun tumkam koxem dislem?
Thodde pavtt jivit moladik mhunn manta te bailek pasun gorbpat korunkuch poddttolo oxem disonk xokta. Izaias 41:10 vachun sokol dilʼlea prosnacho zobab zannam zaum-ia:
Eke bailecher gorbpat korpacho dobhav asa zalear tinnem konnachi modot gheunk zai, ani kiteak?
THODDO LOK MHUNNTTA: “Gorbpat korcho vo na ho nirnnoi gheuncho odhikar fokot eke bailekuch asa karonn gorbant aslolo bhurgo ticho zaun asa.”
Eke avoicho ani tichea kusveant aslolea bhurgeacho jiv Jehova moladik lekhta mhunn tumkam kiteak khatri asa?
KITEM XIKLIM
Amchem jivit Jehova Deva thaun ek moladik dennem mhunn Bible sangta. Tor ami hea denneacho valor korunk zai, toxench, amchea ani dusreanchea jivachi kallji gheunk zai.
Porot Ugddas Korum-ia
Amchem jivit Jehovak kiteak moladik asa?
Ek munis mudʼdom konnacho-i jiv kaddtta zalear Jehovak koxem dista?
Jehovan dilʼlea jivitachea dennea pasot tumi kiteak upkari asat?
ANIK SODHAT
Jehovan dilʼlea jivita pasot ami upkariponn koxem dakhounk zata?
Gorbpat kelʼle eke bailek Dev bhogxitolo kai? Hea prosnachi zap zannam zaiat.
Deva bhaxen ami-i jivit moladik mhunn lekhtat zalear amcho jiv dhokeant poddonk xokta tosle khell ami khellchimnant.
“Amcho Jiv Dhokeant Ghalop Sarkem Kai?” (Awake!, October 8, 2000)
Eka munxak aplo jiv diuncho oxem dista zalear Bible taka koso modot korunk xokta tem zannam zaiat.
“Mhaka Moronk Zai! Oslim Chintnam Ailear Bible Amkam Modot Korunk Xokta Kai?” (Web article)
a Thoddim zannam itlim dukhi vo niraxi zatat ki tankam jieunk naka koxem dista. Punn Jehova tanchi khub kallji korta. (Stotr 34:18) To tanchi bhavnam somzon gheta ani tankam modot korunk sodhta. Oslim chitnam ietat tankam Jehova koso modot korta tem zannam zaunk, Anik Sodhat hea bhagant aslolo “Mhaka Moronk Zai! Oslim Chintnam Ailear Bible Amkam Modot Korunk Xokta Kai?” ho lekh polloiat.
b Jehovak gorbpata vixim koxem dista tem noko astana konnem-i adim gorbpat kelʼlo zalear tannem guneanvkari zaunchi goroz na. Karonn Jehova tika bhogxitolo. Hea vixim anik zannam zaunk, Anik Sodhat hea bhagant aslolo, “Gorbpata Vixim Bible Kitem Sangta?” ho lekh polloiat.