Devachea Rajeacho Raza Konn?
Devan aplea Rajeacho Raza konnak vinchun kaddla tem amkam koxem kollttolem? Hea vixim Bible boroupeank Devan kitem borounk sanglolem tantuntlean amkam kolltta. Zoxem boroun dovorlolem ki
Dev taka vinchun kaddttolo. “Hanvench mhojea razak makhla . . . Hanv tuka raxttram tujem daiz korun ditolom; xekanxek soglli prithum tuje adhin kortolom.”—Stotr 2:6, 8.
To Davidachea sonstintlean astolo. “Zolmola amkam ek ballok, dila amkam ek put . . . Tachi razvottki soglleak pavtoli, ani tache xantik mitmer aschi na. To Davidachea xinvasonar bosun aplem raj choloitolo, tedna thaun nitekallim nitin ani promannikponnan tem raj sthaptolo ani thiraitolo.”—Izaias 9:5, 6.
To Bethlehemant zolmotolo. “Punn tum, Bethlehema . . . , razvott cholouncho asa to mhaka tuje thaun zolmotolo . . . Tachi podvi pritumechea ximancher porian pavtoli.”—Mika 5:1, 3.
Lok taka nakartole ani jivexim martole. “Monxam tachi beporva kortat, aminch taka lekhunk na. . . . Khorench mhollear, amchea opradhank lagun taka aspas vidhlo vo toplo, amchea guneanvank lagun taka vollvollailo.”—Izaias 53:3, 5.
To jivont zatolo ani taka ek vhodd podvi mellttoli. “Tum mhozo otmo melʼleam modem soddcho naim, ani Tujea visvaxi bhoktak fonddant urunk diuncho naim. . . . Tujea uzveak sasnnachem sukh.”—Stotr 16:10, 11.
Jezu Krist Munxancher Razvottki Cholounk Purto Asa
Munxanchea itihasant polloilem zalear, fokot Jezu ek purto Raza zaunk xokta mhunn amkam kollon ieta. Eka dutan Jezuchea avoik Mariek oxem sanglolem: “Jehova Dev taka, tacho bapui Davidachem xinvason ditolo . . . ani tachi razvottki kednanch sompchi na.”—Lukas 1:31-33.
Jezu prithumer astana Raza naslo. Punn sorgar gelea uprant to Devachea Rajeacho Raza zalo. Tor to razvottki cholounk kiteak purto zaun asa? Tem zannam zaunk Jezun prithumer astana kitem kelʼlem tem polloum-ia.
Jezuk lokanchi khub kallji asli. To dadleank, bailank, zanntteank, tornnatteank, girestank toxench goribank modot kortalo. (Matev 9:36; Marku 10:16) Ek pavtti eka koddkaran Jezuk oxem mhunnttlem: “Tuka zai zalear tum mhaka nitoll korunk xokta.” Tednam Jezuk tache churchure disle ani tannem taka boro kelo.—Marku 1:40-42.
Devak ami koxem khuxal korunk xoktat tem Jezun xikoilem. Tannem mhunnttlem: “Tumi ekach borabor Devachim ani toxench Girestkaiechim gulamam zaunk xokonant.” Tea bhair, dusreamnim amchea sangata koxem vaglolem amkam zai, teach toren ami tanchea sangata vagonk zai mhunn tannem xikoilem. Toxench, ami kitem kortat tacheruch nhoi, punn ami kitem chintat ani amkam koxem bhogta tacherui Dev dhean dita mhunn tannem sanglem. Tor Devak khuxal kortolim zalear ami amchea bhavnancher ani chintnancher tabo dovrunk zai. (Matev 5:28; 6:24; 7:12) Tea bhair, jivitant khori khuxalkai koxi melloun gheunk zata tem-ui Jezun xikoilem. Tem mhunnttlear, ami kitem kelʼlem Devak zai tem zannam zavop ani tem korop.—Lukas 11:28.
Jezun dusreancho mog korunk xikoilem. Jezuchea utrant khub boll aslem dekhun tache aikopi, to sangta tem korunk fuddem sortale. Tache vixim oxem sanglam: “Lok tachi xikovpachi rit polloun ekdom ojap zale, karonn to tankam xastream bhaxen xikoi naslo punn odhikar aslolea munxa bhaxen xikoitalo.” (Matev 7:28, 29) Toxench “dusmanancho mog korunk” tannem xikoilem ani hem tannem svota korun dakhoilem. Zoxem morchea poilim tannem aplea thoddea dusmanam pasot oxem magnnem kelʼlem: “Bapa, tankam bhogos, karonn te kitem kortat tem tankam khobor na.”—Matev 5:44; Lukas 23:34.
Tor fokot Jezu ek boro Raza zaun asa, karonn to lokancho khub mog korta ani tankam modot korunk toiar asta. Punn prithumer tachi razvottki kednam suru zatoli?