Bible Videartheank Vaddavoll Korunk Sobhentlim Soglim Koxim Modot Korunk Xoktat?

1-2. Eka Bible videartheak vaddavoll korunk konn modot korunk xoktat?

FIJI desantli Amy nanvachi ek bhoinn mhunntta: “Mhojea Bible obheasant hanv xikta tem mhaka avoddttalem ani tem sot mhunn mhaka khobor asli. Punn hanv bhav-bhoinnam sangata vell sarunk laglem tednanch hanv mhojea jivitant bodlav korun bautizm gheunk pavlem.” Amy-chea hea onnbhovantlean ami ho mhotvacho mudʼdo zannam zatat: Eka Bible videartheak sobhentlea bhav-bhoinnam thaun modot melltta tednam to chodd korun bautizm gheunk fuddem soronk xokta.

² Tor taka sobhentlim dor ek bhav-bhoinnam modot korunk xoktat. (Ef. 4:16) Vanuatu-ant ravpi ek pioneer bhoinn Leilani mhunntta: “Jea toren eka bhurgeachi vaddavoll korunk eka ganvantlea sogleanchi goroz asta oxem mhunnttat, toxench ekleak bautizm gheunk sobhentlea bhav-bhoinnanchea modotichi goroz asta.” Ek bhurgo borea toren vaddttolo zalear tachea familicho, ixttancho ani tticherincho hat asta. Karonn tim taka urba ditat ani jivitantlim mhotvachim lisanvam xikoitat. Teach bhaxen, eka Bible videartheak her bhav-bhoinnam ek bori dekh dovortat tednam, taka urba ani solʼlo ditat tednam taka vaddavoll korun bautizm gheunk modot zata.—Mho. 15:22.

3. Ana, Dorin, ani Leilani hanchea utrantlean tumi kitem xiktat?

³ Eka Bible videarthean vaddavoll korunk eka Bible xikoupean her bhav-bhoinnanchi modot kiteak gheunk zai? Hea vixim Moldova-nt ravpi Ana nanvachi ek khas pioneer kitem mhunntta tem polloum-ia. Ti sangta: “Eka Bible videarthean vaddavoll korunk fokot ekleanuch vavurlear khub kotthin zaunk xokta.” Teach desant khas pioneer mhunn seva korpi bhav Dorin mhunntta: “Choddxe pavtti bhav-bhoinnam mhojea videartheachea kallzak lagta toslem kitem tori mhunnttat, jem mhojea monant ghoddie kednanch ieunchem naslem.” Leilani anik ek karonn sangta: “Eka Bible videartheak bhav-bhoinnam kallji ani mog dakhoitat tednam ami Jehovache lok mhunn taka khatri zata.”—Juanv 13:35.

4. Hea lekhant ami kitem polloitolim?

⁴ Punn tumi chintit, ‘Hanv Bible obheas gheina zalear eka Bible videartheak vaddavoll korunk koso modot korunk xokta?’ Tor, amkam konnui aplea sangata Bible obheasak apoita tednam ami kitem korunk zata. Ek Bible videarthi mittingek ieunk lagta tednam ami kitem korunk zata. Ani vhoddilamnim taka vaddavoll korunk koxi modot korunk zata, tem ami polloitolim.

TUMI DUSREANCHEA BIBLE OBHEASAKVOITAT TEDNAM

5. Tumi dusreanchea Bible obheasak voitat tednam tumchi zobabdari kitem?

⁵ Eka Bible videartheak Devachem Utor xikounchi zobabdari tachea Bible xikoupeachich asa. Punn to Bible xikoupi tachea Bible obheasak tumkam apoita zalear tumi taka tenko diunk zata. (Up. 4:9, 10) Hem tumi borea toren koxem korunk xoktat?

6. Tumi dusreanchea Bible obheasak voitat tednam, Mhonnʼnneo 20:18-nt sanglolem totv koxem apnnaunk zata?

⁶ Bible obheasa pasot toiari korat. Poilem, Bible xikoupea thaun tea videarthea vixim thoddi mahiti gheiat. (Mhonnʼnneo 20:18 vachat.) Tumi taka osle prosn vicharunk xoktat: “Tea videartheachi famil, pirai ani patienni vixim tum mhaka kitem sangunk xokta? Prokaxonatlo khoincho bhag tum tachea sangata obheas kortolo? Aichea hea obheasant tum taka kitea vixim urba diunk sodhta? Videartheak vaddavoll korunk modot zaunk hanvem umkech kitem-i mhunnttlolem tuka zai? Vo obheasant hanvem kitem mhunnttlear ghoddie videartheak borem dischem na?” Hi mahiti ghetlolean khub faideak poddtta. Karonn oxem kelolean Joy nanvachea mixinorik khub faideak poddlam mhunn ti sangta. Ti mhunntta: “Mhojea sangata Bible obheas korunk ietat tankam hi mahiti dilolean obheasa vellar kitem sangonk zai tem tankam kolltta ani videartheak faido zata.” Punn ek Bible xikoupi hi mahiti ditana videarthea vixim dusreank sangonk zaina ti mahiti sangcho na.

7. Tumi dusreanchea Bible obheasak voitat tednam xikchi asa tea bhagachi toiari kiteak korunk zai?

⁷ Dusrem, videarthea sangata xikchi asa tea bhagachi borea toren toiari korat. (Ezra 7:10) Dorin, zachea vixim ami poilim uloilolim to mhunntta: “Mhojea Bible obheasak ietat tim bhav-bhoinnam borea toren toiari kortat tednam hanv khuxal zata. Hea toren tim videartheak faideak poddtta tosli mahiti diunk pavtat.” Tea bhair, tumchi bori toiari polloun apnnem pasun toiari korunk zai mhunn videarthi xikta. Punn tumi toiari korunk pavonant zalear pasun, xikchi asa tea mahitichea mukhel mudʼdeancher tori obheasa poilim dhean diat.

8. Tumchem magnnem Bible videartheak chodd faideak poddonk tumi kitem korunk zata?

⁸ Bible obheasant magnnem korop khub gorjechem. Taka lagon, Bible obheasa vellar tumkam magnnem korunk lailem zalear tumi kitem magtolim tea vixim poilinch chitun dovrat. Toxem kelear Bible videartheak tumchem magnnem chodd faideak poddttolem. (St. 141:2) Japanant ravpi Hanae-k, aplea Bible xikoupea sangata ietali tea bhoinnichi magnnim azun pasun ugddas asa. Ti mhunntta: “Tichea magnneam udexim tichi Jehova sangata kitli ghott ixttagot asa ti dison ietali. Ani mhaka pasun Jehova sangata toslich ixttagot korunk zai asli. Ti tichea magnneant mhojem nanv ghetali tednam mhaka khub borem distalem.”

9. Jakob 1:19-a pormonnem obheasachea vellar tumi eka Bible xikoupeak koso tenko diunk zata?

⁹ Obheas ghetana xikoupeak tenko diat. Nigeria-ntlem ek khas pioneer Omamuyovbi mhunntta: “Mhojea Bible obheasak ietat tim obheasant dhean ditat tednam faideak poddtta. Eka Bible obheasant mukhel zaun tacho Bible xikoupi xikoita dekhun tachea sangata ietat tim chodduch uloinant, punn faideak poddtta tosli mahiti sangtat. Tor obheasa vellar tumi kitem ulounk zata ani kednam ulounk zata? (Mho. 25:11) Poilem zaun, xikoupi ani videarthi uloitat tem kan diun aikat. (Jakob 1:19 vachat.) Tednanch tumi kitem ulounk zai tem tumkam kollttolem. Punn oxem kortana tumi chodduch ulounchem nhoi mhunn ugddas dovrunk zai. Tea bhair, xikoupi xikoita tea mudʼdeacheruch tumi ulounk zai. Ani to mudʼdo soddun dusrea ek vixoi-acher tumi ulounchem nhoi. Tor xikoita ti mahiti videartheak anik borea toren somzunk ek udharonn vo prosn uzar korun thoddea utramnim tumchean taka somzaunk zata. Thoddea pavtti xikoita tea vixoi-acher tumchea lagim anik mahiti na mhunn tumkam disonk puro. Punn tea videartheak xabaski diun tachea gorzancher tumi dhean ditat zalear taka vaddavoll korunk modot kortolim.

10. Eka videartheak tumcho onnbhov koso faideak poddonk xokta?

¹⁰ Tumcho onnbhov tankam sangat. Sondhi melltta tednam tumkam sot koxem mellʼllem, tumi oddchonneancho fuddo koso kelo ani Jehovan tumchea jivitant tumkam koxi modot keli hea vixim tumi videartheak sangonk zata. (St. 78:4, 7) Tumi tumcho onnbhov sanglolean videartheacho bhavarth ghott zaunk xokta ani vaddavoll korit ravonk taka modot zaunk xokta. Toxench, apleak asa ti oddchonn koxi suttavi korunk zata tem taka kollon ietolem. (1 Ped. 5:9) Brazilantlo ek pioneer bhav Gabriel apunn Bible xiktana Bible obheasak ietalim tea bhav-bhoinnam thaun apleak koso faido zalo tea vixim sangta: “Bhav-bhoinnancho onnbhov aikon ami fuddo korta tea poristhiti vixim Jehova borea toren zannam mhunn hanv xiklo. Tim bhav-bhoinnam oddchonneancho fuddo korunk xoktat zalear hanv-ui korunk xokta.”

VIDEARTHI MITTINGEK IETA TEDNAM

11-12. Ek Bible videarthi mittingek ieta tednam taka ami mogan ieukar divop kiteak gorjechem?

¹¹ Eka Bible videarthean chukoinastana mittingek ieun tachea thaun faido ghetlearuch to vaddavoll korun bautizm gheunk pavtolo. (Heb. 10:24, 25) Bible xikoupi aplea videartheak poile pavtt mittingek ieunk urba diunk puro. Punn sodanch mittingek ieunk ami sogleamnim taka urba diunk zata. Hem ami koxem korunk xoktat?

¹² Videartheak mogan ieukar diat. (Rom. 15:7) Videarthi Raj-ghorant poile pavtti ieta tednam ami taka mogan ieukar ditat zalear mittingek ie-it ravonk zai mhunn ghoddie taka disonk puro. Tor to ieta tednam borea toren taka zap korat vo hoddkiat. Taka dusreanchi vollokh korun diat ani to kitem sangta taka kan diat. Tacho xikoupich ieun tachi kallji ghetolo mhunn vatt polloinakat. Karonn taka mittingek ieunk vell zala astolo vo taka her zobabdareo asat astoleo. Tor tumkam tachi kallji asa mhunn dakhoiat. Tumi oxem kortat tednam kitem zaunk xokta? Atam ek sobhecho sevok zaun seva kortolea Dmitrii-cho onnbhov polloum-ia. Taka bautizm gheun thoddich vorsam zaleant. To poile pavtti mittingek ailo tednam kitem zalem tem to sangta: “Mhaka bhirant disli mhunn hanv Raj-ghora bhairuch ubo ravlo. Punn Raj-ghorantlea eka bhavan mhaka polloilem ani to mhaka bhitor gheun gelo. Zaitim zannam ieun mhaka mellʼllim. Hem soglem polloun hanv khub ojap zalo ani osleo mittingo dor disa asonk zai oxem mhaka dislem. Oslem hanvem anik khoinsoruch pollounk naslem.”

13. Tumcho boro sobhav polloun videartheak kitem kollon ietolem?

¹³ Borem udharonn dovrat. Amcho boro sobhav polloun ami khori Kristanvam mhunn videartheak khatri zatoli. (Mt. 5:16) Moldova-nt ravpi Vitalii nanvachi bhoinn oxem sangta: “Sobhentli bhav-bhoinnam koxim jietat, chintat ani vagtat hem kollon ailem tednam Jehovache Sakxi khorench sota pormonnem choltat mhunn mhaka khatri zali.”

14. Tumchem udharonn eka videartheak vaddavoll korunk koxem modot korunk xokta?

¹⁴ Vaddavoll korun bautizm gheunk eka videarthean apunn xikta tem apnnavop gorjechem. Oxem korunk ghoddie thodde pavtt sompem asona. Punn tumkam Bible-antlim totvam apnnaun faido zala tem polloita tednam Bible videartheak tim apnnaunk urba mellttolim. (1 Kor. 11:1) Atam ami Hanae-chea udharonnacher dhean dium-ia, zachea vixim ami poilim uloilolim. Ti mhunntta: “Hanvem kitem korunk zai mhunn hanv xiktalem tench bhav-bhoinnam kortalim. Tim eka-mekak urba ditalim, mog kortalim ani bhogxitalim. Toxench tim dusream vixim borem uloitalim. Tor mhaka-i tanchea sarkem zaum koxem dislem.”

15. Eka Bible videarthea sangata ixttagot korop kiteak faideachem tem Mhonnʼnneo 27:17 koxem dakhoita?

¹⁵ Videarthea sangata ixttagot korat. Videarthi mittingek ieta tednam tumkam tachi kallji asa mhunn dakhoiat. (Filp. 2:4) Hem korunk tumi tanchea lagim vochun ulounk zata. Tanchea jivita vixim soglem zannam zauncho proitn korinakat. Punn tanchea Bible obheasa vixim, famili vixim ani kama vixim tankam vicharunk zata. Tea bhair, sot xikon tannim kelʼlea bodlava pasot tumi tankam xabaski diunk zata. Hea toren tim tumchim ixtt zatolim ani tankam vaddavoll korunk modot zatoli. (Mhonnʼnneo 27:17 vachat.) Hanae aiz ek niemit pioneer mhunn seva korta. Punn ti mittingek ieunk lagli tednam kitem ghoddlem tem ti sangta: “Bhav-bhoinnam sangata mhoji ixttagot zali tednam mittingek ieunk mhaka urba mellʼlli. Tanchea sangata vell sarunk mhaka borem distalem, dekhun hanv thoktalem tednam pasun mittingek ietalem. Tanchi ixttagot aslolean sotant naslolea mhojea poilinchea ixttank soddunk mhaka sompem zalem. Hea toren hanv Jehovachea lagim soronk pavlem ani hanvem bautizm gheuncho nirnnoi ghetlo.”

16. Bible videarthi sobhecho bhag asa mhunn disonk ami taka koxi khatri diunk zata?

¹⁶ Ek Bible videarthi aplea jivitant vaddavoll korun bodlav korta tednam to sobhecho bhag zaun asa mhunn taka disonk zai. Oxem disonk zai zalear ami tacho paramos korunk zai. (Heb. 13:2) Moldova-nt seva korpi Denis apunn Bible xiktalo tea disancho ugddas korun oso mhunntta: “Bhav-bhoinnam zaite pavtti mhaka ani mhojea bailek aplea ghora apoitalim. Thoim amkam bhav-bhoinnam sangata vell sarunk mellttalo. Jehovan apnnak koxi modot keli tea vixim tim aplo onnbhov amkam sangtalim. Tea udexim amkam Jehovachi seva korunk urba mellʼlli. Ani novo sonvsar ietolo mhunn amchi khatri vaddli.” Bible videarthi ek porgottnnar zata tednam tumi taka tumchea sangata porgottnnent vhoronk zata. Brazilantlo ek porgottnnar Diego oso mhunntta: “Zaitim bhav-bhoinnam mhaka aplea sangata porgottnnent vhortalim. Hea toren hanv tankam borea toren vollkhonk pavlo ani tanchea thaun hanv zaitem xiklo. Tea bhair hanv Jehovachea ani Jezuchea lagim soronk pavlo.”

VHODDILAMNIM KOXI MODOT KORUNK ZATA?

17. Vhoddil Bible videartheak koxi modot korunk xoktat?

¹⁷ Bible videarthea sangata vell sarat. Tumi vhoddil zalear tumi Bible videartheank mog dakhoitat ani tanchi kallji ghetat tednam tim vaddavoll korun bautizm gheunk pavtolim. Mittingent tim zobab diunk lagtat tednam tumi tanchem nanv ghetat zalear tumkam tanchi kallji asa mhunn distolem. Tea bhair tumi thoddo vell kaddun Bible videartheachea obheasak vochonk zata. Tumi oxem kortat zalear Bible videartheacher boro porinnam zatolo. Karonn Nigeria-nt ravpi Jackie nanvachi bhoinn sangta: “Mhojea sangata Bible obheasak vhoddil ietat tednam mhoje zaite videarthi ojap zatat. Tantuntlo eklo mhunntta: ‘Mhozo pastor mhojea ghora kednanch iena. To fokot girest ani poixe dita tancheach ghora voita.’” Atam ho videarthi mittingek ieta.

18. Itihas 20:28-ant sangloli zobabdari vhoddil koxe purnn korunk xoktat?

¹⁸ Bible xikoupeak modot korat ani urba diat. Porgottnnechem ani xikoupachem kam borea toren korunk porgottnnarank modot korchi mhotvachi zobabdari vhoddilank asa. (Itihas 20:28 vachat.) Porgottnnar eka vhoddila mukhar obheas gheunk lojeta zalear tannem to obheas gheunk zata. Bhoinn Jackie mhunntta: “Mhojea Bible videarthea vixim vhoddil vicharit astat. Mhaka ek Bible obheas gheunk kotthin zata zalear te mhaka bore solʼle ditat.” Hea toren Bible xikoupeak obheas gheit ravonk vhoddil urba ditat. (1 Tes. 5:11) Jackie fuddem mhunntta: “Vhoddil mhaka urba ditat ani hanv korta tea kama pasot te mhaka xabaski ditat tednam mhaka khub borem dista. Tanchim utram gormechea disa konnem tori amkam thondd udok dilʼlea sarkim astat. Tanchea utrantlean Bible obheas gheunk mhozo dhir ani khuxalkai vaddtta.”—Mho. 25:25.

19. Kitem kelʼlean amkam sogleank khuxalkai mellonk xokta?

¹⁹ Ami Bible obheas gheinant zalear pasun ami ekleak vaddavoll korun bautizm gheunk modot korunk xoktat. Ami konnachea-i Bible obheasak voitat zalear thoim chodd uloinastana ami toiar kelʼli bori mahiti sangonk zata. Bible videarthi mittingek ietat tednam ami tanchea sangata ixttagot korunk zata ani tanchea pasot borem udharonn dovrunk zata. Vhoddil videarthea sangata vell sartat tednam tankam urba ditat. Toxench te xikoupeank xabaski diun modot kortat tednam tankam-i urba ditat. Khorench ami konnakui Jehovacho mog korun tachi seva korunk thoddich modot korunk pavtat zalear pasun hantunt melltta tea khuxalkaie poros vorti khuxalkai na.