Adlea Tempa Voilim Israelitkaram Zhuzant Bhag Ghetalim Zalear Ami Kiteak Gheunk Zaina?
DUSREA Vixv Zhuza vellar, Nazi sorkarachea eka odhikarean Jehovachea Sakxeanchea eka zomeak oxem mhunnttlem: “Tumchea modlo konnui France vo England-achea add zhuzak vochona zalear, tumkam sogleank ami jivexim marun uddoitole.” Tea vellar, Nazi sorkarache soinik thoim laginch asle. Tori astana, ekui Jehovacho Sakxi zhuzak vochonk fuddem soronk na. Khorench, tannim khub dhir dakhoilo! Hea udharonnantlean, aiz pasun Jehovachim Sakxi zhuza vixim kitem chintʼtat tem amkam kollon ieta. Ami hea sonvsarantlea khoinchea-i zhuzant bhag ghenant. Ani amkam mornnachi dhomki dilear pasun ami zhuzak vochonant.
Punn apunn Kristanv mhunnttat tim soglinch zannam zhuza vixim oxem chintinant astolim. Ek Kristanv aplea desa pasot zhuzonk xokta ani tannem toxem korunk zai, oxem zaiteank disonk puro. Tim ghoddie oxem mhunnot: ‘Israelitkaram Devachim munxam aslim ani tim zhuzant bhag ghetalim. Tor aiz Kristanvam kiteak bhag gheunk xokonant?’ Oslea lokank ami koso zobab ditolim? Ami tankam Israelitkaranchi poristhiti ani aiz amchi poristhiti koxi veglli asa tem somzaunk zata. Hea vixim ami panch mudʼde polloum-ia.
1. DEVACHE LOK EKUCH RAXTTRACHE BHAG ZAUN ASLE
Adlea tempar, Jehovan ekuch raxttrak, tem mhunnttlear, Israelachea raxttrak apli porza mhunn vinchun kaddloli. Ani hem raxttr ‘soglea porzam modem apli khaxa porzaʼ mhunn Jehovan sanglolem. (Sutt. 19:5) Toxench, Jehovan tankam ek umkoch zago dilʼlo. Tor Jehovan Israelitkarank, her raxttram add zhuzonk lailim tednam tim Jehovachi bhokti kortolea apleach bhavam add zhuzonaslim vo tankam jivexim marinaslim.a
Aiz, Jehovache lok ‘soglea desantle, kullantle, porzantle ani bhasanche’ zaun asat. (Prok. 7:9) Tor tannim zhuzant bhag ghetlo zalear tim apleach bhav-bhoinnam add zhuz korunk xoktat vo tankam jivexim marunk xoktat.
2. JEHOVA ISRAELITKARANK ZHUZ KORUNK SANGTALO
Adlea tempar, Israelitkaram kednam ani kiteak zhuzak voitolim tem Jehova tharaitalo. Udharonnak, Jehovan Israelitkarank Bhasailʼlo Des ditolo mhunn sanglolem. Punn tea desant ravpi Kanaanit lok vaitt dutanchi bhokti kortale, vitt haddttat toslim onoitik kamam kortale ani bhurgeanchim bolidanam pasun bhettoitale. Hea kamam pasot te khub famad asle. Tor him vaitt kamam Israelitkaram pasun korit mhunn Jehovan Israelitkarank Kanaanitkaram add zhuz korun tankam Bhasailʼlea Desantlean bhair kaddunk lailim. (Lev. 18:24, 25) Ani Israelitkaramnim Bhasailʼlo Des aplea tabeant kelea uprant, Jehovan tankam thodde pavtti tancho virodh korpi dusmanam add zhuzonk lailim. (2 Sam. 5:17-25) Punn Israelitkaram kednam ani kiteak zhuzak voitolim tem tharauncho odhikar Jehovan tankam diunk na. Tori astana, tim svota zaun zhuzak voitalim tednam tacho porinnam khub vaitt zatalo.—Lok. 14:41-45; 2 It. 35:20-24.
Aiz pasun, Jehovan munxank zhuz korunk odhikar diunk na. Tori astana, munis veg-vegllea karonnank lagon eka-meka add zhuz kortat. Zoxem, apleak anikui vattar melloun gheunk, girest zaunk vo rajki karonnank lagon te zhuz korunk puro. Tor te Devak zai toxem korunk nhoi, punn apleak zai toxem korunk zhuzam kortat. Punn Devachea dusmanancho nas korunk vo aplea dhormachi rakhonn korunk apunn Devachea nanvan zhuz kortat mhunn sangtat tanche vixim kitem? Aplea dusmanancho nas korunk ani aplea sevokanchi rakhonn korunk, Jehova svota zaun fuddarak ek zhuz korcho asa. Tem mhunnttlear, Armageddonachem zhuz. (Prok. 16:14, 16) Ani hea zhuzant, Jehova prithumer aslolea aplea sevokank nhoi, punn sorgar aslole aple sorginche foujek uzar kortolo.—Prok. 19:11-15.
3. JEHOVACHER BHAVARTH DOVORLO TANKAM ISRAELITKARAMNIM JIVEXIM MARUNK NANT
Jerikocher zhuz kelem tednam Rahab ani tiche familicho jiv salvar kelo tea bhaxen, aiz zatat tea zhuzamnim, visvaxi munxancho jiv salvar zata kai?
Adlea tempar, Jehovan Israelitkarank jea munxank jivexim marunk lailim, tankam tannim jivexim marlim. Punn Jehovacher bhavarth dovorlo tea munxank tannim salvar kelim. Hea vixim amkam don udharonnam asat. Jehovan Israelitkarank Jeriko xaracho nas korunk sanglem tednam Israelitkaramnim Rahab ani tichea familik salvar kelim. Karonn Rahaban Jehovacher bhavarth dovorlo. (Josh. 2:9-16; 6:16, 17) Toxench, Gibeonitkarank Jehovachi bhirant asli dekhun Israelitkaramnim akʼkhea Gibeon xaracho nas korunk na.—Josh. 9:3-9, 17-19.
Punn aiz, zhuz korpi raxttram bhavarth aslolea munxank salvar korinant. Toxench thodde pavtti, hea zhuzamnim kainch guneanv korunk na tea lokank pasun jivexim martat.
4. ISRAELITKARAMNIM ZHUZA VIXIM JEHOVACHE KAIDE PALLUNK ZAI ASLE
Adlea tempar, Israelitkaramnim Jehovan dilʼlea kaideam pormonnem zhuz kelʼlem Jehovak zai aslem. Udharonnak, thodde pavtti Jehovan Israelitkarank, tankam virodh korpi raxttrank “somadhan korunk . . . sond” diunk laili. (D.S. 20:10) Toxench, Israelitkaram nitoll aslolim, tannim aple tombu nitoll dovorlole ani aple noitik dorje pasun pallʼllole Jehovak zai aslem. (D.S. 23:9-14) Zoxem, Israelachea bhonvtonnim aslolea raxttrantle munis, aplea tabeant kortale tea vattarantlea bailancher bolotkar kortale. Punn Israelitkaramnim toxem korchem nhoi mhunn Jehovan tankam sanglolem. Khorem mhunnttlear, ek xar aplea tabeant kelea uprant koidi kelolea lokam modem tankam ek cheddum avoddlem zalear, tannim eka mhoinea uprantuch tache lagim kazar zaunk zatalem.—D.S. 21:10-13.
Aiz, choddxea desamnim, te zhuz kortana umkech kaide pallttole mhunn tharaun dovorlam. He kaide tea raxttrantlea lokanchi rakhonn korunk keleat. Punn dukhachem mhunnttlear, aiz zhuz kortat tim choddxim raxttram he kaide moddttat.
5. JEHOVA DEV ISRAELA PASOT ZHUZLO
Jehova Israelitkaram pasot Jerikont zhuzlo tea bhaxen, to aiz khoinchea-i raxttra pasot zhuzta kai?
Adlea tempar, Jehova Israelitkaram pasot zhuzlo ani choddxe pavtti ojapache ritin tankam zoit dilem. Udharonnak, Jeriko xaracho nas kortana, Jehovan tankam margdorxon dilem. Ani tea margdorxona pormonnem Israelitkaramnim “vhodd zhuza arodd marli tedna, thoinche-thoinch vonnot kosllun poddli” ani tankam tem xar aplea tabeant korunk sompem zalem. (Josh. 6:20) Toxench, Israelitkar Amorit lokam sangata zhuztale tednam “Sorvesporan sorgar thaun . . . korveancho paus dhaddlo ani . . . Israelkaramnim tolvarin marloleam-von, korveanchea pausa udexim odik mele.”—Josh. 10:6-11.
Punn aiz, Jehova sonvsarantlea khoincheach raxttra pasot zhuzona. Karonn Jezu Raza zaun asa tem tachem raj “hea sonvsarantlem nhoi.” (Ju. 18:36) Punn hea sonvsarantlea soglea sorkarancher Soitan odhikar choloita. Ani aiz munxanche sorkar kortat tea krur zhuzantlean, amkam Soitanacho noxtto sobhav dison ieta.—Luk. 4:5, 6; 1 Ju. 5:19.
KHORIM KRISTANVAM XANTI KORUNK VAVURTAT
Tor ami atam meren, adlea tempa voile Israelitkar ani amchi poristhithi koxi veglli asa tea vixim panch mudʼde polloile. Punn ami zhuzant kiteak bhag ghenant tachim anikui karonnam asat. Udharonnak, Jehovan sanglolem ki nimannea disamnim tache koddlean xikounn ghetat tim ‘konnuch zhuzachi toiari korchimnant.’ (Iz. 2:2-4) Tor hantuntlean, tim zhuzant bhag pasun gheunchim nant mhunn amkam kollon ieta. Toxench, tache xis hea “sonvsarache nhoi” hacho orth, tim hea sonvsarachea rajkaronna sombondint khoinchea-i zhogddim-zhuzant bhag gheunchimnant mhunn Jezun sanglolem.—Ju. 15:19.
Jezun aplea pattlavdarank anikui kitem korunk sanglem. Tem mhunnttlear, dusreancher ragar zaunk, tancho rag dhorun bosonk ani zhuz korunk uksaita toslo sobhav tannem tankam pois korunk sanglo. (Mt. 5:21, 22) Toxench, tannem tankam ‘xanti korunk vavrunkʼ ani tanchea dusmanancho mog korunk xikoilem.—Mt. 5:9, 44.
Amche vixim kitem? Ami kednanch zhuz korunk voichimnant tem khorem. Punn amchea monant ami bhav-bhoinnancho rag dhorun boslear sobhent futt poddonk xokta. Tor oslim bhavnam amchea monant ietat zalear ami tim kaddun uddounk proitn korit ravonk zai.—Jak. 4:1, 11.
Hea sonvsarantlea zhuzamnim bhag gheunchea bodlek ami amchea modem xanti ani mog samballunk vavurtat. (Ju. 13:34, 35) Tor Jehova soglim zhuzam kabar korta meren, ami khoinchea-i zhogddim-zhuzant bhag gheunchimnant mhunn ghott nichov korum-ia.—St. 46:9.
a Thodde pavtti, Israelit kullam eka-meka add zhuztalim. Punn Jehova Devak, Israel raxttra bhitor zatolim him zhuzam manvonaslim. (1 Raz. 12:24) Punn thoddea vellar, Jehova kullam modem zhuzam zaunk ditalo. Karonn hea kullantlim munxam ek tor Jehovak ovisvaxi zalʼlim vo tannim her gombhir patkam adarlolim.—Fudd. 20:3-35; 2 It. 13:3-18; 25:14-22; 28:1-8.