“Chotur Ravat, Zagrut Ravat”

1. Jezun aplea xisank xevottachea vella vixim kitem sanglem, ani tankam kosli xittkaunni dili?

JEZU morchea thoddea disam poilim, tachea char xisamnim taka oxem vicharlem: “Sonvsarachea xevottachea vellachi khunna kitem astoli?” (Mt. 24:3) Te xis ghoddie, Jeruzalem ani tachea Devmondiracho kednam nas zatolo tem tankam koxem kollttolem aslem, tea vixim zannam zaunk sodhtale. Hea prosnak Jezun dilʼlea zobabantlean, tannem fokot Jeruzalem ani tachea mondirachea nisonnttonachich nhoi, punn ami jietat tea ‘xevottachea vella’ vixim pasun sanglem. Jezun oxem mhunnttlem: “Tea disa vixim vo tea vella vixim konnakuch khobor na, na mhunn sorga voilea devdutank, na mhunn Putak, punn fokot Bapak khobor asa.” Uprant tannem aplea soglea xisank ‘zagrut ravonk’ xittkaunni dili.—Mk. 13:32-37.

2. Poilea xekddeantlea Kristanvamnim zagrut ravchi kiteak goroz asli?

² Poilea xekddeantlim Judev Kristanvam salvar zatolim aslim zalear tannim zagrut ravchi goroz asli. Jeruzalem ani tachea mondiracho xevott lagim pavla mhunn koxem kollttolem aslem, tea vixim Jezun tachea pattlavdarank oxem sanglem: “Soinikamnim Jeruzalem xarak gherav ghatlolo tumi polloitole tednam tacho nas lagim pavla mhunn zannam zaiat.” Oxem ghoddtta tednam tannim Jezuchi xittkaunni pallun ‘dongrar pollon vochonk suru korunk’ zai aslem. (Luk. 21:20, 21) Hi xittkaunni pallʼlli tankam koso faido zalo? Romi soinikamnim Jeruzalemacho nas kelo tednam tim salvar zaunk pavlim.

3. Hea lekhant ami kitem polloitolim?

³ Aiz ami, hea noxttea sonvsaracho rokddoch nas zauncho asa tea kallar jietat dekhun, ami zagrut ani chotur ravonk zai. Tor sonvsarantlea ghoddnneancher dhean ditana ami chotur koxem ravonk zata, amcher koxem dhean diunk zata, ani amcho vell ekdom bore toren koso uzar korunk zata tem ami hea lekhant polloitolim.

SONVSARANTLEA GHODDNNEANCHER DHEAN DITANA CHOTUR RAVAT

4. Aiz ghoddttat tea ghoddnneancher ami kiteak dhean diunk zai?

⁴ Aiz sonvsarbhor ghoddttat tea ghoddnneancher dhean diunk amkam borim karonnam asat. Karonn hea udexim Bible-antleo bhasaunneo ghoddon ietat mhunn ami zannam zatat. Udharonnak, Soitanachea sonvsaracho xevott lagim pavta toso, khoincheo umkeoch ghoddnneo ghoddttoleo tea vixim Jezun sanglem. (Mt. 24:3-14) Toxench amcho bhavarth ghott samballunk, Bible-antleo bhasaunneo koxeo purnn zatoleo tacher dhean diunk apostl Pedrun amkam urba dilea. (2 Ped. 1:19-21) Tea bhair, Bible-antlea nimannea pustokachea survatek him utram boroilʼlim asat: “Hi Jezu Kristachi prokasnni: Rokddea-rokddem kitem-kitem ghoddchem asa, tem apleam sevokank dakhouncheak Devan taka ti kelea.” (Prok. 1:1, Povitr Pustok - Novo Korar) Tor aiz ghoddttat tea ghoddnneam vixim, ani teo Bible-antleo bhasaunneo koxe toren purnn korunk xoktat tea vixim ami zannam zaunk sodhtat. Toxench, hea vixim ami eka-meka lagim ulounk sodhtat astolim.

5. Ami kitem korchem, ani kitem korchem nhoi? (Chitram pasun polloiat.)

⁵ Punn Bible-antlea bhasaunneam vixim uloitana, fuddarak kitem ghoddttolem tea vixim ami odmas lavunk zaina. Karonn sobhent futt poddtta toxem ami kainch ulounk sodhinant. Udharonnak, sonvsarache fuddari umkech eke oddchonnecho koso fuddo kortole ani sonvsarant xanti ani surokxa koxe haddttole tea vixim uloitat tem ami ghoddie aikonk puro. Punn tea vellar, hea vorvim 1 Tesalonikekarank 5:3-ant sangloli bhasaunni purnn zata mhunn odmas launchea bodlek, songottnnen halinch tea vixim kosli mahiti dilea tem ami zannam zaunk zai. Tor amchem ulovop songottnnen dilolea mahiticher adarit asta tednam ami sobhent aslolea amchea bhav-bhoinnank “eka motachim zaun” amche modem ekvott samballunk modot korunk pavtat.—1 Kor. 1:10; 4:6.

6. 2 Pedru 3:11-13-ntlean amkam kitem xikonk melltta?

⁶ 2 Pedru 3:11-13 vachat. Bible-antlea bhasaunneancher ami koslea karonnak lagon dhean diunk zai, tem amkam hea versantlean kolltta. Apostl Pedru, ‘Devacho Dis begin ieum mhunn axeun ravonk’ amkam urba dita. Kiteak? Jehova Armageddon haddttolo “tea disa vixim ani tea vella vixim” ami zannam zaunk sodhtat mhunn nhoi. Punn atam ami amchea lagim aslolo vell “patkavinn ani bhoktivont” zaun jieunk sodhtat, hea karonnak lagon. (Mt. 24:36; Luk. 12:40) Hacho orth, ami sarke toren vagonk sodhtat ani Jehova pasot kortat tem soglem tachea mogak lagon kortat mhunn ami khatri korun gheunk sodhtat. Oxem korunk, ami amcher dhean divop gorjechem.

AMI AMCHER DHEAN DIVOP MHUNNTTLEAR KITEM?

7. Ami amcher dhean ditat mhunn koxem dakhounk zata? (Lukas 21:34)

⁷ Jezun aplea xisank fokot sonvsarant kitem ghoddtta tacheruch nhoi, punn amcherui dhean diunk sanglem. Hem amkam, tannem Lukas 21:34-ant dilʼlea xittkaunne thaun spoxtt ritin kollon ieta. (Vachat.) Thoim Jezun mhunnttlem: “Tumi tumcher dhean diat.” Apleacher dhean dita to munis, Jehova sangata tachi ixttagot piddʼddear korta toslea dhokeam vixim chotrai dovorta ani te pois korunk proitn korta. Hea toren to sodanch Jehovachea mogan uronk pavta.—Mho. 22:3; Jud. 20, 21.

8. Apostl Paulun Kristanvank koslo solʼlo dilo?

⁸ Kristanvamnim apleacher dhean diunk zai mhunn apostl Paulun pasun sanglem. Udharonnak, tannem Efezantlea Kristanvank ho solʼlo dilo: “Tumchea jivitachi chal kosli ti mhenotin polleiat, ani nennar monxanchi nhoi punn xanneam monxanchi tumchea jivitachi chal zaum-di.” (Ef. 5:15, 16) Jehova sangata amchi ixttagot moddunk Soitan khub vavr korit asta. Tor Soitanachea soglea akromonna thaun amchi rakhonn korunk, Bible amkam ‘Jehovachi khuxi kitem ti sodhun kaddat’ mhunn sangta.—Ef. 5:17.

9. Jehovachi khuxi zannam zaunk ami kitem korunk zata?

⁹ Jehova sangata amchi ixttagot piddʼddear korta tea dor eka dhokea vixim Bible-ant spoxtt ritin sangonk na. Punn hea vixim pasun amkam zaite pavtti nirnnoi gheunk poddttat. Tor hea vellar xanneponnan nirnnoi gheunk, ‘Jehovachi khuxi’ zannam zaun gheunk ami proitn korunk zai. Oxem korunk, ami chukonastana tachea Utracho obheas korunk zata, ani tacher niall korunk zata. Hea toren, jitlim chodd ami Jehovachi khuxi somzotolim ani “Kristachem mon” apnnaitolim, titlinch ami ‘xannim munxam’ zatolim. Ani Bible-ant spoxtt ritin sangonk nant tea vixoi-am vixim pasun, ami xanneponnan nirnnoi gheunk pavtolim. (1 Kor. 2:14-16) Ami pois korunk zai te dhoke vollkhonk, thodde pavtti sompem asot. Punn thodde pavtti oxem korunk amkam kotthin zait.

10. Ami khoinchea thoddea dhokeam thaun pois ravonk zai?

¹⁰ Ami pois korunk zai te thodde dhoke mhunnttlear, dusream sangata mirop vo flirt korop, chodd soro pievop, chodd khavop, dusreank dukhoita toslim utram ulovop, toxench hinvsen bhorlolem monoronjon pollovop, burxim pichʼcheram vo chitram pollovop vo osleoch her vostu. (St. 101:3) Amcho dusman Soitan, Jehova sangata amchi ixttagot moddunk apleak sondhi melltta kai, mhunn rakhon ravta. (1 Ped. 5:8) Tor ami zagrut nant zalear, Soitan amchea monant ani kallzant, nattkai, fottingponnam, as, dves, gorv ani rag dhorun ravop, oslem bim vompunk puro. (Gal. 5:19-21) Survatek, hem titlem dhokeachem nhoi oxem amkam disot. Punn him bhavnam amchea monantlim ani kallzantlim kaddun uddounk ami rokddench pavl ghenant zalear, tim eka vikari zhadda bhaxen vaddot voitolim ani ami trasant poddttolim.—Jak. 1:14, 15.

11. Amkam vollkhonk kotthin zaunk xokta toslo ek dhoko khoincho, ani kiteak?

¹¹ Amkam vollkhonk kotthin zaunk xokta toslo anik ek dhoko mhunnttlear, vaitt sangati. Hea poristhiti vixim chintat. Jehovacho Sakxi nhoi, toslea eka munxa sangata tumi kam kortat. Tannem Jehovachea Sakxeam vixim borem chintlolem tumkam zai dekhun, tumi taka zaite pavtti modot kortat, ani tachea sangata bore toren vagtat. Thodde pavtti, tumi tachea sangata jevnnak pasun voitat. Punn rokddench, tumi sodanch oxem korunk lagtat. Thodde pavtti, uloitam-uloitam, to munis onoitik vixoi-am vixim ulounk lagta. Ani survatek tumkam tem avoddna astolem. Punn uprant vell soron voita toso, tachem aikon-aikon tumkam itli sonvoim zata ki tantunt kainch vaitt na oxem tumkam dista. Magir ek dis, to munis kama uprant tumkam pieunk apoita, ani tumi voitat. Sovkas-sovkas korun tumi tachech bhaxen chintunk lagtat. Tor tumi rokddinch tachech bhaxen zaunk pavtolim oxem tumkam disona? Ami sogleam sangata doiall toren ani respedan vagonk zai tem khorem. Punn ami jea lokam sangata vell sartat, tanchech bhaxen ami zaunk pavtat mhunn ami ugddas dovrunk zai. (1 Kor. 15:33) Jezun amkam urba dilea toxi, ami amcher dhean ditat tednam, Jehovachea dorjeam pormonnem jienant tanchea sangata ami gorje bhair vell sarchimnant. (2 Kor. 6:15) Ami koslea dhokeant poddonk xoktat tem ami vollkhon ghetolim, ani poilinch tanchea thaun pois ravtolim.

TUMCHO VELL EKDOM BORE TOREN UZAR KORAT

12. Jeruzalem ani Devmondirachea nisonnttonnachi vatt polloitana, Jezuchea xisamnim kitem korunk zai aslem?

¹² Jezuche xis, Jeruzalem ani Devmondirachea nisonnttonnachi vatt polloitale tednam tannim kainch korinastana vogi boson ravlolem Jezuk naka aslem. Tea pasot, tannem tankam ek kam dilem. Jezun tankam “Jeruzaleant, akʼkhea Judeiant ani Samarient ani sonvsarachea ximam porian” bori khobor porgottunk adnea dili. (D.I. 1:6-8) Hem ek khub vhoddlem kam zaun aslem. Tor Jezu vixim govai diunk apleachean zata tem soglem korun, tache xis aplo vell ekdom bore toren uzar korunk pavle.

13. Ami amcho vell ekdom bore toren kiteak uzar korunk zai? (Koloskarank 4:5)

¹³ Koloskarank 4:5 vachat. Amcher dhean diunk, ami amcho vell koso uzar kortat tem ami bariksannen chintunk zai. Karonn ‘vell ani sondhi sogleank asa vo chintunk nant tosleo ghoddnneo konnakui ghoddonk xoktat.’ (Up. 9:11) Hoi, moronn kednam-i ieunk xokta.

14-15. Amcho vell ami ekdom bore toren koso uzar korunk zata? (Hebrevank 6:11, 12) (Chitr pasun polloiat.)

¹⁴ Amcho vell ekdom bore toren uzar korunk, ami Jehovachi khuxi korunk zai ani tachea sangata amchi ixttagot ghott korunk zai. (Ju. 14:21) Toxench, ‘ami thir-ghott ravonk zai ani odik-odik urben Somiachi seva korit ravonk zai.’ (1 Kor. 15:58) Oxem kelear, xevott ieta tednam, to mhunnttlear amchea jivitacho xevott vo Soitanachea sonvsaracho xevott zaum, Jehova pasot ami anik vavr korunk zai aslo mhunn chintun, ami kednanch niraxi zaunchimnant.—Mt. 24:13; Rom. 14:8.

¹⁵ Sonvsarbhor Devachea Rajea vixim porgottunk, aiz pasun Jezu aplea xisank margdorxon di-it asa. Apnnem dilʼli bhas tannem purnn kelea. Mittingo ani prokaxonam udexim, ami porgottnnechem kam koxem korunk zai tem to amkam xikoita. Toxench, hea kama pasot goroz asa tem soglem to amkam dita. (Mt. 28:18-20) Tor porgottchea ani xikoupache kama pasot khub vavr korun, toxench Soitanachea sonvsaracho Jehova nas korta tea meren zagrut ravon, ami Jezuk zai toxench korunk pavtolim. Tea bhair Hebrevank 6:11, 12-nt dilʼlo solʼlo apnnaun ‘sompaddni pavo-sor vo xevott ieum porian’ ami amcho bhorvonso ghott samballunk pavtolim.—Vachat.

16. Tumi kitem korunk nichov kela?

¹⁶ Apunn Soitanachea sonvsaracho kednam nas kortolo, to dis Jehovan tharaila. Ani to dis ietolo tednam aplea Utrant dilʼleo sogleo bhasaunneo Jehova Dev ghoddoun haddttolo. Thodde pavtti, Jehovacho dis ieunk khub vell lagta oxem amkam disonk puro. Punn ‘chodd lambai korinastana Jehovacho dis ietoloch!’ (Hab. 2:3) Tor ‘Jehovacher amche dolle lavun, to amchi soddvonn kortolo mhunn tacheruch visvas dovrunk’ ami nichov korum-ia.—Mik. 7:7.